Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 10:1-42

NUHE E BẸHẸN LẸ

  • Jesu do omẹ 70 lẹ hlan (1-12)

  • Dindọn na tòdaho he ma lẹnvọjọ (13-16)

  • Omẹ 70 lẹ lẹkọwa (17-20)

  • Jesu na pipà Otọ́ etọn na nukundagbe didohia whiwhẹnọ lẹ (21-24)

  • Apajlẹ kọmẹnu Samalianu lọ tọn (25-37)

  • Jesu dla Malta po Malia po pọ́n (38-42)

10  To onú ehelẹ godo, Oklunọ de omẹ 70 devo lẹ bo do yé hlan awe-awe+ jẹnukọnna ẹn yì tòdaho podọ fihe ewọ lọsu na wá yì lẹpo mẹ.  To whenẹnu, e dọna yé dọmọ: “Mọwẹ, ojijẹ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.+  Mì yì! Mì pọ́n! Yẹn to dido mì hlan taidi lẹngbọvu lẹ to ohla lẹ ṣẹnṣẹn.+  Mì hẹn sẹgẹ akuẹ tọn, kavi aglò núdùdù tọn, kavi afọpa lẹ blo,+ podọ mì dọnudo mẹde* to aliji blo.  Fidepope he mì biọ owhé de gbè te, mì dọ jẹnukọn dọ: ‘Jijọho ni tin na owhé ehe.’+  Podọ eyin họntọn jijọho tọn de tin to finẹ, jijọho mìtọn na tin to e ji. Ṣigba, eyin e ma tin, e na lẹkọ do mì dè.  Enẹwutu, mì nọ owhé enẹ gbè,+ bo nọ dù bosọ nọ nù nuhe yé wleawu etọn na mì lẹ,+ na azọ́nwatọ jẹna azọ́nkuẹ etọn.+ Mì ma nọ to tẹnsẹ sọn owhé de gbè jẹ owhé de gbè blo.  “Humọ, fidepope he mì biọ tòdaho de mẹ te bọ yé yí mì, mì dù nuhe yin zizedonukọnna mì lẹ  bo hẹnazọ̀ngbọna mẹhe to azọ̀njẹ to e mẹ lẹ bosọ dọna yé dọmọ: ‘Ahọluduta Jiwheyẹwhe tọn ko dọnsẹpọ mì.’+ 10  Ṣigba, fidepope he mì biọ tòdaho de mẹ te bọ yé ma yí mì, mì tọ́nyi alihogbó etọn lẹ ji bo dọ: 11  ‘Mí súnsún kọ́gudu he tlẹ tẹdo afọ mítọn lẹ go sọn tòdaho mìtọn mẹ lẹ sẹ̀, na okunnu de sọta mì.+ Etomọṣo, mì yọ́n ehe dọ, Ahọluduta Jiwheyẹwhe tọn ko dọnsẹpọ.’ 12  Yẹn dọna mì dọ, e na pọnte na Sodọmi to azán enẹ gbè* hú na tòdaho enẹ.+ 13  “Dindọn hlan we, Kolazin! Dindọn hlan we, Bẹtsaida! na eyin Tile po Sidoni po mẹ wẹ azọ́n huhlọnnọ he yin bibasi to mì mẹ lẹ ko yin bibasi te, yé na ko lẹnvọjọ hoho gbọn aisinsin to odẹ́vọ̀ po afín po mẹ dali.+ 14  Enẹwutu, e na pọnte na Tile po Sidoni po to whẹdida whenu hú na mìwlẹ. 15  Podọ hiẹ, Kapẹlnaumi, be vlavo hiẹ na yin zizedaga kakajẹ olọn wẹ? Hiẹ na yìdo kaka yì Yọdò* mẹ! 16  “Mẹdepope he dotoaina mì dotoaina yẹnlọsu.+ Podọ mẹdepope he gbẹ́ mì dai gbẹ́ yẹnlọsu dai ga. Humọ, mẹdepope he gbẹ́ mi dai gbẹ́ Ewọ he do mi hlan dai ga.”+ 17  To whenẹnu, omẹ 70 lọ lẹ lẹkọwa po ayajẹ po, bo to didọmọ: “Oklunọ, aovi lẹ tlẹ litaina mí to whenue mí yí oyín towe zan.”+ 18  Enẹwutu, e dọna yé dọmọ: “Yẹn mọ bọ Satani flẹ+ taidi abì sọn olọn. 19  Mì pọ́n! yẹn ko na mì aṣẹ nado tùnafọ odàn lẹ po aklekle lẹ po ji podọ nado duto huhlọn kẹntọ tọn lẹpo ji,+ bọ nudepope ma na gbleawuna mì. 20  Etomọṣo, mì jaya dọ gbigbọ lẹ litaina mì blo, ṣigba mì jaya, na oyín mìtọn ko yin kinkandai to olọn mẹ wutu.”+ 21  To ojlẹ enẹ mẹ, e gọ́ na ayajẹ susu gbọn gbigbọ wiwe gblamẹ bo dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko yí sọwhiwhe do whlá onú ehelẹ do nuyọnẹntọ lẹ po weyọnẹntọ lẹ po+ bo ko de yé hia ovi pẹvi lẹ. Mọwẹ, Otọ́ E, na aliho ehe wẹ yọ́n to nukun towe mẹ.+ 22  Otọ́ ṣie ko ze nulẹpo do alọmẹ na mi, podọ mẹde ma yọ́n mẹhe Visunnu lọ yin, adavo Otọ́ lọ, podọ mẹde ma yọ́n mẹhe Otọ́ lọ yin adavo Visunnu lọ+ po mẹdepope he Visunnu lọ jlo nado de e hia po.”+ 23  Enẹwutu, e lẹhlan devi etọn lẹ kẹdẹ bo dọmọ: “Ayajẹnọ wẹ nukun he mọ nuhe mì to mimọ ehelẹ.+ 24  Na yẹn dọna mì dọ, yẹwhegán po ahọlu susu po wẹ ko jlo nado mọ nuhe mìwlẹ to mimọ ṣigba bo ma mọ,+ podọ nado sè nuhe mìwlẹ to sisè ṣigba bo ma sè.” 25  Todin, pọ́n! dawe de he yọ́n Osẹ́n lọ ganji fọ́n nado whlé e pọ́n bo dọmọ: “Mẹplọntọ, etẹwẹ yẹn dona wà nado dugu ogbẹ̀ madopodo tọn?”+ 26  E dọna ẹn dọmọ: “Etẹwẹ yin kinkandai to Osẹ́n lọ mẹ? Etẹwẹ hiẹ hia?” 27  E gblọn dọmọ: “‘Hiẹ dona yí ahun towe lẹpo, alindọn* towe lẹpo, huhlọn towe lẹpo, podọ ayiha towe lẹpo do yiwanna Jehovah* Jiwheyẹwhe towe’+ podọ ‘na kọmẹnu towe di dewe.’”+ 28  E dọna ẹn dọmọ: “Hiẹ gblọn ganji; nọ to ehe wà, hiẹ nasọ mọ ogbẹ̀.”+ 29  Ṣigba, na dawe lọ jlo nado do ede hia di dodonọ wutu,+ e dọna Jesu dọmọ: “Mẹnu wẹ kọmẹnu ṣie taun?” 30  Jesu gblọn dọmọ: “Dawe de jẹte sọn Jelusalẹm jei Jẹliko bo jẹ alọ jaguda lẹ tọn mẹ, bọ yé yí nulẹpo sọn e si bo hò e, bosọ yì, bo jo e do kúdaa-gbẹ̀daa. 31  Todin, gbọn kosọ dali, yẹwhenọ de to tejẹ gbọn aliho enẹ ji, ṣigba to whenue e mọ ẹn, e gbọn awà awetọ ji yì. 32  Mọdopolọ, Levinu de, to whenue e jẹ finẹ bo mọ ẹn, e gbọn awà awetọ ji yì. 33  Ṣigba, Samalianu+ de he to gbejizọnlinzin gbọn aliho lọ ji dọnsẹpọ ẹ, podọ to whenue e mọ ẹn, lẹblanu whàn ẹn. 34  Enẹwutu, e dọnsẹpọ ẹ bo kọ̀n amì po ovẹn po do apà etọn lẹ mẹ bosọ blá yé. Enẹgodo, e ze e do kanlin edetiti tọn ji bo hẹn ẹn wá hotẹli pẹvi de bosọ penukundo e go. 35  To aihọngbè, e de denali* awe tọ́n bo ze na nukunpedonugotọ hotẹli pẹvi lọ tọn, bo dọmọ: ‘Penukundo ewọ go, nudepope he hiẹ sọ zan gbọnvona ehe, yẹn na suahọ etọn we to whenue yẹn na lẹkọwa.’ 36  Mẹnu to omẹ atọ̀n ehelẹ mẹ wẹ hiẹ mọdọ e do ede hia di kọmẹnu+ na dawe lọ he jẹ alọ jaguda lẹ tọn mẹ?” 37  Ewọ dọmọ: “Mẹhe do lẹblanu hia ẹ.”+ To whenẹnu, Jesu dọna ẹn dọmọ: “Yì bo nọ wà nudopolọ.”+ 38  Todin, dile yé to yìyì, e biọ gbétatò de mẹ. Tofi, nawe de he nọ yin Malta+ yí i taidi jonọ do whégbè. 39  Ewọ sọ tindo nọviyọnnu de he nọ yin Malia, he sinai to afọ Oklunọ tọn lẹ kọ̀n bo to todoaina nuhe dọ e te.* 40  To alọ devo mẹ, nukunpipedo azọ́n susu go fẹayihasẹna Malta. Enẹwutu, e yì e dè bo dọmọ: “Oklunọ, be hiẹ ma hòpọn dọ nọviyọnnu ṣie jo yẹn dopo do nado to nukunpedo nulẹ go ya? Dọna ẹn nado wá gọalọna mi.” 41  Oklunọ gblọnna ẹn dọmọ: “Malta, Malta, hiẹ yin magbọjẹnọ bo to tuklajẹ na nususu. 42  Nalete, onú vude wẹ nuhudo tin na, kavi onú dopo poun. Na Malia tọn, ewọ ko de adà dagbe,*+ podọ e ma na yin yíyí sọn e si.”

Nudọnamẹ Odò Tọn

Kavi “mì gbò mẹde fán to nudọdomẹ whenu.”
Enẹ wẹ, Whẹdazangbe.
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.
Pọ́n Zẹm.
Pọ́n Nud. A5.
Pọ́n Nud. B14.
To paa mẹ, “ohó etọn.”
Kavi “he yọ́n hugan.”