Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Levitiku 19:1-37

NUHE E BẸHẸN LẸ

  • Osẹ́n lẹ gando wiwe-yinyin go (1-37)

    • Jibẹwawhé he sọgbe (9, 10)

    • Tókunọ po nukuntọ́nnọ lẹ po tọn hihopọn (14)

    • Mẹhẹngble (16)

    • Mì ma dona hẹnmẹ do homẹ (18)

    • Yè dosẹ́n obó po afinyọn po tọn (26, 31)

    • Yè dosẹ́n nukinkan do agbasa go tọn (28)

    • Sisi nina mẹhomẹ lẹ (32)

    • Nuyiwa hẹ jonọ lẹ (33, 34)

19  Jehovah sọ dọna Mose yinukọn dogọ dọmọ:  “Dọho hẹ Islaelivi lẹpo bo dọna yé dọ, ‘Mìwlẹ dona yin wiwe, na wiwe wẹ yẹn Jehovah Jiwheyẹwhe mìtọn.+  “‘Mì dona nọ na sisi* onọ̀ mìtọn po otọ́ mìtọn lẹ po,+ podọ mì dona nọ yìn gbọjẹzan ṣie lẹ.+ Yẹn wẹ Jehovah Jiwheyẹwhe mìtọn.  Mì lẹhlan yẹwhe ovọ́+ lẹ dè kavi basi yẹwhe boṣiọ kinkọ̀n tọn lẹ+ na mìde blo. Yẹn wẹ Jehovah Jiwheyẹwhe mìtọn.  “‘Todin, eyin hiẹ jlo na basi avọ́sinsan jijọho tọn de hlan Jehovah,+ hiẹ dona basi i to aliho de mẹ na hiẹ nido yin alọkẹyi.+  Avọ́sannu lọ dona nọ yin dùdù to azán he gbè avọ́sinsan lọ yin bibasi te podọ to azán he bọdego gbè, ṣigba eyin e pò jẹ azán atọ̀ntọ gbè, e dona yin fifiọ.+  Podọ eyin depope to avọ́sannu lọ mẹ yin dùdù to azán atọ̀ntọ gbè, whẹhuhu de wẹ, e ma na yin alọkẹyi.  Mẹhe sọ dù i na jiya nuṣiwa etọn tọn, na ewọ ko hẹn onú wiwe Jehovah tọn flu, podọ omẹ* enẹ dona yin sinsánsẹ* sọn omẹ etọn lẹ mẹ.  “‘Eyin hiẹ gbẹ̀n jinukun towe lẹ to ogle towe lẹ mẹ, hiẹ ma dona gbẹ̀n jinukun he tin to tónu ogle towe tọn lẹpo pete gba, podọ hiẹ ma dona ṣinyan jinukun he pò na wélu-wiwe lẹ.*+ 10  Mọdopolọ, hiẹ ma dona bẹ nuhe pò to vẹngle towe mẹ lẹ pli kavi ṣinyan ovẹn sinsẹ́n he gbàpe gbọn vẹngle towe mẹ lẹ gba. Hiẹ dona jo yé do na wamọnọ*+ po mẹhe to jonọ-gbéji po. Yẹn wẹ Jehovah Jiwheyẹwhe towe. 11  “‘Hiẹ ma dona fìnnú,+ hiẹ ma dona klọmẹ,+ podọ hiẹ ma dona yinuwa hẹ hatọ towe po oklọ po. 12  Hiẹ ma dona nọ yí lalo do whlé to oyín ṣie mẹ+ bo gbọnmọ dali hẹn oyín Jiwheyẹwhe towe tọn flu. Yẹn wẹ Jehovah. 13  Hiẹ ma dona hò gbẹtọ hatọ towe dù,+ podọ hiẹ ma dona tafumẹ.+ Hiẹ ma dona hẹn azọ́nkuẹ pakanọ de tọn go to ozán blebu mẹ kakajẹ afọnnu.+ 14  “‘Hiẹ ma dona donù* tókunọ de kavi ze ahlidanu de donukọnna nukuntọ́nnọ de,+ podọ hiẹ dona nọ dibusi Jiwheyẹwhe towe.+ Yẹn wẹ Jehovah. 15  “‘Hiẹ ma dona nọ yin mawadodonọ to whẹdida towe mẹ. Hiẹ ma dona do mẹnukuntahopọn hia wamọnọ kavi do nukundagbe hia adọkunnọ.+ Hiẹ dona nọ yí dodowiwa do dawhẹ gbẹtọ hatọ towe tọn. 16  “‘Hiẹ ma dona to yìyì pé to omẹ towe lẹ ṣẹnṣẹn nado to mẹhẹngble.+ Hiẹ ma dona yangbé ogbẹ̀* gbẹtọ hatọ towe tọn.*+ Yẹn wẹ Jehovah. 17  “‘Hiẹ ma dona gbẹwanna nọvisunnu towe to ahun towe mẹ.+ Hiẹ dona nọ wọhẹ gbẹtọ hatọ towe,+ na a nikaa tindo mahẹ to ylando etọn mẹ. 18  “‘Hiẹ ma dona yiahọsu+ kavi hẹn omẹ towe lẹ do homẹ, podọ hiẹ dona yiwanna gbẹtọ hatọ towe di dewe.+ Yẹn wẹ Jehovah. 19  “‘Hiẹ dona nọ yìn osẹ́ndoai ṣie lẹ: Hiẹ ma dona hẹn kanlin whégbè tọn wunmẹ awe nado hẹ yede. Hiẹ ma dona do okún wunmẹ voovo awe do ogle towe mẹ,+ podọ hiẹ ma dona do awù he yè ṣá sekan wunmẹ voovo awe dopọ nado basi de gba.+ 20  “‘Todin, eyin sunnu de mlọnai dopọ hẹ yọnnu de bo tindo kọndopọ zanhẹmẹ tọn hẹ ẹ bọ yọnnu lọ sọ yin deviyọnnu sunnu devo tọn, ṣigba bọ yọnnu lọ ma ko yin fifligọ kavi ma ko mọ mẹdekannujẹ yí, to whenẹnu yè dona sayana yé. Etomọṣo, yé ma dona yin hùhù, na yọnnu lọ ma ko mọ mẹdekannujẹ yí wutu. 21  Ewọ dona hẹn agbò avọ́nunina whẹhuhu tọn etọn+ wá na Jehovah to họntonu gòhọ opli tọn lọ tọn. 22  Yẹwhenọ lọ nasọ yí agbò avọ́nunina whẹhuhu tọn lọ do basi ovẹsè do ota etọn mẹ to Jehovah nukọn, na ylando he ewọ ko wà wutu, ylando he e ko wà nasọ yin jijona ẹn. 23  “‘Eyin mì wá aigba lọ ji bo do atin depope na dùdù, to bẹjẹeji, mì dona pọ́n sinsẹ́n etọn hlan taidi mawé podọ osùnú.* Owhe atọ̀n wẹ e na yin osùnú* na mì na. E ma dona yin dùdù. 24  Ṣigba, to owhe ẹnẹtọ mẹ, sinsẹ́n etọn lẹpo na yin wiwe bo na yin yiyizan nado jaya to Jehovah nukọn.+ 25  Enẹgodo, to owhe atọ́ntọ mẹ, mì sọgan dù sinsẹ́n etọn bo nasọ bẹ ojijẹ susu pli. Yẹn wẹ Jehovah Jiwheyẹwhe mìtọn. 26  “‘Mì ma dona dù nudepope he mẹ ohùn tin te.+ “‘Mì ma dona dọ dọṣẹ kavi jlẹ obó.+ 27  “‘Mì ma dona whlẹ́ oda* lẹdo pé bo jo oda ahọ̀n mẹ tọn mìtọn do* mọdopolọ mì ma dona whlẹ́ tónu ogbì mìtọn lẹ tọn kẹdẹ gba.*+ 28  “‘Mì ma dona gbowhẹ do agbasa mìtọn go na oṣiọ* de wutu,+ podọ mì ma dona kannu do agbasa mìtọn go gba. Yẹn wẹ Jehovah. 29  “‘Mì ma dona de yẹyi sọn viyọnnu mìtọn go gbọn hinhẹn ẹn zun galọtọ de dali,+ na galilọ nikaa gbayipe to aigba lọ ji bọ walọ gblezọn nasọ gọ́ e ji.+ 30  “‘Mìwlẹ dona nọ yìn gbọjẹzan ṣie lẹ,+ podọ mì dona nọ tindo sisi sisosiso na* fiwiwe ṣie. Yẹn wẹ Jehovah. 31  “‘Mì ma dona lẹhlan afinyọnnọ lẹ dè,+ podọ mì ma dona yì mẹhe nọ dọ dọṣẹ lẹ dè,+ na mì nikaa yin hinhẹnflu gbọn yé dali. Yẹn wẹ Jehovah Jiwheyẹwhe mìtọn. 32  “‘Mì dona nọ fọnṣite to mẹhe tindo owhà nukọn,+ podọ mì dona nọ gbògbéna mẹhe yin mẹhomẹ,+ podọ mì dona nọ dibusi Jiwheyẹwhe mìtọn.+ Yẹn wẹ Jehovah. 33  “‘Eyin jonọ de nọ nọ̀ mì dè to aigba mìtọn ji, mì ma dona ylanhùn do e go.+ 34  Jonọ he nọ nọ̀ mì dè lọ dona tin taidi tòvi de to ṣẹnṣẹn mìtọn;+ podọ mì dona yiwanna ẹn di mìde, na mìlọsu ko nọ jonọ-gbéji to aigba Egipti tọn ji pọ́n.+ Yẹn wẹ Jehovah Jiwheyẹwhe mìtọn. 35  “‘Mìwlẹ ma dona yí nujlẹnu oklọ tọn lẹ zan to tedidi, zínpinpẹn, kavi kiklo nude tọn jijlẹ whenu.+ 36  Mìwlẹ dona nọ yí ojlẹnu pipé lẹ, ojlẹnu zínpinpẹn tọn pipé lẹ, ojlẹnu onú húhú tọn pipé* lẹ po ojlẹnu osin tọn pipé* lẹ po zan.+ Yẹn wẹ Jehovah Jiwheyẹwhe mìtọn he plan mì tọ́n sọn aigba Egipti tọn ji. 37  Enẹwutu, mì dona nọ yìn osẹ́ndoai ṣie lẹpo bo nọ setonuna nudide whẹdida tọn ṣie lẹpo, mì sọ dona nọ hodo yé.+ Yẹn wẹ Jehovah.’”

Nudọnamẹ Odò Tọn

To paa mẹ, “nọ dibusi.”
Kavi “alindọn.”
Kavi “hùhù.”
Kavi “he yin jijodo lẹ.”
Kavi “agbátọnọ.”
Kavi “hodẹ̀do.”
To paa mẹ, “ohùn.”
Kavi vlavo, “Hiẹ ma dona ṣite poun to whenue ogbẹ̀ gbẹtọ hatọ towe tọn yin zizedo owù mẹ.”
To paa mẹ, “taidi ayú tintan etọn.”
To paa mẹ, “adàmagbonọ.”
Kavi “pà oda yìdo; lùn oda.”
Kavi “bo pà oda he tin to ota mìtọn pá lẹ.”
E họnwun dọ ehe to alọdlẹndo aṣa kosi lẹ tọn de bo ma zẹẹmẹdo dọ yé ma sọgan pà ogbì yetọn yìdo paali.”
Kavi “alindọn.” To Heblugbe mẹ, hogbe lọ nefeṣ tofi to alọdlẹndo mẹkúkú de.
Kavi “awú dona nọ ji mì na.” To paa mẹ, “dona nọ dibusi.”
To paa mẹ, “ojlẹnu efa tọn pipé.” Pọ́n Nud. B14.
To paa mẹ, “ojlẹnu hini tọn pipé.” Pọ́n Nud. B14.