Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 5:1-39

NUHE E BẸHẸN LẸ

  • Whèvi wiwle gbọn azọ́njiawu dali; devi tintan lẹ (1-11)

  • Pòtọnọ de yin azọ̀nhẹngbọna (12-16)

  • Jesu gbọazọ̀nna awukuzọ̀njẹtọ (17-26)

  • Jesu ylọ Levi (27-32)

  • Kanbiọ gando nùbibla go (33-39)

5  To ojlẹ de mẹ, to whenuena gbẹtọgun lọ to finfinyọ́n ẹn bo to todoaina ohó Jiwheyẹwhe tọn, ewọ to ote to tándo Genezalẹti tọn* tó.+  Ewọ sọ mọ tọjihun awe glin do tándo lọ tó, ṣigba whèhutọ lọ lẹ ko tọ́n sọn yé mẹ bo to odọ̀ yetọn lẹ klọ́.+  To whenue e biọ dopo to tọjihun lọ lẹ mẹ, ehe yin Simọni tọn, e dọna ẹn nado sẹ̀ ohún lọ sọn agé vude. Enẹgodo, e sinai bo jẹ gbẹtọgun lọ lẹ plọn ji sọn tọjihun lọ mẹ.  To whenue e doalọtena hodidọ, e dọna Simọni dọmọ: “Sẹ̀ ohún lọ yì fihe siso, na mì ni yìn odọ̀ mìtọn lẹ nado wle whèvi.”  Ṣigba, Simọni gblọn dọmọ: “Nuplọnmẹtọ, ozán lọ pete wẹ mí ko yí do jẹtukla bo ma wle nudepope,+ ṣigba na hiẹ degbe wutu, yẹn na yìn odọ̀ lọ lẹ.”  Podọ to whenue yé wà ehe, yé wle whèvi susugege. Na taun tọn, odọ̀ yetọn lẹ jẹ tintlẹ́n ji.+  Enẹwutu, yé mìalọ hlan hagbẹ yetọn he to tọjihun awetọ lọ mẹ lẹ nado wá gọalọna yé, yé sọ wá, podọ whèvi lọ lẹ gọ́ tọjihun awe lọ lẹ, sọmọ bọ yé jẹ sisiọ ji.  To whenue Simọni Pita mọ ehe, e jẹklo to Jesu nukọn bo dọmọ: “Yì sọn dè e, Oklunọ, na ylandonọ de wẹ yẹn.”  Na whèvi he yé wle lọ lẹ wutu, avò daho vò ewọ po mẹhe tin to finẹ hẹ ẹ lẹ po, 10  gọna Jakọbu po Johanu po ga, he yin visunnu Zebede tọn lẹ,+ yèdọ azọ́nwatọgbẹ́ Simọni tọn lẹ. Ṣigba, Jesu dọna Simọni dọmọ: “A dibu ba blo. Na sọn din sọyi, hiẹ na nọ wle gbẹtọ lẹ gbẹ̀te.”+ 11  Enẹwutu, yé hẹn tọjihun lọ gọwá agé bo jo nulẹpo do bosọ hodo e.+ 12  To ojlẹ devo mẹ, to whenue e tin to dopo to tòdaho lọ lẹ mẹ, pọ́n! dawe he to pòzọ̀n sinsinyẹn jẹ de tin to finẹ! To whenue e mọ Jesu, e ṣinyọ́n nukunmẹ ai bo vẹ̀ ẹ dọmọ: “Oklunọ, eyin hiẹ jlo domọ, hiẹ sọgan hẹn mi zun wiwe.”+ 13  Enẹwutu, e dlẹnalọ etọn, bo doalọ dawe lọ go, bosọ dọmọ: “Yẹn jlo! Yin hinhẹn zun wiwe.” To afọdopolọji, pòzọ̀n lọ busẹ sọn e go.+ 14  Enẹgodo, e gbẹ́ na dawe lọ ma nado dọna mẹdepope bo dọna ẹn dọmọ: “Ṣigba, yì bo do dewe hia yẹwhenọ, bosọ basi avọ́nunina de na klọ́we towe, kẹdẹdile Mose ko degbe etọn do,+ taidi kunnudide de hlan yé.”+ 15  Ṣigba, linlin etọn to gbigbayipe dogọ, bọ gbẹtọgun daho lẹ nọ wá pli dopọ nado dotoai podọ nado yin azọ̀nhẹngbọna.+ 16  Ṣigba, e nọ saba yì fihe to olá lẹ bo nọ yì hodẹ̀. 17  Dile e to mẹplọn to gbèdopo, Falesi lẹ po Osẹ́n plọnmẹtọ lẹ po he wá sọn gbétatò Galili tọn, Jude tọn gọna Jelusalẹm lẹpo mẹ to aisinsin to finẹ; podọ huhlọn Jehovah* tọn tin to ewọ ji nado hẹnazọ̀ngbọnamẹ.+ 18  Bo pọ́n! gbẹtọ lẹ hẹn dawe he to awukuzọ̀n jẹ de do adọzan de ji, podọ yé to tintẹnpọn nado hẹn ẹn wá Jesu dè bo ze e do nukọn etọn.+ 19  Enẹwutu, to whenue yé ma mọ aliho de nado hẹn ẹn wá e dè, na gbẹtọgun lọ tọn wutu, yé hẹ aga yì ohọ̀ lọ ta, bo hẹn ẹn jẹte to adọzan de ji gbọn ozà-nùvo lọ mẹ do mẹhe tin to Jesu nukọn lẹ ṣẹnṣẹn tlọlọ. 20  To whenue e mọ yise yetọn, e dọmọ: “Dawe, ylando towe lẹ ko yin jijona we.”+ 21  Whenẹnu, wekantọ lẹ po Falesi lẹ po jẹ linlẹn ji dọmọ: “Mẹnu wẹ ehe, he to nùzan? Mẹnu wẹ sọgan jo ylando lẹ namẹ adavo Jiwheyẹwhe kẹdẹ?”+ 22  Ṣigba, na Jesu yọ́n linlẹn yetọn wutu, e gblọnna yé dọmọ: “Etẹ lẹn wẹ mìwlẹ te to ahun mìtọn mẹ? 23  Detẹ wẹ bọawu hugan, nado dọ dọ, ‘Ylando towe lẹ yin jijona we,’ kavi nado dọ dọ, ‘Fọ́n bo zinzọnlin’? 24  Ṣigba, na mìwlẹ nido yọnẹn dọ Visunnu gbẹtọ tọn tindo aṣẹ to aigba ji nado jo ylando lẹ namẹ—” e dọna awukuzọ̀njẹtọ lọ dọmọ: “Yẹn dọna we dọ, Fọ́n, ze adọzan towe, bo yì owhé towe gbè.”+ 25  Whenẹnu, e fọnṣite to nukọn yetọn, bo ze nuhe ji e mlọnai do dai bosọ yì owhé etọn gbè, bo to gigopana Jiwheyẹwhe. 26  Whenẹnu, e paṣa gbẹtọ lọ lẹpo bọ yé jẹ gigopana Jiwheyẹwhe ji, yé sọ gọ́ na obu bo dọmọ: “Mí mọ nujiawu lẹ to egbé!” 27  Todin, to ehe godo, e tọ́njẹgbonu bo mọ tòkuẹ-ṣinyantọ de he nọ yin Levi to aisinsin to tòkuẹ-ṣinyantẹn, e sọ dọna ẹn dọmọ: “Lẹzun hodotọ ṣie.”+ 28  Ewọ sọ jo nulẹpo do, bo fọ́n bosọ jẹ hihodo e ji. 29  Enẹgodo, Levi wleawuna hùnwhẹ jonọyiyi tọn daho de na ẹn to owhé etọn gbè, podọ tòkuẹ-ṣinyantọ susu lẹ po mẹdevo lẹ po sọ to finẹ bo to núdù* hẹ yé.+ 30  To whenẹnu, Falesi lẹ po wekantọ yetọn lẹ po jẹ hùnhlún ji na devi etọn lẹ dọmọ: “Naegbọn mìwlẹ nọ dù bo nọ nù hẹ tòkuẹ-ṣinyantọ lẹ po ylandonọ lẹ po?”+ 31  Jesu gblọnna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.+ 32  Yẹn ma wá nado ylọ dodonọ lẹ gba, adavo ylandonọ lẹ hlan lẹnvọjọ kọ̀n.”+ 33  Yé dọna ẹn dọmọ: “Devi Johanu tọn lẹ nọ blanù gbọzangbọzan bo nọ basi ovẹvivẹ lẹ, mọjanwẹ Falesi lẹ tọn lọsu nọ wà do, ṣigba towe lẹ nọ dù bo nọ nù.”+ 34  Jesu dọna yé dọmọ: “Mì ma sọgan hẹn họntọn asisunọ yọyọ tọn lẹ nado blanù to whenue asisunọ yọyọ lọ tin to yé dè, kavi mì sọgan wàmọ wẹ? 35  Ṣigba na taun tọn, azán lẹ ja bọ yè na yí asisunọ yọyọ lọ+ sọn yé dè; whenẹnu wẹ yé na blanù to azán enẹlẹ gbè.”+ 36  Ewọ sọ na yé apajlẹ de dọmọ: “Mẹde ma nọ sán avọ̀nu sọn awugbó yọyọ de go bo nọ tọ̀ ẹ do awù hoho de go gba. Eyin e wàmọ, whenẹnu avọ̀nu yọyọ lọ nọ tlẹ́n awù hoho lọ bọ avọ̀nu awugbó yọyọ lọ tọn ma nọ sọgbe hẹ hoho lọ.+ 37  Mọdopolọ, mẹde ma nọ kọ̀n ovẹn yọyọ do ayúgò hoho lẹ mẹ gba. Eyin e wàmọ, ovẹn yọyọ na là ayúgò lọ lẹ, podọ ovẹn lọ na kọnyingbe bọ ayúgò lọ lẹ na gble. 38  Ṣigba, ayúgò yọyọ lẹ mẹ wẹ ovẹn yọyọ dona yin kinkọ̀n do. 39  Mẹdepope he nù ovẹn hoho ma nọ jlo yọyọ gba, na e nọ dọ, ‘Hoho lọ yọ́n hú.’”

Nudọnamẹ Odò Tọn

Enẹ wẹ, Ohù Galili tọn.
Pọ́n Nud. A5.
Kavi “jagla to tafo kọ̀n.”