Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Malku 4:1-41

NUHE E BẸHẸN LẸ

  • APAJLẸ LẸ GANDO AHỌLUDUTA LỌ GO (1-34)

    • Nudotọ lọ (1-9)

    • Nuhewutu Jesu yí apajlẹ lẹ zan (10-12)

    • Zẹẹmẹ apajlẹ nudotọ lọ tọn (13-20)

    • Miyọ́ngbán ma nọ nọ̀ ohà glọ (21-23)

    • Nujlẹnu he a yizan (24, 25)

    • Nudotọ he damlọn (26-29)

    • Okún mutaldi tọn lọ (30-32)

    • Apajlẹ lẹ yiyizan (33, 34)

  • Jesu doalọtena yujẹhọn (35-41)

4  Whladopo dogọ, e sọ jẹ mẹplọn ji to huto, bọ gbẹtọgun daho tlala de sọ pli sẹpọ ẹ. Enẹwutu, e biọ tọjihun de mẹ bo sinai bosọ sẹyì sọn huto, ṣigba gbẹtọgun lọ lẹpo wẹ to huto, to agé.+  Ewọ sọ jẹ apajlẹ lẹ yí do to nususu plọn yé ji+ bọ dile e to mẹplọn, e dọna yé dọmọ:+  “Mì dotoai. Mì pọ́n! Nudotọ lọ tọ́nyi nado donú.+  Dile e to núdo, okún delẹ flẹ jẹ alitó, bọ ohẹ̀ lẹ wá bo ṣinyan yé dù.  Devo lẹ flẹ jẹ osé-yigba ji, fie okọ́ ma sù te, yé sọ tọ́nkun to afọdopolọji, na okọ́ lọ ma siso wutu.+  Ṣigba, to whenue owhè zẹ̀, yé fiọ, podọ yé hú na yé ma tindo adọ̀ wutu.  Okún devo lẹ flẹ jẹ owùn lẹ ṣẹnṣẹn, owùn lẹ sọ tọ́n bo gbidikọna yé, bọ yé ma de sinsẹ́n tọ́n.+  Ṣigba, devo lẹ flẹ jẹ aigba dagbe ji, podọ to whenue yé whẹ́n bo yiaga, yé jẹ sinsẹ́n detọ́n ji, yèdọ donu 30, 60, podọ 100.”+  Enẹgodo, e yidogọ dọmọ: “Mì gbọ mẹhe tindo otó nado dotoai, ni dotoai.”+ 10  Todin, to whenue e tin to edeṣo, mẹhe tin to e dè lẹ po Omẹ Wiawe lọ lẹ po jẹ nukanbiọ ẹ ji gando apajlẹ lọ lẹ go.+ 11  E sọ dọna yé dọmọ: “Mìwlẹ wẹ aṣli wiwe+ Ahọluduta Jiwheyẹwhe tọn ko yin nina, ṣigba na mẹhe pò lẹ, nuhe yé sè lẹpo tin taidi apajlẹ lẹ na yé poun,+ 12  na e nido yindọ, dile yé to pinpọn, yé nido sọgan pọ́n, ṣogan bo ma mọ, podọ dile yé to sisè, yé nido sọgan sè, ṣogan bo ma mọnukunnujẹ zẹẹmẹ etọn mẹ; mọjanwẹ yé ma na lẹkọ gbede bo mọ jona do niyẹn.”+ 13  Humọ, e dọna yé dọmọ: “Mìwlẹ ma mọnukunnujẹ apajlẹ ehe mẹ, enẹwutu nawẹ mì na mọnukunnujẹ apajlẹ he pò lẹpo mẹ do? 14  “Nudotọ lọ do ohó lọ.+ 15  Ehelẹ, to whelọnu lo, wẹ dehe jẹ alitó fie ohó lọ yin dido do; ṣigba tlolo he yé ko sè e, Satani wá+ bo ṣinyan ohó lọ he ko yin dido do ahun yetọn mẹ sẹ̀.+ 16  Mọdopolọ, ehelẹ wẹ dehe yin dido do osé-yigba ji lẹ; tlolo he yé ko sè ohó lọ, yé yí ayajẹ do kẹalọyi i.+ 17  Ṣogan, ohó lọ ma doadọ̀do to yé mẹ, ṣigba yé gbọṣi aimẹ na ojlẹ de; enẹgodo tlolo he nukunbibia kavi homẹkẹn fọ́n, na ohó lọ tọn wutu, yé dahli. 18  Etomọṣo, devo lẹ tin he yin dido do owùn lẹ ṣẹnṣẹn. Ehelẹ wẹ mẹhe sè ohó lọ,+ 19  ṣigba magbọjẹ+ titonu* ehe tọn lẹ po huhlọn mẹkiklọ adọkunnu lẹ tọn po+ gọna ojlo+ na nuhe pò lẹpo biọ ahun yetọn mẹ bo gbidikọna ohó lọ, bọ e ma de sinsẹ́n tọ́n. 20  To godo mẹ, dehe yin dido do aigba dagbe ji lẹ wẹ mẹhe dotoaina ohó lọ bo yí i po ahun dagbe po lẹ bosọ de sinsẹ́n tọ́n—yèdọ donu 30, 60, podọ 100.”+ 21  E sọ dọna yé dọmọ: “Miyọ́ngbán ma nọ yin hinhẹnwa nado yin zizedo ohà* kavi adọzan glọ gba, kavi e ma yin mọ wẹ? Be e ma yin miyọ́ngbán-tin ji wẹ e nọ yin hinhẹnwa nado yin zizedo ya?+ 22  Na nudepope ma tin to nuglọ he ma na wá yin didehia; nudepope ma ko yin whiwhla po sọwhiwhe po he ma na wá yin hinhẹn jẹ gbangba.+ 23  Mẹdepope he tindo otó nado dotoai, mì gbọ e ni dotoai.”+ 24  Humọ, e dọna yé dọmọ: “Mì payi nuhe mì to sisè lẹ go.+ Nujlẹnu he mì to yíyí do jlẹ namẹ, enẹ wẹ na yin yíyí do jlẹ na mì, mọwẹ, e na yin yiyidogọ na mì. 25  Na mẹdepope he tindo, e na yin nina ẹn dogọ,+ ṣigba mẹdepope he ma tindo, yèdọ nuhe e tlẹ tindo na yin yíyí sọn e si.”+ 26  Enẹwutu, e yidogọ dọmọ: “Mọdopolọ, Ahọluduta Jiwheyẹwhe tọn yin yiyijlẹdo dawe de go he dlan okún lẹ do kọmẹ. 27  Dile e nọ damlọn to zánmẹ bo nọ fọ́n to aihọngbè, okún lọ lẹ tọ́nkun bo whẹ́n yiaga—ṣigba e ma yọ́n lehe enẹ jọ gbọn. 28  Aigba lọ na ede nọ de sinsẹ́n tọ́n vudevude, tintan amà, enẹgodo sinsẹ́n, to godo mẹ, sinsẹ́n lọ nọ whẹ́n pete. 29  Ṣigba, tlolo he sinsẹ́n lọ bia, e nọ hẹn agbogọdọẹ biọ e mẹ, na ojlẹ jibẹwawhé tọn ko sọ̀ wutu.” 30  E sọ yidogọ dọmọ: “Etẹ go wẹ mí sọgan yí Ahọluduta Jiwheyẹwhe tọn jlẹdo, kavi apajlẹ tẹwẹ mí sọgan yí do basi zẹẹmẹ etọn? 31  E tin taidi okún mutaldi tọn,* ehe to whenue e yin dido do aigba mẹ, nọ whè hugan to okún he to aigba ji lẹpo mẹ.+ 32  Ṣigba, to whenue e ko yin dido, e nọ whẹ́n bo nọ klohugan omá he pò lẹpo bosọ nọ tindo alà daho lẹ, sọmọ bọ ohẹ̀ agahomẹ tọn lẹ nọ penugo nado nọ oyẹ̀ etọn glọ.” 33  Apajlẹ mọnkọtọn susu+ wẹ e yí do dọ ohó lọ na yé dile yé penugo nado dotoai dẹnsọ. 34  Na nugbo tọn, ewọ ma nọ dọho de na yé matin apajlẹ, ṣigba e nọ basi zẹẹmẹ nulẹpo tọn na devi etọn lẹ dovo.+ 35  Podọ to azán enẹ gbè, to whenue owhè ko jai, e dọna yé dọmọ: “Mì gbọ mí ni dasá yì awà awetọ ji.”+ 36  Enẹwutu, to whenue yé ko do gbẹtọgun lọ hlan godo, yé yí tọjihun lọ do ze e, kẹdẹdile e ko nọ yì do, podọ tọjihun devo lẹ sọ tin to finẹ.+ 37  Todin, yujẹhọn sinsinyẹn de fọ́n, bọ agbówhẹn lẹ to hihò biọ tọjihun lọ mẹ, sọmọ bọ osin dibla gọ́ tọjihun lọ.+ 38  Ṣigba, ewọ tin to húnyonu, bo to amlọndọ to kọ̀donu ji. Enẹwutu, yé fọ́n ẹn bo dọna ẹn dọmọ: “Mẹplọntọ, hiẹ ma hanú dọ mí to na dọ̀n?” 39  To whenẹnu, e fọ́n bo gbẹnuna jẹhọn lọ bosọ dọna ohù lọ dọmọ: “Danido! Nọ whii!”+ Jẹhọn lọ sọ doalọte, bọ abọẹninọ daho de wá aimẹ. 40  Enẹwutu, e dọna yé dọmọ: “Naegbọn mì do to budi* sọmọ? Mì ma ko tindo yise depope kakajẹ din wẹ?” 41  Ṣigba, yé dibu tlala, bo jẹ didọna ode awetọ ji dọmọ: “Mẹnu wẹ ehe na taun tọn? Jẹhọn po ohù po tlẹ nọ setonuna ẹn.”+

Nudọnamẹ Odò Tọn

Kavi “ojlẹ.” Pọ́n Zẹm.
Kavi “ohà nujijlẹ tọn.”
Okún he whè hugan de he nọ yin mimọ to Palestine. Atin etọn sọgan dite na nudi m 4 bo nọ tindo alà lẹ.
Kavi “Naegbọn ahun mìtọn do gbàdo.”