Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Levitiku 5:1-19

NUHE E BẸHẸN LẸ

  • Ylando delẹ po avọ́nunina yetọn po (1-6)

    • Ylando mẹdevo lẹ tọn didọ (1)

  • Avọ́nunina he wamọnọ lẹ gán basi (7-13)

  • Avọ́nunina na ylando mayọnẹn mẹ tọn (14-19)

5  “‘Eyin mẹde* ko sè oylọ gbangba tọn de nado dekunnu*+ bọ ewọ yin kunnudetọ nuṣiwa lọ tọn, kavi ko mọ kavi ko sè dogbọn ylanwiwa lọ dali, ṣigba bo ma dọ ẹ, ewọ ko waylando bo nasọ jiya nuṣiwa etọn tọn.  “‘Kavi eyin mẹde* doalọ onú mawé de go, vlavo oṣiọ gbekanlin mawé de tọn, kanlin whégbè tọn mawé de tọn, kavi nudida flinflin mawé he nọ doawhàn zọnpọ lẹ tọn go,+ e ko yin mawé bosọ hùwhẹ eyin ewọ ma tlẹ yọnẹn.  Kavi eyin mẹde to mayọnẹn mẹ doalọ onú mawé he tọ́n sọn gbẹtọ go de go+—onú mawé depope he sọgan hẹn ẹn zun mawé—bọ e wá yọnẹn, whenẹnu e ko hùwhẹ.  “‘Kavi eyin mẹde* nọ plaplaji do whlé nado wà nude—vlavo nado wà dagbe kavi oylan, mahopọnna nudepope he e sọgan yin—ṣigba eyin e wá yọnẹn dọ emi ko nọ plaplaji do whlé to mayọnẹn mẹ, e ko hùwhẹ.*+  “‘Eyin e hùwhẹ dopo to onú ehelẹ mẹ tọn, whenẹnu e dona yigbe ylando etọn tọn.+  E nasọ hẹn avọ́nunina whẹhuhu tọn wá na Jehovah na ylando he e ko wà,+ yèdọ kanlin asi de sọn lẹngbọpa lọ mẹ, vlavo lẹngbọvu asi kavi gbọgbọẹvu asi de na avọ́nunina ylando tọn. Yẹwhenọ lọ nasọ basi ovẹsè do ota etọn mẹ na ylando etọn.  “‘Ṣigba, eyin ewọ ma penugo nado na lẹngbọ de, e na hẹn owhlé awe kavi awhànnẹvu awe+ wá na Jehovah taidi avọ́nunina whẹhuhu tọn etọn na ylando lọ, yèdọ dopo na avọ́nunina ylando tọn podọ awetọ na avọ́nunina mimẹ̀.+  Ewọ na hẹn yé wá na yẹwhenọ lọ, mẹhe na yí tintan do basi avọ́nunina ylando tọn bo na ṣùn vẹ́go-kàn etọn, ṣigba bo ma na sán okọ̀ etọn sẹ̀.  E na mimí apadewhe ohùn avọ́nunina ylando tọn lọ tọn do agbà lọ go, ṣigba e na sọ̀n ohùn he pò do agbà lọ kọ̀n to kọmẹ.+ Avọ́nunina ylando tọn de wẹ. 10  E na yí awetọ do basi avọ́nunina mimẹ̀ dile e ko nọ yin bibasi do;+ yẹwhenọ lọ nasọ basi ovẹsè do ota etọn mẹ na ylando he e ko wà bọ e na yin jijona ẹn.+ 11  “‘Todin, eyin ewọ ma penugo nado na owhlé awe kavi awhànnẹvu awe, e dona hẹn linfin dagbedagbe mado-ao efa dopo tọn*+ wá taidi avọ́nunina ylando tọn na ylando etọn. E ma dona yí amì do e mẹ kavi yí nuyọnwan gblingblin do e ji, na avọ́nunina ylando tọn de wẹ. 12  E na hẹn ẹn wá yẹwhenọ lọ dè, yẹwhenọ lọ nasọ ba alọgogo dopo sọn e mẹ taidi avọ́nunina ohia tọn de,* e nasọ hẹn ẹn nado to azọ̀ti to agbà lọ ji to aga na avọ́nunina he yin bibasi gbọn miyọ́n dali hlan Jehovah lẹ. Avọ́nunina ylando tọn de wẹ. 13  Yẹwhenọ lọ na basi ovẹsè do ota etọn mẹ na ylando he e ko wà, yèdọ depope to ylando ehelẹ mẹ bọ e na yin jijona ẹn.+ Nuhe pò to avọ́nunina lọ mẹ na lẹzun yẹwhenọ lọ tọn,+ kẹdẹdi avọ́nunina jinukun-lili tọn.’”+ 14  Jehovah sọ dọna Mose dọmọ: 15  “Eyin mẹde* yinuwa po nugbonọ-mayin po gbọn ylando wiwà to mayọnẹn mẹ sọta onú wiwe Jehovah tọn lẹ dali,+ e dona hẹn agbò he to gángán de wá na Jehovah sọn lẹngbọpa lọ mẹ taidi avọ́nunina whẹhuhu tọn de;+ akuẹ etọn he yin ṣekẹli* fataka tọn dona sọgbe hẹ ojlẹnu ṣekẹli tọn he yin ofi wiwe lọ* tọn.+ 16  E nasọ suahọ na ylando he e ko wà sọta ofi wiwe lọ bo nasọ sú mado-atọ́n akuẹ lọ tọn dogọ.+ E na yí i na yẹwhenọ lọ, na ewọ nido yí agbò avọ́nunina whẹhuhu tọn lọ do basi ovẹsè+ do ota etọn mẹ bọ e na yin jijona ẹn.+ 17  “Eyin mẹde* waylando gbọn depope to nuhe Jehovah dosẹ́n etọn lẹ mẹ wiwà dali, eyin ewọ ma tlẹ yọnẹn, e ko hùwhẹ bo nasọ jiya nuṣiwa etọn tọn.+ 18  E na hẹn agbò he to gángán de wá na yẹwhenọ lọ sọn lẹngbọpa lọ mẹ sọgbe hẹ nuhe yin bibiọ na avọ́nunina whẹhuhu tọn.+ Yẹwhenọ lọ na basi ovẹsè do ota etọn mẹ na nuṣiwa he ma yin sọn ojlo mẹ lọ he e wà to mayọnẹn mẹ bọ e na yin jijona ẹn. 19  Avọ́nunina whẹhuhu tọn de wẹ. E họnwun dọ ewọ ko hùwhẹ ylanwiwa do Jehovah go tọn.”

Nudọnamẹ Odò Tọn

Kavi “alindọn de.”
To paa mẹ, “sè dẹ̀hodo (whiwhle) de.” Vlavo nulila de gando ylanwiwa de go he bẹ dẹ̀hodo hẹn sọta ylanwatọ lọ kavi kunnudetọ nuṣiwa lọ tọn eyin e ma dekunnu.
Kavi “alindọn de.”
Kavi “alindọn de.”
E taidi dọ owhẹ̀ he e hù wẹ yindọ ewọ ma depà etọn.
Mado-ao efa dopo tọn sọzẹn hẹ L 2,2. Pọ́n Nud. B14.
Kavi “taidi mimá oflin (nunọnutẹnmẹ) etọn tọn.”
Kavi “alindọn de.”
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Kavi “alindọn de.”