Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Matiu 11:1-30

NUHE E BẸHẸN LẸ

  • Pipà nina Johanu Baptizitọ (1-15)

  • Whẹndo tasinyẹntọ de yin whẹgbledo (16-24)

  • Jesu na pipà Otọ́ etọn na nukundagbe didohia whiwhẹnọ lẹ (25-27)

  • Zẹgẹ Jesu tọn nọ fakọnamẹ (28-30)

11  To whenue Jesu ko na anademẹ devi etọn 12 lẹ pó godo, e tọ́nyi sọn finẹ nado plọnmẹ bo dọyẹwheho to tòdaho yetọn lẹ mẹ.+  Ṣigba, to whenue Johanu sè to gànpamẹ+ gando azọ́n Klisti tọn lẹ go, e do devi etọn lẹ hlan+  nado kanse e dọmọ: “Be hiẹ wẹ Mẹhe ja lọ ya, kavi be mí dona donukun mẹdevo wẹ?”+  Jesu gblọnna yé dọmọ: “Mì yì, bo dọ nuhe mì to sisè bosọ to mimọ lẹ na Johanu:+  Nukuntọ́nnọ lẹ to numọ todin,+ sẹkunọ lẹ to zọnlinzin, pòtọnọ lẹ+ to yinyin kiklọ́we, tókunọ lẹ to núsè, oṣiọ lẹ to yinyin finfọn, bọ wẹndagbe lọ to yinyin lilá hlan wamọnọ lẹ.+  Ayajẹnọ wẹ mẹhe ma mọ ahlidanu de to yẹn mẹ.”+  Dile omẹ ehelẹ dedo, Jesu jẹ hodọna gbẹtọgun lọ lẹ ji gando Johanu go dọmọ: “Etẹwẹ mìwlẹ tọ́nyi nado yì pọ́n to danfafa ji?+ Be ofán he jẹhọn to yigọyigọ-dona de wẹ ya?+  Etẹwẹ mìwlẹ tọ́nyi nado yì mọ lo? Be dawe de he do awù wọ́dọ́wọ́dọ́ whanpẹnọ* lẹ wẹ ya? Yèdọ owhé ahọlu lẹ tọn gbè wẹ mẹhe nọ do awù wọ́dọ́wọ́dọ́ whanpẹnọ lẹ nọ nọ̀.  To whelọnu lo, naegbọn mì do tọ́nyi taun? Be nado mọ yẹwhegán de wẹ ya? Mọwẹ, yẹn dọna mì dọ, ewọ tlẹ hú yẹwhegán de tlala.+ 10  Ewọ wẹ mẹhe go yè ko kanwe gando dọmọ: ‘Pọ́n! Yẹn to wẹnsagun ṣie dohlan jẹnukọnna we,* mẹhe na jẹnukọnna we nado jla aliho towe do!’+ 11  Nugbo wẹ yẹn dọna mì dọ, to mẹhe yin jiji sọn yọnnu dè lẹ mẹ, depope ma ko sọawuhia he klohu Johanu Baptizitọ, ṣigba mẹhe whè hú to Ahọluduta olọn tọn mẹ klohu ewọ.+ 12  Sọn azán Johanu Baptizitọ lọ tọn lẹ gbè kakajẹ din, Ahọluduta olọn tọn wẹ yin yanwle lọ he gbẹtọ lẹ yí vivẹnu do to afọdona, podọ alọ mẹhe to vivẹnudo zọnmii lẹ tọn to pipla ẹ.+ 13  Na yemẹpo, yèdọ Yẹwhegán lẹ po Osẹ́n lọ po wẹ ko dọ dọdai kakajẹ ojlẹ Johanu tọn mẹ;+ 14  podọ vlavo mìwlẹ kẹalọyi i kavi lala, ewọ wẹ ‘Elija he dona wá lọ.’+ 15  Mì gbọ mẹhe tindo otó ni dotoai. 16  “Mẹnu go wẹ yẹn na yí whẹndo ehe jlẹdo?+ E taidi yọpọvu lẹ he to aisinsin to ahimẹ bo to awhádo hlan aihunda-gbẹ́ yetọn lẹ, 17  dọmọ: ‘Míwlẹ kúnván na mì, ṣigba mìwlẹ ma dúwe; míwlẹ doavihàn, ṣigba mì ma do awubla hia.’ 18  Mọdopolọ, Johanu wá, bo ma nọ dù bo masọ nọ nù, ṣigba gbẹtọ lẹ dọ dọ, ‘Ewọ tindo aovi de.’ 19  Visunnu gbẹtọ tọn sọ wá bo to dùdù bosọ to nùnù,+ amọ́ gbẹtọ lẹ dọ dọ, ‘Mì pọ́n! Dawe adọ̀whẹnnọ de he jo ede na ovẹn nùnù, họntọn tòkuẹ-ṣinyantọ lẹ po ylandonọ lẹ po tọn.’+ Etomọṣo, nuyọnẹn nọ yin didohia di dodonọ* gbọn azọ́n* etọn lẹ dali.”+ 20  Whenẹnu, e jẹ whẹgbledo tòdaho he mẹ suhugan azọ́n huhlọnnọ etọn lẹ tọn yin bibasi te lẹ ji, na yé ma lẹnvọjọ wutu: 21  “Dindọn hlan we, Kolazin! Dindọn hlan we, Bẹtsaida! na eyin Tile po Sidoni po mẹ wẹ azọ́n huhlọnnọ he yin bibasi to mì mẹ lẹ ko yin bibasi te, yé na ko lẹnvọjọ hoho to odẹ́vọ̀ po afín po mẹ.+ 22  Ṣigba, yẹn dọna mì dọ, e na pọnte na Tile po Sidoni po to Whẹdazangbe hú na mìwlẹ.+ 23  Podọ hiẹ, Kapẹlnaumi,+ be vlavo hiẹ na yin zizedaga kakajẹ olọn wẹ? Hiẹ na yìdo kaka yì Yọdò* mẹ;+ na eyin Sodọmi mẹ wẹ azọ́n huhlọnnọ he ko yin bibasi to hiẹ mẹ lẹ ko yin bibasi te, e na ko gbọṣi aimẹ kakajẹ azán ehe gbè. 24  Ṣigba, yẹn dọna mì dọ, e na pọnte na otò Sodọmi tọn to Whẹdazangbe hú na hiẹ.”+ 25  To ojlẹ enẹ mẹ, Jesu gblọn dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko whlá onú ehelẹ do nuyọnẹntọ lẹ po weyọnẹntọ lẹ po bo ko de yé hia ovi pẹvi lẹ.+ 26  Mọwẹ, Otọ́ E, na aliho ehe wẹ yọ́n to nukun towe mẹ. 27  Otọ́ ṣie ko ze nulẹpo do alọmẹ na mi, podọ mẹde ma yọ́n Visunnu lọ to gigọ́ mẹ, adavo Otọ́ lọ;+ mọdopolọ mẹdepope ma yọ́n Otọ́ lọ to gigọ́ mẹ+ adavo Visunnu lọ po mẹdepope he Visunnu lọ jlo nado de e hia po.+ 28  Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. 29  Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn,+ mìwlẹ nasọ mọ kọfanamẹ na mìde.* 30  Na zẹgẹ ṣie bọawu* bọ agbàn ṣie sọ fua.”

Nudọnamẹ Odò Tọn

Kavi “avọ̀ dagbedagbe.”
To paa mẹ, “nukọn towe.”
Kavi “yin whẹsuna.”
Kavi “kọdetọn.”
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “alindọn mìtọn.”
Kavi “bọawu nado hẹn.”