Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Malaki 2:1-17

NUHE E BẸHẸN LẸ

  • Yẹwhenọ lẹ gboawupo nado plọnmẹ (1-9)

    • Oyọnẹn dona tin to nùflo yẹwhenọ lẹ tọn ji (7)

  • Gbẹtọ lẹ hùwhẹ gbẹdai tọn (10-17)

    • “Yẹn gbẹwanna gbẹdai” wẹ Jehovah dọ (16)

2  “Podọ todin, mì yẹwhenọ lẹ emi, mìwlẹ wẹ yẹn to gbedide ehe na.+  Eyin mì gbẹ́ nado dotoai podọ nado hẹn ẹn do ahun mẹ dọ mì dona pagigona oyín ṣie,” wẹ Jehovah awhànpa lẹ tọn dọ, “yẹn na hẹn dẹ̀hodo wá mì ji+ bo na diọ dona mìtọn lẹ zun dẹ̀hodo.+ Mọwẹ, yẹn ko diọ dona lẹ zun dẹ̀hodo, na mì ma hẹn ẹn do ahun mẹ wutu.”  “Mì pọ́n! Yẹn na hẹn okún he mì do lẹ gble* na mìtọn wutu,+ yẹn nasọ vúnvún omí do nukunmẹ na mì, yèdọ omí kanlin he mì nọ yí do sanvọ́ to hùnwhẹ mìtọn whenu lẹ tọn; mì nasọ yin bibẹ yì po e po.*  Whenẹnu wẹ mìwlẹ na yọnẹn dọ na alẹnu ṣie hẹ Levi nido zindonukọn wutu wẹ n’ko na mì gbedide ehe,”+ wẹ Jehovah awhànpa lẹ tọn dọ.  “Alẹnu he yẹn basi hẹ ẹ yin ogbẹ̀ po jijọho po tọn, ehe yẹn na ẹn, na e nido nọ dibusi* mi. Ewọ dibusi mi, mọwẹ, e nọ gbògbéna oyín ṣie.  Osẹ́n* nugbo tọn tin to onù etọn mẹ,+ podọ mawadodo depope ma nọ yin mimọ to nùflo etọn lẹ ji. E zinzọnlin jijlọ hẹ mi to jijọho mẹ,+ ewọ sọ gọkọna mẹsusu sọn nuṣiwa mẹ.  Na nùflo yẹwhenọ tọn ji wẹ oyọnẹn dona tin te, podọ onù etọn mẹ wẹ gbẹtọ lẹ dona nọ dín osẹ́n* te,+ na wẹnsagun Jehovah awhànpa lẹ tọn wẹ ewọ wutu.  “Ṣigba, mìlọsu ko lẹhlan apadopo sọn aliho lọ ji. Mì ko hẹn mẹsusu dahli gando osẹ́n go.*+ Mì ko hẹn alẹnu Levi tọn gble,”+ wẹ Jehovah awhànpa lẹ tọn dọ.  “Enẹwutu, yẹn na hẹn mì zun mẹvlẹko podọ gbẹ́gọ́nu to mẹlẹpo nukọn, na mìwlẹ ma gbọṣi aliho ṣie lẹ ji, ṣigba mì nọ homẹnukuntapọn to osẹ́n lọ yiyizan mẹ.”+ 10  “Be e ma yin otọ́ dopolọ wẹ mímẹpo tindo ya?+ Be e ma yin Jiwheyẹwhe dopolọ wẹ dá mí ya? Enẹwutu, naegbọn mí do to nuyiwa hẹ ode awetọ po oklọ po+ bo nọ to alẹnu tọgbo mítọn lẹ tọn hẹnflu? 11  Juda ko yinuwa po oklọ po, podọ osùnú de ko yin wiwà to Islaeli po Jelusalẹm po; na Juda ko hẹn wiwe-yinyin* Jehovah tọn flu,+ ehe Ewọ yiwanna, podọ e ko yí viyọnnu yẹwhe jonọ de tọn taidi asi.+ 12  Jehovah na sán mẹdepope he wà ehe sẹ̀ sọn gòhọ Jakọbu tọn lẹ mẹ, mahopọnna mẹhe ewọ yin,* eyin e tlẹ na avọ́nunina de hlan Jehovah awhànpa lẹ tọn.”+ 13  “Podọ nudevo* de tin he mì sọ wà, ehe zọ́n bọ agbà Jehovah tọn yin hinhẹn yọ̀n gbọn dasin, avi po azọ̀nwinwẹn po dali, sọmọ bọ ewọ masọ nọ na ayidonugo avọ́nunina mìtọn kavi yí nukundagbe do pọ́n nudepope he wá sọn alọ mìtọn mẹ ba.+ 14  Mìwlẹ sọ dọ dọ, ‘Etẹwutu?’ Na Jehovah ko yin kunnudetọ de to hiẹ po asi jọja whenu towe tọn po ṣẹnṣẹn, mẹhe hiẹ ko yí oklọ do yinuwa hẹ, dile etlẹ yindọ ewọ wẹ yin hatọ towe podọ asi towe gbọn alẹnu dali.*+ 15  Ṣigba, mẹde tin he ma wàmọ, na ewọ tindo pipotọ gbigbọ lọ tọn. Podọ etẹ dín wẹ omẹ enẹ te? Kúnkan* Jiwheyẹwhe tọn. Enẹwutu, mì payi gbigbọ he zan mì te go bo masọ nọ yí oklọ do yinuwa hẹ asi jọja whenu mìtọn tọn blo. 16  Na yẹn* gbẹwanna gbẹdai,”+ wẹ Jehovah Jiwheyẹwhe Islaeli tọn dọ, “gọna ewọ he nọ ze danuwiwa ṣinyọ́n taidi avọ̀,”* wẹ Jehovah awhànpa lẹ tọn dọ. “Podọ mì payi gbigbọ he zan mì te go bo masọ nọ yí oklọ do yinuwa blo.+ 17  “Mì ko yí ohó mìtọn lẹ do hẹn agbọ́ pé Jehovah.+ Ṣigba, mì nọ kanse dọ, ‘Nawẹ míwlẹ ko hẹn agbọ́ pé e gbọn?’ Gbọn didọ dali dọ, ‘Mẹdepope he to ylanwa yin mẹdagbe to nukun Jehovah tọn mẹ, podọ homẹ etọn nọ hùn do omẹ mọnkọtọn go,’+ kavi gbọn didọ dali dọ, ‘Fie wẹ Jiwheyẹwhe whẹdida dodo tọn lọ te?’”

Nudọnamẹ Odò Tọn

To paa mẹ, “na gbẹnuna okún he mì do lẹ.”
Enẹ wẹ, yì fie omí kanlin he yin yíyí do sanvọ́ lẹ tọn nọ yin bibẹdo.
Kavi “na sisi; sẹ̀n.”
Kavi “Anademẹ.”
Kavi “anademẹ.”
Kavi vlavo, “gbọn anademẹ mìtọn dali.”
Kavi vlavo, “fiwiwe.”
To paa mẹ, “mẹhe to nukle podọ mẹhe nọ na gblọndo.”
To paa mẹ, “onú awetọ.”
Kavi “asi towe to osẹ́n-liho.”
To paa mẹ, “Okún.”
To paa mẹ, “ewọ.”
Kavi “ewọ he nọ wà danú.”