Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 22:1-71

NUHE E BẸHẸN LẸ

  • Yẹwhenọ lẹ blasé nado hù Jesu (1-6)

  • Awuwiwlena Juwayi godo tọn lọ (7-13)

  • Tenu-Núdùdù Oklunọ tọn (14-20)

  • “Mẹdehiatọ ṣie to tafo kọ̀n hẹ mi” (21-23)

  • Nudindọn do kiklo-yinyin ji (24-27)

  • Jesu basi alẹnu ahọluduta tọn de (28-30)

  • E yin didọ dọ Pita na mọ́n Jesu (31-34)

  • Nuhudo nado wleawudai; ohí awe (35-38)

  • Odẹ̀ Jesu tọn to Osó Olivie tọn ji (39-46)

  • Jesu yin wiwle (47-53)

  • Pita mọ́n Jesu (54-62)

  • Jesu yin ṣinṣanko (63-65)

  • To Whẹdatẹn Daho Ju lẹ tọn nukọn (66-71)

22  Todin, Hùnwhẹ Akla Madotọ́n tọn, he yè nọ ylọdọ Juwayi+ to sisẹpọ.+  Yẹwhenọgán lẹ po wekantọ lẹ po sọ to aliho he yọ́n hugan de dín nado de e sẹ̀ sọn aimẹ,+ na yé dibusi gbẹtọ lẹ wutu.+  To whenẹnu, Satani biọ Juda, he nọ yin Iskaliọti mẹ, mẹhe yin dopo to Omẹ Wiawe lẹ mẹ,+  ewọ sọ tọ́nyi bo dọho hẹ yẹwhenọgán lẹ po ogán tẹmpli-ṣọ́tọ lẹ tọn po gando lehe e na de e hia na yé do go.+  Homẹ yetọn hùn na ehe wutu, bọ yé kọngbedopọ nado na ẹn fataka-kuẹ.+  Enẹwutu, e kẹalọyi bo jẹ dotẹnmẹ hundote dagbe de dín ji nado de e hia na yé to fie gbẹtọgun de ma te.  Todin, azán tintan Hùnwhẹ Akla Madotọ́n tọn wá, whenue avọ́sinsan Juwayi tọn lọ dona yin bibasi;+  enẹwutu Jesu do Pita po Johanu po hlan bo dọmọ: “Mì yì bo wleawuna Juwayi lọ, na mí nido sọgan dù.”+  Yé dọna ẹn dọmọ: “Fie wẹ hiẹ jlo dọ mí ni wleawu etọn do?” 10  E dọna yé dọmọ: “Mì pọ́n! To whenue mì biọ tòdaho lọ mẹ, dawe de he hẹn tọ̀zẹ́n osin tọn de na pé mì. Mì hodo e yì owhé he gbè e na biọ.+ 11  Mì sọ dọna whétọ owhé lọ tọn dọ, ‘Mẹplọntọ lọ dọmọ: “Fie wẹ abò jonọyiyi tọn lọ he mẹ yẹn sọgan dù Juwayi hẹ devi ṣie lẹ te?”’ 12  Dawe enẹ nasọ do abò aga tọn daho de he ko yin jijlado hia mì. Mì wleawu etọn do finẹ.” 13  Enẹwutu, yé tọ́nyi bo mọ kẹdẹdile e ko dọna yé do, yé sọ wleawuna Juwayi lọ. 14  Enẹwutu, to whenue ojlẹ lọ sọ̀, e jagla to tafo kọ̀n po apọsteli etọn lẹ po.+ 15  E sọ dọna yé dọmọ: “E jlo mi taun nado dù Juwayi ehe hẹ mì whẹpo yẹn nido jiya; 16  na yẹn dọna mì dọ, yẹn ma nasọ dù i hẹ mì ba kaka e nado yin hinhẹndi to Ahọluduta Jiwheyẹwhe tọn mẹ.” 17  Podọ to whenue e yí kọfo de, e dopẹ́ bo dọmọ: “Dopodopo mìtọn ni yí ehe bo nù sọn e mẹ, 18  na yẹn dọna mì dọ, sọn din sọyi, yẹn ma nasọ nù sọn sinsẹ́n ovẹn tọn mẹ hẹ mì ba kaka Ahọluduta Jiwheyẹwhe tọn nado wá.” 19  Mọdopolọ, e yí akla de,+ bo dopẹ́, bosọ wẹ́n ẹn, bo yí i na yé bosọ dọmọ: “Ehe nọtena agbasa ṣie+ he na yin nina do ota mìtọn mẹ.+ Mì nọ wà ehe to oflin ṣie mẹ.”+ 20  Humọ, e sọ wà nudopolọ gando kọfo lọ go, to whenue yé ko dù tenu-núdùdù lọ godo bo dọmọ: “Kọfo ehe nọtena alẹnu yọyọ lọ+ to dodonu ohùn ṣie tọn ji,+ he na yin kinkọndai do ota mìtọn mẹ.+ 21  “Ṣigba, mì pọ́n! mẹdehiatọ ṣie to tafo kọ̀n hẹ mi.+ 22  Na nugbo tọn, Visunnu gbẹtọ tọn jei kẹdẹdile yè ko magbe etọn do;+ ṣigba dindọn hlan dawe enẹ he de e hia!”+ 23  Enẹwutu, yé jẹ kinkanbiọ to yedelẹ ṣẹnṣẹn ji nado yọ́n mẹhe sọgan wà ehe to yé mẹ taun.+ 24  Ṣigba, nudindọn sinsinyẹn de fọ́n to yé ṣẹnṣẹn gando mẹhe klohugan to yé mẹ go.+ 25  Amọ́, e dọna yé dọmọ: “Ahọlu akọta lẹ tọn lẹ nọ duklunọ do yé ji, podọ mẹhe tindo aṣẹ do yé ji lẹ nọ yin yiylọdọ Dagbewatọ lẹ.+ 26  Nalete, e ma dona yinmọ na mìwlẹ.+ Ṣigba, mì gbọ mẹhe klohugan to mì ṣẹnṣẹn ni lẹzun pẹvi pete,+ podọ mẹhe yin nukọntọ ni lẹzun mẹhe to lizọnyi. 27  Na mẹnu wẹ klohu, mẹhe to núdù* kavi mẹhe to lizọnyi?* Be e ma yin mẹhe to núdù* lọ wẹ? Etomọṣo, yẹn tin to mì ṣẹnṣẹn taidi mẹhe to lizọnyi.*+ 28  “Ṣigba, mìwlẹ wẹ mẹhe ko gbọṣi dè e+ to whlepọn ṣie lẹ mẹ;+ 29  podọ yẹn basi alẹnu ahọluduta tọn de hẹ mì, kẹdẹdile Otọ́ ṣie ko basi alẹnu de hẹ mi do,+ 30  na mì nido dù bo nù to tafo ṣie ji to Ahọluduta ṣie mẹ,+ bosọ sinai to ofìn lẹ ji+ nado dawhẹna hẹnnu 12 Islaeli tọn lẹ.+ 31  “Simọni, Simọni, pọ́n! Satani ko biọgbè nado jàn mìmẹpo di likun.+ 32  Ṣigba, yẹn ko basi ovẹvivẹ do ota towe mẹ na yise towe nikaa miọn;+ podọ hiẹ, tlolo he a lẹkọ, hẹn mẹmẹsunnu towe lẹ lodo.”+ 33  To whenẹnu, e dọna ẹn dọmọ: “Oklunọ, yẹn wleawufo nado hodo we yì gànpamẹ podọ yì okú.”+ 34  Ṣigba, e dọmọ: “Pita, yẹn dọna we dọ, koklo ma na ko dosé to egbé whẹpo hiẹ nado mọ́n whla atọ̀n dọ a ma yọ́n mi.”+ 35  E sọ dọna yé dọmọ: “Whenuena yẹn do mì hlan matin sẹgẹ akuẹ tọn, aglò núdùdù tọn po afọpa po,+ mì ma jẹdò nudepope tọn, kavi mì jẹdò yetọn wẹ?” Yé dọmọ: “Lala!” 36  To whenẹnu, e dọna yé dọmọ: “Ṣigba todin, mì gbọ mẹhe tindo sẹgẹ akuẹ tọn de ni ze e, mọdopolọ, aglò núdùdù tọn de, podọ mì gbọ mẹhe ma tindo ohí de ni sà awugbó etọn bo họ̀ ode. 37  Na yẹn dọna mì dọ, nuhe yin kinkandai dona yin hinhẹndi to yẹn mẹ, dọmọ, ‘E yin hihia dopọ hẹ sẹ́nhẹngbatọ lẹ.’+ Na ehe to yinyin hinhẹndi gando yẹn go.”+ 38  To whenẹnu, yé dọmọ: “Oklunọ, pọ́n! ohí awe die.” E dọna yé dọmọ: “E ko pé.” 39  To whenue e dedo, e yì Osó Olivie tọn ji dile e ko yin aṣa etọn do, devi lẹ lọsu sọ hodo e.+ 40  To whenue e jẹ finẹ, e dọna yé dọmọ: “Mì nọ hodẹ̀, na mì nikaa biọ whlepọn mẹ.”+ 41  Ewọ sọ sẹyì olá na nudi zannu dindlan dopo sọn yé dè, bo jẹklo bosọ jẹ dẹ̀ho ji, 42  dọmọ: “Otọ́, eyin hiẹ jlo, de kọfo ehe sọn dè e. Ṣogan, a dike e yin ojlo ṣie blo, ṣigba towe ni yin wiwà.”+ 43  To whenẹnu, angẹli de sọn olọn mẹ sọawuhia ẹ bo hẹn ẹn lodo.+ 44  Ṣigba, e tin to ayimajai sinsinyẹn mẹ sọmọ bọ e zindonukọn to dẹ̀hiho vẹkuvẹku mẹ;+ odẹ́n etọn sọ taidi kùnkùn ohùn tọn he to kinkọ̀n do aigba. 45  To whenue e ko hodẹ̀ fó, e yì devi etọn lẹ dè bo mọ yé to amlọngọsa, na awubla sinsinyẹn wutu.+ 46  E sọ dọna yé dọmọ: “Naegbọn mì to amlọndọ? Mì fọ́n bo nọ to dẹ̀ho, na mì nikaa biọ whlepọn mẹ.”+ 47  Dile e gbẹ́ pò to hodọ, pọ́n! gbẹtọgun de, podọ dawe lọ he nọ yin Juda, dopo to Omẹ Wiawe lẹ mẹ to nukọnna yé ja, ewọ sọ dọnsẹpọ Jesu bo donùnùgo na ẹn.+ 48  Ṣigba, Jesu dọna ẹn dọmọ: “Juda, nùdonùgo wẹ hiẹ yí do to Visunnu gbẹtọ tọn dehia ya?” 49  To whenue mẹhe lẹdo e pé lẹ mọ nuhe to na jọ, yé dọmọ: “Oklunọ, mí ni hú ohí mẹ wẹ ya?” 50  Dopo to yé mẹ tlẹ hú ohí afanumẹ yẹwhenọ daho lọ tọn bo pà otó adusiwhé tọn na ẹn.+ 51  Ṣigba, Jesu gblọn dọmọ: “E pé.” E sọ doalọ otó lọ go bo hẹn ẹn jẹgangan. 52  Enẹgodo, Jesu dọna yẹwhenọgán lẹ po ogán tẹmpli-ṣọ́tọ lẹ tọn po gọna mẹho he dín in wá finẹ lẹ dọmọ: “Be yẹn gbé wẹ mìwlẹ tọ́n wá bo hẹn ohí lẹ po aglọpò lẹ po taidi mẹhe ja jaguda de dè ya?+ 53  To whenue yẹn tin po mì po egbesọegbesọ to tẹmpli mẹ,+ mìwlẹ ma dealọ mìtọn nado wle mi.+ Ṣigba, ojlẹ mìtọn po ojlẹ aṣẹpipa zinvlu tọn po wẹ sọ̀.”+ 54  To whenẹnu, yé wle e bo plan ẹn yì+ bosọ hẹn ẹn yì owhé yẹwhenọ daho tọn gbè; ṣigba Pita to hihodo e to aganu.+ 55  To whenue yé flọ miyọ́n to ṣẹnṣẹn awánu lọ tọn bo sinai dopọ, Pita lọsu to aisinsin to yé mẹ.+ 56  Ṣigba, deviyọnnu de mọ ẹn to aisinsin to hinhọ́n miyọ́n he to jiji lọ tọn nù bo pọ́n ẹn tlintlin bosọ dọmọ: “Dawe ehe lọsu nọ zọnhẹ ẹ.” 57  Ṣigba, e mọ́n bo dọmọ: “Nawe, yẹn ma yọ́n ewọ.” 58  To ojlẹ vude godo, mẹdevo mọ ẹn bo dọmọ: “Hiẹ lọsu yin dopo to yé mẹ.” Ṣigba, Pita dọmọ: “Dawe, yẹn ma yin dopo to yé mẹ.”+ 59  Podọ to whenue nudi gànhiho dopo ko juwayi, dawe devo sọ tẹkudeji sinsinyẹn dọmọ: “Matin ayihaawe, dawe ehe lọsu nọ zọnhẹ ẹ, na, nado dọ hójọhó, Galilinu de wẹ ewọ!” 60  Ṣigba, Pita dọmọ: “Dawe, yẹn ma yọ́n nuhe dọ a te.” Podọ to afọdopolọji, dile e gbẹ́ pò to hodọ, koklo dosé. 61  Whenẹnu, Oklunọ lilẹ́ bo pọ́n Pita hlan tlintlin, Pita sọ flin nuhe Oklunọ ko dọ to whenue e dọna ẹn dọmọ: “Whẹpo koklo na dosé to egbé, hiẹ na mọ́n mi whla atọ̀n.”+ 62  E sọ tọ́njẹgbonu bo viavi vivẹvivẹ. 63  Todin, mẹhe wle Jesu lẹ jẹ yíyí i do davlẹ ji,+ bo nọ linú in;+ 64  podọ to whenue yé ko ṣinyọnnudo nukunmẹ na ẹn godo, yé nọ kanse e dọmọ: “Dọ dọdai! Mẹnu wẹ linú we?” 65  Yé sọ dọ ohó nùzinzan tọn susu devo lẹ do e go. 66  To whenue ai ko họ́n, pipli mẹho lẹ tọn, yèdọ yẹwhenọgán lẹ po wekantọ lẹ po pli dopọ,+ yé sọ plan ẹn yì fihe hagbẹ Whẹdatẹn Daho Ju lẹ tọn* nọ pli do, bo dọmọ: 67  “Dọna mí, eyin hiẹ wẹ Klisti lọ.”+ Ṣigba, e dọna yé dọmọ: “Eyin yẹn tlẹ dọna mì, mì ma kúkú na yí i sè. 68  Humọ, eyin yẹn kannubiọ mì, mì ma kúkú na na gblọndo. 69  Ṣigba, bẹsọn din, Visunnu gbẹtọ tọn+ na sinai to adusilọ huhlọnnọ Jiwheyẹwhe tọn mẹ.”+ 70  Enẹwutu, yemẹpo dọmọ: “To whelọnu lo, be Visunnu Jiwheyẹwhe tọn wẹ hiẹ?” E dọna yé dọmọ: “Mìlọsu wẹ to didọ dọ yẹn yinmọ.” 71  Yé dọmọ: “Naegbọn mí gbẹ́ to kunnudenu dín dogọ? Na mílọsu ko sè sọn onù etọn titi mẹ.”+

Nudọnamẹ Odò Tọn

Kavi “jagla to tafo kọ̀n.”
Kavi “devizọnwa.”
Kavi “jagla to tafo kọ̀n.”
Kavi “devizọnwa.”
To paa mẹ, “Sanhedlin.” Pọ́n Zẹm.