Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 8:1-56

NUHE E BẸHẸN LẸ

  • Yọnnu lẹ zọnhẹ Jesu (1-3)

  • Apajlẹ nudotọ lọ tọn (4-8)

  • Nuhewutu Jesu yí apajlẹ lẹ zan (9, 10)

  • Zẹẹmẹ apajlẹ nudotọ tọn (11-15)

  • Miyọ́ngbán ma nọ yin nuṣinyọndo (16-18)

  •  Onọ̀ po nọvi Jesu tọn lẹ po (19-21)

  • Jesu doalọtena yujẹhọn (22-25)

  • Jesu do aovi lẹ hlan ohàn lẹ mẹ (26-39)

  • Viyọnnu Jailu tọn; yọnnu de doalọ awugbó Jesu tọn go (40-56)

8  To enẹgodo tlolo, e zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to yẹwhehodọ bosọ to wẹndagbe Ahọluduta Jiwheyẹwhe tọn lá.+ Omẹ Wiawe lẹ sọ tin po e po,  gọna yọnnu delẹ he mẹ gbigbọ ylankan lẹ ko yin yinyan sọn bo ko sọ yin azọ̀nhẹngbọna: Malia he nọ yin yiylọdọ Magdaleni, mẹhe mẹ aovi ṣinawe ko tọ́njẹgbonu sọn;  Joana+ asi Kuza, he yin nukunpedonugotọ Hẹlọdi tọn tọn; Susana; po yọnnu susu devo lẹ po, he nọ yí nutindo yetọn lẹ zan nado yilizọn na yé.+  Todin, to whenue gbẹtọgun daho de po mẹhe nọ saba hodo e sọn tòdaho de mẹ jẹ tòdaho de mẹ lẹ po ko pli dopọ, e yí apajlẹ de do dọho dọmọ:+  “Nudotọ de tọ́nyi nado do okún lẹ. Dile e to núdo, delẹ to yé mẹ flẹ jẹ alitó bo yin afọtùn e ji, bọ ohẹ̀ agahomẹ tọn lẹ ṣinyan yé dù.+  Delẹ flẹ jẹ osé ji, podọ to whenue yé ko tọ́nkun godo, yé fiọ na yé ma mọ fifá wutu.+  Devo lẹ flẹ jẹ owùn lẹ ṣẹnṣẹn, owùn he whẹ́n dopọ hẹ yé lẹ sọ gbidikọna yé.+  Ṣigba, devo lẹ flẹ jẹ aigba dagbe ji, podọ to whenue yé ko tọ́nkun godo, yé de sinsẹ́n tọ́n, yèdọ donu 100.”+ Dile e dọ onú ehelẹ pó godo, e dawhá dọmọ: “Mì gbọ mẹhe tindo otó nado dotoai, ni dotoai.”+  Ṣigba, devi etọn lẹ kanse e nuhe apajlẹ ehe zẹẹmẹdo.+ 10  E dọmọ: “Mìwlẹ wẹ e ko yin nina nado mọnukunnujẹ aṣli wiwe Ahọluduta Jiwheyẹwhe tọn lẹ mẹ, ṣigba na mẹhe pò lẹ, apajlẹ lẹ poun wẹ e yin na yé,+ na e nido yindọ, dile yé to pinpọn, yé nido sọgan pọ́n to ovọ́ mẹ podọ dile yé to sisè, yé ni ma do mọnukunnujẹ zẹẹmẹ lọ mẹ blo.+ 11  Todin, nuhe apajlẹ lọ zẹẹmẹdo die: Okún lọ wẹ ohó Jiwheyẹwhe tọn.+ 12  Dehe tin to alitó lẹ wẹ mẹhe ko sè, podọ enẹgodo Lẹgba wá bo ṣinyan ohó lọ sọn ahun yetọn mẹ, na yé ni ma do yise bo yin whinwhlẹngán blo.+ 13  Dehe tin to osé ji lẹ wẹ mẹhe, to whenue yé sè ohó lọ, yé yí ayajẹ do kẹalọyi i, ṣigba ehelẹ ma doadọ̀do. Yé yise na ojlẹ de, ṣigba yé jai to whenue whlepọn wá.+ 14  Na nuhe dù dehe flẹ jẹ owùn lẹ ṣẹnṣẹn, ehelẹ wẹ mẹhe sè, ṣigba na magbọjẹ, adọkunnu lẹ+ po gbẹdudu aihọn ehe tọn lẹ+ po duto yé ji wutu, yé yin kọgbidina mlẹnmlẹn bọ sinsẹ́n yetọn gboawupo nado whẹ́n.+ 15  Na nuhe dù dehe tin to aigba dagbe ji, ehelẹ wẹ mẹhe, to whenue yé ko yí ahun he yọ́n bosọ yin dagbe do sè ohó lọ godo,+ yé yí i hẹn bo yí akọndonanu do de sinsẹ́n tọ́n.+ 16  “Mẹdepope ma nọ tá miyọ́ngbán, bo nọ ṣinyọnnudo e kavi ze e do adọzan de glọ, ṣigba e nọ ze e do miyọ́ngbán-tin ji, na mẹhe to whégbè biọ lẹ nido sọgan mọ hinhọ́n.+ 17  Na nudepope ma tin to nuglọ he ma na wá yin didehia, mọdopolọ nudepope ma ko yin whiwhla po sọwhiwhe po he ma na wá yin yinyọnẹn bo yin hinhẹn jẹ gbangba.+ 18  Enẹwutu, mì payi lehe mì nọ dotoai do go, na mẹdepope he tindo, e na yin nina ẹn dogọ,+ ṣigba mẹdepope he ma tindo, yèdọ nuhe e tlẹ lẹndọ emi tindo na yin yíyí sọn e si.”+ 19  Todin, onọ̀ etọn po nọvisunnu etọn lẹ po+ ja e dè, ṣigba yé ma penugo nado wá e dè, na gbẹtọgun lọ wutu.+ 20  Enẹwutu, ewọ yin didọna dọmọ: “Onọ̀ towe po nọvisunnu towe lẹ po to ote to gbonu bo to jijlo nado mọ we.” 21  E gblọnna yé dọmọ: “Onọ̀ ṣie po nọvisunnu ṣie lẹ po wẹ omẹ ehelẹ he nọ sè ohó Jiwheyẹwhe tọn bo nọ basi i.”+ 22  To gbèdopo, ewọ po devi etọn lẹ po biọ tọjihun de mẹ, e sọ dọna yé dọmọ: “Mì gbọ mí ni dasá yì awà awetọ tándo lọ tọn ji.” Enẹwutu, yé súnhún.+ 23  Ṣigba, dile yé to yìyì, e damlọn. Podọ yujẹhọn sinsinyẹn de fọ́n to tándo lọ ji, osin sọ jẹ ohún yetọn gọ́ ji bọ yé tin to owù mẹ.+ 24  Enẹwutu, yé yì bo fọ́n ẹn bosọ dọmọ: “Nuplọnmẹtọ, Nuplọnmẹtọ, mí to na dọ̀n!” E sọ fọ́n bo gbẹnuna jẹhọn lọ po zingidi osin tọn lọ po, bọ yé nọ whii, bosọ nabọẹ.+ 25  Whenẹnu, e dọna yé dọmọ: “Fie wẹ yise mìtọn te?” Ṣigba, obu jẹ yé ji bọ awuji yé, yé sọ to didọna ode awetọ dọmọ: “Mẹnu wẹ ehe na taun tọn? Na e tlẹ nọ degbedo jẹhọn po osin po, bọ yé nọ setonuna ẹn.”+ 26  Yé sọ glinhún do huto to lẹdo Gelazeninu lẹ tọn mẹ,+ he pannukọn Galili. 27  Dile Jesu jẹte do agé, dawe de sọn tòdaho lọ mẹ he tindo gbigbọ aovi tọn lẹ wá pé e. Ewọ ma ko do avọ̀ na ojlẹ de, bo ma nọ nọ̀ whégbè, ṣigba yọdò* lẹ ṣẹnṣẹn.+ 28  To whenue e mọ Jesu, e dawhá bo jẹklo to nukọn etọn, bosọ yí ogbè lélé do dọmọ: “Etẹwẹ yẹn tindo nado wà hẹ we, hiẹ Jesu Visunnu Jiwheyẹwhe Gigogán lọ tọn? Yẹn vẹ̀ we, a sayana mi blo.”+ 29  (Na Jesu ko to gbededo gbigbọ mawé lọ nado tọ́njẹgbonu sọn dawe lọ mẹ. Gbigbọ mawé lọ ko ze e whlasusu,*+ podọ whlasusu wẹ yè ko yí gẹdẹ lẹ po afọgàn lẹ po do blá ẹ bo nọ to ṣiṣọ́ ẹ, ṣigba e nọ wẹ́n gẹdẹ lọ lẹ bo nọ yin anadena gbọn aovi lọ dali yì fihe to olá lẹ.) 30  Jesu kanse e dọmọ: “Nawẹ hiẹ nọ yin?” E dọmọ: “Awhànpa,” na aovi susu wẹ ko biọ ewọ mẹ wutu. 31  Podọ yé to vivẹ̀ ẹ mapote ma nado degbe dọ yé ni yì odò mapote mẹ.+ 32  Todin, pipli ohàn+ tọn daho de to núdù to finẹ to osó lọ ji, enẹwutu yé vẹ̀ ẹ nado dike yé ni biọ ohàn lọ lẹ mẹ, e sọ nagbè yé.+ 33  Whenẹnu, aovi lọ lẹ tọ́njẹgbonu sọn dawe lọ mẹ bo biọ ohàn lọ lẹ mẹ, pipli lọ sọ hozín yì pópló lọ tónu* bo flẹ jẹ tándo lọ mẹ bosọ siọ do osin mẹ. 34  Ṣigba, to whenue kanlinyìntọ lọ lẹ mọ nuhe jọ, yé họnyi bo yì na linlin to tòdaho lọ mẹ podọ to glètoho lọ mẹ. 35  Enẹgodo, gbẹtọ lẹ wá nado pọ́n nuhe jọ. Yé wá Jesu dè bo mọ dawe lọ he mẹ aovi lọ lẹ yin yinyan jẹgbonu sọn, e do avọ̀ bọ ayiha etọn ko gọwá, bọ e to aisinsin to afọ Jesu tọn lẹ kọ̀n, yé sọ gọ́ na obu. 36  Mẹhe mọ nuhe jọ lọ lẹ dọ lehe dawe he tindo gbigbọ aovi tọn dai lọ yin hinhẹn jẹgangan do na yé. 37  Enẹgodo, gbẹtọgun daho de he wá sọn lẹdo Gelazeninu lẹ tọn mẹ biọ to Jesu si nado yì sọn yé dè, na obu sinsinyẹn he jẹ yé ji lọ wutu. To whenẹnu, e biọ tọjihun lọ mẹ nado dedo. 38  Ṣigba, dawe he mẹ aovi lẹ ko tọ́njẹgbonu sọn lọ to vivẹ̀ ẹ mapote nado nọ zọnhẹ ẹ, ṣigba e do dawe lọ hlan, bo dọmọ:+ 39  “Lẹkọyi owhé towe gbè, bo nọ to nuhe Jiwheyẹwhe ko wà na we lẹ dọ.” Enẹwutu, e yì, bo to nuhe Jesu ko wà na ẹn lẹ lá lẹdo tòdaho lọ pete. 40  To whenue Jesu lẹkọwa, gbẹtọgun lọ lẹ yí homẹdagbe do yí i, na yemẹpo wẹ to nukundo e.+ 41  Ṣigba, pọ́n! dawe de he nọ yin Jailu wá; dawe ehe yin ogán sinagọgu tọn de. Ewọ sọ jẹklo to afọ Jesu tọn lẹ kọ̀n bo jẹ vivẹ̀ ẹ ji nado wá owhé etọn gbè,+ 42  na viyọnnu dopo akàn* etọn he yin owhe 12 mẹvi to kúdonu. Dile Jesu to yìyì, gbẹtọgun lọ lẹ to finfinyọ́n ẹn. 43  Todin, nawe de tin to finẹ he ko to hùndi+ sọn owhe 12 die gbọ́n bo ma ko penugo nado mọ pọngbọ sọn mẹdepope dè.+ 44  Nawe lọ dọnsẹpọ gbọn godo bo doalọ okẹ̀yẹ̀ awugbó etọn tọn go,+ hùndidi etọn sọ doalọte to afọdopolọji. 45  Enẹwutu, Jesu dọmọ: “Mẹnu wẹ doalọ go e?” To whenue yemẹpo to mimọ́n, Pita dọmọ: “Nuplọnmẹtọ, gbẹtọgun lọ lẹ wẹ to hihá do we bosọ to finfinyọ́n we.”+ 46  Ṣigba, Jesu dọmọ: “Mẹde doalọ go e, na yẹn mọdọ huhlọn+ tọ́n sọn go e.” 47  To whenue yọnnu lọ mọdọ yè ko doayi emi go, e wá bo to sisọsisọ bo jẹklo to nukọnna ẹn bosọ dọ to gbẹtọ lẹpo nukọn nuhewutu e doalọ e go podọ lehe e yin azọ̀nhẹngbọna to afọdopolọji do. 48  Ṣigba, e dọna ẹn dọmọ: “Viyọnnu ṣie, yise towe ko hẹn we jẹgangan. Yì to jijọho mẹ.”+ 49  Dile e gbẹ́ pò to hodọ, afọzedaitọ ogán sinagọgu tọn lọ tọn de wá, bo dọmọ: “Viyọnnu towe ko kú; a sọ dotukla Mẹplọntọ ba blo.”+ 50  To whenue Jesu sè ehe, e gblọnna ẹn dọmọ: “A dibu blo, saa ko tindo yise poun, ewọ nasọ yin whinwhlẹngán.”+ 51  To whenue e jẹ owhé lọ gbè, e ma dike mẹdepope ni hodo e biọ họmẹ adavo Pita, Johanu, Jakọbu gọna otọ́ po onọ̀ viyọnnu lọ tọn po. 52  Ṣigba, gbẹtọ lẹpo to avivi bo to awubla dohia, na viyọnnu lọ tọn wutu. Enẹwutu, e dọmọ: “Mì sọ viavi ba blo,+ na ewọ ma kú gba ṣigba amlọndọ wẹ e te.”+ 53  Enẹwutu, yé jẹ ṣinṣàn ẹn kò ji, na yé yọnẹn dọ e ko kú. 54  Ṣigba, e hẹn alọ etọn go bo ylọ ẹ bosọ dọmọ: “Ovi, fọ́n!”+ 55  Gbigbọ*+ etọn sọ gọ̀ biọ e mẹ, bọ e fọ́n to afọdopolọji,+ ewọ sọ degbe dọ nude ni yin nina ẹn nado dù. 56  Ayajẹ mẹjitọ etọn lẹ tọn sọ gọfla, ṣigba e dọna yé ma nado dọ nuhe jọ lọ na mẹdepope.+

Nudọnamẹ Odò Tọn

Kavi “yọdò oflin tọn.”
Kavi vlavo, “ko to tuklado e sinsinyẹn na ojlẹ dindẹn.”
Kavi “yì bẹbẹnu pópló lọ tọn.”
To paa mẹ, “detọ́n dopo akàn.”
Kavi “Huhlọn ogbẹ̀ tọn.”