Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Malku 6:1-56

NUHE E BẸHẸN LẸ

  • Yé gbẹ́ Jesu dai to otò etọn mẹ (1-6)

  • Devi 12 lẹ mọ anademẹ lẹ yí na lizọnyizọn lọ (7-13)

  • Okú Johanu Baptizitọ lọ tọn (14-29)

  • Jesu na núdùdù gbẹtọ 5 000 (30-44)

  • Jesu zinzọnlin gbọn osin ji (45-52)

  • Azọ̀nhẹngbọnamẹ to Genezalẹti (53-56)

6  E tọ́n sọn finẹ bo wá otò etọn titi mẹ, devi etọn lẹ sọ hodo e.+  Whenue e jẹ Gbọjẹzangbe, e jẹ mẹplọn ji to sinagọgu mẹ, awú sọ ji suhugan mẹhe to todoai lẹ tọn bọ yé dọmọ: “Fie wẹ dawe ehe hẹn onú ehelẹ sọn?+ Podọ naegbọn nuyọnẹn ehe do yin nina ẹn, bọ azọ́n huhlọnnọ ehelẹ do yin wiwà gbọn ewọ dali?+  Ehe wẹ whlẹpatọ lọ,+ visunnu Malia tọn+ podọ nọvisunnu Jakọbu,+ Josẹfu, Juda po Simọni po tọn,+ kavi e ma yin mọ wẹ? Podọ nọviyọnnu etọn lẹ tofi hẹ mí, kavi e ma yin mọ wẹ?” Enẹwutu, yé jẹ ahlida ji, na ewọ tọn wutu.  Ṣigba, Jesu dọna yé dọmọ: “Yẹwhegán de ma nọ gọ̀n ma doyẹyi adavo to otò etọn titi mẹ podọ to hẹnnumẹ etọn lẹ ṣẹnṣẹn podọ to owhé etọn titi gbè.”+  Enẹwutu, ewọ ma sọgan wà azọ́n huhlọnnọ depope to finẹ adavo nado ze alọ etọn do vude to mẹhe to azọ̀njẹ lẹ mẹ ji bo hẹnazọ̀ngbọna yé.  Na nugbo tọn, yise matindo yetọn paṣa ẹ. Podọ e yì gbétatò lẹ mẹ lẹdo pé, bo to mẹplọn.+  Todin, e ylọ Omẹ Wiawe lẹ pli, bo jẹ dido yé hlan awe-awe ji,+ bosọ na yé aṣẹ do gbigbọ mawé lẹ ji.+  Humọ, e degbena yé ma nado hẹn nudepope na gbejizọnlin lọ adavo opò kẹdẹ—yé ma dona hẹn akla po aglò núdùdù tọn po, mọdopolọ yé ma dona hẹn akuẹ* do sẹgẹ yetọn lẹ mẹ+  ṣigba yé ni do afọpa bo ma do awù awe* blo. 10  Humọ, e dọna yé dọmọ: “Fidepope he mì biọ owhé de gbè te, mì nọ finẹ kaka mì nado tọ́n sọn tòdaho lọ mẹ.+ 11  Podọ fidepope he yè ma yí mì kavi dotoaina mì te, to whenue mì to tintọ́n sọn finẹ, mì húnhún afínfín sẹ̀ sọn afọ mìtọn lẹ go, na okunnu de hlan yé.”+ 12  Enẹwutu, yé tọ́nyi bo dọyẹwheho dọ gbẹtọ lẹ ni lẹnvọjọ,+ 13  podọ yé yàn aovi susu lẹ+ bo samisisana susu mẹhe to azọ̀njẹ lẹ tọn bosọ hẹnazọ̀ngbọna yé. 14  Todin, Ahọlu Hẹlọdi* sè ehe, na oyín Jesu tọn ko zun yinyọnẹn pé wutu, podọ gbẹtọ lẹ to didọmọ: “Johanu Baptizi ko yin finfọn sọn oṣiọ lẹ mẹ, podọ enẹ wẹ zọ́n bọ e do to azọ́n huhlọnnọ lẹ wà.”+ 15  Ṣigba, mẹdevo lẹ to didọmọ: “Elija wẹ.” Etomọṣo, mẹdevo lẹ dọmọ: “Yẹwhegán de wẹ ewọ yin taidi yẹwhegán hohowhenu tọn lẹ.”+ 16  Ṣigba, to whenue Hẹlọdi sè ehe, e dọmọ: “Johanu he yẹn gbòtana, ewọ lọ wẹ ko yin finfọn.” 17  Hẹlọdi ko dà Hẹlọdia, asi Filipi nọvisunnu etọn tọn. Na yọnnu lọ tọn wutu wẹ Hẹlọdi lọsu ko domẹhlan bo wle Johanu bosọ blá ẹ do gànpamẹ.+ 18  Na Johanu ko nọ dọna Hẹlọdi dọmọ: “E ma sọgbe hẹ osẹ́n dọ hiẹ ni tindo asi nọvisunnu towe tọn gba.”+ 19  Enẹwutu, Hẹlọdia hẹn ewọ do homẹ bo jlo nado hù i, amọ́ e ma sọgan. 20  Hẹlọdi nọ dibusi Johanu, na e yọnẹn dọ dodonọ podọ omẹ wiwe de wẹ ewọ,+ e sọ hlá ẹ dogbẹ̀. Whedepopenu he e dotoaina Johanu, e nọ jẹflumẹ bo ma nọ yọ́n nuhe e na wà, etomọṣo e zindonukọn nado nọ sè ohó etọn po homẹhunhun po. 21  Ṣigba, dotẹnmẹ de hundote na Hẹlọdia to whenue Hẹlọdi wleawuna núdùdù whèjai tọn de to jijizan+ etọn gbè na ahọluzọnwatọ nukundeji etọn lẹ, awhàngán daho* lẹ gọna omẹ nukundeji Galili tọn lẹ.+ 22  Podọ viyọnnu Hẹlọdia tọn wá bo dúwe bosọ hẹn homẹ Hẹlọdi po mẹhe to núdù* hẹ ẹ lẹ po tọn hùn. Ahọlu sọ dọna viyọnnu lọ dọmọ: “Biọ mi nudepope he a jlo, yẹn nasọ na we.” 23  Mọwẹ, e whlé na ẹn dọmọ: “Nudepope he a biọ mi, yẹn na na we, yèdọ kakajẹ odaa ahọluduta ṣie tọn ji.” 24  Enẹwutu, e yì bo dọna onọ̀ etọn dọmọ: “Etẹwẹ yẹn na biọ?” Ewọ dọna ẹn dọmọ: “Ota Johanu Baptizi tọn.” 25  To afọdopolọji, e yì ahọlu dè po awuyiya po bo basi obiọ etọn dọmọ: “Yẹn jlo dọ hiẹ ni na mi ota Johanu Baptizitọ lọ tọn to agbánvla de mẹ tlolo din.”+ 26  Dile etlẹ yindọ ehe blawuna ahọlu lọ tlala, e ma jlo na gbẹ́ obiọ viyọnnu lọ tọn, na whiwhle etọn lẹ po jonọ etọn* lẹ po tọn wutu. 27  Enẹwutu, to afọdopolọji ahọlu lọ do dopo to mẹhe nọ basi hihọ́na ẹn lẹ mẹ hlan bo degbena ẹn nado hẹn ota Johanu tọn wá. Ewọ sọ tọ́nyi bo gbòtana ẹn to gànpamẹ 28  bo hẹn ota etọn wá to agbánvla de mẹ. E ze e na viyọnnu lọ, viyọnnu lọ sọ ze e yì na onọ̀ etọn. 29  To whenue devi etọn lẹ sè ehe, yé wá bo ze oṣiọ etọn bosọ tẹ́ ẹ do yọdò* de mẹ. 30  Apọsteli lẹ sọ pli dopọ lẹdo Jesu bo na ẹn linlin nuhe yé ko wà bosọ plọnmẹ lẹpo tọn.+ 31  Ewọ sọ dọna yé dọmọ: “Mì wá bo gbọ mí ni sẹ̀ jẹ fie to olá de bo gbọjẹ vude.”+ Na mẹsusu wẹ to wiwá bo to yìyì, bọ yé ma tlẹ mọ whenu nado dùnú. 32  Enẹwutu, yé biọ tọjihun mẹ bo yì fie to olá de nado nọ yedeṣo.+ 33  Ṣigba, gbẹtọ lẹ mọ whenue yé to yìyì, bọ mẹsusu sọ yọ́n filọ, podọ yé whlẹndo, bo zọnpọ gbọn afọ sọn tòdaho lọ lẹpo mẹ bosọ jẹ dọ́n jẹnukọnna yé. 34  Todin, whenuena e jẹte, e mọ gbẹtọgun daho de, onú yetọn sọ wàlẹblanuna ẹn,+ na yé taidi lẹngbọ lẹ he ma tindo lẹngbọhọtọ de wutu.+ E sọ jẹ nususu plọn yé ji.+ 35  Todin, whenu ko yì podọ devi etọn lẹ sọ wá e dè bo dọmọ: “File jẹ gblolo mẹ podọ whenu ko yì taun.+ 36  Do yé hlan, na yé nido yì glètoho po gbétatò he to lẹdo lọ mẹ lẹ po mẹ bo họ̀ nude na yede nado dù.”+ 37  E gblọnna yé dọmọ: “Mì na nude yé nado dù.” Enẹwutu, yé dọna ẹn dọmọ: “Be míwlẹ na tọ́nyi nado họ̀ akla he sọ denali* 200 nù bo na gbẹtọ lọ lẹ nado dù wẹ?”+ 38  E dọna yé dọmọ: “Akla nẹmu wẹ mì tindo? Mì yì pọ́n!” To whenue yé ko dindona pó godo, yé dọmọ: “Akla atọ́n po whèvi awe po.”+ 39  E sọ dọna gbẹtọ lọ lẹpo nado jagla to gọnu-gọnu do ogbé-mú lẹ ji.+ 40  Enẹwutu, yé jagla gọnu-gọnu omẹ kanweko-kanweko podọ omẹ kandeao-kandeao. 41  Todin, e yí akla atọ́n po whèvi awe lọ lẹ po bo pọ́n olọn bosọ dona.+ Enẹgodo, e wẹ́n akla lọ lẹ bo jẹ yíyí na devi lẹ ji, na yé nido na gbẹtọ lẹ, e sọ má whèvi awe lọ lẹ na mẹlẹpo. 42  Gbọnmọ dali, yemẹpo dù bo gọ́ho, 43  yé sọ bẹ dupò lẹ pli, bọ e gọ́ ohà 12, mahia whèvi lẹ.+ 44  Mẹhe dù akla lọ lẹ yin sunnu 5 000. 45  To enẹgodo tlolo, e biọ to devi etọn lẹ si nado biọ tọjihun lọ mẹ bo jẹnukọnna ẹn gbọn Bẹtsaida pá yì awà awetọ ji, to whenue ewọ lọsu do gbẹtọgun lọ hlan.+ 46  Ṣigba, to whenuena e ko dọ e yì whedenu na yé godo, e yì osó de ji nado hodẹ̀.+ 47  To whenue tenu do, tọjihun lọ to ohù ṣẹnṣẹn, ṣigba e pò ewọ kẹdẹ to agé.+ 48  Enẹwutu, to whenue e mọdọ húnkùnkùn lọ to tuklado yé, na yé to jẹhọn pé wutu, to nudi mimá ẹnẹtọ ozán tọn* mẹ, e dọnsẹpọ yé bo to zọnlinzin gbọn ohù ji; ṣigba e basi taidi dọ e jlo na* zẹ̀ yé go wẹ nkọ. 49  To whenue yé mọ ẹn bọ e to zọnlinzin to ohù ji, yé lẹndọ: “Odlọ de wẹ!” Yé sọ dawhá. 50  Na yemẹpo wẹ mọ ẹn bo biọ bẹwlu mẹ. Ṣigba to afọdopolọji, e dọna yé dọmọ: “Mì gboadọ! Yẹn wẹ; mì dibu blo.”+ 51  Enẹgodo, e biọ tọjihun he mẹ yé te, jẹhọn lọ sọ doalọte. Ehe sọ hẹn awuji yé tlala, 52  na yé ma ko mọnukunnujẹ zẹẹmẹ akla lọ lẹ tọn mẹ, podọ e gbẹ́ vẹawuna ahun yetọn nado mọnukunnujẹemẹ janwẹ. 53  To whenue yé dasá jẹ agé, yé wá Genezalẹti bo glinhún do yakẹ.+ 54  Ṣigba, tlolo he yé jẹte sọn tọjihun lọ mẹ, gbẹtọ lẹ yọnẹn dọ ewọ wẹ. 55  Yé sọ họ̀nwezun gbọn agbegbe enẹ lọ lẹpo ji, bo jẹ mẹhe to azọ̀njẹ lẹ hẹnwa ji to adọzan lẹ ji, wá fie yé sè dọ e tin te. 56  Podọ fidepope he e biọ, yèdọ gbétatò lẹ kavi tòdaho lẹ kavi glètoho lẹ mẹ, yé nọ hẹn mẹhe to azọ̀njẹ lẹ wá ahi lẹ mẹ, yé sọ nọ vẹ̀ ẹ na yé nido sọgan doalọ okẹ̀yẹ̀ awugbó etọn tọn go poun.+ Mẹhe doalọ e go lẹpo wẹ sọ jẹgangan.

Nudọnamẹ Odò Tọn

To paa mẹ, “gànvẹẹ.”
Kavi “awù devo.”
Enẹ wẹ, “Hẹlọdi Antipa, visunnu Hẹlọdi Daho lọ tọn.”
Hogbe Glẹkigbe tọn lọ nọ dlẹnalọdo omẹ fọtọ́n-whàngán.
Kavi “mẹhe jagla to tafo kọ̀n.”
Kavi “mẹhe jagla to tafo kọ̀n hẹ ẹ.”
Kavi “yọdò oflin tọn.”
Pọ́n Nud. B14.
Enẹ wẹ, sọn nudi ogàn 3 zánmẹ tọn mẹ jẹ ogàn 6 afọnnu tọn.
Kavi “e dibla.”