Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Matiu 21:1-46

NUHE E BẸHẸN LẸ

  • Jesu biọ tòdaho lọ mẹ to awhàngbigba mẹ (1-11)

  • Jesu klọ́ tẹmpli lọ wé (12-17)

  • Ovòtin yin dẹ̀hodo (18-22)

  • Aṣẹpipa Jesu tọn yin nukundiọsọ (23-27)

  • Apajlẹ visunnu awe lọ lẹ tọn (28-32)

  • Apajlẹ glesi hlọnhutọ lọ lẹ tọn (33-46)

    • Zannu họ̀gosu tọn gbigbẹdai (42)

21  To whenue yé sẹpọ Jelusalẹm bo jẹ Bẹtfagi to Osó Olivie tọn ji, whenẹnu wẹ Jesu do devi awe hlan,+  bo dọna yé dọmọ: “Mì yì gbétatò he mì to mimọ hlan lọ mẹ, podọ to afọdopolọji mì na mọ kẹtẹkẹtẹ de to sìnsìn bọ kẹtẹkẹtẹvu de gọna ẹn. Mì tún yé bo hẹn yé wá na mi.  Eyin mẹde dọ nudepope na mì, mì na dọ dọ, ‘Oklunọ tindo nuhudo yetọn.’ To whenẹnu, e na do yé hlan to afọdopolọji.”  Ehe jọ na taun tọn, na nuhe yin didọ gbọn yẹwhegán lọ gblamẹ nido sọgan yin hinhẹndi, dọmọ:  “Mì dọna viyọnnu Ziọni tọn* dọ: ‘Pọ́n! Ahọlu towe ja dè we+ po homẹmimiọn po,+ bo hẹ kẹtẹkẹtẹ de ji, mọwẹ, kẹtẹkẹtẹvu de, ovi kẹtẹkẹtẹ de tọn ji.’”+  Enẹwutu, devi lọ lẹ yì bo basi kẹdẹdile Jesu ko na anademẹ yé do.+  Yé hẹn kẹtẹkẹtẹ lọ po kẹtẹkẹtẹvu lọ po wá, bo tẹ́ awugbó yetọn lẹ do yé ji, bọ ewọ sọ sinai do yé* ji.+  Suhugan gbẹtọgun lọ tọn tẹ́ awugbó yetọn lẹ do aliji+ bọ mẹdevo lẹ to alà atin lẹ tọn sán bo to titẹ́ yé do aliji.  Humọ, gbẹtọgun he to yìyì to nukọnna ẹn lẹ po mẹhe to hihodo e lẹ po to awhádo mapote dọmọ: “Mí vẹ̀ we, whlẹn Visunnu Davidi tọn!+ Donanọ wẹ mẹlọ he ja to oyín Jehovah* tọn mẹ!+ Mí vẹ̀ we, whlẹn ẹn to oji aga!”+ 10  To whenue e biọ Jelusalẹm, tòdaho lọ pete hozín, bo to didọmọ: “Mẹnu wẹ ehe?” 11  Gbẹtọgun lọ lẹ to didọ madoalọte dọmọ: “Ehe wẹ yẹwhegán lọ, Jesu,+ sọn Nazalẹti Galili tọn!” 12  Jesu sọ biọ tẹmpli lọ mẹ bo yàn mẹhe to nusà po mẹhe to nuhọ̀ to tẹmpli lọ mẹ lẹpo po jẹgbonu, e sọ takitina tafo akuẹdiọtọ lẹ po aisinnu mẹhe to apoe sà lẹ po tọn lẹ.+ 13  E sọ dọna yé dọmọ: “E ko yin kinkan dọ, ‘Ohọ̀ ṣie na yin yiylọdọ ohọ̀ odẹ̀ tọn,’+ ṣigba mìwlẹ to hinhẹn ẹn zun odò jaguda lẹ tọn.”+ 14  Humọ, nukuntọ́nnọ lẹ po sẹkunọ lẹ po wá e dè to tẹmpli lọ mẹ, bọ e hẹnazọ̀ngbọna yé. 15  To whenuena yẹwhenọgán lẹ po wekantọ lẹ po mọ nujiawu he e wà lẹ po yọpọ sunnu lẹ po he to awhádo to tẹmpli lọ mẹ dọmọ, “Mí vẹ̀ we, whlẹn Visunnu Davidi tọn!”+ homẹgble yé+ 16  bọ yé dọna ẹn dọmọ: “Be a sè nuhe omẹ ehelẹ to didọ?” Jesu dọna yé dọmọ: “Mọwẹ. Be mì ma ko hia ehe gbede dọ, ‘Sọn onù yọpọvu lẹ po viyẹyẹ lẹ po tọn mẹ wẹ hiẹ ko hẹn pipà wá sọn’?”+ 17  E sọ jo yé do finẹ bo tọ́n sọn tòdaho lọ mẹ yì Bẹtani bosọ dọ́ dọ́n.+ 18  Dile e lẹkọja tòdaho lọ mẹ to afọnnu fuu, huvẹ hù i.+ 19  E sọ mọ ovòtin de to alitó bo yì e kọ̀n, ṣigba e ma mọ nude to e ji adavo amà lẹ kẹdẹ,+ bọ e dọna atin lọ dọmọ: “Na sinsẹ́n de ni masọ sẹ́n to hiẹ ji pọ́n gbede ba blo.”+ Ovòtin lọ sọ fiọ to afọdopolọji. 20  To whenue devi lẹ mọ ehe, e paṣa yé bọ yé dọmọ: “Naegbọn bọ ovòtin lọ do fiọ to afọdopolọji?”+ 21  Jesu gblọnna yé dọmọ: “Nugbo wẹ yẹn dọna mì dọ, eyin mì tindo yise bo ma tindo ayihaawe, e ma yin nuhe yẹn wà na ovòtin lọ kẹdẹ wẹ mì na wà gba, ṣigba eyin mì tlẹ dọna osó ehe dọ, ‘Sẹtẹn sọn fi bo yì jẹ hùmẹ,’ e na jọ domọ.+ 22  Podọ nudepope he mì biọ to odẹ̀ mẹ, eyin mì tindo yise, mì na mọyi.”+ 23  To whenue e ko biọ tẹmpli mẹ godo, yẹwhenọgán lẹ po mẹho lẹ po wá e dè dile e to mẹplọn bo dọmọ: “Aṣẹ tẹwẹ hiẹ yí do to onú ehelẹ wà? Podọ mẹnu wẹ na we aṣẹ ehe?”+ 24  Jesu gblọnna yé dọmọ: “Yẹnlọsu na kàn onú dopo biọ mì. Eyin mì dọna mi, yẹnlọsu na dọ aṣẹ he yẹn yí do to onú ehelẹ wà na mì: 25  Baptẹm Johanu tọn, fie wẹ e wá sọn? Sọn olọn wẹ kavi sọn gbẹtọ lẹ dè?”* Ṣigba, yé jẹ nulẹnpọn ji to yedelẹ ṣẹnṣẹn, dọmọ: “Eyin mí dọ, ‘Sọn olọn,’ ewọ na dọna mí dọ, ‘To whelọnu lo, naegbọn mì ma do yí i sè?’+ 26  Ṣigba, eyin mí dọ, ‘Sọn gbẹtọ lẹ dè,’ mí dona dibuna gbẹtọgun lọ, na yemẹpo wẹ nọ pọ́n Johanu hlan di yẹwhegán de.” 27  Enẹwutu, yé gblọnna Jesu dọmọ: “Mí ma yọnẹn.” Ewọ lọsu dọna yé dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì. 28  “Etẹwẹ mìwlẹ lẹn? Dawe de tindo ovi awe. E yì tintan dè, bo dọmọ, ‘Ovi, yì wazọ́n to vẹngle mẹ to egbé.’ 29  Ewọ gblọn dọmọ, ‘Yẹn ma na yì,’ ṣigba to godo mẹ, e diọlinlẹn bo yì. 30  E dọnsẹpọ awetọ lọ bo dọ nudopolọ. Ewọ gblọn dọmọ, ‘Otọ́, yẹn na yì,’ ṣigba e ma yì. 31  Detẹ to yé omẹ awe lẹ mẹ wẹ wà ojlo otọ́ etọn tọn?” Yé dọmọ: “Tintan lọ.” Jesu dọna yé dọmọ: “Nugbo wẹ yẹn dọna mì dọ, tòkuẹ-ṣinyantọ lẹ po galọtọ lẹ po to nukọnjẹna mì biọ Ahọluduta Jiwheyẹwhe tọn mẹ. 32  Na Johanu wá mì dè bo do aliho dodowiwa tọn hia mì, ṣigba mì ma yí i sè. Etomọṣo, tòkuẹ-ṣinyantọ lẹ po galọtọ lẹ po yí i sè,+ podọ dile mìwlẹ tlẹ mọ ehe, mì ma diọlinlẹn to godo mẹ nado yí i sè gba. 33  “Mì dotó apajlẹ devo: Dawe de tin, yèdọ aigbanọ de, he do vẹngle de+ bo do pákàn lẹdo e bosọ kùn ovẹn-finyọ́ndo de bo gbá atọ̀họ̀ de do e mẹ;+ e sọ haya ogle lọ na glesi lẹ bo tọ́nwhẹ̀n yì tògodo.+ 34  To whenuena ojlẹ sinsẹ́n lẹ bibẹpli tọn wá, e do afanumẹ etọn lẹ hlan glesi lọ lẹ dè nado mọ sinsẹ́n etọn lẹ yí. 35  Ṣigba, glesi lọ lẹ wle afanumẹ etọn lẹ, bo hò dopo, bo hù devo, bosọ dlan zannu do devo.+ 36  Whladopo dogọ, e do afanumẹ devo lẹ hlan, he sù hú pipli tintan tọn lẹ, ṣigba yé wà nudopolọ na yé.+ 37  To godo mẹ, e do visunnu etọn hlan yé, bo dọ dọ, ‘Yé na na sisi visunnu ṣie.’ 38  To whenue glesi lọ lẹ mọ visunnu lọ, yé dọ to yedelẹ ṣẹnṣẹn dọ, ‘Gudutọ lọ die.+ Mì wá, bo gbọ mí ni hù i bosọ yí ogú etọn!’ 39  To whenẹnu, yé wle e bo dọ̀n ẹn jẹgbonu sọn vẹngle lọ mẹ bosọ hù i.+ 40  Enẹwutu, to whenue klunọ vẹngle lọ tọn na wá, etẹwẹ e na wà na glesi enẹlẹ?” 41  Yé dọna ẹn dọmọ: “Na yé yin mẹylankan wutu, e na hẹn vasudo ylankan wá yé ji bo na haya vẹngle lọ na glesi devo lẹ, he na na ẹn sinsẹ́n etọn lẹ to whenuena ojlẹ yetọn sọ̀.” 42  Jesu dọna yé dọmọ: “Be mì ma ko hia to Owe-wiwe lẹ mẹ gbede dọ, ‘Zannu he họ̀dotọ lẹ gbẹ́ dai, ehe lọ wẹ ko lẹzun zannu gángánsu họ̀gosu tọn.+ Jehovah* dè wẹ e wá sọn, podọ e jiawu to nukun mítọn lẹ mẹ’?+ 43  Ehe wẹ zọ́n bọ yẹn dọna mì dọ, Ahọluduta Jiwheyẹwhe tọn na yin yíyí sọn mì si bo yin yíyí na akọta de he na de sinsẹ́n etọn lẹ tọ́n. 44  Humọ, mẹhe jai jẹ zannu ehe ji na gbà hányán.+ Ṣigba, mẹdepope he ji e flẹ jẹ, e na gídí i.”+ 45  To whenue yẹwhenọgán lẹ po Falesi lẹ po ko sè apajlẹ etọn lẹ, yé yọnẹn dọ emilẹ hodọ wẹ e te.+ 46  Dile etlẹ yindọ yé jlo nado wle e, yé dibusi gbẹtọgun lọ lẹ, na omẹ ehelẹ nọ pọ́n ẹn hlan di yẹwhegán de wutu.+

Nudọnamẹ Odò Tọn

Ehe sọgan to alọdlẹndo “tòdaho Ziọni tọn” kavi “tòmẹnu Ziọni tọn lẹ.”
E họnwun dọ hogbe lọ “yé” tofi, dlẹnalọdo awugbó lọ lẹ.
Pọ́n Nud. A5.
Kavi “sọn asisa gbẹtọ tọn mẹ?”
Pọ́n Nud. A5.