Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Luku 1:1-80

NUHE E BẸHẸN LẸ

  • Wekinkan hlan Teofil (1-4)

  • Dọdai gando jiji Johanu tọn go (5-25)

  • Dọdai gando jiji Jesu tọn go (26-38)

  • Malia basi dlapọn na Elizabẹti (39-45)

  • Malia pagigona Jehovah (46-56)

  • Jiji po yinkọ dido na Johanu po (57-66)

  • Dọdai Zekalia tọn (67-80)

1  Mẹsusu ko dovivẹnu nado wleawuna kandai nugbo lẹ he go mí dejido mlẹnmlẹn,+  kẹdẹdile mẹhe lẹzun kunnudetọ yí nukun do mọ lẹ+ po devizọnwatọ owẹ̀n lọ tọn lẹ po ko lá onú ehelẹ na mí sọn bẹjẹeji do,+  enẹwutu wẹ yẹnlọsu magbe, na yẹn ko dindona nulẹpo po gbesisọ po sọn bẹjẹeji, nado basi kandai yetọn to aliho whinnuwhinnu tọn de mẹ hlan we, hiẹ gigonọ daho Teofil,+  na hiẹ nido yọ́n nugbo lọ to gigọ́ mẹ gando nuhe yè ko yí onù do plọn we lẹ go.+  To azán Hẹlọdi,*+ ahọlu Jude tọn lọ tọn lẹ gbè, yẹwhenọ de tin he nọ yin Zekalia, he yin hagbẹ pipli yẹwhenọ he wá sọn whẹndo Abija tọn mẹ lẹ tọn.+ Asi etọn yin dopo to viyọnnu Aalọn tọn lẹ mẹ bọ oyín etọn nọ yin Elizabẹti.  Yé omẹ awe lẹ yin dodonọ to Jiwheyẹwhe nukọn bo nọ zinzọnlin to aliho he ma tindo oblọ mẹ sọgbe hẹ gbedide po nubiọtomẹsi osẹ́n Jehovah* tọn lẹpo po.  Ṣigba, yé ma tindo ovi, na Elizabẹti yin wẹnsinọ de wutu, podọ owhe yé omẹ awe lẹ tọn ko sẹyì taun.  Todin, dile e to devizọnwa taidi yẹwhenọ to azọ́ndenamẹ pipli etọn tọn mẹ+ to Jiwheyẹwhe nukọn,  sọgbe hẹ aṣa yẹwhenọduta tọn he hẹnai, e jẹ ewọ ji nado biọ fiwiwe Jehovah* tọn bo mẹ̀ nuyọnwan.+ 10  Gbẹtọgun lọ lẹpo sọ to dẹ̀ho to gbonu to gànhiho he mẹ yè to nuyọnwan lọ mẹ̀. 11  Angẹli Jehovah* tọn sọawuhia ẹ, bo ṣite to adusiwhé na agbà nuyọnwan tọn lọ. 12  Ṣigba, Zekalia biọ bẹwlu mẹ na nuhe e mọ lọ wutu, bọ obu sọ jẹ e ji. 13  Etomọṣo, angẹli lọ dọna ẹn dọmọ: “A dibu blo, Zekalia, na Jiwheyẹwhe ko sè ovẹ̀ towe, podọ asi towe Elizabẹti na ji visunnu de na we, hiẹ nasọ ylọ oyín etọn dọ Johanu.+ 14  Hiẹ nasọ tindo ayajẹ po homẹhunhun daho po, podọ mẹsusu na jaya na jiji etọn wutu,+ 15  na ewọ na klo to Jehovah* nukọn.+ Ṣigba, ewọ ma dona nù ovẹn po ahàn sinsinyẹn depope po,+ ewọ nasọ gọ́ na gbigbọ wiwe etlẹ yin jẹnukọnna jiji etọn,*+ 16  podọ ewọ na hẹn ovi Islaeli tọn susu lẹkọwa Jehovah* Jiwheyẹwhe yetọn dè.+ 17  Humọ, e na yí gbigbọ po huhlọn Elija tọn po do jẹnukọnna ẹn yì+ nado diọ ahun otọ́ lẹ tọn di ovi lẹ tọn+ podọ nado diọ ahun tolivẹtọ lẹ tọn, na yé nido tindo nuyọnẹn yọ́n-na-yizan dodonọ lẹ tọn nado sọgan wleawu mẹhe jẹ lẹ tọn dai na Jehovah.”*+ 18  Zekalia sọ dọna angẹli lọ dọmọ: “Nawẹ yẹn sọgan dejido ehe go gbọn? Na yẹn ko poyọnho bọ owhe asi ṣie tọn ko sẹyì taun.” 19  Angẹli lọ gblọnna ẹn dọmọ: “Yẹn wẹ Gabliẹli,+ he nọ nọte to Jiwheyẹwhe nukọn,+ podọ yẹn yin didohlan nado dọhona we bo lá wẹndagbe ehe na we. 20  Ṣigba, pọ́n! hiẹ na lẹzun unbọpẹnnọ bo ma na penugo nado dọho kakajẹ azán he gbè onú ehelẹ na jọ, na hiẹ ma yí ohó ṣie lẹ, he na yin hinhẹndi to ojlẹ dide yetọn mẹ sè wutu.” 21  Nalete, gbẹtọ lẹ to tenọpọn Zekalia, bọ e paṣa yé dọ e to gbàndọn zẹjlẹgo to fiwiwe lọ. 22  Whenue e tọ́njẹgbonu, e ma penugo nado dọhona yé, yé sọ doayi e go dọ e ṣẹṣẹ mọ numimọ jiawu de to fiwiwe lọ. E yí alọ do to ohia lẹ basi na yé, ṣigba bo gbọṣi unbọpẹnnọ-yinyin mẹ. 23  Whenue azán sinsẹ̀nzọn wiwe* etọn tọn wá vivọnu, e yì owhé etọn gbè. 24  To azán delẹ godo, asi etọn Elizabẹti mọhò, e sọ whlá ede họ̀ osun atọ́n, bo dọmọ: 25  “Aliho he mẹ Jehovah* ko yinuwa hẹ mi te to azán ehelẹ mẹ die. E ko lẹ́ ayidonugo etọn hlan mi nado de vlẹko ṣie sẹ̀ to gbẹtọ lẹ ṣẹnṣẹn.”+ 26  To osun ṣidopotọ etọn mẹ, Jiwheyẹwhe do angẹli Gabliẹli+ hlan tòdaho Galili tọn he nọ yin Nazalẹti mẹ, 27  hlan awhli*+ de dè, he ko dopà alọwle tọn* na sunnu de he nọ yin Josẹfu sọn owhé Davidi tọn gbè, oyín awhli lọ tọn sọ wẹ Malia.+ 28  Podọ to whenue angẹli lọ yì ewọ dè, e dọna ẹn dọmọ: “Kudo lewhenu, hiẹ he nukundagbe daho yin didohia, Jehovah* tin hẹ we.” 29  Ṣigba, ohó etọn hẹn ẹn biọ bẹwlu mẹ taun bọ e tẹnpọn nado mọnukunnujẹ nudọdomẹ he nkọ ehe sọgan ko yin mẹ. 30  Enẹwutu, angẹli lọ dọna ẹn dọmọ: “A dibu blo, Malia, na Jiwheyẹwhe ko do nukundagbe hia we. 31  Podọ pọ́n! hiẹ na mọhò* bo na ji visunnu de,+ hiẹ nasọ ylọ oyín etọn dọ Jesu.+ 32  Ewọ na klo+ bo na yin yiylọdọ Visunnu Gigogán lọ tọn,+ Jehovah* Jiwheyẹwhe nasọ yí ofìn Davidi otọ́ etọn tọn na ẹn,+ 33  ewọ nasọ yin Ahọlu do owhé Jakọbu tọn ji kakadoi, podọ Ahọluduta etọn ma na wá opodo.”+ 34  Ṣigba, Malia dọna angẹli lọ dọmọ: “Nawẹ ehe na jọ gbọn, to whenue yẹn ma ko tindo kọndopọ zanhẹmẹ tọn hẹ sunnu de?”+ 35  Angẹli lọ gblọnna ẹn dọmọ: “Gbigbọ wiwe na wá hiẹ ji,+ bọ huhlọn Gigogán lọ tọn na ṣinyọnyẹ ji we. Podọ na enẹ tọn wutu, ovi he yin jiji lọ na yin yiylọdọ wiwe,+ Visunnu Jiwheyẹwhe tọn.+ 36  Podọ pọ́n! Elizabẹti hẹnnumẹ towe lọsu ko mọhò visunnu de tọn, to yọnhowhe etọn mẹ, podọ osun ṣidopotọ etọn die, yèdọ ewọ he nọ yin yiylọdọ wẹnsinọ lọ; 37  na nuhe ko yin didọ depope* ma glo Jiwheyẹwhe.”+ 38  To whelọnu, Malia dọmọ: “Pọ́n! Afanumẹ yọnnu Jehovah* tọn wẹ yẹn! Na e ni jọ domọ na mi kẹdẹdi ohó towe.” To whenẹnu, angẹli lọ tọ́n sọn e dè. 39  Enẹwutu, Malia fọ́n to azán enẹlẹ gbè bo zingbejizọnlin yì lẹdo osó tọn lẹ mẹ po awuyiya po, yì tòdaho Juda tọn de mẹ, 40  e sọ biọ owhé Zekalia tọn gbè bo dọnudo Elizabẹti. 41  Todin, dile Elizabẹti sè nudọdomẹ Malia tọn, viyẹyẹ lọ he to ohò etọn mẹ whàngo, Elizabẹti sọ gọ́ na gbigbọ wiwe 42  bo yí ogbè lélé do dawhá dọmọ: “Donanọ wẹ hiẹ to yọnnu lẹ ṣẹnṣẹn, podọ donanọ wẹ sinsẹ́n adọ̀ towe mẹ tọn! 43  Enẹwutu, naegbọn lẹblanulọkẹyi ehe do yin nina mi, bọ onọ̀ Oklunọ ṣie tọn nado wá dè e? 44  Na, pọ́n! dile nudọdomẹ towe jẹ otó ṣie lẹ mẹ, viyẹyẹ he to ohò ṣie mẹ whàngo na ayajẹ wutu. 45  Ayajẹnọ wẹ hiẹ lọsu ga he yise, na nuhe yin didọna we sọn Jehovah* dè lẹpo wẹ na yin hinhẹndi mlẹnmlẹn.” 46  Malia sọ dọmọ: “Alindọn ṣie* pagigona Jehovah,*+ 47  podọ gbigbọ ṣie ma sọgan nọma gọ́ na ayajẹ susu hlan Jiwheyẹwhe Mẹwhlẹngántọ ṣie,+ 48  na e ko mọ ninọmẹ he yìdo afanumẹ yọnnu etọn tọn.+ Na, pọ́n! bẹsọn din sọyi, whẹndo lẹpo na nọ ylọ mi dọ ayajẹnọ,+ 49  na Omẹ huhlọnnọ lọ ko wà azọ́n daho lẹ na mi, podọ wiwe wẹ oyín etọn,+ 50  lẹblanu etọn nasọ tin to mẹhe dibusi i lẹ ji sọn whẹndo de mẹ jẹ devo mẹ.+ 51  E ko yí awà etọn lẹ do wà azọ́n huhlọnnọ lẹ; mẹhe yin saklanọ to linlẹn ahun yetọn lẹ tọn mẹ lẹ wẹ e ko vúnvún pé.+ 52  E ko de sunnu huhlọnnọ lẹ sọn ofìn ji+ bo ko ze whiwhẹnọ lẹ daga;+ 53  e ko yí nudagbe lẹ do pekọna mẹhe huvẹ to hùhù lẹ,+ podọ e ko do mẹhe yin adọkunnọ lẹ hlan agbá. 54  E ko gọalọna Islaeli devizọnwatọ etọn bo flin lẹblanu etọn,+ 55  kẹdẹdile e ko dọna tọgbo mítọn lẹ do, yèdọ hlan Ablaham po kúnkan* etọn po+ kakadoi.” 56  Malia gbọṣi e dè na nudi osun atọ̀n, enẹgodo e lẹkọyi whé. 57  Todin, ojlẹ sọ̀ na Elizabẹti nado jivi, e sọ ji visunnu de. 58  Podọ kọmẹnu po hẹnnumẹ etọn lẹ po sè dọ Jehovah* ko do lẹblanu daho etọn hia ẹ, yé sọ jaya hẹ ẹ.+ 59  To azán ṣinatọ̀ntọ gbè, yé wá nado gboadà na ovi pẹvi lọ,+ podọ yé jlo na do oyín otọ́ etọn tọn, yèdọ Zekalia na ẹn. 60  Amọ́, onọ̀ etọn gblọn dọmọ: “Lala! ṣigba Johanu wẹ e na yin yiylọdọ.” 61  Enẹwutu, yé dọna ẹn dọmọ: “Mẹdepope ma tin to hẹnnumẹ towe lẹ mẹ he tindo oyín enẹ.” 62  To whenẹnu, yé kanse otọ́ etọn gbọn alọ yí do basi ohia lẹ dali nado dọ oyín he e jlo dọ e ni yin yiylọdọ. 63  E sọ biọ wekan-whlẹ de bo kàn do e ji dọmọ: “Johanu wẹ oyín etọn.”+ Enẹwutu, e jiawu na mẹlẹpo. 64  To afọdopolọji, onù etọn hùn bọ okàn odẹ́ etọn tọn tún podọ e jẹ hodọ ji+ bo to Jiwheyẹwhe pà. 65  Obu sọ jẹ mẹhe nọ nọ̀ lẹdo yetọn mẹ lẹpo ji, onú ehe lẹpo sọ to yinyin didọ pé to lẹdo osó tọn lẹpo mẹ to Jude. 66  Podọ mẹhe sè lẹpo hẹn ẹn do ahun yetọn mẹ dọmọ: “Etẹwẹ ovi pẹvi ehe na wá lẹzun taun?” Na alọ Jehovah* tọn tin to e ji nugbonugbo. 67  Whenẹnu, Zekalia otọ́ etọn gọ́ na gbigbọ wiwe, e sọ dọ dọdai dọmọ: 68  “Mì gbọ Jehovah* Jiwheyẹwhe Islaeli tọn ni yin pipà,+ na e ko lẹ́ ayidonugo etọn hlan omẹ etọn lẹ bo ko sọ whlẹn yé gán.+ 69  E ko sọ ze azò whlẹngán tọn* de daga+ na mí to owhé Davidi devizọnwatọ etọn tọn gbè,+ 70  kẹdẹdile ewọ ko gbọn onù yẹwhegán wiwe etọn hohowhenu tọn lẹ mẹ dọho+ 71  gando whlẹngán mítọn go sọn alọ kẹntọ mítọn lẹ tọn mẹ podọ sọn alọ mẹhe gbẹwanna mí lẹ tọn mẹ;+ 72  nado do lẹblanu hia to kọndopọ mẹ hẹ tọgbo mítọn lẹ podọ nado flin alẹnu wiwe etọn,+ 73  yèdọ whiwhle he e whlé na Ablaham tọgbo mítọn,+ 74  nado na mí lẹblanulọkẹyi lọ, to whenue mí na ko yin whinwhlẹn sọn alọ kẹntọ lẹ tọn mẹ godo, nado nọ wà sinsẹ̀nzọn wiwe hlan ẹn madibu, 75  po nugbonọ-yinyin gọna dodowiwa po to nukọn etọn to azán mítọn lẹpo gbè. 76  Ṣigba na hiẹ, ovi pẹvi E, hiẹ na yin yiylọdọ yẹwhegán Gigogán lọ tọn, na hiẹ na jẹnukọnna Jehovah* yì nado jla aliho etọn lẹ do,+ 77  nado na oyọnẹn whlẹngán tọn omẹ etọn lẹ gbọn jona ylando yetọn lẹ tọn dali,+ 78  na awuvẹmẹ sisosiso Jiwheyẹwhe mítọn tọn wutu. Po awuvẹmẹ ehe po, mí na mọ wunkinkẹn sọn oji aga 79  nado na hinhọ́n mẹhe sinai to zinvlu po oyẹ̀ okú tọn po mẹ lẹ+ podọ nado deanana afọ mítọn lẹ to aliho jijọho tọn ji.” 80  Ovi pẹvi lọ sọ whẹ́n bo lẹzun huhlọnnọ to gbigbọ mẹ, podọ e gbọṣi danfafa ji kakajẹ azán he gbè e do ede hia Islaeli to gbangba.

Nudọnamẹ Odò Tọn

Pọ́n Zẹm.
Pọ́n Nud. A5.
Pọ́n Nud. A5.
Pọ́n Nud. A5.
Pọ́n Nud. A5.
Kavi “sọn adọ̀ onọ̀ etọn tọn mẹ.”
Pọ́n Nud. A5.
Pọ́n Nud. A5.
Kavi “sinsẹ̀nzọn gbangba tọn.”
Pọ́n Nud. A5.
Hogbe Glẹkigbe tọn lọ dlẹnalọdo yọnnu de he ma ko yọ́n sunnu pọ́n.
Kavi “ko yin asi-mọdo-aliji.”
Pọ́n Nud. A5.
Kavi “mọhò ovi de tọn to vidọ̀ towe mẹ.”
Pọ́n Nud. A5.
Kavi “na nudepope.”
Pọ́n Nud. A5.
Pọ́n Nud. A5.
Kavi “Yẹnlọsu pete.”
Pọ́n Nud. A5.
To paa mẹ, “okún.”
Pọ́n Nud. A5.
Pọ́n Nud. A5.
Pọ́n Nud. A5.
Kavi “ze whlẹngántọ huhlọnnọ.” Pọ́n Zẹm., “Azò.”
Pọ́n Nud. A5.