Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jona 1:1-17

NUHE E BẸHẸN LẸ

  • Jona tẹnpọn nado họ̀n sọn Jehovah nukọn (1-3)

  • Jehovah hẹn yujẹhọn sinsinyẹn de fọ́n (4-6)

  • Jona wẹ adọ̀ nuhahun lọ tọn (7-13)

  • Jona yin dindlan do hùmẹ (14-16)

  • Whèvi daho de ze Jona mì (17)

1  Ohó Jehovah tọn wá Jona,*+ visunnu Amitai tọn dè dọmọ:  “Fọ́n bo yì Nineve+ tòdaho-gbó lọ mẹ bosọ lá whẹdida sọta ẹ, na n’ko doayi kanyinylan yetọn go.”  Ṣigba, Jona fọ́n bo họ̀n dedo Talṣiṣi sọn Jehovah nukọn; e jẹte yì Jọpa bo mọ tọjihun de he jei Talṣiṣi. Enẹwutu, e sú húndokuẹ bo biọ e mẹ nado hodo yé yì Talṣiṣi, sọn Jehovah nukọn.  Whenẹnu, Jehovah fọ́n jẹhọn sinsinyẹn de to ohù lọ ji bọ yujẹhọn de sọ to yìnyìn po zingidi po to ohù lọ ji sọmọ bọ tọjihun lọ jlo na siọ.  Budi húnkùntọ lọ lẹ sọmọ bọ dopodopo yetọn jẹ awhádo ylọ yẹwhe yetọn lẹ ji na alọgọ. Yé sọ jẹ nuyizan he to ohún lọ mẹ lẹ bẹ dlan hùmẹ ji nado hẹn ohún lọ fua.+ Ṣigba, Jona ko jẹte yì nuglọ pete to ohún lọ mẹ,* fie e mlọnai bo damlọn yìkànmẹ te.  Húnkùntọ-gán lọ sọ dọnsẹpọ ẹ bo dọna ẹn dọmọ: “Naegbọn hiẹ do to amlọndọ? Fọ́n bo dawhá ylọ yẹwhe towe! Vlavo Jiwheyẹwhe nugbo lọ na hò mítọn pọ́n bọ mí ma na dọ̀n.”+  Enẹgodo, yé dọna ode awetọ dọmọ: “Mì wá bo gbọ mí ni de ovò+ nado yọ́n mẹhe mí na gblewhẹdo na nugbajẹmẹji ehe.” Enẹwutu, yé de ovò bọ ovò de Jona.+  Yé dọna ẹn dọmọ: “Jaale bo dọna mí, mẹnu wẹ mí na gblewhẹdo na nugbajẹmẹji he wá mí ji ehe? Azọ́n tẹwẹ hiẹ nọ wà podọ fie wẹ a wá sọn? Fie wẹ yin otò towe mẹ podọ mẹnu lẹ wẹ yin omẹ towe lẹ?”  E gblọn dọmọ: “Heblu de wẹ yẹn, podọ n’nọ dibusi* Jehovah Jiwheyẹwhe olọn tọn, yèdọ Mẹlọ he basi ohù po aigba-klo po.” 10  Budi dawe lọ lẹ dogọ to whenue yé sè ehe bọ yé sọ kanse e dọmọ: “Naegbọn a do wà onú mọnkọtọn?” (Dawe lọ lẹ yọnẹn dọ hinhọ̀n yì wẹ e te sọn Jehovah nukọn, na ewọ ko dọna yé wutu.) 11  Yé sọ dọna ẹn dọmọ: “Etẹwẹ mí na wà na we na ohù lọ nido nọ whii na mí?” Na zingidi ohù lọ tọn to sinsinyẹn deji wutu. 12  Ewọ dọmọ: “Mì ze mi bo dlan mi do ohù lọ mẹ, ohù lọ nasọ nọ whii na mì; na n’yọnẹn dọ yẹn wẹ zọ́n bọ yujẹhọn sinsinyẹn ehe do wá mì ji.” 13  Ṣigba, dawe lọ lẹ dovivẹnu taun nado gọ̀ ohún lọ do agé,* amọ́ e ma pà yé, na zingidi ohù lọ tọn to sinsinyẹn deji lẹdo yé wutu. 14  Whenẹnu wẹ yé dawhá hlan Jehovah bo dọmọ: “Ṣo todin, Jehovah E, jaale, a dike mí dọ̀n na dawe ehe tọn* wutu blo! A hia ohùn homẹvọnọ tọn dokọna mí blo, to whenuena e yindọ hiẹ ko basi dile e jlo we do, Jehovah E.” 15  Whenẹnu wẹ yé ze Jona bo dlan ẹn do ohù lọ mẹ; zingidi ohù lọ tọn sọ doalọte. 16  Enẹwutu, obu Jehovah tọn jẹ dawe lọ lẹ ji sinsinyẹn+ bọ yé basi avọ́sinsan de hlan Jehovah bosọ dopà lẹ. 17  Todin, Jehovah do whèvi daho de hlan nado ze Jona mì bọ Jona tin to adọ̀go whèvi lọ tọn mẹ na okle atọ̀n ozán atọ̀n.+

Nudọnamẹ Odò Tọn

Zẹẹmẹdo “Apoe.”
Kavi “yì ohún-zanji.”
Kavi “basi sinsẹ̀n hlan.”
Kavi “tẹnpọn nado kùnhún jẹage.”
Kavi “na alindọn dawe ehe tọn.”