Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Juda 1:1-25

NUHE E BẸHẸN LẸ

  • Nudọdomẹ lẹ (1, 2)

  • Whẹdidana mẹplọntọ lalo lẹ (3-16)

    • Mikaẹli dọnnu hẹ Lẹgba (9)

    • Dọdai Enọku tọn (14, 15)

  • Gbọṣi owanyi Jiwheyẹwhe tọn mẹ (17-23)

  • Gigo nina Jiwheyẹwhe (24, 25)

 Juda, afanumẹ Jesu Klisti tọn, ṣigba nọvisunnu Jakọbu tọn,+ to wekanhlan mẹyiylọ+ lẹ he Jiwheyẹwhe Otọ́ yiwanna podọ yé mẹhe yin whiwhla dai na Jesu Klisti:+  Na lẹblanu, jijọho po owanyi po ni yin hinhẹn sudeji hlan mì.  Mẹyiwanna lẹ emi, dile yẹn tlẹ ko to vivẹnu lẹpo do dai nado kanwehlan mì gando whlẹngán he mí tindo to pọmẹ+ lọ go, yẹn mọdọ e yin dandan nado kanwehlan mì bo dotuhomẹna mì nado hoavùn sinsinyẹn na yise+ lọ he ko yin yíyí na omẹ wiwe lẹ whladopo podọ kakadoi.  Whẹwhinwhẹ́n he yẹn tindo wẹ yindọ mẹdelẹ ko lìn biọ ṣẹnṣẹn mìtọn, yèdọ yé mẹhe ko yin dide gbọn Owe-wiwe dali sọn whenu dindẹn die na whẹdida ehe; omẹ jijọ-madi-Jiwheyẹwhe tọn lẹ wẹ yé bo nọ diọ nukundagbe majẹhẹ Jiwheyẹwhe mítọn tọn zun whẹjijọ de nado jo yede na walọ gblezọn tasinsinyẹn tọn*+ bosọ nọ mọ́n Oklunọ mítọn dopo kẹdẹ he họ̀ mí lọ, enẹ wẹ Jesu Klisti.+  Mahopọnna dọ mìwlẹ ko yọ́n onú ehe lẹpo ganji, yẹn jlo na flinnu mì dọ whenue Jehovah* ko whlẹn omẹ etọn lẹ gán sọn aigba Egipti tọn ji+ godo, e wá và mẹhe ma do yise hia lẹ sudo.+  Podọ angẹli he ma gbọṣi otẹn dowhenu tọn yetọn mẹ ṣigba bo jo nọtẹn he jẹna yé lọ do lẹ+ wẹ ewọ ko yí gẹdẹ madopodo lẹ do hlá dote to zinvlu gọ́ngọ́n mẹ na whẹdida azán daho lọ tọn.+  Mọdopolọ, Sodọmi po Gomọla po gọna tòdaho he lẹdo yé lẹ lọsu ko peve to fẹnnuwiwa zanhẹmẹ tọn* mẹ bo doafọna ojlo agbasalan tọn he ma yin jọwamọ tọn lẹ;+ yé jiya whẹdida yasanamẹ miyọ́n madopodo tọn bo gbọnmọ dali yin zizedonukọnna mí taidi apajlẹ avase tọn de.+  Mahopọnna ehe, omẹ ehelẹ sọ nọ to yede jo na odlọ lẹ bo nọ to agbasalan hẹnflu, nọ to nukunpẹvi yí do pọ́n aṣẹpipa* bosọ nọ to nùzan do omẹ gigonọ lẹ go.+  Ṣigba, to whenue Mikaẹli+ angẹligán+ lọ tindo wiwọ́ de hẹ Lẹgba bo to nudọn gando oṣiọ Mose tọn+ go, e ma tẹnpọn nado hẹn whẹdida wá e ji po hogbe mẹzunzun tọn+ lẹ po gba, amọ́ e dọmọ: “Na Jehovah* ni wọhẹ we.”+ 10  Ṣigba, omẹ ehelẹ nọ to nùzan gando nuhe mẹ yé ma mọnukunnujẹ na taun tọn lẹpo go.+ Podọ nulẹpo he mẹ yé mọnukunnujẹ to jọwamọ-liho taidi kanlin he ma nọ lẹnnupọn lẹ,+ ehelẹ mẹ wẹ yé zindonukọn nado to yedelẹ hẹn gblezọn te. 11  Dindọn hlan yé, na yé ko hodo ali Kaini tọn+ bo ko dowezun hodo alibubu Balaami tọn+ na ale, yé ko sọ dọ̀n to hodidọ atẹṣiṣi+ Kola+ tọn mẹ! 12  Omẹ ehelẹ wẹ osé whiwhla lẹ to osin glọ to hùnwhẹ owanyi didohia tọn+ mìtọn lẹ whenu dile yé to núdù hẹ mì, lẹngbọhọtọ he nọ na núdùdù yedelẹ madibu;+ aslọ matin osin he jẹhọn nọ to hinhẹn yidọn-yide;+ atin he ma nọ de sinsẹ́n tọ́n to ojlẹ etọn mẹ,* he ko kú whla awe* bọ yè ko họ̀nadọna lẹ wẹ yé; 13  agbówhẹn sinsinyẹn ohù tọn he nọ túntún fútúfútú winyannu yedetiti tọn lẹ jẹgbonu;+ sunwhlẹvu he to dindanpe lẹ, he zinvlu gọ́ngọ́n ko yin hihla dai na kakadoi wẹ yé.+ 14  Mọwẹ, Enọku,+ omẹ ṣinawetọ bẹsọn hukan Adam tọn ji, ko dọ dọdai gando yé go ga, to whenuena e dọmọ: “Mì pọ́n! Jehovah* wá po fọtọ́n donu ao angẹli wiwe etọn lẹ tọn po+ 15  nado hẹn whẹdida ṣẹ do mẹlẹpo ji,+ podọ nado gblewhẹdo omẹ jijọ-madi-Jiwheyẹwhe tọn lẹpo na walọ jijọ-madi-Jiwheyẹwhe tọn yetọn lẹpo he yé ko zan to aliho jijọ-madi-Jiwheyẹwhe tọn mẹ, podọ na ohó mẹhẹnjọsi tọn he ylanwatọ jijọ-madi-Jiwheyẹwhe tọn lẹ ko dọ sọta ẹ lẹpo wutu.”+ 16  Omẹ ehelẹ nọ to nuhlundọ+ bo nọ to lewu gando ninọmẹ gbẹ̀mẹ tọn yetọn go bosọ nọ doafọna ojlo yedetiti tọn lẹ,+ podọ onù yetọn nọ yigo onú gboogbo lẹ tọn, to whenuena yé nọ to pipà oklọ tọn na mẹdevo lẹ* na ale yedetiti tọn wutu.+ 17  Na mìwlẹ tọn, mẹyiwanna lẹ emi, mì flin ohó he apọsteli Oklunọ mítọn Jesu Klisti tọn lẹ ko dọ wayi* lẹ, 18  lehe yé nọ saba dọ hlan mì do dọmọ: “To azán godo tọn lẹ mẹ, mẹṣankotọ lẹ na tin bo na to afọdona ojlo yetọn lẹ na onú jijọ-madi-Jiwheyẹwhe tọn lẹ.”+ 19  Omẹ ehelẹ wẹ yé he nọ hẹn kinklan wá lẹ,+ yèdọ gbẹtọ kanlinjọmẹ* lẹ he ma tindo gbigbọnọ-yinyin.* 20  Ṣigba, mì mẹyiwanna lẹ emi, mì hẹn mìde lodo to dodonu yise mìtọn he wé hugan lọ tọn ji bo nọ hodẹ̀ to gbigbọ wiwe mẹ,+ 21  na mì nido hẹn mìde do owanyi Jiwheyẹwhe tọn mẹ,+ dile mì to tenọpọn lẹblanu Oklunọ mítọn Jesu Klisti tọn, to todido mẹ na ogbẹ̀ madopodo.+ 22  Humọ, mì zindonukọn nado nọ do lẹblanu hia+ mẹdelẹ he tindo ayihaawe;+ 23  mì whlẹn yé gán+ gbọn hihò yé yí sọn miyọ́n mẹ dali. Ṣigba, mì zindonukọn nado nọ do lẹblanu hia mẹdevo lẹ bo nọ wàmọ po obu po, dile mì tlẹ gbẹwanna awù lọ lọsu he agbasalan ko hẹn kudiho.+ 24  Todin, hlan mẹlọ he penugo nado basi hihọ́na mì ma nado dahli bo hẹn mì gbọṣi madoblọ+ mẹ to gigo* etọn nukọn po ayajẹ daho po, 25  yèdọ Jiwheyẹwhe Mẹwhlẹngántọ mítọn dopo kẹdẹ lọ gbọn Jesu Klisti Oklunọ mítọn gblamẹ, wẹ gigo, kiklo, huhlọn po aṣẹpipa po ni tin hlan sọn ojlẹ madopodo podọ todin podọ kakadoi. Niṣẹ.*

Nudọnamẹ Odò Tọn

Kavi “walọ he huwinyan.” Glẹki, asẹlgeia. Pọ́n Zẹm.
Pọ́n Nud. A5.
Pọ́n Zẹm.
Dlẹnalọdo Jiwheyẹwhe po mẹhe e na aṣẹpipa lẹ po.
Pọ́n Nud. A5.
To paa mẹ, “vivọnu afò-whenu tọn.”
Kavi “kú pete.”
Pọ́n Nud. A5.
Kavi “to sisi nukunta tọn na gbẹtọ lẹ.”
Kavi “ko dọ dọdai yetọn.”
Kavi “agbasanọ.”
To paa mẹ, “gbigbọ lọ.”
Kavi “awusọhia gigonọ.”
Kavi “Amẹn” to Glẹkigbe mẹ.