Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 7:1-50

NUHE E BẸHẸN LẸ

  • Yise mẹkanwekowhàngán de tọn (1-10)

  • Jesu fọ́n visunnu asuṣiọsi de tọn sọnku to Naini (11-17)

  • Pipà nina Johanu Baptizitọ (18-30)

  • Whẹndo tasinyẹntọ de yin whẹgbledo (31-35)

  • Yọnnu ylandonọ de mọ jona yí (36-50)

    • Apajlẹ ahọ́tọnọ lẹ tọn (41-43)

7  To whenue e ko dọ nuhe e jlo na dọna gbẹtọ lẹ fó godo, e biọ Kapẹlnaumi.  Todin, afanumẹ vivẹ́ mẹkanwekowhàngán de tọn to azọ̀njẹ sinsinyẹn bo to kúdonu.+  To whenue e sè dogbọn Jesu dali, e do mẹho Ju lẹ tọn delẹ hlan e dè nado biọ to e si nado wá bo hẹn afanumẹ etọn jẹgangan.  Yé sọ wá Jesu dè bo jẹ vivẹ̀ ẹ ji vẹkuvẹku dọmọ: “Ewọ jẹna mẹhe hiẹ na wà ehe na,  na e yiwanna akọta mítọn podọ ewọ lọsu wẹ gbá sinagọgu lọ na mí.”  Enẹwutu, Jesu hodo yé. Ṣigba, to whenue e sẹpọ owhé lọ gbè, mẹkanwekowhàngán lọ ko do họntọn lẹ hlan nado dọna ẹn dọmọ: “Oklunọ, a jẹtukla blo, na yẹn ma jẹ na hiẹ nido biọ owhé ṣie gbè.+  Enẹwutu wẹ yẹn ma mọ dee taidi mẹhe jẹ nado wá dè we. Ṣigba dọho, bo dike devizọnwatọ ṣie ni yin azọ̀nhẹngbọna.  Na yẹnlọsu yin mẹde he tin to aṣẹpipa glọ, bo tindo awhànfuntọ lẹ to oglọ ṣie, bọ yẹn nọ dọna ode dọ, ‘Yì!’ ewọ sọ nọ yì, podọ na devo dọ, ‘Wá!’ ewọ sọ nọ wá, podọ na afanumẹ ṣie dọ, ‘Wà ehe!’ ewọ sọ nọ wà ẹ.”  Whenue Jesu sè ehelẹ, awuji i gando ewọ go, bọ e lẹhlan gbẹtọgun he to hihodo e lọ bo dọmọ: “Yẹn dọna mì dọ, yẹn ma ko mọ yise he klo sọmọ de, etlẹ yin to Islaeli.”+ 10  Podọ to whenue mẹhe yin didohlan lẹ lẹkọyi whégbè, yé mọdọ afanumẹ lọ ko jẹgangan.+ 11  To ehe godo tlolo, e zingbejizọnlin yì tòdaho de mẹ he nọ yin Naini, podọ devi etọn lẹ po gbẹtọgun daho de po to gbejizọnlinzin hẹ ẹ. 12  Dile e sẹpọ họngbo tòdaho lọ tọn, doayi e go! yé to oṣiọ dawe de tọn ze tọ́njẹgbonu, yèdọ visunnu dopo akàn* onọ̀ etọn tọn.+ Gbọnvona enẹ, asuṣiọsi de wẹ ewọ. Gbẹtọgun he yinukunkẹ de sọn tòdaho lọ mẹ sọ tin po yọnnu lọ po. 13  Whenue Oklunọ mọ ẹn, lẹblanu whàn ẹn,+ bọ e dọna yọnnu lọ dọmọ: “A viavi ba blo.”+ 14  To whenẹnu, e dọnsẹpọ bo doalọ apotinjan lọ go, mẹhe hẹn ẹn lẹ sọ ṣite guun. Enẹgodo, e dọmọ: “Dẹpẹ, yẹn dọna we, fọ́n!”+ 15  Oṣiọ lọ sọ fọ́n sinai bo jẹ hodọ ji, bọ Jesu ze e na onọ̀ etọn.+ 16  Todin, obu jẹ yemẹpo ji, yé sọ jẹ gigopana Jiwheyẹwhe ji, bo to didọmọ: “Yẹwhegán daho de ko yin zizedaga to ṣẹnṣẹn mítọn,”+ podọ “Jiwheyẹwhe ko lẹ́ ayidonugo etọn hlan omẹ etọn lẹ.”+ 17  Linlin he gando Jesu go ehe sọ gbayipe gbọn Jude lẹpo podọ to otò he lẹdo pé lẹpo mẹ. 18  Todin, devi Johanu tọn lẹ na ẹn linlin onú ehe lẹpo tọn.+ 19  Enẹwutu, Johanu ylọ awe to devi etọn lẹ mẹ bo do yé hlan Oklunọ dè nado kanse dọmọ: “Be hiẹ wẹ Mẹhe ja lọ+ ya, kavi be mí dona donukun mẹdevo wẹ?” 20  To whenue dawe lọ lẹ wá e dè, yé dọmọ: “Johanu Baptizitọ wẹ do mí hlan dè we nado kanse we dọ, ‘Be hiẹ wẹ Mẹhe ja lọ ya, kavi be mí dona donukun mẹdevo wẹ?’” 21  To gànhiho enẹ mẹ, e hẹn azọ̀n po azọ̀n sinsinyẹn lẹ po gbọ na mẹsusu+ bo yàn gbigbọ ylankan lẹ jẹgbonu, bosọ do nukundagbe hia nukuntọ́nnọ susu bọ yé mọnú. 22  E gblọnna yé dọmọ: “Mì yì, bo dọ nuhe mì mọ bo sè lẹ na Johanu: Nukuntọ́nnọ lẹ to numọ todin,+ sẹkunọ lẹ to zọnlinzin, pòtọnọ lẹ to yinyin kiklọ́we, tókunọ lẹ to núsè,+ oṣiọ lẹ to yinyin finfọn, bọ wẹndagbe lọ to yinyin lilá hlan wamọnọ lẹ.+ 23  Ayajẹnọ wẹ mẹhe ma mọ ahlidanu de to yẹn mẹ.”+ 24  To whenue wẹnsagun Johanu tọn lẹ ko yì, Jesu jẹ hodọna gbẹtọgun lọ lẹ ji gando Johanu go dọmọ: “Etẹwẹ mìwlẹ tọ́nyi nado yì pọ́n to danfafa ji? Be ofán he jẹhọn to yigọyigọ-dona de wẹ ya?+ 25  Etẹwẹ mìwlẹ tọ́nyi nado yì mọ lo? Be dawe de he do awù wọ́dọ́wọ́dọ́ whanpẹnọ* lẹ wẹ ya?+ Yèdọ owhé ahọlu lẹ tọn gbè wẹ mẹhe nọ do avọ̀ whanpẹnọ bo nọ nọ̀ fẹẹmẹ lẹ nọ nọ̀. 26  To whelọnu lo, etẹwẹ mìwlẹ tọ́nyi nado yì mọ taun? Be yẹwhegán de wẹ ya? Mọwẹ, yẹn dọna mì dọ, ewọ tlẹ hú yẹwhegán de tlala.+ 27  Ewọ wẹ mẹhe go yè ko kanwe gando dọmọ: ‘Pọ́n! Yẹn to wẹnsagun ṣie dohlan jẹnukọnna we,* mẹhe na jẹnukọnna we nado jla aliho towe do.’+ 28  Yẹn dọna mì dọ, to mẹhe yin jiji sọn yọnnu dè lẹ mẹ, depope ma klohu Johanu, ṣigba mẹhe whè hú to Ahọluduta Jiwheyẹwhe tọn mẹ klohu ewọ.”+ 29  (Whenue gbẹtọ lẹpo po tòkuẹ-ṣinyantọ lẹ po sè ehe, yé lá Jiwheyẹwhe di dodonọ, na yé ko yin bibaptizi po baptẹm Johanu tọn po wutu.+ 30  Ṣigba, Falesi lẹ po mẹhe yọ́n Osẹ́n lọ ganji lẹ po gbẹkọ ayinamẹ* he Jiwheyẹwhe na yé lọ go,+ na yé ma ko yin bibaptizi gbọn ewọ dali wutu.) 31  “Enẹwutu, mẹnu go wẹ yẹn na yí omẹ whẹndo ehe tọn lẹ jlẹdo, podọ mẹnu wẹ yé taidi?+ 32  Yé taidi yọpọvu lẹ he to aisinsin to ahimẹ bo to awhádo hlan ode awetọ dọmọ: ‘Míwlẹ kúnván na mì, ṣigba mìwlẹ ma dúwe; míwlẹ doavihàn, ṣigba mì ma viavi.’ 33  Mọdopolọ, Johanu Baptizitọ wá bo ma nọ dù akla kavi nù ovẹn,+ ṣigba mìwlẹ dọ dọ: ‘Ewọ tindo aovi de.’ 34  Visunnu gbẹtọ tọn sọ wá bo to dùdù bosọ to nùnù, amọ́ mìwlẹ dọ dọ: ‘Mì pọ́n! Dawe adọ̀whẹnnọ de he jo ede na ovẹn nùnù, họntọn tòkuẹ-ṣinyantọ lẹ po ylandonọ lẹ po tọn!’+ 35  Etomọṣo, nuyọnẹn nọ yin didohia di dodonọ* gbọn ovi* etọn lẹpo dali.”+ 36  Todin, Falesi de to bibiọ to e si mapote nado wá dùnú hẹ ẹ. Enẹwutu, e biọ owhé Falesi lọ tọn gbè bo jagla to tafo kọ̀n. 37  Podọ pọ́n! nawe de he yin yinyọnẹn to tòdaho lọ mẹ nado yin ylandonọ sè dọ ewọ to núdù* to owhé Falesi lọ tọn gbè, yọnnu lọ sọ hẹn ogo alabasta tọn* de wá he mẹ amisisa owán gblingblinnọ tin te.+ 38  Dile e ṣite to godo to afọ etọn lẹ kọ̀n, e to avivi bo jẹ dasin etọn lẹ kùn do afọ etọn lẹ go ji, bosọ nọ yí oda he to ota etọn lẹ do súnsún in sẹ̀. Humọ, e to nùdo afọ etọn lẹ go magbọjẹ bo jẹ amisisa owán gblingblinnọ lọ kọ̀n do afọ etọn lẹ go ji. 39  To whenue Falesi he basi oylọna ẹn mọ ehe, e dọ to ede mẹ dọmọ: “Eyin dawe ehe yin yẹwhegán de nugbonugbo, e na ko yọ́n nawe he to alọ do e go lọ podọ mẹhe nkọ ewọ yin, dọ ylandonọ de wẹ.”+ 40  Ṣigba, Jesu gblọnna ẹn dọmọ: “Simọni, yẹn tindo nude nado dọna we.” E dọna ẹn dọmọ: “Mẹplọntọ, dọ ẹ!” 41  “Dawe awe duahọ do akuẹ-yannamẹtọ de; dopo duahọ denali* 500 tọn, ṣigba awetọ dù 50. 42  To whenue yé ma tindo nudepope he yé na yí do suahọ ẹ, ewọ jona yé sọn ojlo mẹ wá. Enẹwutu, mẹnu to yé mẹ wẹ na yiwanna ẹn hugan?” 43  Simọni gblọn dọmọ: “Yẹn lẹndọ mẹhe ewọ jo susu na lọ wẹ.” E dọna ẹn dọmọ: “Hiẹ gblọn ganji.” 44  To whenẹnu, e lẹhlan nawe lọ bo dọna Simọni dọmọ: “Hiẹ mọ nawe ehe ya? Yẹn biọ owhé towe gbè; hiẹ ma na mi osin na afọ ṣie lẹ. Ṣigba, nawe ehe kùn dasin etọn lẹ do afọ ṣie lẹ go bo yí oda etọn do súnsún in sẹ̀. 45  Hiẹ ma donùnùgo na mi, ṣigba nawe ehe, sọn whenue gbọ́n yẹn biọ họmẹ, e to nùdo afọ ṣie lẹ go madoalọte. 46  Hiẹ ma kọ̀n amisisa do ota na mi, ṣigba nawe ehe kọ̀n amisisa owán gblingblinnọ do afọ ṣie lẹ go. 47  Na ehe wutu, yẹn dọna we dọ, ylando etọn lẹ, dile yé tlẹ sù* sọ, yé ko yin jijona ẹn.+ Enẹwutu wẹ ewọ nọ do owanyi susu hia. Ṣigba, ewọ he vude yin jijona, nọ do owanyi vude hia.” 48  To whenẹnu, e dọna yọnnu lọ dọmọ: “Ylando towe lẹ ko yin jijona we.”+ 49  Mẹhe jagla to tafo kọ̀n hẹ ẹ lẹ jẹ didọ ji to yedelẹ ṣẹnṣẹn dọmọ: “Mẹnu wẹ dawe ehe, he tlẹ nọ jo ylando lẹ namẹ?”+ 50  Ṣigba, e dọna nawe lọ dọmọ: “Yise towe ko whlẹn we gán;+ yì to jijọho mẹ.”

Nudọnamẹ Odò Tọn

To paa mẹ, “detọ́n dopo akàn.”
Kavi “avọ̀ dagbedagbe.”
To paa mẹ, “nukọn towe.”
Kavi “anademẹ.”
Kavi “yin whẹsuna.”
Kavi “kọdetọn.”
Kavi “jagla to tafo kọ̀n.”
Enẹ wẹ, ogo pẹvide he yè nọ yí zannu he nọ yin mimọ sẹpọ Alabastron to Egipti do basi.
Pọ́n Nud. B14.
Kavi “klo.”