Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luti 3:1-18

NUHE E BẸHẸN LẸ

  • Naomi na anademẹ Luti (1-4)

  • Luti po Boazi po to likun-flétẹn (5-15)

  • Luti lẹkọyi Naomi dè (16-18)

3  Todin, Naomi asu-nọ̀ etọn dọna ẹn dọmọ: “Viyọnnu ṣie, be e ma jẹ dọ ma dín owhé* de na we,+ na e nido yin dagbe na we ya?  Be e ma yin hẹnnumẹ+ mítọn wẹ Boazi yin ya? Hiẹ po jọja yọnnu etọn lẹ po wẹ wazọ́n dopọ wayi. Ewọ na fú balekun to likun-flétẹn etọn to egbé whèjai.  Enẹwutu, lawu bo sá amì owán gblingblinnọ; enẹgodo doaṣọ́ ganji* bo jẹte yì likun-flétẹn lọ. A dike dawe lọ yọnẹn dọ a wá finẹ blo, kakajẹ whenue e na ko dù bo nù fó godo.  Eyin e mlọnai, doayi fie e mlọn lọ go; enẹgodo yì hùnnú sọn afọ etọn lẹ go bo mlọnai. Ewọ nasọ dọ nuhe hiẹ dona wà na we.”  Whenẹnu, e gblọn dọmọ: “Nuhe hiẹ dọna mi lẹpo wẹ yẹn na wà.”  Enẹwutu, e jẹte yì likun-flétẹn lọ bo wà nuhe asu-nọ̀ etọn ko dọna ẹn lẹpo.  To ojlẹ enẹ mẹ, Boazi ko dù bo nù bọ homẹ etọn hùn. Ewọ sọ mlọnai to jinukun he yin bibẹpli lọ lẹ tó. Enẹgodo, yọnnu lọ zọ̀n dẹẹdẹ wá bo hùnnú sọn afọ etọn lẹ go bosọ mlọnai.  To zánhomẹ, dawe lọ jẹ sisọsisọ ji, e sọ dẹ́ hlan nukọn bo mọ yọnnu de to aimimlọn to afọ etọn lẹ kọ̀n.  Ewọ sọ dọmọ: “Mẹnu wẹ hiẹ?” Yọnnu lọ gblọn dọmọ: “Yẹn Luti devizọnwatọ towe wẹ. Dlẹn awù towe* do devizọnwatọ towe ji, na mẹflitọ+ de wẹ hiẹ.” 10  Whenẹnu, dawe lọ dọna ẹn dọmọ: “Na Jehovah ni dona we, viyọnnu ṣie. Hiẹ ko do owanyi nugbo hia to whẹho ehe mẹ hú tintan whenu tọn,+ na a ma dómọna jọja sunnu lẹ, vlavo yé yin wamọnọ kavi adọkunnọ. 11  Podọ todin viyọnnu ṣie, a dibu blo. Nuhe a dọ lẹpo wẹ yẹn na wà na we,+ na mẹhe to tòdaho lọ mẹ lẹpo* wẹ yọnẹn dọ yọnnu jijọ dagbenọ de wẹ hiẹ. 12  Nugbo wẹ dọ mẹflitọ+ de wẹ yẹn, amọ́ mẹflitọ devo de tin he yin hẹnnumẹ sẹpọmẹ hugan mi.+ 13  Nọfi to ozán ehe mẹ, podọ eyin ewọ na fli we to afọnnu, be e yọ́n! Ewọ ni bo fli we.+ Ṣigba, eyin ewọ ma jlo na fli we, be yẹnlọsu wẹ na fli we, dile Jehovah togbẹ̀. Mlọnai dofi kakajẹ afọnnu.” 14  Enẹwutu, e mlọn afọ etọn lẹ kọ̀n kakajẹ afọnnu, enẹgodo e fọ́n whẹpo ai nido họ́n jẹ obá lọ mẹ bọ yè na jẹ ode awetọ yọnẹn ji. Dawe lọ sọ dọmọ: “A dike mẹde yọnẹn dọ yọnnu de wá likun-flétẹn lọ blo.” 15  E sọ dọmọ: “Ze awù daho he a do lọ bo tẹ́ ẹ.” Yọnnu lọ sọ tẹ́ ẹ, bọ e kọ̀n ojlẹnu balekun tọn ṣidopo* do e mẹ bo didá ẹ, enẹgodo dawe lọ biọ tòdaho lọ mẹ. 16  Yọnnu lọ sọ wleali yì asu-nọ̀ etọn dè, bọ e kanse e dọmọ: “Viyọnnu ṣie, nawẹ nulẹ yì do na we?”* Ewọ sọ dọ nuhe dawe lọ wà na ẹn lẹpo na ẹn. 17  E yidogọ dọmọ: “E sọ na mi ojlẹnu balekun tọn ṣidopo ehe bo dọna mi dọ, ‘A lẹkọyi asu-nọ̀ towe dè asigbá-alọgbá blo.’” 18  To whenẹnu, asu-nọ̀ etọn dọmọ: “Viyọnnu ṣie, sinai tofi kaka hiẹ nado sè lehe whẹho lọ na yì do, na dawe lọ ma na gbọjẹ kakajẹ whenue ewọ na didẹ whẹho lọ to egbé.”

Nudọnamẹ Odò Tọn

To paa mẹ, “gbọjẹtẹn.”
Kavi “ze awugbó towe lẹ do.”
Kavi “Dlẹn tónu awù towe tọn.”
To paa mẹ, “na họngbo omẹ ṣie lẹ tọn lẹpo.”
Vlavo balekun ojlẹnu sea tọn ṣidopo, kavi nudi L 44. Pọ́n Nud. B14.
To paa mẹ, “mẹnu wẹ hiẹ?”