Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 21:1-38

NUHE E BẸHẸN LẸ

  • Abọgan-kuẹ awe asuṣiọsi wamọnọ lọ tọn (1-4)

  • OHIA NUHE JA LẸ TỌN (5-36)

    • Awhàn, aigba sisọsisọ daho, azọ̀nylankan po huvẹ po (10, 11)

    • Awhànpa lẹ lẹdo Jelusalẹm (20)

    • Ojlẹ dide akọta lẹ tọn (24)

    • Visunnu gbẹtọ tọn ja (27)

    • Apajlẹ ovòtin tọn lọ (29-33)

    • Mì nọ họ́ mìde (34-36)

  • Jesu plọnnumẹ to tẹmpli mẹ (37, 38)

21  Todin, dile e ze nukun etọn daga, e mọ adọkunnọ lẹ to nunina yetọn lẹ dlan do adọkun potin lọ lẹ mẹ.+  To whenẹnu, e mọ asuṣiọsi wamọnọ de dlan abọgan-kuẹ flinflin awe,* he ma họakuẹ sọmọ do e mẹ,+  e sọ dọmọ: “Nugbo wẹ yẹn dọna mì dọ, asuṣiọsi wamọnọ ehe dlan do e mẹ hú lehe yemẹpo basi do.+  Na omẹ ehe lẹpo dlan nunina lẹ do e mẹ sọn lánkan yetọn lẹ mẹ, ṣigba ewọ, sọn matindo* etọn mẹ, dlan nutindo gbẹ̀mẹ tọn etọn lẹpo do e mẹ.”+  Enẹgodo, dile mẹdelẹ to hodọ gando lehe yè yí zannu dagbedagbe lẹ po nuhe yin kinklandowiwe lẹ po do doaṣọ́na tẹmpli lọ do go,+  e dọmọ: “Onú ehelẹ he mì to mimọ todin, azán lẹ na wá bọ zannu de ma na yin jijodo zannu de ji he ma na yin hihọliai.”+  To whenẹnu, yé kanse e dọmọ: “Mẹplọntọ, whetẹnu wẹ onú ehelẹ na jọ taun, podọ etẹwẹ na yin ohia whenue onú ehelẹ na jọ tọn?”+  E dọmọ: “Mì payi dọ mì yin hinhẹn buali blo,+ na mẹsusu wẹ na wá to oyín ṣie mẹ, bo na to didọmọ, ‘Yẹn wẹ ewọ,’ podọ, ‘Ojlẹ sisọ lọ ko sẹpọ.’ Mì hodo yé blo.+  Humọ, to whenue mì sè dogbọn awhàn zingidi po bẹwlu* lẹ po dali, mì dibu blo. Na onú ehelẹ dona jọ whẹ́, ṣigba opodo lọ ma na wá to afọdopolọji.”+ 10  To whenẹnu, e dọna yé dọmọ: “Akọta na fọ́n do akọta ji,+ podọ ahọluduta do ahọluduta ji.+ 11  Aigba sisọsisọ daho lẹ na tin, núdùdù whèdomẹ lẹ po azọ̀nylankan lẹ po na tin sọn fide jẹ fide;+ podọ nujijọ dobu lẹ na tin, ohia daho lẹ nasọ tin sọn olọn. 12  “Ṣigba, jẹnukọnna onú ehe lẹpo, alọ gbẹtọ lẹ tọn na jẹ mì go bọ yé na dohomẹkẹn mì,+ bo na ze mì jo na sinagọgu lẹ po gànpa lẹ po. Mì na yin hinhẹn yì ahọlu lẹ po ayimatẹn-gán lẹ po nukọn, na oyín ṣie tọn wutu.+ 13  Ehe na hùn dotẹnmẹ dote na mì nado dekunnu. 14  Enẹwutu, mì magbe to ahun mìtọn mẹ jẹnukọn gando lehe mì na yiavùnlọ do go blo,+ 15  na yẹn na na mì ohó he mì na dọ podọ nuyọnẹn he nukundiọsọmẹtọ mìtọn lẹpo to pọmẹ ma na penugo nado diọnukunsọ kavi jẹagọdo.+ 16  Humọ, mì na yin zizejo* etlẹ yin gbọn mẹjitọ lẹ, nọvisunnu lẹ, hẹnnumẹ lẹ po họntọn lẹ po dali, bọ yé na hù delẹ to mì mẹ,+ 17  podọ gbẹtọ lẹpo na gbẹwanna mì, na oyín ṣie tọn wutu.+ 18  Ṣigba, dopo tata to oda he to ota na mì lẹ mẹ ma na dọ̀n.+ 19  Gbọn akọndonanu mìtọn dali wẹ mì na whlẹn ogbẹ̀ mìtọn gán.*+ 20  “Amọ́, to whenue mì mọ awhànpa lẹ lẹdo Jelusalẹm pé,+ whenẹnu mì ni yọnẹn dọ vọjijẹ etọn ko dọnsẹpọ.+ 21  Whenẹnu, mì gbọ mẹhe to Jude lẹ ni jẹ hinhọ̀n ji yì osó lẹ ji,+ mì gbọ mẹhe tin to Jelusalẹm lẹ ni tọ́n, podọ mì gbọ mẹhe to glètoho lẹ mẹ ni ma biọ e mẹ blo, 22  na azán whẹdida dodo tọn* wẹ ehelẹ yin, na nuhe yin kinkandai lẹpo nido sọgan yin hinhẹndi. 23  Dindọn hlan yọnnu he to ohò po dehe to anọ́ na ovi lẹ po to azán enẹlẹ gbè!+ Na ayimajai sinsinyẹn na tin to aigba lọ ji podọ homẹgble do akọta ehe ji. 24  Yé nasọ jai gbọn onù ohí tọn lẹ dali bo na yin hinhẹn zun kanlinmọ yì akọta lẹpo mẹ;+ podọ Jelusalẹm na yin afọtùn e ji gbọn akọta* lẹ dali kakajẹ whenue ojlẹ dide akọta* lẹ tọn na wá.+ 25  “Humọ, ohia lẹ na tin to owhè, osun po sunwhlẹvu lẹ po mẹ,+ bọ awufiẹsa akọta lẹ tọn na tin to aigba ji, bọ yé ma na yọ́n nuhe yé na wà, na gbigbó ohù tọn po adánjijẹ etọn po wutu. 26  Gbẹtọ lẹ nasọ nọ dakú na obu podọ na nukundido nuhe ja aigba ji lẹ tọn wutu, na huhlọn olọn tọn lẹ na yin whinwhàn. 27  To whenẹnu, yé nasọ mọ Visunnu gbẹtọ tọn+ ja to aslọ mẹ to huhlọn po gigo daho po mẹ.+ 28  Ṣigba, dile onú ehelẹ na jẹ jijọ ji, mì jlọ ṣite bo ze ota mìtọn daga, na whlẹngán mìtọn to sisẹpọ.” 29  Enẹwutu, e na apajlẹ de yé dọmọ: “Mì doayi ovòtin po atin he pò lẹpo po go.+ 30  To whenue yé jẹ amà jọ ji bọ mì mọ, mì nọ yọnẹn na mìde dọ alunlun ko sẹpọ todin. 31  Mọdopolọ mìwlẹ ga, to whenue mì mọ onú ehelẹ to jijọ, mì ni yọnẹn dọ Ahọluduta Jiwheyẹwhe tọn ko sẹpọ. 32  Nugbo wẹ yẹn dọna mì dọ, whẹndo ehe ma na juwayi to aliho depope mẹ kaka onú ehe lẹpo nado jọ.+ 33  Olọn po aigba po na juwayi, ṣigba ohó ṣie lẹ ma na juwayi to aliho depope mẹ.+ 34  “Ṣigba, mì payi mìde go ma nado yí dùdù zẹjlẹgo, nùnù zẹjlẹgo+ po magbọjẹ gbẹ̀mẹ tọn lẹ+ po do doagban pinpẹn na ahun mìtọn, bọ to ajiji mẹ, azán lọ na wá mì ji plaun 35  di omọ̀ de.+ Na e na wá mẹhe nọ nọ̀ nukunmẹ aigba tọn pete ji lẹpo ji. 36  Enẹwutu, mì nọ họ́ mìde+ bo nọ basi ovẹvivẹ+ to ojlẹ lẹpo mẹ na mì nido sọgan tindo kọdetọn dagbe to hinhọngán sọn onú ehe lẹpo he dona jọ lẹ mẹ, podọ na mì nido nọte to Visunnu gbẹtọ tọn nukọn.”+ 37  Enẹwutu, e nọ to mẹplọn to tẹmpli mẹ to okle, ṣigba to zánmẹ, e nọ tọ́nyi bo nọ nọ̀ osó he nọ yin Osó Olivie tọn ji. 38  Gbẹtọ lẹpo sọ nọ wá e dè to afọnnu fuu to tẹmpli mẹ nado sè ohó etọn.

Nudọnamẹ Odò Tọn

To paa mẹ, “lẹpta awe,” he nọtena mado 64 azọ́nkuẹ gbèdopo tọn. Pọ́n Nud. B14.
Kavi “ohẹ́n.”
Kavi “hunyanhunyan; zingidi.”
Kavi “didehia.”
Kavi “na mọ alindọn mìtọn yí.”
Kavi “azán ahọsuyi tọn.”
Kavi “Kosi.”
Kavi “Kosi.”