Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnwe Opli Gbẹzan po Lizọnyizọn po Tọn  |  Juin 2017

 GBẸZAN KLISTIANI TỌN

Nọ Mọ Ayajẹ to Wẹndagbe lọ Lilá Mẹ

Nọ Mọ Ayajẹ to Wẹndagbe lọ Lilá Mẹ

Be e ko vẹawuna we pọ́n nado dọyẹwheho ya? Susu to mí mẹ wẹ na dọ mọwẹ na kanbiọ enẹ. Etẹwutu? Vlavo mí nọ saba pehẹ ojlo matindo kavi kanyinylan to aigba-denamẹ mítọn ji kavi mí ma nọ voawu nado dọhona mẹhe mí ma jẹakọ hẹ lẹ. Na nugbo tọn, onú ehelẹ sọgan de ayajẹ mítọn pò. Ṣigba, Jiwheyẹwhe he sẹ̀n mí te yin ayajẹnọ, podọ ojlo etọn wẹ yindọ mí ni sẹ̀n ẹn po ayajẹ po. (Slm 100:2; 1Ti 1:11) Whẹwhinwhẹ́n dagbe atọ̀n tẹlẹ wẹ mí tindo nado nọ mọ ayajẹ to yẹwhehodidọ mẹ?

Tintan, owẹ̀n todido tọn de lá wẹ mí te. Dile etlẹ yindọ gbẹtọ lẹ masọ nọ tindo todido sọmọ to egbehe ba, míwlẹ sọgan yí “wẹndagbe nudagbe tọn” do fakọna yé. (Isa 52:7) Ṣigba, wẹndagbe gando Ahọluduta Jiwheyẹwhe tọn go sọgan sọ hẹn ayajẹ wá na mílọsu. Whẹpo a nado nọ tọ́nyi dọyẹwheho, nọ lẹnnupọndo dona he Ahọluduta Jiwheyẹwhe tọn na hẹnwa aigba ji lẹ ji.

Awetọ, wẹndagbe he lá mí te nọ hẹn ale wá na gbẹtọ lẹ to agbasa-liho podọ to gbigbọ-liho. Yé nọ plọn nado jo walọyizan ylankan lẹ do bo nọ tindo todido ogbẹ̀ madopodo tọn. (Isa 48:17, 18; Lo 1:16) Mí ni nọ mọ míde di mẹhe to mahẹ tindo to azọ́n gbẹtọ lẹ dindin nado whlẹn yé tọn de mẹ. Dile etlẹ yindọ mẹdelẹ ma nọ jlo nado yin whinwhlẹngán, mí nọ zindonukọn nado to mẹhe jlo lẹ dín.—Mt 10:11-14.

Atọ̀ntọ, podọ dehe yin nujọnu hugan lọ wẹ yindọ yẹwhehodidọ mítọn nọ gbògbéna Jehovah. Azọ́n yẹwhehodidọ tọn mítọn nọ họakuẹ to nukun etọn mẹ taun. (Isa 43:10; Heb 6:10) Humọ, e nọ na gbigbọ wiwe etọn mí sọn ojlo mẹ wá, na mí nido wà azọ́n ehe dotana. Enẹwutu, nọ vẹ̀ Jehovah dọ ni na we ayajẹ, he yin adà sinsẹ́n gbigbọ wiwe tọn de. (Ga 5:22) Po alọgọ etọn po, mí sọgan duto magbọjẹ mítọn lẹ ji bo yí adọgbigbo do dọyẹwheho. (Ow 4:31) Gbọnmọ dali, mahopọnna lehe gbẹtọ lẹ na yinuwa hẹ mí do to aigba-denamẹ mítọn ji, mí na nọ mọ ayajẹ to azọ́ndenamẹ mítọn nado dọyẹwheho mẹ.—Eze 3:3.

Pọndohlan tẹwẹ a dona nọ tindo to lizọnyizọn lọ mẹ? Nawẹ a sọgan nọ do ayajẹ hia gbọn?

PỌ́N VIDEO LỌ GỌ̀ AYAJẸ TOWE MỌYI GBỌN NUPINPLỌN PO AYIHAMẸLINLẸNPỌN PO DALI, ENẸGODO, NA GBLỌNDO NA KANBIỌ HE BỌDEGO LẸ:

  • Naegbọn mí dona nọ ze aṣa nupinplọn tọn gbigbọmẹ tọn mítọn do otẹn tintan mẹ, eyin mí tlẹ nọ yí whenu susu zan nado dọyẹwheho to sunmẹsunmẹ?

  • Aliho tẹ mẹ wẹ mí sọgan hodo apajlẹ Malia tọn te?

  • Whetẹnu wẹ a nọ de whenu dovo nado lẹnayihamẹpọn do Ohó Jiwheyẹwhe tọn ji?

  • Etẹwẹ nọ na we ayajẹ eyin a to wẹndagbe lọ lá?