Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Zekalia 14:1-21

NUHE E BẸHẸN LẸ

  • Sinsẹ̀n nugbo gbawhàn pete (1-21)

    • Osó Olivie tọn na zẹ̀ do awe (4)

    • Jehovah na yin dopo podọ oyín etọn dopo (9)

    • Azọ̀nylankan na agọjẹdomẹtọ Jelusalẹm tọn lẹ (12-15)

    • Hùnwhẹ Gòhọtúntún lẹ tọn (16-19)

    • Nudàzẹ́n lẹpo na yin wiwe na Jehovah (20, 21)

14  “Pọ́n! Azán lọ ja, yèdọ azán Jehovah tọn, whenue ogblànnu towe* lẹ na yin mimá to hiẹ mẹ.  Yẹn na bẹ akọta lẹpo pli sọta Jelusalẹm na awhàn; tòdaho lọ nasọ yin yíyí bọ nutindo lẹ na yin bibẹ sọn ohọ̀ lẹ mẹ taidi ogblànnu bọ yọnnu lẹ na yin zinzanhẹ gánnugánnu. Mado-awe mẹhe nọ nọ̀ tòdaho lọ mẹ lẹ tọn nasọ yì kanlinmọgbenu, ṣigba mẹhe pò to gbẹtọ lọ lẹ mẹ lẹ ma na yin sinsánsẹ sọn tòdaho lọ mẹ.  “Jehovah na tọ́nyi bo na funawhàn sọta akọta enẹlẹ+ kẹdẹdile e nọ hoavùn to azán awhàn tọn gbè do.+  To azán enẹ gbè, afọ etọn lẹ na ṣite to Osó Olivie ji,+ ehe pannukọn Jelusalẹm to whèzẹtẹn-waji; Osó Olivie nasọ zẹ̀ do awe, yèdọ sọn whèzẹtẹn-waji yì whèyihọ-waji,* bọ agbàdo daho de na hùndonuvo; adà osó lọ tọn dopo na sẹyì agewaji bọ adà awetọ na sẹyì hùwaji.  Mìwlẹ na họnyi agbàdo osó lọ lẹ tọn mẹ, na agbàdo osó lọ lẹ tọn na dlẹnkan kaka yì Azẹli. Mìwlẹ nasọ họnyi kẹdẹdile mì họnyi na aigba sisọsisọ he jọ to azán Ahọlu Uzia Juda tọn tọn lẹ gbè do.+ Jehovah Jiwheyẹwhe ṣie nasọ wá bọ mẹwiwe lẹpo na tin topọ hẹ ẹ.+  “To azán enẹ gbè, hinhọ́n họakuẹ depope ma na tin+—nulẹ na sinyẹn di osin-agó.*  E nasọ lẹzun azán de he yin yinyọnẹn taidi azán Jehovah tọn.+ E ma na taidi okle, mọ e ma nasọ taidi ozán; podọ hinhọ́n na tin to whèjai.  To azán enẹ gbè, osin ogbẹ̀ tọn lẹ+ na sà jẹgbonu sọn Jelusalẹm,+ odaa etọn hlan ohù whèzẹtẹn-waji tọn*+ podọ odaa he pò hlan ohù whèyihọ-waji tọn.*+ Ehe na jọ to alunlun mẹ podọ to avivọ-whenu.  Jehovah nasọ lẹzun Ahọlu do aigba pete ji.+ To azán enẹ gbè, Jehovah na yin dopo+ bọ oyín etọn na yin dopo.+ 10  “Aigba lọ pete na wá lẹzun Alaba+ nkọ, yèdọ sọn Geba+ kaka yì Limọni+ to hùwaji Jelusalẹm tọn; Jelusalẹm nasọ fọ́n bọ gbẹtọ lẹ na nọ nọ̀ e mẹ to finẹ,+ yèdọ sọn Họngbo Bẹnjamini+ tọn kọ̀n kaka yì fihe Họngbo Tintan tin te, kaka yì Họngbo Lọnglọnẹnmẹ tọn ji, podọ sọn Atọ̀họ̀ Hananẹli+ tọn kọ̀n kaka yì ovẹn-finyọ́ndo ahọlu tọn lẹ kọ̀n. 11  Gbẹtọ lẹ nasọ nọ nọ̀ e mẹ; whẹwhinwhẹ́n depope ma nasọ tin nado và ẹ sudo gbede ba,+ podọ gbẹtọ lẹ na nọ nọ̀ hihọ́ mẹ to Jelusalẹm.+ 12  “Azọ̀nylankan he Jehovah na yí do hò mẹhe tọ́nawhàn Jelusalẹm lẹpo die:+ Agbasalan yetọn na to yinyọ̀n dile yelọsu to ote to afọ yetọn lẹ ji, nukun yetọn lẹ na to yinyọ̀n to apà mẹ podọ odẹ́ yetọn na to yinyọ̀n to nùmẹ na yé. 13  “To azán enẹ gbè, bẹwlu sọn Jehovah dè na gbayipe to ṣẹnṣẹn yetọn; mẹdopodopo nasọ nọ hẹn alọ go na hatọ etọn bọ alọ etọn nasọ fọ́n do alọ hatọ etọn tọn ji.*+ 14  Juda nasọ tin to mẹhe to awhànfun to Jelusalẹm lẹ mẹ; podọ adọkun akọta he lẹdo e pé lẹpo tọn na yin bibẹpli, yèdọ sika, fataka po awù susugege po.+ 15  “Podọ azọ̀nylankan he taidi azọ̀nylankan enẹ nasọ hò osọ́ lẹ, otlò* lẹ, kanklosọ́ lẹ, kẹtẹkẹtẹ lẹ po kanlin-yìnyìn he tin to osla enẹlẹ mẹ lẹpo po. 16  “Depope to mẹhe pò sọn omẹ akọta he diọnukunsọ Jelusalẹm lẹ tọn lẹpo mẹ wẹ na nọ hẹji yì to whemẹwhemẹ+ nado yì dẹ́ do odò* na Ahọlu lọ, yèdọ Jehovah awhànpa lẹ tọn+ podọ nado nọ basi Hùnwhẹ Gòhọtúntún* lẹ tọn.+ 17  Ṣigba, eyin mẹdepope ma hẹji yì Jelusalẹm sọn whẹndo aigba ji tọn lẹ mẹ nado yì dẹ́ do odò na Ahọlu lọ, yèdọ Jehovah awhànpa lẹ tọn, jikun ma na nọ ja do e ji.+ 18  Podọ eyin whẹndo Egipti tọn lọ ma hẹji wá finẹ, be jikun ma na ja na yé. Kakatimọ, azọ̀nylankan he Jehovah yí do hò akọta he ma hẹji wá nado basi Hùnwhẹ Gòhọtúntún lẹ tọn wẹ na hò yé. 19  Yasanamẹ lọ niyẹn na ylando Egipti tọn podọ na ylando akọta he ma hẹji wá nado basi Hùnwhẹ Gòhọtúntún lẹ tọn lẹpo. 20  “To azán enẹ gbè, hogbe lọ ‘Jehovah wẹ wiwe!’+ na yin kinkan do ogàn-kéké osọ́ lẹ tọn lẹ go. Nudàzẹ́n*+ he tin to ohọ̀ Jehovah tọn mẹ lẹ nasọ taidi agbán lẹ+ to agbà lọ nukọn. 21  Nudàzẹ́n* he tin to Jelusalẹm podọ to Juda lẹpo nasọ yin wiwe bo na yin Jehovah awhànpa lẹ tọn tọn, bọ mẹhe to avọ́san lẹ na nọ wá bo na nọ yí delẹ to yé mẹ zan do sọakusìn. To azán enẹ gbè, Kenaninu* de ma nasọ tin to ohọ̀ Jehovah awhànpa lẹ tọn mẹ ba.”+

Nudọnamẹ Odò Tọn

Enẹ wẹ, tòdaho he yin alọdlẹndo to wf 2tọ mẹ.
To paa mẹ, “ohù lọ kọ̀n.”
Kavi “na nọte guun,” taidi nuhe fifá hẹn sinyẹn.
Enẹ wẹ, Ohù Kúkú.
Enẹ wẹ, Ohù Meditelane tọn.
Kavi “bọ sunnu de na diọnukunsọ awetọ etọn.”
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
Kavi “nado basi sinsẹ̀n.”
Kavi “Bẹtẹn Ojlẹ Gli tọn.”
Kavi “Nudàzẹ́n he onù etọn to gblagada.”
Kavi “Nudàzẹ́n he onù etọn to gblagada.”
Kavi vlavo, “ajọwatọ.”