Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Matiu 12:1-50

NUHE E BẸHẸN LẸ

  • Jesu, “Oklunọ Gbọjẹzan tọn” (1-8)

  • Dawe de he alọ etọn kúsẹ́ yin azọ̀nhẹngbọna (9-14)

  • Devizọnwatọ he Jiwheyẹwhe yiwanna (15-21)

  • Gbigbọ wiwe yàn aovi lẹ jẹgbonu (22-30)

  • Ylando he ma tindo jona (31, 32)

  • Atin de nọ yin yinyọnẹn gbọn sinsẹ́n etọn dali (33-37)

  • Ohia Jona tọn (38-42)

  • Eyin gbigbọ mawé de lẹkọwa (43-45)

  • Onọ̀ po nọvi Jesu tọn lẹ po (46-50)

12  To ojlẹ enẹ mẹ, Jesu gbọn likun-gle lẹ mẹ wá jei to Gbọjẹzangbe. Huvẹ hù devi etọn lẹ bọ yé jẹ ota likun tọn lẹ wẹ́n ji bosọ to dùdù.+  To whenue Falesi lẹ mọ ehe, yé dọna ẹn dọmọ: “Pọ́n! Devi towe lẹ to nuhe ma sọgbe hẹ osẹ́n wà to Gbọjẹzangbe.”+  E dọna yé dọmọ: “Be mìwlẹ ma ko hia nuhe Davidi wà to whenue huvẹ hù ewọ po mẹhe tin to e dè lẹ po ya?+  Lehe e biọ ohọ̀ Jiwheyẹwhe tọn mẹ do bọ yé dù akla didetọn* lẹ,+ yèdọ nude he e ma sọgbe hẹ osẹ́n dọ ewọ, kavi mẹhe tin po e po lẹ ni dù, adavo yẹwhenọ lẹ kẹdẹ?+  Kavi be mì ma ko hia to Osẹ́n lọ mẹ dọ, to Gbọjẹzan lẹ gbè, yẹwhenọ he tin to tẹmpli mẹ lẹ ma nọ yìn Gbọjẹzan ṣogan bo ma nọ hùwhẹ ya?+  Ṣigba, yẹn dọna mì dọ mẹde he hugan tẹmpli lọ tin tofi.+  Etomọṣo, eyin mì ko mọnukunnujẹ nuhe ehe zẹẹmẹdo mẹ, dọ, ‘Lẹblanu wẹ yẹn jlo,+ e ma yin avọ́sinsan gba,’+ mì ma na ko gblewhẹdo mẹhe ma hùwhẹ lẹ.  Na Visunnu gbẹtọ tọn wẹ Oklunọ Gbọjẹzan tọn.”+  To whenue ewọ ko tọ́n sọn finẹ godo, e yì sinagọgu yetọn mẹ, 10  podọ pọ́n! dawe de he alọ etọn kúsẹ́ tin to finẹ!+ Enẹwutu, yé kanse e dọ, “Be e sọgbe hẹ osẹ́n nado hẹnazọ̀ngbọ to Gbọjẹzangbe ya?” na yé nido sọgan sawhẹdokọna ẹn.+ 11  E dọna yé dọmọ: “Eyin mì tindo lẹngbọ dopo bọ lẹngbọ enẹ jẹ odò mẹ to Gbọjẹzangbe, be mẹde to mì mẹ he ma na tẹdo e go bo de e tọ́n ya?+ 12  Nẹmunẹmu wẹ e yin na gbẹtọ de he họakuẹ hú lẹngbọ! Enẹwutu, e sọgbe nado wà nudagbe to Gbọjẹzangbe.” 13  Enẹgodo, e dọna dawe lọ dọmọ: “Dlẹnalọ towe.” Ewọ sọ dlẹn ẹn, bọ e yin hinhẹn gọ̀ jẹgangan taidi alọ awetọ. 14  Ṣigba, Falesi lẹ tọ́nyi bo blasé do e go nado hù i. 15  To whenue Jesu wá yọ́n ehe, e tọ́nyi sọn finẹ. Mẹsusu sọ hodo e,+ bọ e hẹnazọ̀ngbọna yemẹpo, 16  ṣigba e dosẹ́n na yé sinsinyẹn ma nado hẹn ewọ zun yinyọnẹn,+ 17  na nuhe yin didọ gbọn yẹwhegán Isaia gblamẹ nido yin hinhẹndi, dọmọ: 18  “Pọ́n! Devizọnwatọ ṣie,+ mẹhe yẹn de, mẹyiwanna ṣie, mẹhe yẹn* ko kẹalọyi!+ Yẹn na yí gbigbọ ṣie do e ji,+ podọ ewọ na hẹn nuhe whẹdida dodo yin họnwun na akọta lẹ. 19  Ewọ ma na dọnnu+ kavi dawhá, mọjanwẹ mẹdepope ma na sè ogbè etọn to alihogbó lẹ ji. 20  Ewọ ma na gídí ofán he dẹ́ depope, podọ e ma na ṣí miyọ́ngbán-kàn he to azọ̀ tì depope,+ kaka ewọ nado hẹn whẹdida dodo ṣẹ po kọdetọn dagbe po. 21  Na nugbo tọn, to oyín etọn mẹ wẹ akọta lẹ na tindo todido te.”+ 22  Enẹgodo, yé hẹn dawe he tindo gbigbọ aovi tọn de wá e dè, he yin nukuntọ́nnọ bosọ yin unbọpẹnnọ, ewọ sọ hẹnazọ̀ngbọna ẹn, bọ dawe unbọpẹnnọ lọ penugo nado dọho bosọ mọnú. 23  Nalete, avò vò gbẹtọgun lọ lẹpo bọ yé jẹ didọ ji dọmọ: “Be vlavo e ma yin Visunnu Davidi tọn lọ die?” 24  To whenue Falesi lẹ sè ehe, yé dọmọ: “Dawe ehe to aovi lẹ yàn jẹgbonu kiki gbọn Beẹlzebuli* ogán aovi lẹ tọn gblamẹ.”+ 25  Na e yọ́n linlẹn yetọn lẹ wutu, e dọna yé dọmọ: “Ahọluduta depope he klan sọta ede nọ jẹvọ́, podọ tòdaho kavi owhé depope he klan sọta ede ma na nọte. 26  To aliho dopolọ mẹ, eyin Satani nọ yàn Satani jẹgbonu, be ewọ ko klan sọta ede; to whenẹnu, nawẹ ahọluduta etọn na nọte do? 27  Humọ, eyin gbọn Beẹlzebuli gblamẹ wẹ yẹn nọ yàn aovi lẹ jẹgbonu, gbọn mẹnu gblamẹ wẹ visunnu* mìtọn lẹ nọ yàn yé jẹgbonu lo? Na ehe wutu, yewlẹ wẹ na dawhẹna mì. 28  Ṣigba, eyin gbọn gbigbọ Jiwheyẹwhe tọn gblamẹ wẹ yẹn to aovi lẹ yàn jẹgbonu, be Ahọluduta Jiwheyẹwhe tọn ko gbọ mì go.+ 29  Kavi, nawẹ mẹde sọgan biọ owhé dawe huhlọnnọ de tọn gbè gánnugánnu bo bẹ nutindo etọn lẹ gbọn, eyin ewọ ma blá dawe huhlọnnọ lọ whẹ́? Enẹgodo wẹ e sọgan bẹ nuhe to owhé etọn gbè lẹ yì. 30  Mẹdepope he ma tin to adà ṣie mẹ jẹagọdo mi, podọ mẹdepope he ma to gbẹtọ lẹ bẹpli hẹ mi to yé vúnvún pé.+ 31  “Enẹwutu wẹ yẹn dọna mì dọ, ylando po nùzinzan wunmẹ lẹpo po wẹ na yin jijona gbẹtọ lẹ, ṣigba nùzinzan do gbigbọ go ma na yin jijonamẹ.+ 32  Di apajlẹ, mẹdepope he dọho jẹagọdo Visunnu gbẹtọ tọn, e na yin jijona ẹn;+ ṣigba mẹdepope he dọho jẹagọdo gbigbọ wiwe, e ma na yin jijona ẹn, lala, to titonu* ehe mẹ, kavi to dehe ja mẹ.+ 33  “Eyin mìwlẹ hẹn atin lọ yin dagbe, sinsẹ́n etọn na yin dagbe, kavi eyin mì hẹn atin lọ yin ylankan, sinsẹ́n etọn nasọ yin ylankan, na gbọn sinsẹ́n atin de tọn dali wẹ yè do nọ yọ́n ẹn.+ 34  Mì ovi amàpoe tọn lẹ,+ nawẹ mì sọgan dọ nudagbe lẹ gbọn to whenuena e yindọ mẹylankan wẹ mìwlẹ yin? Na sọn susugege nuhe tin to ahun mẹ lẹ tọn mẹ wẹ onù nọ dọtọ́n.+ 35  Mẹdagbe nọ de nudagbe lẹ tọ́n sọn adọkunnu dagbe etọn lẹ mẹ, to whenuena mẹylankan nọ de nuylankan lẹ tọ́n sọn adọkunnu ylankan etọn lẹ mẹ.+ 36  Yẹn dọna mì dọ ohó ovọ́ he gbẹtọ lẹ dọ lẹpo wẹ yé na dogbè etọn+ to Whẹdazangbe; 37  na gbọn ohó towe lẹ dali wẹ hiẹ na yin lilá di dodonọ, podọ gbọn ohó towe lẹ dali wẹ hiẹ na yin whẹgbledo.” 38  To whenẹnu, taidi gblọndo de, delẹ to wekantọ lẹ po Falesi lẹ po mẹ dọna ẹn dọmọ: “Mẹplọntọ, míwlẹ jlo na mọ ohia de sọn dè we.”+ 39  E gblọnna yé dọmọ: “Whẹndo ylankan podọ ayọdetọ* de to ohia de dín mapote, ṣigba ohia de ma na yin nina ẹn adavo ohia Jona yẹwhegán lọ tọn.+ 40  Na kẹdẹdile Jona nọ adọ̀go whèvi daho lọ tọn mẹ na okle atọ̀n ozán atọ̀n do,+ mọkẹdẹ wẹ Visunnu gbẹtọ tọn na nọ aigba homẹ na okle atọ̀n ozán atọ̀n do niyẹn.+ 41  Omẹ Nineve tọn lẹ na fọ́n to whẹdida whenu po whẹndo ehe po bo na gblewhẹdo e, na yewlẹ lẹnvọjọ na yẹwhehodidọ Jona tọn wutu.+ Ṣigba pọ́n! mẹde he hugan Jona tin tofi.+ 42  Ahọsi hùwaji tọn na yin finfọn to whẹdida whenu po whẹndo ehe po bo na gblewhẹdo e, na ewọ wá sọn opodo aigba tọn lẹ nado sè nuyọnẹn Sọlomọni tọn.+ Ṣigba pọ́n! mẹde he hugan Sọlomọni tin tofi.+ 43  “Eyin gbigbọ mawé de tọ́n sọn gbẹtọ de mẹ, e nọ gbọn ofi húhú klókló lẹ bo nọ dín gbọjẹtẹn de bo masọ nọ mọ depope.+ 44  Enẹgodo e nọ dọmọ, ‘Yẹn na lẹkọyi owhé ṣie gbè fie yẹn tọ́n sọn,’ podọ to whenue e jẹ finẹ, e nọ mọ owhé lọ to ovọ́, bọ e ko yin ziza wé bosọ yin aṣọ́dona. 45  Enẹgodo, e nọ yì bo nọ hẹn gbigbọ ṣinawe devo lẹ he ylanhu ewọ lọsu wá, podọ to whenue yé ko biọ e mẹ godo, yé nọ nọ̀ finẹ; ninọmẹ mẹlọ tọn to godo mẹ sọ nọ wá ylanhu tintan tọn.+ Mọkẹdẹ wẹ e na yin na whẹndo ylankan ehe lọsu ga.” 46  Dile e gbẹ́ pò to hodọna gbẹtọgun lẹ, onọ̀ etọn po nọvisunnu etọn lẹ po+ to ote to gbonu bo to dindin nado dọhona ẹn.+ 47  Enẹwutu, mẹde dọna ẹn dọmọ: “Pọ́n! Onọ̀ towe po nọvisunnu towe lẹ po to ote to gbonu bo to dindin nado dọhona we.” 48  E gblọnna mẹhe dọhona ẹn lọ dọmọ: “Mẹnu wẹ yin onọ̀ ṣie, podọ mẹnu lẹ wẹ yin nọvisunnu ṣie lẹ?” 49  Dile e dlẹnalọ etọn hlan devi etọn lẹ, e dọmọ: “Pọ́n! Onọ̀ ṣie po nọvisunnu ṣie lẹ po die!+ 50  Na mẹdepope he wà ojlo Otọ́ ṣie he tin to olọn mẹ tọn, omẹ enẹ lọ wẹ nọvisunnu, nọviyọnnu po onọ̀ ṣie po.”+

Nudọnamẹ Odò Tọn

Kavi “akla sọhia tọn.”
Kavi “alindọn ṣie.”
Tẹnmẹ-yinkọ de he yin yiyizan na Satani.
Kavi “devi.”
Kavi “ojlẹ.” Pọ́n Zẹm.
Kavi “he ma yin nugbonọ.”