Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 12:1-59

NUHE E BẸHẸN LẸ

  • Otọ́n Falesi lẹ tọn (1-3)

  • Dibusi Jiwheyẹwhe, e ma yin gbẹtọ (4-7)

  • Gbeyiyi dọ mí tin to kọndopọ mẹ hẹ Klisti (8-12)

  • Dawe adọkunnọ nulunọ lọ (13-21)

  • Mì sọ yin magbọjẹnọ ba blo (22-34)

    • Lẹngbọpa pẹvi (32)

  • Nukleninọ (35-40)

  • Họ̀nkọnsi nugbonọ lọ po mawadodonọ de po (41-48)

  • E ma yin jijọho, ṣigba kinklan (49-53)

  • Mí dona tunwun ojlẹ lẹ go (54-56)

  • Owhẹ̀ didọgbò (57-59)

12  To ojlẹ enẹ mẹ, to whenue gbẹtọgun de he sọha yetọn yì fọtọ́n susu lẹ ko pli dopọ bọ yé to afọtùn ode awetọ yetọn ji, e jẹ didọna devi etọn lẹ whẹ́ ji dọmọ: “Mì payi otọ́n Falesi lẹ tọn, he yin yẹnuwiwa go.+  Ṣigba, nudepope ma tin he ko yin whiwhla po sọwhiwhe po he ma na wá yin didehia, podọ nudepope ma tin he yin aṣli he ma na wá yin yinyọnẹn.+  Enẹwutu, nudepope he mì dọ to zinvlu mẹ na yin sisè to hinhọ́n nù, podọ nuhe mì depá etọn to abò mìtọn titi lẹ mẹ na yin lilá sọn họta.  Humọ, yẹn dọna mì mẹhe yin họntọn ṣie lẹ+ dọ, mì dibusi yé he nọ hù agbasa podọ to enẹgodo masọ penugo nado wà nudepope ba lẹ blo.+  Ṣigba, yẹn na do mẹhe mì na dibusi hia mì: Mì dibusi Mẹhe sọgan hù bọ to enẹgodo tindo aṣẹ nado zedlan Gẹhẹnna* mẹ.+ Mọwẹ, yẹn dọna mì dọ, Omẹ ehe wẹ mì ni dibusi.+  Oblẹnọ atọ́n wẹ nọ yin sisà yin abọgan-kuẹ pẹvi* awe, kavi e ma yin mọ wẹ? Ṣogan, Jiwheyẹwhe ma nọ wọn* depope to yé mẹ.+  Ṣigba, etlẹ yin oda he to ota na mì lẹpo wẹ ko yin hihia.+ Mì dibu blo; mìwlẹ họakuẹ hú oblẹnọ susu.+  “Yẹn dọna mì dọ, mẹdepope he yigbe to gbẹtọ lẹ nukọn dọ emi tindo yise to yẹn mẹ,+ Visunnu gbẹtọ tọn lọsu na yigbe etọn to angẹli Jiwheyẹwhe tọn lẹ nukọn ga.+  Ṣigba, mẹdepope he mọ́n mi to gbẹtọ lẹ nukọn na yin mimọ́n to angẹli Jiwheyẹwhe tọn lẹ nukọn.+ 10  Podọ mẹdepope he dọ ohó de sọta Visunnu gbẹtọ tọn, e na yin jijona ẹn, ṣigba mẹdepope he zánnu do gbigbọ wiwe go, e ma na yin jijona ẹn.+ 11  To whenue yé plan mì wá gbẹtọgun lẹ,* ahọluzọnwatọ lẹ po aṣẹpipa lẹ po nukọn, mì yin magbọjẹnọ gando lehe mì na yiavùnlọna mìde kavi nuhe mì na gblọn go blo,+ 12  na gbigbọ wiwe na plọn mì nuhe mì dona dọ to gànhiho enẹ mẹ.”+ 13  To whenẹnu, mẹdopo to gbẹtọgun lọ mẹ dọna ẹn dọmọ: “Mẹplọntọ, dọna nọvisunnu ṣie nado má ogú lọ hẹ mi.” 14  Ewọ dọna ẹn dọmọ: “Dawe, mẹnu wẹ de mi taidi whẹdatọ kavi numátọ to mì omẹ awe lẹ ṣẹnṣẹn?” 15  Whenẹnu, e dọna yé dọmọ: “Mì hùn nukun mìtọn lẹ bo họ́ mìde sọta nukunkẹn wunmẹ lẹpo,+ na eyin mẹde tlẹ tindo susugege, nutindo etọn lẹ ma nọ na ẹn ogbẹ̀.”+ 16  To whenẹnu, e na apajlẹ de yé dọmọ: “Aigba dawe adọkunnọ de tọn de sinsẹ́n susu tọ́n. 17  Enẹwutu, e jẹ linlẹn ji to ede mẹ dọ, ‘Etẹwẹ yẹn na wà, todin he yẹn ma tindo fidepope nado bẹ jinukun ṣie lẹ do?’ 18  Enẹgodo, e dọmọ, ‘Nuhe yẹn na wà die:+ Yẹn na họ́ agbànhọ ṣie lẹ liai bo na gbá dehe klo humọ lẹ, bọ finẹ wẹ yẹn na bẹ likun ṣie lẹpo podọ nutindo ṣie lẹpo do, 19  yẹn nasọ dọna dee* dọmọ: “Hiẹ* tindo nususu he ko yin bibẹpli dai he hiẹ na yizan na owhe susu; hiẹ ni vò, bo nọ dù, bo nọ nù bosọ nọ dugbẹ.”’ 20  Ṣigba, Jiwheyẹwhe dọna ẹn dọ, ‘Hiẹ nulunọ, to ozán ehe mẹ, yè to ogbẹ̀* towe biọ sọn dè we. To whelọnu lo, mẹnu tọn wẹ nuhe hiẹ bẹpli lẹ na yin?’+ 21  Mọ wẹ e nọ yì do na mẹlọ he bẹ adọkun pli na ede, ṣigba bo ma yin adọkunnọ hlan Jiwheyẹwhe.”+ 22  Enẹgodo, e dọna devi etọn lẹ dọmọ: “Ehe wutu wẹ yẹn dọna mì dọ, mì sọ yin magbọjẹnọ na ogbẹ̀* mìtọn gando nuhe mì na dù go kavi na agbasa mìtọn gando nuhe mì na do go ba blo.+ 23  Na ogbẹ̀* họakuẹ hú núdùdù podọ agbasa hú avọ̀. 24  Mì doayi ohọ́n lẹ go: Yé ma nọ do jinukun kavi gbẹ̀n; yé ma nọ tindo zínhọ kavi agbànhọ; ṣogan Jiwheyẹwhe nọ na núdùdù yé.+ Be mìwlẹ ma họakuẹ tlala hú ohẹ̀ lẹ wẹ ya?+ 25  Mẹnu to mì mẹ wẹ sọgan gbọn magbọjẹnọ-yinyin dali yí awagbà* dopo dogọ tedidi gbẹzan etọn tọn? 26  Enẹwutu, eyin mì ma sọgan wà onú pẹvi mọnkọtọn, naegbọn mì do to magbọjẹnọ yin na nuhe pò lẹ?+ 27  Mì doayi lehe vounvoun lẹ nọ whẹ́n do go: Yé ma nọ do magbọjẹ na yede kavi gbẹ̀n sekan; ṣigba yẹn dọna mì dọ, Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ.+ 28  Todin, eyin Jiwheyẹwhe nọ doaṣọ́na ogbé danji tọn he nọ tin to egbé bo nọ yin zizedlan adò mẹ to osọ he ja lẹ domọ, nẹmunẹmu wẹ ewọ ma na doaṣọ́na mì, mì yise pẹvinọ! 29  Enẹwutu, mì sọ yin magbọjẹnọ gando nuhe mì na dù po nuhe mì na nù po go blo, podọ mì doalọtena magbọjẹ he ma yin dandan tọn;+ 30  na ehe lẹpo wẹ nuhe akọta aihọn tọn lẹ nọ to afọdona vẹkuvẹku, ṣigba Otọ́ mìtọn yọnẹn dọ mì tindo nuhudo onú ehelẹ tọn.+ 31  Kakatimọ, mì to Ahọluduta etọn dín zọnmii, podọ onú ehelẹ na yin yiyidogọ na mì.+ 32  “Mì dibu blo, lẹngbọpa pẹvi,+ na Otọ́ mìtọn mọdọ e jẹ nado na mì Ahọluduta lọ.+ 33  Mì sà nuhe mì tindo lẹ bo na nunina lẹblanu tọn lẹ.*+ Mì basi sẹgẹ akuẹ tọn he ma nọ dohó lẹ, yèdọ adọkun he ma nọ vọ̀ gbede do olọn mẹ,+ fie ajotọ de ma nọ sẹpọ bọ okọ́ ma nọ dùnú te. 34  Na fie adọkunnu mìtọn te, finẹ wẹ ahun mìtọn na te ga. 35  “Mì sọnú bo wleawudai*+ bosọ gbọ miyọ́ngbán mìtọn ni to jiji,+ 36  podọ mìlọsu lẹ ni taidi dawe lọ lẹ he to tenọpọn whenue klunọ yetọn na lẹkọwa+ sọn alọwle,+ na whenue e na wá bo húhúhọ̀n, yé nido hùn na ẹn to afọdopolọji. 37  Ayajẹnọ wẹ afanumẹ enẹlẹ he klunọ yetọn wá bo mọ to nukle! Nugbo wẹ yẹn dọna mì dọ, e na sọnú* nado yilizọn bo na hẹn yé jagla to tafo kọ̀n bo nasọ wá yé dè nado yilizọn na yé. 38  Podọ eyin e wá to mimá awetọ* mẹ, kavi etlẹ yin atọ̀ntọ* mẹ, bo mọdọ yé ko wleawudai, ayajẹnọ wẹ yé! 39  Ṣigba, mì yọ́n ehe dọ, eyin whétọ lọ ko yọ́n ogàn he mẹ ajotọ na wá te wẹ, e ma na ko dike yè ni gbò adó biọ owhé etọn gbè.+ 40  Mìlọsu ga, mì wleawudai, na ogàn he mẹ mì ma lẹn do wẹ Visunnu gbẹtọ tọn ja.”+ 41  To whenẹnu Pita dọmọ: “Oklunọ, be míwlẹ kẹdẹ wẹ hiẹ to apajlẹ ehe dọna kavi na mẹlẹpo?” 42  Oklunọ sọ dọmọ: “Mẹnu wẹ họ̀nkọnsi* nugbonọ, nuyọnẹntọ* lọ he klunọ etọn na de do pipli devizọnwatọ etọn lẹ tọn* ji nado nọ na yé núdùdù he pé yé to ojlẹ sisọ mẹ?+ 43  Ayajẹnọ wẹ afanumẹ enẹ eyin klunọ etọn wá bo mọ ẹn to mọwà! 44  Nugbo wẹ yẹn dọna mì dọ, ewọ na de e do nutindo etọn lẹpo ji. 45  Ṣigba, eyin afanumẹ enẹ dọ to ahun ede tọn mẹ gbede dọ, ‘Wiwá klunọ ṣie tọn to dindẹn,’ bo jẹ devisunnu po deviyọnnu lẹ po hò ji, bọ ewọ nọ dù bo nọ nù bosọ nọ nùmú,+ 46  klunọ afanumẹ enẹ tọn na wá to azán he gbè ewọ ma to nukundo e podọ to ogàn he ewọ ma yọnẹn mẹ, bo na sayana ẹn to aliho he sinyẹn hugan mẹ bo nasọ na ẹn otẹn etọn do mẹhe ma yin nugbonọ lẹ ṣẹnṣẹn. 47  To whenẹnu, afanumẹ enẹ he mọnukunnujẹ ojlo klunọ etọn tọn mẹ ṣigba bo ma wleawudai kavi wà nuhe e biọ to e si* na yin hihò po obá susu po.+ 48  Ṣigba, ewọ he ma mọnukunnujẹemẹ amọ́ bo wà nuhe jẹna obá lẹ na yin hihò po obá vude po. Na nugbo tọn, mẹdepope he susu yin nina, susu na yin bibiọ to e si, podọ ewọ he yin zizedo nususu ji, nususu na yin bibiọ to e si hú dehe dona yin bibiọ.+ 49  “Yẹn wá nado flọ miyọ́n de do aigba ji, podọ etẹwẹ yẹn na gbẹsọ to jijlo eyin e ko yin fiflọ? 50  Na nugbo tọn, yẹn tindo baptẹm de he yè na yí do baptizi mi, podọ lehe yẹn yin ayimajainọ kakajẹ whenue e na ko yin tadona do sọ!+ 51  Be mì lẹndọ yẹn wá nado hẹn jijọho wá aigba ji wẹ ya? Lala, adavo kinklan.+ 52  Na sọn din sọyi, omẹ atọ́n na tin to ohọ̀ dopo mẹ bọ yé na klan, omẹ atọ̀n sọta omẹ awe podọ omẹ awe sọta omẹ atọ̀n. 53  Yé na yin kinklan, yèdọ otọ́ sọta visunnu podọ visunnu sọta otọ́, onọ̀ sọta viyọnnu podọ viyọnnu sọta onọ̀, asu-nọ̀ sọta ovisi podọ ovisi sọta asu-nọ̀.”+ 54  Enẹgodo, e sọ dọna gbẹtọgun lọ lẹ dọmọ: “To whenue mì mọ bọ aslọ súyu to whèyihọ-waji, mì nọ dọ to afọdopolọji dọ, ‘Yujẹhọn na tin,’ e sọ nọ yinmọ. 55  Podọ to whenue mì mọ jẹhọn hùwaji tọn to yìnyìn, mì nọ dọ, ‘Yozò sinsinyẹn na tin,’ e sọ nọ jọ domọ. 56  Mì yẹnuwatọ lẹ, mìwlẹ yọ́n lehe yè nọ tunwun awusọhia aigba po jiwhé-nukunmẹ tọn po go do, ṣigba naegbọn bọ mì ma yọ́n lehe yè nọ tunwun ojlẹ tangan ehe go do?+ 57  Naegbọn mìwlẹ ma do basi dide nuhe dodo yin tọn na mìde? 58  Di apajlẹ, to whenue hiẹ tin to aliji hẹ mẹhe ylọwhẹ we jei ogán de nukọn, yawu jẹ owhẹ̀ towe gbọ hẹ ẹ ji to whenue mì tin to aliji, na ewọ nikaa dọ̀n we yì whẹdatọ lọ nukọn, bọ whẹdatọ lọ na ze we do alọmẹ na ponọ whẹdatẹn tọn, ponọ whẹdatẹn tọn nasọ dlan we do gànpamẹ.+ 59  Yẹn dọna we dọ, hiẹ ma na tọ́n sọn finẹ to aliho depope mẹ kaka hiẹ nado sú abọgan-kuẹ pẹvi* towe godo tọn.”

Nudọnamẹ Odò Tọn

Pọ́n Zẹm.
To paa mẹ, “asaliọn.” Pọ́n Nud. B14.
Kavi “yí nukunpẹvi do pọ́n.”
Kavi “sinagọgu lẹ.”
Kavi “alindọn ṣie.”
Kavi “Alindọn, hiẹ.”
Kavi “alindọn.”
Kavi “alindọn.”
Kavi “alindọn.”
Pọ́n Nud. B14.
Kavi “na nunina wamọnọ lẹ.” Pọ́n Zẹm.
To paa mẹ, “Mì blagbajana mìde.”
Kavi “blagbajana ede.”
Sọn nudi ogàn 9 zánmẹ tọn mẹ jẹ ogàn 12 zánmẹ tọn.
Sọn nudi ogàn 12 zánmẹ tọn mẹ jẹ ogàn 3 afọnnu tọn.
Kavi “nukunpedonugotọ whédo tọn.”
Kavi “zinzintọ.”
Kavi “devizọnwatọ whédo tọn etọn lẹ.”
Kavi “yinuwa sọgbe hẹ ojlo etọn.”
To paa mẹ, “lẹptọn.” Pọ́n Nud. B14.