Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Malku 7:1-37

NUHE E BẸHẸN LẸ

  • Aṣa gbẹtọvi tọn lẹ yin didegbà (1-13)

  • Ahun mẹ wẹ hẹnflu nọ wá sọn (14-23)

  • Yise nawe Silofenikenu lọ tọn (24-30)

  • Dawe tókunọ de jẹgangan (31-37)

7  Todin, Falesi lẹ podọ delẹ to wekantọ lẹ mẹ he ko wá sọn Jelusalẹm pli lẹdo e.+  Yé sọ mọ delẹ to devi etọn lẹ mẹ yí alọ mawé do dùnú, enẹ wẹ, alọ he ma yin kiklọ́* lẹ.  (Na Falesi lẹ po Ju lẹpo po ma nọ dùnú adavo yé klọ́ alọ yetọn lẹ kakajẹ awàgonu, na yé nọ tẹdo aṣa omẹ hohowhenu tọn lẹ tọn go,  podọ eyin yé gọ̀ sọn ahimẹ, yé ma nọ dùnú adavo yé klọ́ yedelẹ wé. Aṣa susu devo lẹ sọ tin he yé ko mọyi bo tẹdego, taidi kọfo lẹ, tọ̀zẹ́n lẹ po núzinzan gànvẹẹ tọn lẹ po kiklọ́we.)+  Enẹwutu, Falesi po wekantọ ehelẹ po kanse e dọmọ: “Naegbọn devi towe lẹ ma nọ hodo aṣa omẹ hohowhenu tọn lẹ tọn, ṣigba bo nọ yí alọ mawé lẹ do dùnú?”+  E dọna yé dọmọ: “Isaia ko gbọn gbesisọ dali dọ dọdai gando mì yẹnuwatọ lẹ go, dile e yin kinkandai do dọ, ‘Omẹ ehelẹ nọ yí nùflo yetọn lẹ do gbògbéna mi, ṣigba ahun yetọn dẹn do mi tlala.+  Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’+  Mìwlẹ jo gbedide Jiwheyẹwhe tọn do bo tẹdo aṣa gbẹtọ lẹ tọn go.”+  Humọ, e sọ dọna yé dọmọ: “Mìwlẹ yí ayiha wintinwintin do gbẹ́ gbedide Jiwheyẹwhe tọn dai nado sọgan tẹdo aṣa mìtọn go.+ 10  Di apajlẹ, Mose dọmọ, ‘Gbògbéna otọ́ towe po onọ̀ towe po,’+ podọ, ‘Mì gbọ mẹhe nọ zun* otọ́ kavi onọ̀ etọn ni yin hùhù.’+ 11  Ṣigba, mìwlẹ dọ dọ, ‘Eyin mẹde dọna otọ́ etọn kavi onọ̀ etọn dọ: “Nudepope he yẹn tindo he hiẹ sọgan mọyi yin kọlbani (enẹ wẹ, nunina de he ko yin kinklandowiwe hlan Jiwheyẹwhe),”’ 12  gbọnmọ dali, mìwlẹ ma nọ dike ewọ ni basi onú dopo tata na otọ́ etọn kavi onọ̀ etọn ba.+ 13  Enẹwutu, mì hẹn ohó Jiwheyẹwhe tọn zun ovọ́ gbọn aṣa he mì ko zedai dali.+ Onú mọnkọtọn susu devo lẹ wẹ mì sọ nọ wà ga.”+ 14  Enẹwutu, e ylọ gbẹtọgun lọ do ede dè whladopo dogọ, bo dọna yé dọmọ: “Mìmẹpo ni dotoaina mi, bo mọnukunnujẹ zẹẹmẹ lọ mẹ.+ 15  Nudepope sọn gbonu he biọ gbẹtọ mẹ ma sọgan hẹn ẹn flu gba; ṣigba nuhe tọ́n sọn gbẹtọ mẹ lẹ wẹ nuhe nọ hẹn ẹn flu.”+ 16  *—— 17  Todin, to whenue e ko tọ́n sọn gbẹtọgun lọ mẹ bo biọ owhé de gbè, devi etọn lẹ jẹ hokanse e ji gando apajlẹ lọ go.+ 18  Enẹwutu, e dọna yé dọmọ: “Be mìlọsu ma mọnukunnujẹnumẹ taidi yé wẹ? Be mì ma yọnẹn dọ nudepope sọn gbonu he biọ gbẹtọ mẹ ma sọgan hẹn ẹn flu, 19  to whenue e yindọ e ma biọ ahun etọn mẹ, ṣigba adọ̀go etọn mẹ wẹ e biọ, bo nọ yin yinyẹ̀n jẹgbonu do adàdo mẹ ya?” Gbọnmọ dali, e do núdùdù lẹpo hia nado yin wiwe. 20  Humọ, e dọmọ: “Enẹ he tọ́njẹgbonu sọn gbẹtọ mẹ wẹ nọ hẹn ẹn flu.+ 21  Na sọn homẹ, enẹ wẹ sọn ahun gbẹtọ tọn mẹ+ wẹ onú ehelẹ nọ tọ́njẹgbonu sọn, yèdọ linlẹn ylankan, fẹnnuwiwa zanhẹmẹ tọn,* ajojijẹ, hlọnhuhu, 22  ayọdide, nukunkẹn, kanyinylan, oklọ, walọ gblezọn tasinsinyẹn tọn,* nukun he gọ́ na nuvẹun, nùzinzan, sakla po nulú po. 23  Homẹ wẹ nuylankan ehe lẹpo nọ wá sọn bo nọ hẹn gbẹtọ flu.” 24  E fọ́n sọn finẹ bo yì lẹdo Tile po Sidoni po tọn mẹ.+ E sọ biọ owhé de gbè to finẹ bo ma jlo dọ mẹdepope ni yọnẹn, ṣogan e ma sọgan whlá ede. 25  To afọdopolọji, nawe de he viyọnnu etọn pẹvi tindo gbigbọ mawé sè dogbọn ewọ dali bo wá bosọ jẹklo to afọ etọn lẹ kọ̀n.+ 26  Glẹkinu wẹ nawe lọ, ṣigba e ko lẹzun Silofenikenu gbọn akọta* dali; podọ e to bibiọ to e si mapote nado yàn aovi lọ sọn viyọnnu etọn mẹ. 27  Ṣigba, e dọna nawe lọ dọmọ: “Gbọ ovi lẹ ni gọ́ho whẹ́, na e ma sọgbe nado yí akla ovi lẹ tọn bo dlan ẹn hlan avún pẹvi lẹ gba.”+ 28  Etomọṣo, nawe lọ gblọnna ẹn dọmọ: “Mọwẹ, oklunọ, ṣogan avún pẹvi he to tafo glọ lẹ lọsu nọ dù jàjá ovi pẹvi lẹ tọn.” 29  Enẹwutu, e dọna nawe lọ dọmọ: “Na hiẹ dọ ehe wutu, yì; aovi lọ ko tọ́n sọn viyọnnu towe mẹ.”+ 30  Enẹwutu, yọnnu lọ tọ́nyi whégbè bo mọdọ ovi pẹvi lọ tin to aimimlọn to adọzan ji bọ aovi lọ ko tọ́n sọn ewọ mẹ.+ 31  To whenue Jesu lẹkọ sọn lẹdo Tile tọn mẹ, e jugbọn Sidoni yì Ohù Galili tọn waji podọ gbọn lẹdo Dekapole* tọn mẹ.+ 32  Yé hẹn dawe tókunọ he ma sọgan nọ dọho de wá e dè+ to finẹ bo vẹ̀ ẹ nado ze alọ etọn do e ji. 33  E sọ plan ẹn sọn gbẹtọgun lọ mẹ jẹ olá. Enẹgodo, e sisẹ́ alọvi etọn lẹ do otó etọn lẹ mẹ, podọ to whenue e ko túntán godo, e doalọ odẹ́ etọn go.+ 34  Podọ to whenue e pọ́n olọn, e gbọ gángán bo dọna ẹn dọmọ: “Effata,” enẹ wẹ, “Hùn.” 35  Whenẹnu, otó etọn lẹ hùn,+ bọ okàn odẹ́ etọn tọn tún, e sọ jẹ hodọ ji ganji. 36  Enẹwutu, e dosẹ́n na yé ma nado dọna mẹdepope,+ ṣigba dile e dosẹ́n na yé sọ, mọ wẹ yé nọ to lilá ẹ sù sọ.+ 37  Na nugbo tọn, awuji yé tlala+ bọ yé dọmọ: “E ko wà nulẹpo ganji. E tlẹ hẹn tókunọ lẹ nado sènu podọ unbọpẹnnọ lẹ nado dọho.”+

Nudọnamẹ Odò Tọn

Enẹ wẹ, he ma yin kiklọ́we to aṣa-liho.
Kavi “vlẹ.”
Pọ́n Nud. A3.
Glẹki, pọlnẹia. Pọ́n Zẹm.
Kavi “walọ he huwinyan.” Glẹki, asẹlgeia. Pọ́n Zẹm.
Kavi “jiji.”
Kavi “Lẹdo Tòdaho Ao tọn lọ.”