Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Mika 4:1-13

NUHE E BẸHẸN LẸ

  • Osó Jehovah tọn yin zizedaga (1-5)

    • Ohí do tùn glepọnu (3)

    • ‘Mí na nọ zinzọnlin to oyín Jehovah tọn mẹ’ (5)

  • Ziọni he yè hẹngọwa na lẹzun huhlọnnọ (6-13)

4  To azán godo tọn lẹ mẹ, Osó ohọ̀ Jehovah tọn+ Na yin hinhẹn lodo gligli to aga pete osó lẹ tọn, E nasọ yin zizedaga hú okọ́ta lẹ, Bọ gbẹtọ lẹ na nọ wọ̀ wá e ji.+   Akọta susu nasọ nọ yì bo nọ dọmọ: “Mì wá na mí ni hẹji yì osó Jehovah tọn ji Podọ yì ohọ̀ Jiwheyẹwhe Jakọbu tọn tọn mẹ.+ Ewọ na plọn aliho etọn lẹ mí, Bọ mí na nọ zinzọnlin gbọn ali etọn lẹ ji.” Na osẹ́n* na tọ́nyi sọn Ziọni, Podọ ohó Jehovah tọn sọn Jelusalẹm.   Ewọ na dawhẹ to mẹsusu ṣẹnṣẹn+ Bo dọwhẹgbọ* na akọta huhlọnnọ he to fidindẹn lẹ. Yé na yí ohí yetọn lẹ do tùn glepọnu Podọ owhán yetọn lẹ do tùn agbogọdọẹ.+ Akọta de ma na ze ohí daga do akọta devo ji, Mọ yé ma nasọ plọn awhànfunfun ba.+   Mẹdopodopo na nọ sinai to* vẹntin etọn glọ podọ to ovòtin etọn glọ,+ Bọ mẹde ma na nọ dobuna yé,+ Na onù Jehovah awhànpa lẹ tọn wẹ ko dọ ẹ.   Na gbẹtọ lẹpo na nọ zinzọnlin, yèdọ mẹdopodopo to oyín yẹwhe etọn tọn mẹ, Ṣigba, míwlẹ na nọ zinzọnlin to oyín Jehovah Jiwheyẹwhe mítọn tọn mẹ+ kakadoi podọ doidoi.   “To azán enẹ gbè,” wẹ Jehovah dọ, “Yẹn na bẹ mẹhe* to ṣinṣọ̀n lẹ pli, Bo na bẹ mẹhe vúnvún pé lẹ pli,+ Gọna mẹhe yẹn yinuwa hẹ to aliho sinsinyẹn mẹ lẹ.   Yẹn na hẹn mẹhe* to ṣinṣọ̀n lẹ zun pipotọ de,+ Podọ mẹhe yin hinhẹn yì fidindẹn lẹ zun akọta huhlọnnọ de;+ Jehovah nasọ duahọlu do yé ji to Osó Ziọni ji, Sọn din kakadoi podọ doidoi.   Na hiẹ tọn, hiẹ atọ̀họ̀ lẹngbọpa lọ tọn E, Yèdọ pópló viyọnnu Ziọni tọn,+ Towe wẹ e na yin, mọwẹ, aṣẹpipa tintan* lọ na yin towe,+ Yèdọ ahọluduta he yin viyọnnu Jelusalẹm tọn.+   Todin, naegbọn hiẹ do to awhádo po ogbè lélé po? Be hiẹ ma tindo ahọlu depope wẹ, Kavi ayinamẹtọ towe ko dọ̀n wẹ, Bọ hiẹ do tin to awufiẹsa mẹ taidi yọnnu he to ajidònu wẹ ya?+ 10  Viyọnnu Ziọni tọn E, hiẹ ni slo bo wẹnhun, Taidi yọnnu he to ajidònu de, Na todin, hiẹ na yì sọn tòdaho lọ mẹ bo na nọ nọ̀ danji. Hiẹ na yì kakajẹ Babilọni,+ Bo na yin whinwhlẹn to finẹ;+ Jehovah na fli we gọ̀ sọn alọ kẹntọ towe lẹ tọn mẹ+ to finẹ. 11  Todin, akọta susu na yin bibẹpli sọta we; Yé na dọ dọ, ‘Mì gbọ ewọ ni yin hinhẹnflu, Bo gbọ mí ni mọ po nukun mítọn lẹ po dọ ehe jọ do Ziọni go.’ 12  Ṣigba, yé ma yọ́n linlẹn Jehovah tọn lẹ, Yé ma mọnukunnujẹ lẹndai* etọn mẹ; Na ewọ na bẹ yé pli taidi jinukun he ṣẹṣẹ yin sinsánliai bo yin bibẹdo gọnu-gọnu to likun-flétẹn. 13  Viyọnnu Ziọni tọn E, fọ́n bo tùn jinukun;+ Na yẹn na diọ azò towe lẹ zun gànyuu, Yẹn nasọ diọ ofẹ̀n towe lẹ zun gànvẹẹ, Bọ hiẹ na gídí akọta susu.+ Hiẹ na klan ale mawadodo tọn yetọn dovo na Jehovah, Podọ nutindo yetọn lẹ na Oklunọ nugbo aigba pete tọn.”+

Nudọnamẹ Odò Tọn

Kavi “anademẹ.”
Kavi “Bo vọ́ ninọmẹ lẹ jlado.”
Kavi “na nọ nọ̀.”
To paa mẹ, “yọnnu he.”
To paa mẹ, “yọnnu he.”
Kavi “dai tọn.”
Kavi “ayinamẹ.”