Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Zekalia 6:1-15

NUHE E BẸHẸN LẸ

  • Numimọ 8: Osọ́-kẹkẹ 4 (1-8)

  • Alà lọ na lẹzun ahọlu podọ yẹwhenọ (9-15)

6  Enẹgodo, n’sọ vọ́ pọ́n aga bo mọ osọ́-kẹkẹ ẹnẹ ja sọn osó awe ṣẹnṣẹn, bọ osó lọ lẹ yin gànvẹẹ tọn.  Osọ́-kẹkẹ tintan tindo osọ́ vẹẹ lẹ bọ osọ́-kẹkẹ awetọ tindo osọ́ yuu lẹ.+  Osọ́-kẹkẹ atọ̀ntọ tindo osọ́ wewe lẹ bọ osọ́-kẹkẹ ẹnẹtọ tindo osọ́ wlanwlan po dehe tindo ohia toun-toun to agbasa go po lẹ.+  N’kanbiọ angẹli he to hodọ hẹ mi dọmọ: “Etẹwẹ ehelẹ nọtena, oklunọ ṣie?”  Angẹli lọ gblọnna mi dọmọ: “Ehelẹ wẹ gbigbọ ẹnẹ+ olọn tọn lẹ he to tintọ́n yì to whenue yé ko sọawuhia to Oklunọ aigba pete tọn lọ nukọn fó godo.+  Dehe* tindo osọ́ yuu lẹ lọ tọ́n jei aigba agewaji tọn ji;+ dehe tindo wewe lẹ tọ́n jei ohù godo; podọ dehe tindo sinmẹ wlanwlan lẹ tọ́n jei aigba hùwaji tọn ji.  Podọ dehe tindo ohia toun-toun to agbasa go lẹ to jejeji nado tọ́nyi dánpe gbọn aigba pete ji.” Enẹgodo, e dọmọ: “Mì yì bo dánpe gbọn aigba pete ji.” Yé sọ jẹ dindanpe ji gbọn aigba pete ji.  Enẹgodo, e dawhá hlan mi dọmọ: “Pọ́n, dehe to tintọ́n yì aigba agewaji tọn ji lẹ ko hẹn gbigbọ Jehovah tọn nado wá aigba agewaji tọn lọ ji.”  Ohó Jehovah tọn sọ vọ́ wá dè e dọmọ: 10  “Bẹ delẹ to nuhe Hẹldai, Tobija po Jedaia po yí sọn mẹhe to kanlinmọgbenu lọ lẹ dè mẹ; podọ to azán enẹ gbè, hiẹ po mẹhe lẹkọwa sọn Babilọni lẹ po dona yì owhé Josia visunnu Zefania tọn gbè. 11  Hiẹ ni yí fataka po sika po bo yí yé do basi jẹgbakun* de bo ze e ṣinyọ́n na Jọṣua,+ visunnu Jehozadaki tọn he yin yẹwhenọ daho. 12  Enẹgodo, dọna ẹn dọ, “‘Nuhe Jehovah awhànpa lẹ tọn dọ die: “Dawe he nọ yin Alà+ lọ die. Ewọ na zẹ̀alà sọn nọtẹn etọn bo na gbá tẹmpli Jehovah tọn.+ 13  Ewọ wẹ na gbá tẹmpli Jehovah tọn podọ ewọ wẹ na mọ gigo yí. E na sinai do ofìn etọn ji bo na dugán bo nasọ yin yẹwhenọ de to ofìn etọn+ ji bọ gbekọndopọ jijọho tọn de na tin to ṣẹnṣẹn na awe lẹ.* 14  Jẹgbakun* lọ nasọ yin oflin* de na Helẹmi, Tobija, Jedaia+ po Hẹni visunnu Zefania tọn po to tẹmpli Jehovah tọn mẹ. 15  Mẹhe tin to fidindẹn lẹ nasọ wá bo na tindo mahẹ to tẹmpli Jehovah tọn gbigbá mẹ.” Mìwlẹ nasọ yọnẹn dọ Jehovah awhànpa lẹ tọn wẹ do mi hlan mì dè. E nasọ mọ hẹndi—eyin mì ma doalọtena tonusisena ogbè Jehovah Jiwheyẹwhe mìtọn tọn.’”

Nudọnamẹ Odò Tọn

Enẹ wẹ, Osọ́-kẹkẹ he.
Kavi “jẹgbakun daho.”
Enẹ wẹ, to ṣẹnṣẹn na azọngban etọn taidi gandutọ po yẹwhenọ po.
Kavi “Jẹgbakun daho.”
Kavi “nuflinmẹ.”