Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Mika 1:1-16

NUHE E BẸHẸN LẸ

  • Whẹdida sọta Samalia po Juda po (1-16)

    • Ylando po gufinfọn po hẹn tukla wá (5)

1  Ohó Jehovah tọn he wá Mika*+ Molẹṣẹti tọn dè, to azán Jotami,+ Ahazi+ po Hẹzekia+ po, yèdọ ahọlu Juda+ tọn lẹ tọn lẹ gbè, ehe ewọ sọ mọ to numimọ de mẹ gando Samalia po Jelusalẹm po go dọmọ:   “Mì sè, mì gbẹtọ lẹpo emi! Aigba po nuhe tin to e ji lẹ po emi, mì tuntoai, Bo dike Oklunọ Nupojipetọ Jehovah ni yinuwa taidi kunnudetọ de sọta mì+ —Jehovah, yèdọ mẹhe tin to tẹmpli wiwe etọn mẹ.   Na pọ́n! Jehovah to tintọ́njẹgbonu sọn nọtẹn etọn; E na jẹte wá odò bo na zinzọnlin gbọn ofi yiaga aigba tọn lẹ ji.   Osó lẹ na yọ́ to oglọ etọn,+ Bọ agbàdo lẹ na zẹ̀ do awe Taidi osẹ̀n to miyọ́n kọ̀n, Taidi to whenue osin lẹ sà sọn pópló ji wá dòdòmẹ.   Ehe lẹpo na gufinfọn Jakọbu tọn wutu, Na ylando owhé Islaeli tọn tọn lẹ wutu.+ Etẹwẹ yin gufinfọn Jakọbu tọn? Be e ma yin Samalia wẹ ya?+ Podọ etẹwẹ yin ofi yiaga Juda tọn lẹ?+ Be e ma yin Jelusalẹm wẹ ya?   Yẹn na hẹn Samalia zun okiti gbakija tọn de to danji, Otẹn de nado lẹ̀ vẹngle do; N’na sisẹ́* zannu etọn lẹ dlan agbàdo mẹ to odò, N’nasọ de dodonu etọn lẹ jẹ gbangba.   Yè na gídí boṣiọ pipà etọn lẹpo,+ Podọ nunina he yè nọ na ẹn nado tindo kọndopọ zanhẹmẹ tọn hẹ ẹ* lẹpo nasọ yin fifiọ to miyọ́n mẹ.+ N’na và boṣiọ etọn lẹpo sudo. Na ale galilọ tọn lẹ wẹ e yí do bẹ yé pli, Yé nasọ lẹzun ale galilọ tọn lẹ whladopo dogọ.”   Na ehe wutu, n’na doavihàn bo do hùkluhú;+ N’na zọ̀n afọ-vọ́ podọ omẹ́.+ Avihàn ṣie na taidi avún gbémẹ tọn lẹ tọn, Aluẹmẹninọ ṣie nasọ taidi ogongo lẹ tọn.   Na awugble etọn ma sọgan yin hinhẹn gbọ;+ E ko wá kakajẹ Juda.+ Azọ̀nylankan lọ ko gbayipe jẹ họngbo omẹ ṣie lẹ tọn kọ̀n to Jelusalẹm.+ 10  “Mì lá ẹ to Gati blo; Mì masọ dona viavi paali. Mì bli gbọn kọ́gudu mẹ to Bẹti-afla.* 11  Mì zọ̀n omẹ́ do dasá jẹ dọ́n po winyan po, mì mẹhe* nọ nọ̀ Ṣafili lẹ emi. Mẹhe* nọ nọ̀ Zaanani lẹ ma ko tọ́n wá. Avihàn na tin to Bẹti-ezẹli bọ e ma nasọ nọgodona we ba. 12  Na mẹhe* nọ nọ̀ Malọti lẹ ko donukun dagbe, Ṣigba, nuhe ylan wẹ jẹte wá họngbo Jelusalẹm tọn ji sọn Jehovah dè. 13  Mì mẹhe* nọ nọ̀ Lakiṣi lẹ emi,+ mì sìn osọ́-kẹkẹ do pipli osọ́ lẹ tọn go. Mìwlẹ wẹ yin bẹjẹeji ylando viyọnnu Ziọni tọn tọn, Na mì dè wẹ gufinfọn Islaeli tọn lẹ yin mimọ te.+ 14  Enẹwutu wẹ mì na na nunina e yì whedenu tọn* lẹ Molẹṣẹti-gati. Oklọ de wẹ owhé Akzibi+ tọn lẹ yin na ahọlu Islaeli tọn lẹ. 15  Mì mẹhe* nọ nọ̀ Malẹṣa+ lẹ emi, yẹn na gbẹ́ hẹn awhàngbatọ* lọ wá mì dè.+ Gigo Islaeli tọn na wá kakajẹ Adulami.+ 16  Mì hẹn mìde mọ́n ahọ̀n bo whlẹ́ ota mìtọn, na ovi yiwanna mìtọn lẹ wutu. Mì hẹn mìde mọ́n ahọ̀n taidi akùn, Na yé ko yin bibẹ sọn mì dè yì kanlinmọgbenu.”+

Nudọnamẹ Odò Tọn

Sándogli Mikaẹli kavi Mikaia tọn, he zẹẹmẹdo “Mẹnu Wẹ Taidi Jehovah?”
To paa mẹ, “kọ̀n.”
Kavi “Podọ ale galilọ tọn etọn.”
Kavi “to owhé Afla tọn gbè.”
To paa mẹ, “yọnnu he.”
To paa mẹ, “Yọnnu he.”
To paa mẹ, “yọnnu he.”
To paa mẹ, “yọnnu he.”
Kavi “edabọ tọn.”
To paa mẹ, “yọnnu he.”
Kavi “mẹhe nọ bẹ nutindo mẹtọn.”