Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Hodidọ Jẹnukọn

Biblu wiwe lọ yin ohó Jiwheyẹwhe tọn he yin kinkandai na mímẹpo. Mí dona nọ plọn ẹn nado yọ́n Dowatọ etọn ganji. (Johanu 17:3; 2 Timoti 3:16) To Biblu mẹ, Jehovah Jiwheyẹwhe do lẹndai etọn na gbẹtọvi lẹ podọ na aigba he ji yé tin te hia.—Jenẹsisi 3:15; Osọhia 21:3, 4.

Owe devo depope ma ko yinuwado gbẹzan gbẹtọ lẹ tọn ji sọmọ pọ́n. Biblu nọ whàn mí nado do jẹhẹnu Jehovah tọn lẹ hia taidi owanyi, lẹblanu po awuvẹmẹ po. E nọ namẹ todido bo nọ gọalọnamẹ nado doakọnna yajiji he tlẹ sinyẹn hugan lẹ. Podọ e nọ to nudepope he to aihọn ehe mẹ bo ma tin to kọndopọ mẹ hẹ ojlo pipé Jiwheyẹwhe tọn degba.—Salmu lẹ 119:105; Heblu lẹ 4:12; 1 Johanu 2:15-17.

Heblugbe, Alamaikigbe po Glẹkigbe po mẹ wẹ Biblu yin kinkan do to dowhenu, ṣigba blebu etọn kavi apadewhe etọn ko yin lilẹdo nudi ogbè 2 600 mẹ. Kakajẹ din, owe devo depope ma ko yin lilẹdogbedevomẹ bo yin mimá pé sọ ẹ to whenuho mẹ. Ehe ma yin nupaṣamẹ. Biblu ko dọ dọdai dọ: “Yẹwheho wẹndagbe Ahọluduta lọ tọn ehe [owẹ̀n tangan he Biblu bẹhẹn] na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.”—Matiu 24:14.

Na mí yọ́n nujọnu-yinyin owẹ̀n Biblu tọn wutu, mí yí do basi yanwle nado wleawuna lẹdogbedevomẹ de he sọgbe hẹ kandai dowhenu tọn lẹ bo ka sọ họnwun bo bọawu hihia. Nudọnamẹ Dogọ lọ lẹ he hosọ yetọn yin “Nunọwhinnusẹ́n He Nọ Deanana Lẹdogbedevomẹ Biblu Tọn Lẹ,” “Adà Ayidego Tọn Zinjẹgbonu Ehe Tọn Lẹ,” podọ “Lehe Biblu Wá Jẹ Mí Si Do” dọhodo delẹ to nunọwhinnusẹ́n lẹdogbedevomẹ tọn he mí hodo lẹ mẹ ji, gọna zẹẹmẹ delẹ gando adà ayidego tọn zinjẹgbonu ehe tọn lẹ go.

Mẹhe yiwanna Jehovah Jiwheyẹwhe bo nọ sẹ̀n ẹn lẹ nọ jlo vẹkuvẹku nado tindo lẹdogbedevomẹ Ohó Jiwheyẹwhe tọn he sọgbe bosọ họnwun de. (1 Timoti 2:4) Enẹwutu, mí hẹn zinjẹgbonu ehe tin-to-aimẹ to Gungbe mẹ, na ojlo mítọn wẹ nado hẹn Lẹdogbedevomẹ Aihọn Yọyọ Tọn tin-to-aimẹ to ogbè susu mẹ dile e sọgan yọnbasi do. Wehiatọ vivẹ́, todido mítọn podọ odẹ̀ mítọn wẹ yindọ zinjẹgbonu Owe-Wiwe lẹ tọn ehe ni hẹn ale wá na we, dile a to vivẹnudo nado “dín Jiwheyẹwhe . . . bo mọ ẹn nugbonugbo.”—Owalọ lẹ 17:27.

Wedegbẹ́ Lẹdogbedevomẹ Biblu Aihọn Yọyọ Tọn

août 2015