Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 16:1-31

NUHE E BẸHẸN LẸ

  • Apajlẹ họ̀nkọnsi mawadodonọ tọn (1-13)

    • “Nugbonọ to onú pẹvi pete mẹ” (10)

  • Osẹ́n lọ po Ahọluduta Jiwheyẹwhe tọn po (14-18)

  • Dawe adọkunnọ lọ po Lazalọsi po (19-31)

16  To enẹgodo, e sọ dọna devi lẹ dọmọ: “Dawe adọkunnọ de tindo họ̀nkọnsi* de, he yè sawhẹdokọna dọ e to nutindo etọn lẹ hẹngu.  Enẹwutu, e ylọ ẹ bo dọmọ, ‘Etẹ die he yẹn to sisè gando gowe? Ze kandai họ̀nkọnsi-zọ́n tọn towe jo, na hiẹ ma sọgan sọ deanana owhé lọ ba.’  Whenẹnu, họ̀nkọnsi lọ dọ to ede mẹ dọ, ‘Etẹwẹ yẹn na wà, to whenue e yindọ klunọ ṣie na yí họ̀nkọnsi-zọ́n lọ sọn asi e? Yẹn ma tindo huhlọn sọmọ nado kùndò, winyan sọ nọ hù mi nado biọnu.  Ẹn hẹn! n’ko yọ́n nuhe n’na wà, bọ eyin n’wá yin yinyan sọn họ̀nkọnsi-zọ́n mẹ, gbẹtọ lẹ na yí mi do owhé yetọn lẹ gbè.’  Podọ to whenue e ylọ dopodopo ahọ́tọnọ klunọ etọn tọn lẹ, e dọna tintan dọ, ‘Nẹmu wẹ hiẹ dù do klunọ ṣie?’  E gblọn dọ, ‘Ojlẹnu* amì olivie tọn 100.’ Ewọ dọna ẹn dọ, ‘Gọ̀ kandai gbekọndopọ tọn towe ze bo sinai bosọ kàn 50 po awuyiya po.’  Enẹgodo, e dọna devo dọ, ‘Todin, nẹmu wẹ hiẹ dù?’ E dọ, ‘Ojlẹnu daho* likun tọn 100.’ Ewọ dọna ẹn dọ, ‘Gọ̀ kandai gbekọndopọ tọn towe ze bo kàn 80.’  Klunọ etọn sọ pà họ̀nkọnsi lọ, dile e tlẹ yin mawadodonọ, na e yinuwa po nuyọnẹn* po wutu; na ovi titonu* ehe tọn lẹ nọ yọnnuin to aliho he yọ́n-na-yizan mẹ to nuyiwa yetọn hẹ whẹndo yetọn titi mẹ hugan lehe e yin do na ovi hinhọ́n tọn lẹ.+  “Humọ, yẹn dọna mì dọ: Mì jihọntọn lẹ na mìde gbọn adọkun mawadodo tọn lẹ yiyizan dali,+ na to whenue yé na busẹ, họntọn ehelẹ nido kẹalọyi mì do nọtẹn madopodo lẹ mẹ.+ 10  Mẹhe yin nugbonọ to onú pẹvi pete mẹ yin nugbonọ to nususu mẹ ga, podọ mẹhe yin mawadodonọ to onú pẹvi pete mẹ yin mawadodonọ to nususu mẹ ga. 11  Enẹwutu, eyin mì ma ko do mìde hia nado yin nugbonọ gando adọkun mawadodo tọn lẹ go, mẹnu wẹ na ze nuhe yin nugbo do alọmẹ na mì? 12  Podọ eyin mì ma ko do mìde hia nado yin nugbonọ gando nuhe yin mẹdevo lẹ tọn go, mẹnu wẹ na na mì nuhe yin mìtọn titi?+ 13  Devizọnwatọ de ma sọgan yin afanumẹ na ogán awe, adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.”+ 14  Todin, Falesi wanyina akuẹtọ lẹ to todoaina onú ehe lẹpo, yé sọ jẹ awọnlín-yẹ́n do e ji.+ 15  Enẹwutu, e dọna yé dọmọ: “Mìwlẹ wẹ mẹhe nọ do mìde hia di dodonọ to gbẹtọ lẹ nukọn,+ ṣigba Jiwheyẹwhe yọ́n ahun mìtọn.+ Na nuhe gbẹtọ lẹ nọ pọ́n taidi nujọnu wẹ awuhiọnu de to nukun Jiwheyẹwhe tọn mẹ.+ 16  “Osẹ́n lọ po Yẹwhegán lẹ po tin kakajẹ ojlẹ Johanu tọn mẹ. Sọn whenẹnu sọyi, Ahọluduta Jiwheyẹwhe tọn to yinyin lilá taidi wẹndagbe, podọ gbẹtọ wunmẹ lẹpo wẹ to vivẹnudo zọnmii hlan e kọ̀n.+ 17  Na nugbo tọn, e bọawuna olọn po aigba po nado juwayi hú na adà tiuntiun wekun Osẹ́n lọ tọn dopo nado nọma mọ hẹndi.+ 18  “Mẹdepope he gbẹ́ asi etọn dai bo wlealọ hẹ devo deayọ, podọ mẹdepope he wlealọ hẹ yọnnu he asu etọn gbẹdai, e deayọ.+ 19  “Dawe adọkunnọ de tin he nọ saba yí sopẹ́-vọ̀ po alavọ po do doaṣọ́na ede, bo nọ to gbẹdu egbesọegbesọ po gigo daho po. 20  Ṣigba, nubiọdutọ de he nọ yin Lazalọsi, bo gọ́ na agàdá nọ saba yin zizedo họngbo etọn ji 21  bosọ nọ jlo nado dù nuhe to fiflẹ sọn tafo dawe adọkunnọ lọ tọn ji lẹ. Mọwẹ, avún lẹ tlẹ nọ wá bo nọ didọ́ agàdá etọn lẹ. 22  Todin, to ojlẹ vude godo, nubiọdutọ lọ kú bọ angẹli lẹ ze e yì apá na Ablaham.* “Mọdopolọ, dawe adọkunnọ lọ kú bo yin dìdì. 23  Podọ to awufiẹsa mẹ to Yọdò* mẹ, e ze nukun etọn lẹ daga bo mọ Ablaham to olá bọ Lazalọsi to apá etọn.* 24  Enẹwutu, e ylọ bo dọ, ‘Otọ́ Ablaham, wàlẹblanuna mi bo do Lazalọsi hlan nado ylọn bẹ́nu alọvi etọn tọn do osin mẹ bo fá odẹ́ ṣie, na yẹn to awufiẹsa mẹ to miyọ́n sinsinyẹn ehe mẹ wutu.’ 25  Ṣigba, Ablaham dọmọ, ‘Ovi, flindọ hiẹ ko mọ nudagbe towe lẹ yí to gigọ́ mẹ to gbẹwhenu towe, ṣigba Lazalọsi uwọ mọ nuylankan lẹ yí. Amọ́ todin, ewọ to yinyin homẹmiọnna tofi, ṣigba hiẹ tin to awufiẹsa mẹ. 26  Podọ gbọnvona onú ehe lẹpo, odò daho de ko yin zizedo míwlẹ po mìwlẹ po ṣẹnṣẹn, na mẹhe jlo na tọ́n sọn mí dè bo yì mì dè lẹ ma nado sọgan yì, mọjanwẹ mẹde ma sọgan dasá sọn finẹ wá mí dè do niyẹn.’ 27  Enẹgodo, e dọmọ, ‘Eyin mọ wẹ, yẹn vẹ̀ we otọ́, dọ hiẹ ni do e hlan owhé otọ́ ṣie tọn gbè, 28  na yẹn tindo nọvisunnu atọ́n, na ewọ nido dekunnu mlẹnmlẹn na yé, bọ yelọsu ma nado wá nọtẹn yasanamẹ tọn ehe mẹ.’ 29  Ṣigba, Ablaham dọmọ, ‘Yé tindo Mose po Yẹwhegán lẹ po; gbọ yé ni dotoaina yé.’+ 30  Whenẹnu, e dọmọ, ‘Lala, otọ́ Ablaham, ṣigba eyin mẹde fọ́n sọn oṣiọ lẹ mẹ yì yé dè, yé na lẹnvọjọ.’ 31  Ṣigba, e dọna ẹn dọ, ‘Eyin yé ma dotoaina Mose+ po Yẹwhegán lẹ po, mọjanwẹ yé ma na yin linlẹndiọna eyin mẹde tlẹ fọ́n sọn oṣiọ lẹ mẹ do niyẹn.’”

Nudọnamẹ Odò Tọn

Kavi “nukunpedonugotọ whédo tọn.”
Kavi “Ojlẹnu bati tọn.” Bati dopo sọzẹn hẹ L 22. Pọ́n Nud. B14.
Kavi “Ojlẹnu kọli tọn.” Kọli dopo sọzẹn hẹ L 220. Pọ́n Nud. B14.
Kavi “zinzin; wuntuntun.”
Kavi “ojlẹ.” Pọ́n Zẹm.
To paa mẹ, “yì akọ́nnu Ablaham tọn,” enẹ wẹ, otẹn nukundagbe vonọtaun tọn.
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.
To paa mẹ, “to akọ́nnu etọn,” enẹ wẹ, otẹn nukundagbe vonọtaun tọn.