Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Nahumi 2:1-13

NUHE E BẸHẸN LẸ

  • Nineve na jẹvọ́ (1-13)

    • “Họngbo tọ̀sisa lẹ tọn na yin hùnhùn” (6)

2  Mẹhe na vúnvún mì pé ko fọ́n do mì* ji.+ Mì basi hihọ́na figángán mìtọn lẹ. Mì to alihọ́. Mì blagbajana mìde* bo vọ́ huhlọnna mìde.   Na Jehovah na vọ́ gigo Jakọbu tọn hẹngọwa, Gọna gigo Islaeli tọn, Na mẹhusudotọ lẹ ko hù yé sudo;+ Yé ko sọ hù alà yetọn lẹ.   Awọ̀yinu sunnu huhlọnnọ etọn lẹ tọn ko yin ahó vẹẹ sádo, Awhànfuntọ etọn lẹ ko do ahóvọ̀ vẹẹ. Aṣọ́donu gànyuu tọn he tin to osọ́-kẹkẹ awhàn tọn etọn lẹ go to gbigbòdlán taidi miyọ́n To azán he gbè ewọ wleawudaina awhàn, Bọ owhán he yè yí atin junipeli tọn do basi lẹ yin dindlẹn.   Osọ́-kẹkẹ awhàn tọn lẹ to wezunhọ̀n klinkán-klinkán gbọn tòhomẹ-liho lẹ ji. Yé to wezunhọ̀n pé to tòplitẹn lẹ. Yé to sisẹ́ taidi zòwhán he to jiji lẹ bo to gbigbòdlán taidi abì.   E na ylọ awhànfuntọ etọn lẹ pli. Yé na dahli dile yé to yìyì. Yé họ̀nwezun yì adó etọn kọ̀n; Yé sọ wleawuna aliglọnnamẹnu.   Họngbo tọ̀sisa lẹ tọn na yin hùnhùn, Bọ họ̀nmẹ na yin gbigbà hányán.*   Gbedide lọ ko yin nina:* Ewọ ko yin gòhùnna, E yin pinplan sọyi bọ afanumẹ yọnnu etọn lẹ biọ aluẹmẹ; Nudidọ yetọn taidi apoe lẹ tọn dile yé to akọ́nnu* hò.   Nineve+ taidi osindò de to azán etọn lẹpo gbè, Amọ́ todin, yé to hinhọ̀n. “Mì nọte guun! Mì nọte guun!” Ṣigba, mẹde ma lẹkọ.+   Mì bẹ fataka po sika po taidi ogblànnu! Adọkunnu lẹ madodogbó. E yin bibẹsẹdo po nuhọakuẹ wunmẹ lẹpo po. 10  Tòdaho lọ jẹvọ́ bo gbọgbé bosọ yin huhusudo!+ Ahun yetọn lẹ gbàdo, kligonu yetọn lẹ to whinwhàn bọ alinmẹ yetọn to sisọsisọ; Nukunmẹ yemẹpo tọn wẹ do ayimajai hia. 11  Fie wẹ fiwhiwhlá kinnikinni lẹ tọn te,+ fihe kinnikinni winyanwinyan lẹ nọ dùnú te, Yèdọ fie kinnikinni nọ deanana ovi etọn lẹ tọ́n sọn, Bọ mẹde ma na nọ dobuna yé? 12  Kinnikinni nọ tlẹ́n nuhe e wle lẹ na ovi etọn lẹ bọ e nọ pé yé Bo nọ slokọna nuhe e wle lẹ na kinnikinni asi etọn lẹ. E nọ dike nuhe e wle lẹ ni gọ́ nọtẹn etọn, Bo nọ hẹn kanlin he yin tintlẹ́n lẹ gọ́ fiwhiwhlá etọn lẹ. 13  “Pọ́n! Yẹn na diọnukunsọ we,” wẹ Jehovah awhànpa lẹ tọn dọ,+ “Yẹn na fiọ osọ́-kẹkẹ awhàn tọn etọn lẹ to azọ̀ mẹ,+ Bọ ohí na hù kinnikinni winyanwinyan towe lẹ. Yẹn na doalọtena gbeyinyan towe to aigba ji, Bọ ogbè wẹnsagun towe lẹ tọn ma nasọ yin sisè gbede ba.”+

Nudọnamẹ Odò Tọn

Enẹ wẹ, Nineve.
To paa mẹ, “Mì hẹn alinmẹ lẹ lodo.”
Kavi “yin hihọliai.”
Kavi “yin hinhẹn lodo.”
To paa mẹ, “ahun.”