Hosọ Lẹ

 

Hukan

Hodidọ Bẹjẹeji Tọn

 2

Nuhọakuẹ lẹ sọn Ohó Jiwheyẹwhe Tọn Mẹ

 3

Awuwiwlena Lizọnyizọn Kunnudegbe Tọn

 4

Gbẹzan Klistiani Tọn

 5

Tadonahó

 6

Jo Dewe Na Wehihia po Mẹpinplọn Po

 7

Ayinamẹ

 8

Gànmẹ

 9

Dlapọn Nugopọntọ Lẹdo Tọn

 10

Osẹ Plidopọ Lẹdo Kavi Daho Tọn

 11

Osẹ Oflin Tọn

 12

Nugopọntọ Opli Gbẹzan po Lizọnyizọn po Tọn

 13

Azinponọ Opli Gbẹzan po Lizọnyizọn po Tọn

 14

Anadenanutọ to Pipli Mẹho lẹ Tọn Mẹ

 15

Ayinamẹtọ Alọgọtọ

 16

Klasi Devo Lẹ

 17

Video Lẹ

 18

1. Opli Gbẹzan po Lizọnyizọn Mítọn po tọn na nọ yin anadena dile e yin didohia do to Gbẹzan po Lizọnyizọn Mítọn poNuplọnwe Opli Tọn mẹ podọ sọgbe hẹ anademẹ he bọdego ehelẹ. Wẹnlatọ lẹpo dona yin tulina nado wleawufo nado nọ ze azọ́ndenamẹ wehọmẹvi tọn lẹ donukọnnamẹ. Mẹdevo lẹ he to gbẹdo hẹ agun lọ po zohunhun po sọ sọgan ze yinkọ dai di wehọmẹvi eyin yé kọngbedopọ hẹ nuplọnmẹ Biblu tọn lẹ bọ gbẹzan yetọn sọgbe hẹ nunọwhinnusẹ́n Klistiani tọn lẹ.—be w. 282.

 2. Hodidọ Bẹjẹeji Tọn: Nukunwhiwhe 3 kavi whè humọ. To osẹ dopodopo mẹ, to ohàn po odẹ̀ bẹjẹeji tọn po godo, azinponọ Opli Gbẹzan po Lizọnyizọn po tọn na nọ fọnjlodotena mẹplidopọ lẹ gando tito-to-whinnu lọ go, bo na nọ donù kanbiọ he to Wema Gblọndo Tọn Na Opli Gbẹzan po Lizọnyizọn po Tọn mẹ lọ go.

 3. Nuhọakuẹ lẹ sọn Ohó Jiwheyẹwhe Tọn Mẹ:

  • Hodidọ: Nukunwhiwhe 10. Hosọ lọ po bladopọ nuagokun tangan awe kavi atọ̀n po tọn yin awuwlena do Nuplọnwe Opli Gbẹzan po Lizọnyizọn po Tọn lọ mẹ. Hodidọ ehe dona yin didena mẹho kavi devizọnwatọ lizọnyizọnwiwa tọn he pegan de. Eyin owe Biblu tọn yọyọ de wẹ na yin dogbapọnna to osẹ de mẹ, video homẹbibiọ tọn etọn na nọ yin hihò. Hodọtọ lọ sọgan do kanṣiṣa he tin to video lọ po hosọ lọ po ṣẹnṣẹn hia. Etomọṣo, e dona dọhodo nuagokun he to nuplọnwe lọ mẹ lẹ ji. Humọ, eyin whenu tin, e dona yí yẹdide po nuagokun sinai do Biblu ji he zọnpọ hẹ hosọ lọ lẹ po zan, na yé yin awuwlena nado yidogọna nuhe na yin dogbapọnna lẹ.

  •   Onú Sisosiso Gbigbọmẹ Tọn Lẹ: Nukunwhiwhe 8. Adà kanbiọ po gblọndo po tọn de wẹ, ehe ma biọ homẹbibiọ kavi tadonahó de. E na yin nukunpedego gbọn mẹho kavi devizọnwatọ lizọnyizọnwiwa tọn he pegan de dali. Hodọtọ lọ sọgan de ojlẹ nẹmu he e na zan to nuagokun ẹnẹ lọ lẹ dopodopo ji sọgbe hẹ lehe yé yọ́n-na-yizan na agun lọ do. Ṣigba, e dona kàn kanbiọ lọ lẹpo sè mẹplidopọ lẹ. Humọ, ewọ sọgan de eyin e biọ dọ wefọ he yin dide to kanbiọ awe tintan lọ lẹpo mẹ wẹ na yin hihia kavi lala. Gblọndo mẹplidopọ lẹ tọn ma dona zẹ̀ nukunwhiwhe daa go.

  • Biblu Hihia: Nukunwhiwhe 4 kavi whè humọ. Azọ́ndenamẹ ehe na yin nukunpedego gbọn mẹmẹsunnu de dali. Wehọmẹvi lọ dona hia fie yin didena ẹn lọ matin homẹbibiọ kavi tadonahó. Azinponọ opli lọ tọn dona tindo ojlo nado gọalọna wehọmẹvi lọ lẹ nado hiawe to jọwamọ-liho gọna nukunnumọjẹnumẹ, dẹ́didi, nùzindo linlẹn he sọgbe ji, ogbè didiọ, po otán mìmì he sọgbe po.

  4. Awuwiwlena Lizọnyizọn Kunnudegbe Tọn: Nukunwhiwhe 15 kavi whè humọ. Adà opli lọ tọn ehe yin awuwlena nado na dotẹnmẹ mẹlẹpo nado plọnazọ́n na lizọnyizọn lọ podọ nado hẹn nugopipe yẹwhehodidọ po mẹpinplọn tọn yetọn po pọnte dogọ. Wehọmẹvi lẹ dona ze azọ́ndenamẹ dlapọn tintan po gọyìpọn po tọn sinai do hodọdopọ hẹ whétọ lẹ ji, ehe tin to weda 1 Nuplọnwe Opli Gbẹzan po Lizọnyizọn po Tọn ji. Wẹnlatọ lẹ sọgan de eyin yé na yí owe kavi video he tin to Azọ́nwanu Mẹpinplọn tọn mítọn mẹ lẹ zan kavi lala. Nuplọnwe Opli Gbẹzan po Lizọnyizọn po Tọn nọ dọ lehe azọ́ndenamẹ wehọmẹvi tọn dopodopo dona dẹnsọ, bọ to whedelẹnu, e sọgan bẹ anademẹ devo lẹ hẹn. Wehọmẹvi lẹ ma dona nọ yí nudọnamẹ devo lẹ dogọ, vlavo na yé mọdọ whenu emitọn pò poun wutu. Nuzedonukọnnamẹ he yin awuwlena ganji lẹ sọgan pò nukunwhiwhe dopo kavi humọ dai. Eyin e biọ domọ, azọ́ndenamẹ ehe sọgan yin didena mẹho agun tọn lẹ.

  • Video Nuzedonukọnnamẹ Tọn Lẹ: Video he sinai do hodọdopọ hẹ whétọ lẹ ji lẹ na nọ yin didohia bo yin hodọdeji to sẹmẹsẹmẹ to osun dopodopo mẹ. E sọgan yin video dlapọn tintan, gọyìpọn tintan po gọyìpọn awetọ po tọn. Adà ehe na yin nukunpedego gbọn azinponọ Opli Gbẹzan po Lizọnyizọn po Tọn dali.

  • Dlapọn Tintan: Adà ehe sọgan yin didena mẹmẹsunnu kavi mẹmẹyọnnu de. Alọgọtọ etọn dona yin mẹhe tindo vijinu dopolọ kavi hagbẹ whẹndo tọn etọn de. Wehọmẹvi lọ po alọgọtọ etọn po sọgan sinai kavi gbọṣi ote. Wehọmẹvi lọ dona de nudọdomẹ he sọgbe hẹ aṣa lẹdo lọ tọn. Hodọdopọ hẹ whétọ lẹ ji wẹ azọ́ndenamẹ yetọn dona sinai do.

  • Gọyìpọn Tintan: Adà ehe sọgan yin didena mẹmẹsunnu kavi mẹmẹyọnnu de. Alọgọtọ etọn dona yin mẹhe tindo vijinu dopolọ. (km 5/97 w. 2) Wehọmẹvi lọ po alọgọtọ etọn po sọgan sinai kavi gbọṣi ote. Wehọmẹvi lọ dona basi wadohia nuhe yè sọgan dọ tọn to whenue yè lẹkọyi mẹhe do ojlo hia to dlapọn tintan whenu de dè. Hodọdopọ hẹ whétọ lẹ he tin to Nuplọnwe Opli Gbẹzan po Lizọnyizọn po Tọn mẹ ji wẹ azọ́ndenamẹ yetọn dona sinai do.

  • Gọyìpọn Awetọ: Adà ehe sọgan yin didena mẹmẹsunnu kavi mẹmẹyọnnu de. Alọgọtọ etọn dona yin mẹhe tindo vijinu dopolọ. (km 5/97 w. 2) Wehọmẹvi lọ po alọgọtọ etọn po sọgan sinai kavi gbọṣi ote. Wehọmẹvi lọ dona basi wadohia nuhe yè sọgan dọ tọn to whenue yè lẹkọyi mẹhe do ojlo hia to gọyìpọn tintan whenu de dè. Hodọdopọ hẹ whétọ lẹ ji wẹ azọ́ndenamẹ yetọn dona sinai do.

  • Plọnmẹ Biblu: Adà ehe sọgan yin didena mẹmẹsunnu kavi mẹmẹyọnnu de. Alọgọtọ etọn dona yin mẹhe tindo vijinu dopolọ. (km 5/97 w. 2) Wehọmẹvi lọ po alọgọtọ etọn po sọgan sinai kavi gbọṣi ote. Wadohia ehe dona do adà plọnmẹ Biblu he ko to yìyì de  tọn hia. Homẹbibiọ kavi tadonahó de bibasi ma yin dandan, adavo e yindọ nupọnnamẹ he ji wehọmẹvi lọ to azọ́nwa do niyẹn. E ma yin dandan dọ adà he yè biọ dọ ni gbadopọnna lọ pete ni yin hihia tọ́n gba, dile etlẹ yindọ mẹde sọgan wàmọ eyin e jlo e. E dona na ayidonugo aliho mẹpinplọn tọn dagbe lẹ.

  • Hodidọ: Azọ́ndenamẹ ehe na yin nukunpedego gbọn mẹmẹsunnu de dali bo yin zizedonukọnnamẹ taidi hodidọ de na agun lọ.

  5. Gbẹzan Klistiani Tọn: To ohàn bẹjẹeji tọn lọ godo, nukunwhiwhe 15 he bọdego na nọ bẹ adà dopo kavi awe he yin awuwlena nado gọalọna mẹplidopọ lẹ nado yí Ohó Jiwheyẹwhe tọn do yizan mẹ hẹn. Adavo e yin didohia to alọpa devo mẹ, adà ehelẹ sọgan yin didena mẹho kavi devizọnwatọ lizọnyizọnwiwa tọn he pegan lẹ, gbọnvona nuhudo agun tọn lẹ he nọ yin nukunpedego gbọn mẹho de dali.

  • Biblu Pinplọn Agun Tọn: Nukunwhiwhe 30. Adà ehe na nọ yin didena mẹho he pegan de. (To fie mẹho ma sù te lẹ, devizọnwatọ lizọnyizọnwiwa tọn he pegan lẹ sọgan yin yiyizan, eyin e biọ domọ.) Pipli mẹho lẹ tọn wẹ dona de mẹhe pegan nado deanana Biblu Pinplọn Agun Tọn. Mẹhe yin dide lẹ dona nọ deanana adà ehe to aliho dagbe mẹ, nado sọgan nọ nọ̀ gànmẹ ji, nọ zinnudo wefọ tangan lẹ ji, bosọ gọalọna mẹlẹpo nado mọ nujọnu-yinyin nudọnamẹ he oplọn lọ bẹhẹn lẹ tọn. Yé nasọ mọ ayinamẹ yọ́n-na-yizan lẹ yí gbọn dogbigbapọnna anademẹ he gando anadidena Oplọn Atọ̀họ̀-Nuhihọ́ lọ Tọn go lẹ dali. To fie e yọnbasi te lẹ, anademẹtọ adà ehe tọn po wehiatọ voovo lẹ po dona nọ yin yiyizan to sẹmẹsẹmẹ. Eyin azinponọ Opli Gbẹzan po Lizọnyizọn po tọn biọ to anademẹtọ lọ si nado de whenu he na yin yiyizan na adà lọ pò, anademẹtọ lọ lọsu wẹ na de fie e na nọ glido te lẹ. E sọgan de ma nado biọ hihia hukan delẹ tọn.

  6. Tadonahó: Nukunwhiwhe 3 kavi whè humọ. Azinponọ Opli Gbẹzan po Lizọnyizọn po tọn na basi bladopọ nuagokun yọ́n-na-yizan opli lọ tọn lẹ, gọna kanbiọ po gblọndo po he tin to Wema Gblọndo Tọn Na Opli Gbẹzan po Lizọnyizọn po Tọn lọ mẹ. E sọ dona donù nuhe na yin dogbapọnna to osẹ he na bọdego mẹ go, vlavo gbọn alọdindlẹndo kanbiọ he yè na na gblọndo etọn de dali. E sọgan lá yinkọ wehọmẹvi he na wazọ́n to osẹ he na bọdego mẹ lẹ tọn, eyin whenu tin. Adavo e yin didohia to alọpa devo mẹ, nulila kavi wekanhlanmẹ he yin dandan tọn depope sọgan yin hihia na agun lọ gbọn azinponọ lọ dali to tadonahó etọn whenu. Nudọnamẹ he nọ yin nùdego whẹwhẹ lẹ, taidi tito kunnudegbe tọn po aimẹ jijlado tọn po, ma dona yin lilá sọn oplò ji, kakatimọ yé dona yin titẹdo owhlẹ nudọnamẹ tọn ji. Eyin nulila kavi wekanhlanmẹ delẹ ma sọgan yin hihia to gànmẹ he yin didena tadonahó azinponọ lọ tọn gblamẹ, e dona biọ to mẹmẹsunnu he na wazọ́n to adà Gbẹzan Klistiani tọn mẹ lẹ si nado jo nukunwhiwhe kleun delẹ do eyin e biọ domọ. (Pọ́n  hukan 5 po  9 po.) Ohàn po odẹ̀ po wẹ na dotana opli lọ.

 7. Jo Dewe Na Wehihia po Mẹpinplọn Po: Bẹsọn osẹ 7 janvier 2019 tọn, alọnuwe lọ Mẹpinplọn wẹ azinponọ Opli Gbẹzan po Lizọnyizọn po tọn na nọ yizan nado nọ pà wehọmẹvi lẹ bo na yé ayinamẹ. Wehọmẹvi dopodopo dona nọ wazọ́n do nupọnnamẹ he tin to glọ̀ndo mẹ to azọ́ndenamẹ etọn nukọn to Nuplọnwe Opli Gbẹzan po Lizọnyizọn po Tọn mẹ ji. To osẹ tintan osun dopodopo tọn mẹ, azinponọ Opli Gbẹzan po Lizọnyizọn po tọn na nọ gbadopọnna nupọnnamẹ dopo hẹ mẹplidopọ lẹ sọn alọnuwe Mẹpinplọn mẹ. Adà lọ “Kàn Nukọnyiyi Towe” he to alọnuwe lọ mẹ yin awuwlena na wehọmẹvi lọ nado kannu do e mẹ bọ azinponọ ma dona kàn nudepope do finẹ.

  8. Ayinamẹ: To azọ́ndenamẹ wehọmẹvi lẹ tọn dopodopo godo, azinponọ Opli Gbẹzan po Lizọnyizọn po tọn lọ tindo nukunwhiwhe dopo nado nọ na pipà po ayinamẹ po sinai do alọnuwe  Mẹpinplọn ji. To whenue azinponọ to oylọ-basina wehọmẹvi de, ewọ ma na dọ nupọnnamẹ he ji e na wazọ́n do gba. Ṣigba to whenue wehọmẹvi lọ ko wazọ́n fó bọ azinponọ lọ ko dọ adà azọ́n lọ tọn delẹ he jẹna pipà godo, ewọ na dọ jẹhẹnu hodidọ tọn he ji wehọmẹvi lọ wazọ́n do po nuhewutu wehọmẹvi lọ do yí nupọnnamẹ enẹ zan ganji po, kavi yí homẹdagbe do dọ nuhewutu e do jẹ dọ wehọmẹvi lọ ni na ayidonugo jẹhẹnu hodidọ tọn enẹ dogọ. Azinponọ lọ sọ sọgan dọhodo adà wadohia lọ tọn devo lẹ ji eyin e mọdọ wehọmẹvi lọ kavi mẹplidopọ lẹ na mọaleyi sọn e mẹ. Ayinamẹ mẹjlọdote tọn devo sinai do alọnuwe Mẹpinplọn kavi owe Mọaleyi ji sọgan yin nina to nuglọ to opli godo kavi to ojlẹ devo mẹ gando nupọnnamẹ he yin didena wehọmẹvi lọ kavi nupọnnamẹ devo go.—Na anademẹ dogọ gando azọngban nugopọntọ Opli Gbẹzan po Lizọnyizọn po tọn gọna ayinamẹtọ alọgọtọ tọn tọn go, pọ́n  hukan 13 po  16 po.

    9. Gànmẹ: Adà depope kavi ayinamẹ azinponọ Opli Gbẹzan po Lizọnyizọn po tọn ma dona zẹ̀ gànmẹ go. Eyin wehọmẹvi de dù gànmẹ, e dona yin alọdotena po wuntuntun po. Eyin adà opli lọ tọn devo lẹ dù gànmẹ, ayinamẹtọ alọgọtọ na na ayinamẹ nuglọ tọn mẹlọ lẹ. Opli lọ blebu gọna ohàn po odẹ̀ po ma dona zẹ̀ gànhiho dopo e lán nukunwhiwhe 45 go.

 10. Dlapọn Nugopọntọ Lẹdo Tọn: Whenue agun de tindo dlapọn nugopọntọ lẹdo tọn, tito-to-whinnu Nuplọnwe Opli Gbẹzan po Lizọnyizọn po Tọn na nọ yin hihodo po vogbingbọn kleun ehe po: Hodidọ sinsẹ̀nzọn tọn nukunwhiwhe 30 tọn he nugopọntọ lẹdo tọn nọ na wẹ na diọtẹnna Biblu Pinplọn Agun tọn to adà lọ Gbẹzan Klistiani tọn glọ. Jẹnukọnna hodidọ sinsẹ̀nzọn tọn lọ, azinponọ Opli Gbẹzan po Lizọnyizọn po tọn na basi bladopọ osẹ lọ tọn bo dọ nuagokun osẹ he ja tọn delẹ bosọ basi nulila he yin dandan tọn lẹ bọ to enẹgodo e na basi oylọna nugopọntọ lẹdo tọn. To hodidọ sinsẹ̀nzọn tọn lọ godo, nugopọntọ lẹdo tọn na yí ohàn he jlo e do dotana opli lọ. To dlapọn nugopọntọ tọn whenu, klasi devo depope ma na nọ yin bibasi to ogbè he agun lọ nọ zan mẹ. Kándo he nọ do jonọgbè lẹ sọgan nọ basi opli yetọn lẹ, etlẹ yin to whenue nugopọntọ lẹdo tọn wá dla agun he glọ yé te pọ́n. Ṣigba, kándo lọ lẹ dona nọ wá kọnawudopọ hẹ agun he glọ yé te lẹ to hodidọ sinsẹ̀nzọn tọn nugopọntọ lẹdo tọn whenu.

 11. Osẹ Plidopọ Lẹdo Kavi Daho Tọn: To osẹ plidopọ lẹdo kavi daho tọn mẹ, opli agun tọn depope ma na yin bibasi. Mẹdopodopo kavi whẹndo dopodopo dona gbadopọnna tito-to-whinnu opli tọn na osẹ enẹlẹ.

 12. Osẹ Oflin Tọn: Eyin Oflin jẹ do azán depope ji to osẹ gblamẹ, Opli Gbẹzan po Lizọnyizọn po tọn de ma na tin. Amọ́, opli sinsẹ̀nzọn kunnudegbe tọn lẹ dona tin to azán Oflin tọn ji.

  13. Nugopọntọ Opli Gbẹzan po Lizọnyizọn po Tọn: Mẹho he yin dide gbọn pipli mẹho lẹ tọn dali de wẹ na yin nugopọntọ Opli Gbẹzan po Lizọnyizọn po tọn. E na nọ hẹn ẹn diun dọ opli ehe yin tito-basina bo yin bibasi sọgbe hẹ anademẹ ehelẹ. E dona nọ tindo hodọdopọ dagbe hẹ ayinamẹtọ alọgọtọ. Tlolo he nugopọntọ Opli Gbẹzan po Lizọnyizọn po tọn mọ Nuplọnwe Opli Gbẹzan po Lizọnyizọn po Tọn osun de tọn yí, e na nọ deazọ́nna wehọmẹvi lẹ na osun enẹ. (Pọ́n  hukan 4.) Azọ́ndenamẹ wehọmẹvi dopodopo tọn dona yin mimá na yé e whè gbau osẹ atọ̀n jẹnukọn gbọn Azọ́ndenamẹwe Opli Gbẹzan po Lizọnyizọn Mítọn po Tọn (S-89) yiyizan dali.

 14. Azinponọ Opli Gbẹzan po Lizọnyizọn po Tọn: To osẹ dopodopo mẹ, mẹho dopo na nọ yin azinponọ na Opli Gbẹzan po Lizọnyizọn po tọn. (To agun he mẹ mẹho ma sù te lẹ mẹ, devizọnwatọ lizọnyizọnwiwa tọn he pegan lẹ sọgan yin yiyizan, eyin e biọ domọ.) Ewọ wẹ na wleawuna homẹbibiọ po tadonahó po bo na penukundo adà hodọdopọ do video nuzedonukọnnamẹ lẹ tọn ji go gọna video he dọhodo nupọnnamẹ yọyọ de ji sọn alọnuwe Mẹpinplọn mẹ. Ewọ wẹ  nasọ basi oylọna mẹhe na ze adà voovo lẹ donukọnnamẹ, podọ eyin mẹho ma sù to agun lọ mẹ, ewọ sọgan sọ ze adà opli lọ tọn devo donukọnnamẹ. Hodidọ etọn to vivọnu adà dopodopo tọn dona nọ nọ̀ glido. Pipli mẹho lẹ tọn wẹ na de mẹho he pegan nado hẹn azọngban ehe di lẹ. Mẹho he pegan lọ lẹ na nọ yin dide sọn ojlẹ de mẹ jẹ devo mẹ nado penukundo azọngban ehe go. Sọgbe hẹ ninọmẹ agun lọ tọn lẹ, nugopọntọ Opli Gbẹzan po Lizọnyizọn po tọn sọgan nọ yin azinponọ whẹwhẹ hugan mẹho he pegan diẹ lẹ. Eyin mẹho de pegan nado deanana Biblu Pinplọn Agun tọn, e dohia dọ ewọ sọgan pegan nado yin azinponọ opli lọ tọn ga. Ṣigba, mì jaale bo hẹn do ayiha mẹ dọ e na nọ yin bibiọ to mẹho he nọ yin dide taidi azinponọ lẹ si nado nọ pà wehọmẹvi lẹ bosọ na yé ayinamẹ po owanyi po. Azinponọ lọ sọ dona hẹn ẹn diun dọ opli lọ fó do gànmẹ. (Pọ́n  hukan 6 po  9 po.) Eyin azinponọ lọ jlo, e sọgan nọ ṣite to miklo ote tọn de kọ̀n to oplò lọ ji eyin tẹnmẹ tin, nado basi oylọna mẹhe na ze adà lọ donukọnnamẹ dile yè to miklo jlado na mẹlọ lọsu to oplò ji to miklo hodọtọ tọn kọ̀n. Mọdopolọ, azinponọ lọ sọgan jlo nado sinai to tafo de kọ̀n to azọ́ndenamẹ Biblu hihia tọn whenu podọ to adà lọ Awuwiwlena Lizọnyizọn Kunnudegbe tọn whenu. Ehe sọgan de whenu pò.

 15. Anadenanutọ to Pipli Mẹho lẹ Tọn Mẹ: Anadenanutọ to pipli mẹho lẹ tọn mẹ wẹ na nọ deazọ́nna mẹhe na penukundo adà opli lọ tọn voovo lẹ go gbọnvona azọ́ndenamẹ wehọmẹvi lẹ tọn. Ehe bẹ azọ́n didena azinponọ opli lọ tọn sọn mẹhe yin dide gbọn pipli mẹho lẹ tọn dali lẹ mẹ hẹn. To pọmẹ hẹ nugopọntọ Opli Gbẹzan po Lizọnyizọn po tọn lọ, anadenanutọ to pipli mẹho lẹ tọn mẹ dona hẹn ẹn diun dọ vọkan tito-to-whinnu opli lọ blebu tọn yin titẹdo owhlẹ nudọnamẹ tọn ji.

  16. Ayinamẹtọ Alọgọtọ: Eyin e yọnbasi, e na yọ́n nado yí mẹho agun tọn he yin hodọtọ numimọnọ de zan na lẹblanulọkẹyi enẹ. Eyin nuhudo etọn tin, ayinamẹtọ alọgọtọ dona na ayinamẹ nuglọ tọn mẹho agun tọn kavi devizọnwatọ lizọnyizọnwiwa tọn de gando azọ́n he e wà to oplò ji go, ehe bẹ adà Opli Gbẹzan po Lizọnyizọn po tọn lẹ, hodidọ na mẹlẹpo, anadidena Oplọn Atọ̀họ̀-Nuhihọ́ lọ Tọn kavi Biblu Pinplọn Agun tọn po wehihia po hẹn. (Pọ́n  hukan 9.) Eyin mẹho he yin hodọtọ po mẹplọntọ dagbe lẹ po sù to agun lọ mẹ, mẹho he pegan lẹ sọgan nọ diọ yede to whemẹwhemẹ nado penukundo azọngban ehe go. E ma yin dandan dọ ayinamẹtọ alọgọtọ lọ ni nọ na ayinamẹ to nuzedonukọnnamẹ lẹpo godo gba.

 17. Klasi Devo Lẹ: Eyin sọha wehọmẹvi lẹ tọn sù, agun lẹ sọgan wleawuna klasi devo lẹ na azọ́ndenamẹ wehọmẹvi lẹ tọn. Klasi dopodopo dona tindo ayinamẹtọ he pegan de, titengbe mẹho agun tọn. To fie nuhudo tin te lẹ, devizọnwatọ lizọnyizọnwiwa tọn he pegan de sọgan hẹn azọngban ehe di. Pipli mẹho lẹ tọn wẹ na de mẹhe na hẹn azọngban lọ di bosọ de eyin mẹmẹsunnu voovo lẹ wẹ na nọ diọ yede. Ayinamẹtọ lọ dona hodo anademẹ he to  hukan 8tọ mẹ. Eyin klasi devo lẹ tin, e na nọ yin bibiọ to wehọmẹvi lọ lẹ si nado yì klasi yetọn lẹ to adà lọ Onú Sisosiso Gbigbọmẹ Tọn lẹ he to hosọ lọ Nuhọakuẹ lẹ sọn Ohó Jiwheyẹwhe Tọn mẹ glọ godo. Eyin adà opli lọ tọn Awuwiwlena Lizọnyizọn Kunnudegbe tọn fó, yé dona lẹkọwa. To whenue video nuzedonukọnnamẹ tọn lẹ na to yinyin hodọdeji, mẹhe to awukọndopọ hẹ klasi devo lẹ na pọ́n video lọ kavi dotoaina hodọdopọ lọ sọn klasi lọ eyin e yọnbasi. Eyin e ma yinmọ ayinamẹtọ lọ na do video lọ hia sọn alokan kavi tablẹti de ji bo deanana hodọdopọ lọ.

 18. Video Lẹ: Video delẹ na nọ yin pinpọn to opli ehe whenu. Video he na yin pinpọn to opli osẹ ṣẹnṣẹn tọn whenu lẹ na nọ tin-to-aimẹ to JW Library ji, bo sọgan yin hihò to nuyizan voovo lẹ ji. To whedelẹnu, video nuzedonukọnnamẹ tọn lẹ sọgan nọ yin hihò to dope kunnudegbe tọn lẹ whenu to whenue yé ko yin didohia to Opli Gbẹzan po Lizọnyizọn po tọn ji godo.