Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Zekalia 4:1-14

NUHE E BẸHẸN LẸ

  • Numimọ 5: Miyọ́ngbán-tin po atin olivie tọn 2 po (1-14)

    • ‘E ma yin gbọn huhlọn dali’ (6)

    • A yí nukunpẹvi do pọ́n azán he gbè onú pẹvi lẹ bẹ blo (10)

4  Angẹli he to hodọ hẹ mi dai lọ lẹkọwa bo fọ́n mi, taidi dọ e to mẹde fọ́n sọn amlọn mẹ nkọ.  E sọ dọna mi dọmọ: “Etẹ mọ a te?” Whenẹnu wẹ n’gblọn dọmọ: “N’mọ podọ pọ́n! miyọ́ngbán-tin he yè yí sika kẹdẹ do basi+ de bọ agbán de tin to e ji. Miyọ́ngbán ṣinawe sọ to e ji,+ mọwẹ, ṣinawe, podọ miyọ́ngbán he to e ji lọ lẹ tindo alà ṣinawe.  Atin olivie tọn awe tin to adà etọn lẹ mẹ,+ yèdọ dopo to adusiwhé bọ awetọ to amiyọnwhé.”  To whenẹnu, n’kanse angẹli he to hodọ hẹ mi lọ dọmọ: “Oklunọ ṣie, etẹwẹ onú ehelẹ zẹẹmẹdo?”  Angẹli he to hodọ hẹ mi lọ sọ kanse dọmọ: “Be a ma yọ́n nuhe onú ehelẹ zẹẹmẹdo wẹ ya?” N’gblọn dọmọ: “Lala, oklunọ ṣie.”  Ewọ sọ dọna mi dọmọ: “Nuhe Jehovah dọna Zelubabẹli die: ‘“E ma yin gbọn awhànpa kavi huhlọn de dali wẹ gba,+ ṣigba gbọn gbigbọ ṣie dali,”+ wẹ Jehovah awhànpa lẹ tọn dọ.  Mẹnu wẹ hiẹ, osó daho E? Hiẹ na lẹzun aigba jijlọ* to Zelubabẹli+ nukọn.+ Ewọ nasọ hẹn zannu aga pete tọn lọ tọ́njẹgbonu to awhágbe lẹ mẹ dọmọ: “Nujiawu nankọ die! Nujiawu nankọ die!”’”  Ohó Jehovah tọn sọ vọ́ wá dè e dọmọ:  “Alọ Zelubabẹli tọn lẹ wẹ do dodonu ohọ̀ ehe tọn ai,+ alọ etọn lẹ wẹ nasọ dotana ẹn.+ Mìwlẹ nasọ yọnẹn dọ Jehovah awhànpa lẹ tọn wẹ do mi hlan mì dè. 10  Na mẹnu wẹ ko yí nukunpẹvi do pọ́n azán he gbè onú pẹvi lẹ bẹjẹeji?+ Na yé na jaya bo na mọ nujlẹkàn* lọ to alọ Zelubabẹli tọn mẹ. Nukun Jehovah tọn wẹ yin nukun ṣinawe ehelẹ, yé sọ to yìyì pé gbọn aigba lọ pete ji.”+ 11  Yẹn sọ kanse e dọmọ: “Etẹwẹ atin olivie tọn awe ehelẹ he tin to adusiwhé po amiyọnwhé miyọ́ngbán-tin lọ tọn po nọtena?”+ 12  N’sọ vọ́ kanse e dọmọ: “Etẹwẹ alà* atin olivie tọn awe lọ lẹ he mẹ amì sika tọn to tintọ́n gbọn lẹ nọtena?” 13  Enẹwutu, e kanse mi dọmọ: “Be a ma yọ́n nuhe onú ehelẹ nọtena wẹ ya?” N’gblọn dọmọ: “Lala, oklunọ ṣie.” 14  Ewọ dọmọ: “Mẹyiamisisadode awe he to ote to apá na Oklunọ aigba pete tọn lẹ wẹ.”+

Nudọnamẹ Odò Tọn

Kavi “dankló de.”
To paa mẹ, “zannu, nujlẹnu.”
Enẹ wẹ, atin-là he go sinsẹ́n sù te.