Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Malku 11:1-33

NUHE E BẸHẸN LẸ

  • Jesu biọ tòdaho lọ mẹ to awhàngbigba mẹ (1-11)

  • Ovòtin yin dẹ̀hodo (12-14)

  • Jesu klọ́ tẹmpli lọ wé (15-18)

  • Oplọn gando ovòtin he fiọ lọ go (19-26)

  • Aṣẹpipa Jesu tọn yin nukundiọsọ (27-33)

11  Todin, to whenue yé to sisẹpọ Jelusalẹm, Bẹtfagi po Bẹtani+ po to Osó Olivie tọn ji, e do awe to devi etọn lẹ mẹ hlan+  bo dọna yé dọmọ: “Mì yì gbétatò he mì to mimọ hlan lọ mẹ, podọ tlolo he mì biọ e mẹ, mì na mọ kẹtẹkẹtẹvu de to sìnsìn, ehe ji mẹdepope ma ko sinai do pọ́n. Mì tún in bo hẹn ẹn wáfi.  Podọ eyin mẹde dọna mì dọ, ‘Naegbọn mì do to ehe wà?’ mì dọ dọ, ‘Oklunọ tindo nuhudo etọn, podọ e na lẹkọna ẹn wáfi to afọdopolọji.’”  Enẹwutu, yé yì bo mọ kẹtẹkẹtẹvu lọ to sìnsìn to ohọ̀n de kọ̀n, to gbonu to fihe tòhomẹ-liho lọ klan te, yé sọ tún in.+  Ṣigba, delẹ to mẹhe to ote to finẹ lẹ mẹ dọna yé dọmọ: “Naegbọn mì do to kẹtẹkẹtẹvu lọ tún?”  Yé dọna mẹlọ lẹ kẹdẹdile Jesu ko dọ do, yé sọ jo yé do.  Yé sọ hẹn kẹtẹkẹtẹvu lọ wá+ Jesu dè bo tẹ́ awugbó yetọn lẹ do e ji, bọ ewọ sọ sinai do e ji.+  Humọ, mẹsusu tẹ́ awugbó yetọn lẹ do aliji, ṣigba mẹdevo lẹ sán amà lẹ sọn glemẹ.+  Mẹhe sọ to yìyì to nukọn lẹ po mẹhe ja to godo lẹ po to awhádo mapote dọmọ: “Mí vẹ̀ we, whlẹn ẹn!+ Donanọ wẹ mẹlọ he ja to oyín Jehovah* tọn mẹ!+ 10  Donanọ wẹ Ahọluduta otọ́ mítọn Davidi tọn he ja!+ Mí vẹ̀ we, whlẹn ẹn* to oji aga!” 11  E sọ biọ Jelusalẹm bo yì tẹmpli mẹ bosọ pọ́n nulẹpo lẹdo pé, ṣigba na gànmẹ ko yì wutu, e tọ́nyi Bẹtani po Omẹ Wiawe lẹ po.+ 12  To aihọngbè, to whenue yé to tintọ́n sọn Bẹtani, huvẹ hù i.+ 13  E mọ ovòtin de sọn olá he tindo amà, e sọ yì nado pọ́n eyin e na mọ nude to e ji. Ṣigba, to whenue e wá e kọ̀n, e ma mọ nude to e ji adavo amà lẹ kẹdẹ, na ovò sinsẹ́n whenu ma ko wá. 14  Enẹwutu, e dọna atin lọ dọmọ: “Mẹdepope sọ dù sinsẹ́n to hiẹ ji gbede ba blo.”+ Devi etọn lẹ sọ to sisè. 15  Todin, yé wá Jelusalẹm. Ewọ biọ tẹmpli lọ mẹ to finẹ bo jẹ mẹhe to nusà po mẹhe to nuhọ̀ to tẹmpli lọ mẹ lẹ po yàn jẹgbonu ji, e sọ takitina tafo akuẹdiọtọ lẹ po aisinnu mẹhe to apoe sà lẹ po tọn lẹ,+ 16  e masọ nọ dike mẹdepope ni hẹn nudepope gbọn tẹmpli lọ mẹ wayi. 17  E to mẹplọn bo to didọna yé dọmọ: “Be e ma ko yin kinkan dọ, ‘Ohọ̀ ṣie na yin yiylọdọ ohọ̀ odẹ̀ tọn na akọta lẹpo’ ya?+ Ṣigba, mìwlẹ ko hẹn ẹn zun odò jaguda lẹ tọn.”+ 18  Yẹwhenọgán lẹ po wekantọ lẹ po sọ sè, bo jẹ lehe yé na wagbọn do hù i dín ji;+ na yé to budisi i, na gbẹtọgun lọ lẹpo wẹ mẹpinplọn etọn nọ jiawu na wutu.+ 19  Whenue tenu do, yé tọ́nyi sọn tòdaho lọ mẹ. 20  Ṣigba, to whenue yé juwajei to afọnnu fuu azán awetọ tọn, yé mọ bọ ovòtin lọ ko fiọ kakajẹ adọ̀ etọn lẹ ji.+ 21  Na Pita flin wutu, e dọna ẹn dọmọ: “Labi, pọ́n! ovòtin he hiẹ hodẹ̀do lọ ko fiọ.”+ 22  Jesu sọ gblọn bo dọna yé dọmọ: “Mì tindo yise to Jiwheyẹwhe mẹ. 23  Nugbo wẹ yẹn dọna mì dọ, mẹdepope he dọna osó ehe dọ, ‘Sẹtẹn sọn fi bo yì hùmẹ,’ bo masọ tindo ayihaawe to ahun etọn mẹ, ṣigba bo tindo yise dọ nuhe emi dọ lọ na jọ, e na jọ domọ.+ 24  Enẹwutu wẹ yẹn dọna mì dọ, nulẹpo he mì hodẹ̀ bo biọ, mì ni yise dọ mì ko mọ yé yí, mì nasọ mọ yé yí.+ 25  Podọ eyin mì to ote bo to dẹ̀ho, nudepope he mì tindo sọta mẹdepope, mì jona ẹn, na Otọ́ mìtọn he tin to olọn mẹ nido sọgan jo sẹ́nmẹjijẹ mìtọn lẹ na mì ga.”+ 26  *—— 27  Yé sọ vọ́ wá Jelusalẹm. Podọ dile e to zọnlinzin to tẹmpli mẹ, yẹwhenọgán lẹ po wekantọ lẹ po gọna mẹho lẹ wá 28  bo dọna ẹn dọmọ: “Aṣẹ tẹwẹ hiẹ yí do to onú ehelẹ wà? Kavi mẹnu wẹ na we aṣẹ ehe nado wà onú ehelẹ?”+ 29  Jesu dọna yé dọmọ: “Yẹn na kàn onú dopo biọ mì. Mì na mi gblọndo, yẹnlọsu na dọ aṣẹ he yẹn yí do to onú ehelẹ wà na mì. 30  Baptẹm Johanu tọn,+ sọn olọn wẹ kavi sọn gbẹtọ lẹ dè?* Mì na mi gblọndo.”+ 31  Enẹwutu, yé jẹ nulẹnpọn ji to yedelẹ ṣẹnṣẹn dọmọ: “Eyin mí dọ, ‘Sọn olọn,’ ewọ na dọ, ‘To whelọnu lo, naegbọn mì ma do yí i sè?’ 32  Ṣigba, be míwlẹ hà nado dọ, ‘Sọn gbẹtọ lẹ dè’?” Yé to budisi gbẹtọgun lọ, na yemẹpo wẹ ko nọ pọ́n Johanu hlan di yẹwhegán de nugbonugbo.+ 33  Enẹwutu, yé gblọnna Jesu dọmọ: “Mí ma yọnẹn.” Jesu sọ dọna yé dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì.”

Nudọnamẹ Odò Tọn

Pọ́n Nud. A5.
Tofi hogbe lọ “ẹn” dlẹnalọdo Jesu.
Pọ́n Nud. A3.
Kavi “sọn asisa gbẹtọ tọn mẹ?”