Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 13:1-35

NUHE E BẸHẸN LẸ

  • Lẹnvọjọ kavi vasudo (1-5)

  • Apajlẹ ovòtin he ma sẹ́n lọ tọn (6-9)

  • Nawe de he tindo oblọ jẹgangan to Gbọjẹzangbe (10-17)

  • Apajlẹ okún mutaldi po otọ́n lọ po tọn (18-21)

  • E biọ vivẹnu nado gbọn ohọ̀n bibó lọ nù biọ e mẹ (22-30)

  • Hẹlọdi, “owọ̀ enẹ” (31-33)

  • Jesu viavi do Jelusalẹm ji (34, 35)

13  To ojlẹ enẹ mẹ, delẹ to mẹhe tin to finẹ lẹ mẹ na ẹn linlin gando Galilinu lẹ go, ohùn mẹhe tọn Pilati flusọ́ po avọ́sinsan yetọn lẹ po.  E sọ gblọnna yé dọmọ: “Be mìwlẹ lẹndọ Galilinu enẹlẹ yin ylandonọ hú Galilinu he pò lẹpo, na yé jiya onú ehelẹ tọn wutu wẹ ya?  Yẹn dọna mì dọ, e ma yinmọ; ṣigba eyin mìwlẹ ma lẹnvọjọ, mìmẹpo wẹ na yin vivasudo to aliho mọnkọtọn mẹ.+  Kavi omẹ 18 he ji atọ̀họ̀ Siloami tọn họ́ jẹ, bo hù lẹ—be mìwlẹ lẹndọ yé yin whẹhutọ hú mẹhe pò lẹpo he nọ nọ̀ Jelusalẹm wẹ ya?  Yẹn dọna mì dọ, e ma yinmọ; ṣigba eyin mìwlẹ ma lẹnvọjọ, mìmẹpo wẹ na yin vivasudo di yewlẹ.”  To enẹgodo, e zindonukọn nado na apajlẹ ehe dọmọ: “Dawe de tindo ovòtin de he yin dido do vẹngle etọn mẹ, e sọ wá nado dín sinsẹ́n to e ji, ṣigba e ma mọ depope.+  To whenẹnu, e dọna vẹngle-zọ́nwatọ etọn dọ, ‘E ko yì owhe atọ̀n he yẹn to wiwá bo to sinsẹ́n dín to ovòtin ehe ji, ṣigba yẹn ma mọ depope. Sán ẹn liai! Naegbọn e nado to tẹnmẹ ján aigba sọmọ?’  E gblọnna ẹn dọmọ, ‘Klunọ, jo e do na owhe dopo dogọ, kaka yẹn nado kùndò lẹdo e bo bẹ ogbó do e mẹ.  Eyin e de sinsẹ́n tọ́n to sọgodo, be e yọ́n; ṣigba eyin e ma yinmọ, hiẹ ni bo sán ẹn liai.’”+ 10  Todin, e to mẹplọn to dopo to sinagọgu lẹ mẹ to Gbọjẹzangbe. 11  Podọ pọ́n! nawe de to finẹ he ko nọ nuyiwadomẹji aovi de tọn glọ* na owhe 18; ewọ nọ zọ̀n tọ́tọ́ bo masọ penugo nado jlọ paali. 12  To whenue Jesu mọ nawe lọ, e dọna ẹn dọmọ: “Nawe, hiẹ yin tuntundote sọn awutu towe mẹ.”+ 13  E sọ ze alọ etọn lẹ do nawe lọ ji, ewọ sọ jlọ to afọdopolọji bo jẹ gigopana Jiwheyẹwhe ji. 14  Ṣigba, na enẹ tọn wutu, ogán sinagọgu tọn lọ gblehomẹ, na Jesu hẹnazọ̀ngbọ to Gbọjẹzangbe wutu, bo dọna gbẹtọgun lọ dọmọ: “Azán ṣidopo wẹ tin na azọ́n;+ enẹwutu mì wá bo yin azọ̀nhẹngbọna to azán enẹlẹ gbè, ṣigba e yin to Gbọjẹzangbe blo.”+ 15  Etomọṣo, Oklunọ gblọnna ẹn dọmọ: “Mì yẹnuwatọ lẹ,+ be dopodopo mìtọn ma nọ tún oyìnsú etọn kavi kẹtẹkẹtẹ etọn sọn apó mẹ to Gbọjẹzangbe bo nọ plan ẹn yì nado na ẹn osin ya?+ 16  Be e ma jẹ dọ nawe he yin viyọnnu Ablaham tọn ehe, he Satani ko dogàn, yèdọ sọn owhe 18 die gbọ́n lọ ni yin tuntundote sọn ogàn ehe mẹ to Gbọjẹzangbe ya?” 17  Todin, to whenue e ko dọ onú ehelẹ, winyan jẹ hùhù nukundiọsọmẹtọ etọn lẹpo ji, ṣigba gbẹtọgun lọ lẹpo jẹ ayajẹ ji, na onú gigonọ he e ko wà lẹpo wutu.+ 18  Enẹwutu, e zindonukọn dọmọ: “Etẹwẹ Ahọluduta Jiwheyẹwhe tọn taidi, podọ etẹ go wẹ yẹn sọgan yí i jlẹdo? 19  E tin taidi okún mutaldi tọn* de he dawe de ze bo do dó jipa etọn mẹ, e sọ whẹ́n bo lẹzun atin de, bọ ohẹ̀ agahomẹ tọn lẹ nọ do adọ́ do alà etọn lẹ ji.”+ 20  Whladopo dogọ, e sọ dọmọ: “Etẹ go wẹ yẹn sọgan yí Ahọluduta Jiwheyẹwhe tọn jlẹdo? 21  E tin taidi otọ́n de, he yọnnu de yí bo yàn ẹn dopọ po linfin he sù sọ nujlẹka daho* atọ̀n po kaka linfin lọ pete do fọ́n.”+ 22  E sọ zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to mẹplọn bosọ zindonukọn to gbejizọnlin etọn mẹ yì Jelusalẹm. 23  Todin, dawe de dọna ẹn dọmọ: “Oklunọ, be omẹ vude wẹ na yin whinwhlẹngán ya?” E dọna yé dọmọ: 24  “Mì vánkan vẹkuvẹku nado gbọn ohọ̀n bibó lọ nù biọ e mẹ,+ na yẹn dọna mì dọ, mẹsusu wẹ na dín nado biọ e mẹ ṣigba bo ma na penugo. 25  To whenue whétọ lọ na ko fọ́n bo sú ohọ̀n lọ, mìwlẹ nasọ ṣite to gbonu bo na to họ̀nhúhú, bosọ to didọmọ, ‘Oklunọ, hùnhọ̀n na mí.’+ Ṣigba, ewọ na gblọnna mì dọ: ‘Yẹn ma yọ́n fie mì wá sọn.’ 26  To whenẹnu, mìwlẹ na jẹ didọ ji dọ, ‘Mí dù bo nù to nukọn towe, podọ hiẹ plọnmẹ to alihogbó mítọn lẹ ji.’+ 27  Ṣigba, e na dọna mì dọ, ‘Yẹn ma yọ́n fie mì wá sọn. Mì tọ́n sọn dè e, mìmẹpo he nọ wazọ́n mawadodo tọn lẹ!’ 28  Finẹ wẹ mì na viavi bo dù adúkúnkún te, to whenue mì mọ Ablaham, Isaki, Jakọbu po yẹwhegán lẹpo po to Ahọluduta Jiwheyẹwhe tọn mẹ, ṣigba bọ mìwlẹ yin zizedlan gbonu.+ 29  Humọ, gbẹtọ lẹ na wá sọn whèzẹtẹn-waji po whèyihọ-waji po, podọ sọn agewaji po hùwaji po, bo na jagla to tafo kọ̀n to Ahọluduta Jiwheyẹwhe tọn mẹ. 30  Podọ pọ́n! delẹ to mẹhe yin godotọ lẹ mẹ na lẹzun tintan, podọ delẹ to mẹhe yin tintan lẹ mẹ na lẹzun godotọ.”+ 31  To gànhiho enẹ dopolọ mẹ, Falesi delẹ wá bo dọna ẹn dọmọ: “Tọ́n bo yì sọn fi, na Hẹlọdi* jlo na hù we.” 32  Ewọ sọ dọna yé dọmọ: “Mì yì bo dọna owọ̀* enẹ dọ, ‘Pọ́n! yẹn to aovi lẹ yàn jẹgbonu bo to azọ̀nhẹngbọnamẹ to egbé po osọ he ja po, podọ yẹn na dotana to azán atọ̀n gbè.’ 33  Etomọṣo, yẹn dona zindonukọn to egbé po osọ he ja po, podọ to azán atọ̀n gbè, na e ma jẹ* dọ yẹwhegán de ni yin hùhù to gbonu Jelusalẹm tọn.+ 34  Jelusalẹm, Jelusalẹm E, hiẹ he nọ hù yẹwhegán lẹ bo nọ dlan zannu do mẹhe yin didohlan we lẹ+—whla nẹmu wẹ yẹn ko jlo nado bẹ ovi towe lẹ pli dile koklosi de nọ bẹ ovi etọn lẹ pli do awà etọn lẹ glọ do! Ṣigba, mìwlẹ ma jlo domọ.+ 35  Mì pọ́n! Owhé* mìtọn ko yin jijodai na mì.+ Yẹn dọna mì dọ, mìwlẹ ma nasọ mọ mi ba kaka mì nado dọ: ‘Donanọ wẹ mẹlọ he ja to oyín Jehovah* tọn mẹ!’”+

Nudọnamẹ Odò Tọn

Kavi “he tindo gbigbọ he nọ hẹnmẹ zun madogánnọ.”
Okún he whè hugan de he nọ yin mimọ to Palestine. Atin etọn sọgan dite na nudi m 4 bo nọ tindo alà lẹ.
To paa mẹ, “ojlẹnu sea tọn.” Ojlẹnu sea tọn dopo sọzẹn hẹ L 7,33. Pọ́n Nud. B14.
Enẹ wẹ, Hẹlọdi Antipa. Pọ́n Zẹm.
To Islaeli, owọ̀ nọ yin pinpọnhlan taidi kanlin he yin ayiha gigẹdẹnọ de.
Kavi “na yè ma sọgan yise.”
To paa mẹ, “Tẹmpli.”
Pọ́n Nud. A5.