Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Malku 2:1-28

NUHE E BẸHẸN LẸ

  • Jesu gbọazọ̀nna awukuzọ̀njẹtọ (1-12)

  • Jesu ylọ Levi (13-17)

  • Kanbiọ gando nùbibla go (18-22)

  • Jesu, “Oklunọ Gbọjẹzan tọn” (23-28)

2  Ṣigba, to azán delẹ godo, e sọ vọ́ wá Kapẹlnaumi bọ linlin lọ gbayipe dọ ewọ tin to whégbè.+  Mẹsusu sọ pli dopọ to owhé lọ gbè sọmọ bọ otẹn ma tin to finẹ ba, etlẹ yin kakajẹ ohọ̀n ji, bọ e jẹ wẹndagbe lọ lá na yé ji.+  Yé sọ hẹn awukuzọ̀njẹtọ he yin zize gbọn omẹ ẹnẹ dali de wá e dè.+  Ṣigba, yé ma penugo nado hẹn ẹn wá Jesu dè tlọlọ, na gbẹtọgun lọ tọn wutu, enẹwutu yé hùn ohọ̀ lọ ta to fie Jesu te, podọ to whenue yé ko de nùvo de godo, yé hẹn adọzan he ji awukuzọ̀njẹtọ lọ mlọnai do jẹte gbọn nùvo lọ mẹ.  To whenue Jesu mọ yise yetọn,+ e dọna awukuzọ̀njẹtọ lọ dọmọ: “Ovi ṣie, ylando towe lẹ ko yin jijona we.”+  Todin, delẹ to wekantọ lẹ mẹ tin to aisinsin to finẹ, bo to linlẹn to ahun yetọn mẹ dọmọ:+  “Naegbọn dawe ehe do to hodọ dole? E to nùzan. Mẹnu wẹ sọgan jo ylando lẹ namẹ adavo mẹdopo, yèdọ Jiwheyẹwhe?”+  Ṣigba to afọdopolọji, Jesu yọnẹn to ohò ede tọn mẹ dọ yé to onú mọnkọtọn lẹn to yedelẹ ṣẹnṣẹn, enẹwutu e dọna yé dọmọ: “Naegbọn mì do to onú ehelẹ lẹn to ahun mìtọn mẹ?+  Detẹ wẹ bọawu hugan, nado dọna awukuzọ̀njẹtọ lọ dọ, ‘Ylando towe lẹ yin jijona we,’ kavi nado dọ dọ, ‘Fọ́n, ze adọzan towe bo zinzọnlin’? 10  Ṣigba, na mìwlẹ nido yọnẹn dọ Visunnu gbẹtọ tọn+ tindo aṣẹ nado jo ylando lẹ namẹ to aigba ji—”+ e dọna awukuzọ̀njẹtọ lọ dọmọ: 11  “Yẹn dọna we dọ, Fọ́n, ze adọzan towe, bo yì owhé towe gbè.” 12  Enẹwutu, e fọ́n bo ze adọzan etọn to afọdopolọji bosọ zinzọnlin tọ́nyi to yemẹpo nukọn. To whenẹnu, avò vò yemẹpo tlala, bọ yé pagigona Jiwheyẹwhe, dọmọ: “Mí ma ko mọ ehe nkọ pọ́n gbede.”+ 13  Whladopo dogọ, e tọ́nyi huto, podọ gbẹtọgun lọ lẹpo to wiwá e dè, e sọ jẹ nuplọn yé ji. 14  Dile e sọ juwajei, e mọ Levi, visunnu Alfe tọn to aisinsin to tòkuẹ-ṣinyantẹn, e sọ dọna ẹn dọmọ: “Lẹzun hodotọ ṣie.” Ewọ sọ fọ́n bo hodo e.+ 15  Enẹgodo, ewọ to núdù* to owhé etọn gbè, bọ susu tòkuẹ-ṣinyantọ lẹ po ylandonọ lẹ po tọn to núdù* hẹ Jesu po devi etọn lẹ po, na susu mẹhe tin to finẹ lẹ tọn wẹ to hihodo e.+ 16  Ṣigba, to whenue wekantọ Falesi lẹ tọn lẹ mọdọ e to núdù hẹ ylandonọ lẹ po tòkuẹ-ṣinyantọ lẹ po, yé jẹ didọna devi etọn lẹ ji dọmọ: “E nọ dùnú hẹ tòkuẹ-ṣinyantọ lẹ po ylandonọ lẹ po wẹ ya?” 17  To whenue Jesu sè ehe, e dọna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ. Yẹn ma wá nado ylọ dodonọ lẹ gba, adavo ylandonọ lẹ.”+ 18  Podọ devi Johanu tọn lẹ po Falesi lẹ po nọ blanù. Enẹwutu, yé wá bo dọna ẹn dọmọ: “Naegbọn devi Johanu tọn lẹ po devi Falesi lẹ tọn po nọ blanù bọ devi towe lẹ ma ka nọ blanù?”+ 19  Enẹwutu, Jesu dọna yé dọmọ: “To whenue asisunọ yọyọ+ tin to yé dè, họntọn asisunọ yọyọ lọ tọn lẹ ma tindo nuhudo nado blanù, kavi e ma yin mọ wẹ? Dile e na dẹnsọ bọ asisunọ yọyọ na tin to yé dè, yé ma sọgan blanù. 20  Ṣigba, azán lọ ja bọ yè na yí asisunọ yọyọ lọ sọn yé dè,+ whenẹnu wẹ yé na blanù to azán enẹ gbè. 21  Mẹde ma nọ tọ̀ avọ̀nu avọ̀ yọyọ tọn do awugbó hoho go gba. Eyin e wàmọ, avọ̀nu yọyọ lọ na dọ̀n awugbó hoho lọ, bọ tintlẹ́n lọ nasọ ylanhu.+ 22  Mọdopolọ, mẹde ma nọ kọ̀n ovẹn yọyọ do ayúgò hoho lẹ mẹ gba. Eyin e wàmọ, ovẹn lọ na là ayú lọ lẹ, podọ ovẹn lọ na kọnyingbe bọ ayú lọ lẹ na gble. Ṣigba, ayúgò yọyọ lẹ mẹ wẹ ovẹn yọyọ nọ yin kinkọ̀n do.” 23  Todin, dile e gbọn likun-gle lẹ mẹ wá jei to Gbọjẹzangbe, devi etọn lẹ jẹ ota likun tọn lẹ wẹ́n ji dile yé to yìyì.+ 24  Enẹwutu, Falesi lẹ dọna ẹn dọmọ: “Pọ́n fi! Naegbọn yé do to nuhe ma sọgbe hẹ osẹ́n wà to Gbọjẹzangbe?” 25  Ṣigba, e dọna yé dọmọ: “Be mìwlẹ ma ko hia gbede, nuhe Davidi wà to whenue e tin to nuhudo mẹ bọ huvẹ hù ewọ po mẹhe tin to e dè lẹ po ya?+ 26  Be mìwlẹ ma ko hia to kandai he gando Abiatali+ yẹwhenọgán lọ go mẹ, lehe Davidi biọ ohọ̀ Jiwheyẹwhe tọn mẹ do bo dù akla didetọn* lẹ bosọ na delẹ mẹhe tin po e po lẹ, yèdọ nude he ma sọgbe hẹ osẹ́n na mẹdevo depope nado dù, adavo yẹwhenọ lẹ ya?”+ 27  Whenẹnu, e dọna yé dọmọ: “Gbọjẹzan lọ wá aimẹ na gbẹtọ tọn wutu,+ e ma yin gbẹtọ wẹ wá aimẹ na Gbọjẹzan wutu gba. 28  Enẹwutu, Visunnu gbẹtọ tọn sọ wẹ Oklunọ Gbọjẹzan tọn ga.”+

Nudọnamẹ Odò Tọn

Kavi “jagla to tafo kọ̀n.”
Kavi “jagla to tafo kọ̀n.”
Kavi “akla sọhia tọn.”