Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Matiu 27:1-66

NUHE E BẸHẸN LẸ

  • Jesu yin zizedo alọmẹ na Pilati (1, 2)

  • Juda dokankọ bo kú (3-10)

  • Jesu to Pilati nukọn (11-26)

  • Yin vivlẹko to gbangba (27-31)

  • Yin whiwhè to Gọlgọta (32-44)

  • Okú Jesu tọn (45-56)

  • Ṣiọdidi Jesu tọn (57-61)

  • Yọdò lọ yin ṣiṣọ́ (62-66)

27  To whenue ai ko họ́n, yẹwhenọgán lẹpo gọna mẹho lẹ dewé dopọ sọta Jesu nado sọgan hù i.+  To whenue yé ko blá ẹ godo, yé plan ẹn sọyi bo ze e do alọmẹ na ayimatẹn-gán Pilati.+  To whenẹnu, whenue Juda, mẹhe de e hia lọ mọdọ yè ko dawhẹ okú tọn na Jesu, e jẹ whẹgbledo ede ji bo gọ̀ fataka-kuẹ 30 lọ lẹ jo na yẹwhenọgán lẹ po mẹho lẹ po,+  bosọ dọmọ: “Yẹn waylando to whenue yẹn de ohùn homẹvọnọ tọn hia.” Yé dọna ẹn dọmọ: “Etẹwẹ dù mí to enẹ mẹ? Hiẹ wẹ enẹ dù!”*  Enẹwutu, e bẹ fataka-kuẹ lọ lẹ dlan do tẹmpli mẹ bo tọ́nyi. Enẹgodo, e yì dokankọ bo kú.+  Ṣigba, yẹwhenọgán lẹ yí fataka-kuẹ lọ lẹ bo dọmọ: “E ma sọgbe hẹ osẹ́n nado bẹ yé do adọkunnu sẹdotẹn wiwe lọ mẹ, na akuẹ ohùn tọn wẹ yé yin wutu.”  To whenue yé ko dewé dopọ godo, yé yí akuẹ lọ do họ̀ aigba zẹ́ndotọ tọn nado nọ dì oṣiọ jonọ lẹ tọn do finẹ.  Enẹwutu wẹ aigba enẹ do nọ yin yiylọdọ Aigba Ohùn tọn+ kakajẹ azán ehe gbè.  Gbọnmọ dali, nuhe yin didọ gbọn yẹwhegán Jelemia gblamẹ yin hinhẹndi, dọmọ: “Podọ yé yí fataka-kuẹ 30 lọ lẹ, yèdọ akuẹ he ji delẹ to ovi Islaeli tọn lẹ mẹ ko kọngbedopọ do nado yí do họ̀ dawe lọ, 10  bosọ yí yé do họ̀ aigba zẹ́ndotọ tọn lọ, sọgbe hẹ nuhe Jehovah* ko degbe etọn na mi.”+ 11  Todin, Jesu ṣite to ayimatẹn-gán lọ nukọn, bọ ayimatẹn-gán lọ kanse e dọmọ: “Be hiẹ wẹ Ahọlu Ju lẹ tọn ya?” Jesu gblọn dọmọ: “Hiẹ lọsu wẹ dọ ẹ.”+ 12  Ṣigba, to whenuena yẹwhenọgán lẹ po mẹho lẹ po to whẹsadokọna ẹn, e ma kẹnù.+ 13  To whenẹnu, Pilati dọna ẹn dọmọ: “Be hiẹ ma sè nususu he yé to kunnu etọn de sọta we lẹ wẹ?” 14  Ṣigba, e ma kẹnù, lala, e ma dọ ohó depope na ẹn, sọmọ bọ e paṣa ayimatẹn-gán lọ taun. 15  Todin, to hùnwhẹ Juwayi tọn dopodopo whenu, ayimatẹn-gán lọ tindo aṣa lọ nado nọ tún gàntọ de dote na gbẹtọgun lọ, yèdọ mẹdepope he jlo yé.+ 16  To ojlẹ enẹ lọ mẹ, yé tindo gàntọ he diyin to aliho ylankan mẹ de, he nọ yin Balabas. 17  Enẹwutu, to whenue yé pli dopọ, Pilati dọna yé dọmọ: “Mẹnu wẹ mìwlẹ jlo dọ yẹn ni tundote na mì, Balabas kavi Jesu, mẹhe yè nọ ylọdọ Klisti?” 18  Na Pilati yọnẹn dọ nuvẹun wutu wẹ yé do ze e jo. 19  Humọ, to whenue e to aisinsin to whẹdaján ji, asi etọn dowẹn hlan ẹn, dọmọ: “A doalọ dawe dodonọ enẹ go blo, na yẹn jiya susu to odlọ mẹ to egbé na ewọ tọn wutu.” 20  Ṣigba, yẹwhenọgán lẹ po mẹho lẹ po diọlinlẹnna gbẹtọgun lọ lẹ nado biọ Balabas,+ amọ́ nado mọdọ Jesu yin hùhù.+ 21  Ayimatẹn-gán lọ sọ vọ́ dọna yé dọmọ: “Mẹnu to yé omẹ awe lẹ mẹ wẹ mì jlo dọ yẹn ni tundote na mì?” Yé dọmọ: “Balabas.” 22  Pilati dọna yé dọmọ: “To whelọnu lo, etẹwẹ yẹn na wà na Jesu, mẹhe yè nọ ylọdọ Klisti?” Yemẹpo dọmọ: “Ewọ ni yin hùhù do pòtin ji!”+ 23  Ewọ sọ dọmọ: “Etẹwutu? Oylan tẹwẹ e ka wà taun?” Etomọṣo, yé sọ vọ́ to awhádo gángán dọmọ: “Ewọ ni yin hùhù do pòtin ji!”+ 24  To whenue Pilati mọdọ ehe ma jla nudepope do, ṣigba kakatimọ, zingidi wẹ to finfọn, e yí osin bo klọ́ alọ etọn lẹ to gbẹtọgun lọ nukọn, bo dọmọ: “Yẹn wé sọn ohùn dawe ehe tọn mẹ. Mìwlẹ wẹ enẹ dù.” 25  Ṣigba, gbẹtọ lọ lẹpo gblọn dọmọ: “Gbọ ohùn etọn ni wá míwlẹ po ovi mítọn lẹ po ji.”+ 26  To whenẹnu, e tún Balabas dote na yé, ṣigba e dike Jesu yin hihò+ bo jo e do alọmẹ na yé nado yin hùhù do pòtin ji.+ 27  Enẹgodo, awhànfuntọ ayimatẹn-gán lọ tọn lẹ plan Jesu yì owhé ayimatẹn-gán lọ tọn gbè bo bẹ awhànfuntọ lọ lẹpo pli lẹdo e.+ 28  Podọ to whenue yé ko de avọ̀ sọn e go, yé ṣinyọ́n awù daho vẹẹ ṣẹ́ṣẹ́ de na ẹn,+ 29  yé sọ lọ̀n jẹgbakun owùn tọn de bo ṣinyọ́n do ota na ẹn bosọ ze ofánpò de do adusilọ etọn mẹ. Yé sọ nọ jẹklo to nukọn etọn bo nọ yí i do davlẹ dọmọ: “Kudo lewhenu,* hiẹ Ahọlu Ju lẹ tọn!” 30  Podọ yé túntán do e go+ bo yí ofánpò lọ bosọ jẹ lìlì ota na ẹn ji. 31  To godo mẹ, to whenue yé ko yí i do davlẹ pó godo, yé de awù daho lọ sọn e go bo do awugbó etọn lẹ na ẹn bosọ plan ẹn yì nado whè e do pòtin go.+ 32  Dile yé tọ́n jei, yé mọ dawe he wá sọn Silene de he nọ yin Simọni. Dawe ehe wẹ yé yí huhlọn do hẹn nado ze yatin* etọn.+ 33  Podọ to whenuena yé jẹ fihe nọ yin Gọlgọta, he zẹẹmẹdo, Taká Tẹnmẹ,+ 34  yé na ẹn ovẹn he yè flusọ́ po vivẹ́* po nado nù;+ ṣigba to whenue e dọ́ ẹ pọ́n, e gbẹ́ nado nù in. 35  To whenue yé ko whè e do pòtin go, yé má awugbó etọn lẹ gbọn ovò dide dali,+ 36  podọ yé sọ sinai to finẹ bo to ṣiṣọ́ ẹ. 37  Yé sọ kàn owhẹ̀ he yin sisadokọna ẹn lọ do taligbé etọn dọmọ: “Jesu, Ahọlu Ju lẹ tọn lọ die.”+ 38  To whenẹnu, jaguda awe yin whiwhè do pòtin lẹ go to apá etọn, dopo to adusi etọn mẹ podọ awetọ to amiyọn etọn mẹ.+ 39  Mẹhe juwajei lẹ sọ nọ to zunzun in+ bo nọ to ota yetọn mimí+ 40  bosọ nọ to didọmọ: “Hiẹ he jlo na họ́ tẹmpli lọ liai bo vọ́ ẹ gbá to azán atọ̀n gblamẹ,+ whlẹn dewe! Eyin hiẹ yin visunnu Jiwheyẹwhe tọn, jẹte sọn yatin* lọ ji!”+ 41  Mọdopolọ, yẹwhenọgán lẹ, wekantọ lẹ po mẹho lẹ po sọ jẹ yíyí i do davlẹ ji bo to didọmọ:+ 42  “E whlẹn mẹdevo lẹ gán; e ma sọgan whlẹn ede gán! Ewọ wẹ Ahọlu Islaeli tọn;+ gbọ e ni jẹte sọn yatin* ji todin, mí nasọ yí i sè. 43  Ewọ ko dejido Jiwheyẹwhe go; gbọ E ni whlẹn ẹn gán todin eyin E tindo ojlo to ewọ mẹ,+ na e dọ dọ, ‘Visunnu Jiwheyẹwhe tọn wẹ yẹn.’”+ 44  Mọdopolọ, jaguda he yin whiwhè do pòtin lẹ go to apá etọn lẹ lọsu to vivlẹ ẹ kò.+ 45  Bẹsọn gànhiho ṣidopotọ* mẹ, zinvlu ṣinyọ́n aigba lọ lẹpo ji kakajẹ gànhiho ṣinẹnẹtọ* mẹ.+ 46  To nudi gànhiho ṣinẹnẹtọ mẹ, Jesu dawhá po ogbè lélé po dọmọ: “Eli, Eli, lama sabaktani?” he zẹẹmẹdo, “Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?”+ 47  To whenue yé sè ehe, delẹ to mẹhe to ote to finẹ lẹ mẹ jẹ didọ ji dọmọ: “Dawe ehe to Elija ylọ.”+ 48  Podọ to afọdopolọji, dopo to yé mẹ họ̀nwezun bo ze hùmẹ-tekan de bosọ ylọn ẹn do ovẹn he vẹsin mẹ bo ze e do ofánpò de nù bosọ na ẹn nado nù.+ 49  Ṣigba, mẹhe pò lẹ dọmọ: “Jo e do! Mì gbọ mí ni pọ́n eyin Elija na wá whlẹn ẹn gán.” 50  Jesu sọ dawhá po ogbè lélé po whladopo dogọ, bo jo gbigbọ do.*+ 51  Podọ pọ́n! avọ̀ he gbò fiwiwe lọ+ tlẹ́n do awe+ sọn aga wá odò,+ aigba sọ sisọ, bọ osé lẹ zẹ̀. 52  Podọ yọdò* lẹ hùn bọ susu oṣiọ omẹ wiwe he ko damlọn to okú mẹ lẹ tọn tọ́njẹgbonu 53  bo yin mimọ gbọn mẹsusu dali. (Podọ to whenuena ewọ ko yin finfọn godo, gbẹtọ lẹ he to tintọ́n sọn yọdò lẹ ṣẹnṣẹn biọ tòdaho wiwe lọ mẹ.*) 54  Ṣigba, to whenue mẹkanwekowhàngán lọ po mẹhe gọna ẹn bo to Jesu ṣọ́ lẹ po mọ aigba sisọsisọ lọ po nuhe jọ lẹ po, yé dibu tlala bo dọmọ: “Matin ayihaawe, Visunnu Jiwheyẹwhe tọn wẹ ehe.”+ 55  Yọnnu susu he ko hodo Jesu sọn Galili nado yilizọn na ẹn lẹ sọ to finẹ bo to nupọn sọn olá;+ 56  Malia Magdaleni tin to yé mẹ, gọna Malia onọ̀ Jakọbu po Jose po tọn po onọ̀ visunnu Zebede+ tọn lẹ tọn po. 57  Todin, to whenue tenu ko do, dawe adọkunnọ Alimate tọn de, he nọ yin Josẹfu, he ewọ lọsu ko lẹzun devi Jesu tọn de wá finẹ.+ 58  Dawe ehe yì Pilati dè bo biọ oṣiọ Jesu tọn.+ Pilati sọ degbe dọ e ni yin zizejo na ẹn.+ 59  Josẹfu sọ ze oṣiọ lọ bo blá ẹ do alavọ he wé dagbedagbe de mẹ,+ 60  bosọ tẹ́ ẹ do yọdò* yọyọ etọn mẹ,+ ehe ewọ lọsu ko kùn do osé mẹ. Podọ to whenue e ko bli zannu daho de do ohọ̀n yọdò* lọ tọn nù godo, e yì. 61  Ṣigba, Malia Magdaleni po Malia diẹ po gbọṣi finẹ, bo to aisinsin to yọdò lọ nukọn.+ 62  To aihọngbè, yèdọ azán he bọdo azán Awuwle* tọn+ go, yẹwhenọgán lẹ po Falesi lẹ po pli dopọ to Pilati nukọn, 63  bo dọmọ: “Mẹdaho, mí flindọ mẹblutọ enẹ dọ to whenue e gbẹ́ pò to ogbẹ̀ dọ, ‘Yẹn na yin finfọn to azán atọ̀n godo.’+ 64  Enẹwutu, degbe dọ yọdò lọ ni yin ṣiṣọ́ kakajẹ azán atọ̀ntọ gbè, na devi etọn lẹ nikaa wá fìn in+ bo dọna gbẹtọ lẹ dọ, ‘Ewọ ko yin finfọn sọn oṣiọ lẹ mẹ!’ Whenẹnu, mẹkiklọ godo mẹ tọn ehe nasọ ylanhu tintan tọn.” 65  Pilati dọna yé dọmọ: “Mì sọgan de nuhọ́tọ lẹ. Mì yì bo ṣọ́ ẹ dile mì penugo do.” 66  Enẹwutu, yé yì bo yí hiadonu do tlẹ́ zannu lọ bosọ de nuhọ́tọ lẹ nado ṣọ́ yọdò lọ.

Nudọnamẹ Odò Tọn

Kavi “Nuhahun towe wẹ enẹ!”
Pọ́n Nud. A5.
Kavi “N’kàn whé biọ.”
Pọ́n Zẹm.
Onú vivẹ́.
Pọ́n Zẹm.
Pọ́n Zẹm.
Enẹ wẹ, nudi ogàn 12 whèmẹ tọn.
Enẹ wẹ, nudi ogàn 3 whèmẹ tọn.
Kavi “bọ gbigbọ etọn ṣí.”
Kavi “yọdò oflin tọn.”
Vlavo nado na linlin nuhe yé mọ lẹ tọn.
Kavi “yọdò oflin tọn.”
Kavi “yọdò oflin tọn.”
Pọ́n Zẹm.