Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Matiu 14:1-36

NUHE E BẸHẸN LẸ

  • Johanu Baptizitọ yin otagbona (1-12)

  • Jesu na núdùdù gbẹtọ 5 000 (13-21)

  • Jesu zinzọnlin gbọn osin ji (22-33)

  • Azọ̀nhẹngbọnamẹ to Genezalẹti (34-36)

14  To ojlẹ enẹ mẹ, Hẹlọdi, yèdọ ogán agbegbe tọn* lọ, sè linlin gando Jesu go+  podọ e dọna devizọnwatọ etọn lẹ dọmọ: “Johanu Baptizitọ lọ wẹ. Ewọ ko yin finfọn sọn oṣiọ lẹ mẹ, podọ ehe wẹ zọ́n bọ e do to azọ́n huhlọnnọ ehelẹ wà.”+  Hẹlọdi* ko wle Johanu bo blá ẹ bosọ sú i do gànpamẹ, na Hẹlọdia, asi Filipi nọvisunnu etọn tọn wutu.+  Na Johanu ko nọ dọna ẹn dọmọ: “E ma sọgbe hẹ osẹ́n dọ hiẹ ni tindo e taidi asi gba.”+  Ṣigba, dile etlẹ yindọ ewọ jlo nado hù i, e dibusi gbẹtọgun lọ, na yé nọ pọ́n Johanu di yẹwhegán de wutu.+  Ṣigba, to whenue hùnwhẹ jijizan+ Hẹlọdi tọn to yinyin bibasi, viyọnnu Hẹlọdia tọn dúwe to hùnwhẹ lọ tẹnmẹ bo hẹn homẹhun Hẹlọdi sọmọ+  bọ e yí whiwhle do dopagbe nado na ẹn nudepope he ewọ biọ.  To whenẹnu, to anademẹ onọ̀ etọn tọn glọ, e dọmọ: “Na mi ota Johanu Baptizitọ lọ tọn to agbánvla de mẹ tofi.”+  Dile etlẹ yindọ e blawuna ahọlu lọ, na whiwhle etọn lẹ podọ na mẹhe to núdù* hẹ ẹ lẹ wutu, e degbe dọ e ni yin nina ẹn. 10  Enẹwutu, e domẹhlan nado yì gbòtana Johanu to gànpamẹ. 11  Ota etọn sọ yin hinhẹnwa na viyọnnu lọ to agbánvla de mẹ, bọ ewọ hẹn ẹn yì na onọ̀ etọn. 12  To godo mẹ, devi etọn lẹ wá ze oṣiọ etọn bo yì dì i; enẹgodo yé wá dogbè na Jesu. 13  To whenue Jesu sè ehe, e do tọjihun sọn finẹ yì fihe to olá de nado sọgan nọ edeṣo. Ṣigba, to whenue gbẹtọgun lẹ sè ehe, yé zọ̀n afọ hodo e sọn tòdaho lẹ mẹ.+ 14  To whenue e jẹte wá agé, e mọ gbẹtọgun daho de, onú yetọn sọ wàlẹblanuna ẹn,+ bọ e hẹnazọ̀ngbọna omẹ yetọn he to azọ̀njẹ lẹ.+ 15  Ṣigba, to whenuena owhè ko jai, devi etọn lẹ wá e dè bo dọmọ: “Filọ jẹ gblolo mẹ podọ whenu ko yì taun; do gbẹtọgun lọ lẹ hlan, na yé nido yì gbétatò lẹ mẹ bo họ̀ núdùdù na yede.”+ 16  Ṣigba, Jesu dọna yé dọmọ: “E ma biọ dọ yé ni yì gba; mì na nude yé nado dù.” 17  Yé dọna ẹn dọmọ: “Mí ma tindo nude tofi adavo akla atọ́n po whèvi awe po.” 18  E dọmọ: “Mì bẹ yé wá na mi tofi.” 19  E sọ dọna gbẹtọgun lẹ nado jagla do ogbé lẹ ji. To whenẹnu, e ze akla atọ́n po whèvi awe lọ lẹ po, bọ whenuena e pọ́n olọn, e dona,+ podọ to whenue e ko wẹ́n akla lọ lẹ godo, e yí na devi etọn lẹ, bọ devi lẹ má na gbẹtọgun lẹ. 20  Gbọnmọ dali, yemẹpo dù bo gọ́ho, yé sọ bẹ dupò lẹ pli, bọ e gọ́ ohà 12.+ 21  Todin, mẹhe dùnú lẹ diblayi sunnu 5 000, mahia yọnnu lẹ po yọpọvu lẹ po.+ 22  To enẹgodo tlolo, e biọ to devi etọn lẹ si nado biọ tọjihun lọ mẹ bo jẹnukọnna ẹn yì awà awetọ ji, to whenuena ewọ do gbẹtọgun lẹ hlan.+ 23  To whenue e ko do gbẹtọgun lẹ hlan godo, e hẹji yì osó lọ ji edeṣo nado hodẹ̀.+ Ewọ kẹdẹ wẹ to finẹ to whenue ozán kú. 24  Todin, tọjihun lọ ko dẹn do agé na mẹtlu kanweko susu* lẹ, bọ agbówhẹn lẹ to tuklado e badabada, na yé to jẹhọn pé wutu. 25  Ṣigba, to mimá ẹnẹtọ ozán tọn* mẹ, e to zọnlinzin gbọn ohù ji ja yé dè. 26  To whenue devi lẹ mọ ẹn bọ e to zọnlinzin to ohù ji, yé biọ bẹwlu mẹ, bo dọmọ: “Odlọ de wẹ!” Yé sọ dawhá, na budi yé wutu. 27  Ṣigba to afọdopolọji, Jesu dọna yé dọmọ: “Mì gboadọ! Yẹn wẹ; mì dibu blo.”+ 28  Pita gblọnna ẹn dọmọ: “Oklunọ, eyin hiẹ wẹ, degbena mi nado gbọn osin ji wá dè we.” 29  E dọmọ: “Wá!” Enẹwutu, Pita tọ́n sọn tọjihun lọ mẹ bo zinzọnlin gbọn osin ji jei Jesu dè. 30  Ṣigba, to whenuena e pọ́n yujẹhọn lọ, budi i. Podọ to whenue e jẹ sisiọ ji, e dawhá dọmọ: “Oklunọ whlẹn mi!” 31  Jesu dlẹnalọ etọn to afọdopolọji bo hẹn e go bosọ dọna ẹn dọmọ: “Hiẹ yise pẹvinọ, naegbọn a do jẹ ayihaawe tindo ji?”+ 32  To whenue yé ko biọ tọjihun lọ mẹ godo, yujẹhọn lọ doalọte. 33  Enẹgodo, mẹhe to tọjihun lọ mẹ lẹ litaina* ẹn, bo dọmọ: “Na nugbo tọn, Visunnu Jiwheyẹwhe tọn wẹ hiẹ.” 34  Podọ yé dasá bo jẹte do Genezalẹti.+ 35  To whenue mẹhe nọ nọ̀ finẹ lẹ yọnẹn dọ ewọ wẹ, yé dowẹn hlan otò he to lẹdo enẹ mẹ lẹpo, bọ gbẹtọ lẹ hẹn mẹhe to awutujẹ lẹpo wá e dè. 36  Yé sọ vẹ̀ ẹ na yé nido sọgan doalọ okẹ̀yẹ̀ awugbó etọn tọn go poun,+ mẹhe doalọ e go lẹpo sọ jẹgangan mlẹnmlẹn.

Nudọnamẹ Odò Tọn

To paa mẹ, “tẹtlalkes.” Ahọvi lẹdo tọn he nọ ze afọ ahọluigba-gán Lomu tọn dai.
Enẹ wẹ, Hẹlọdi Antipa. Pọ́n Zẹm.
Kavi “jagla to tafo kọ̀n.”
To paa mẹ, “na stade susu.” Stade dopo sọzẹn hẹ m 185.
Enẹ wẹ, sọn nudi ogàn 3 zánmẹ tọn mẹ jẹ ogàn 6 afọnnu tọn.
Kavi “dẹ́ do odò na.”