Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 9:1-41

NUHE E BẸHẸN LẸ

  • Jesu hẹnazọ̀ngbọna dawe de he yin jiji di nukuntọ́nnọ (1-12)

  • Falesi lẹ kanhose dawe he jẹgangan lọ (13-34)

  • Nukuntintọ́n Falesi lẹ tọn (35-41)

9  Dile e juwajei, e mọ dawe de he yin nukuntọ́nnọ sọn jiji whenu.  Devi etọn lẹ sọ kanse e dọmọ: “Labi,+ mẹnu wẹ waylando, dawe ehe kavi mẹjitọ etọn lẹ, bọ ewọ do yin jiji di nukuntọ́nnọ?”  Jesu gblọn dọmọ: “Dawe ehe kavi mẹjitọ etọn lẹ ma waylando gba, ṣigba na azọ́n Jiwheyẹwhe tọn lẹ nido sọgan yin hinhẹn sọawuhia gando ewọ go wutu wẹ.+  Mí dona wazọ́n mẹhe do mi hlan tọn lẹ to whenue okle gbẹ́ pò to ote;+ ozán na wá kú bọ mẹdepope ma sọgan wazọ́n.  Dile e na dẹnsọ bọ yẹn na to aihọn mẹ, yẹn wẹ hinhọ́n aihọn lọ tọn.”+  To whenue e ko dọ onú ehelẹ godo, e túntán do kọmẹ bo yí otán lọ do yàn okọ́ bosọ tlẹ́ okọ́ yinyan lọ do nukun dawe lọ tọn lẹ ji+  bo dọna ẹn dọmọ: “Yì klọ́ ẹ to osindò Siloami tọn mẹ” (ehe lẹdogbedevomẹ etọn yin “Enẹ He to Sisà Yì”). Ewọ yì bo klọ́ ẹ, e sọ lẹkọwa bo to numọ.+  To whenẹnu, kọmẹnu lẹ podọ mẹhe ko mọdọ e yin nubiọdutọ dai lẹ jẹ didọ ji dọmọ: “Dawe he nọ sinai bo nọ to nubiọ dai lọ die, kavi e ma yin mọ wẹ?”  Mẹdelẹ to didọmọ: “Ewọ lọ wẹ.” Mẹdevo lẹ to didọmọ: “Lala, ṣigba e di i wẹ.” Dawe lọ sọ nọ to didọ dọ: “Yẹn wẹ.” 10  Enẹwutu, yé kanse e dọmọ: “To whelọnu lo, nawẹ nukun towe lẹ wagbọn do hùn?” 11  E gblọn dọmọ: “Dawe lọ he nọ yin Jesu wẹ yàn okọ́ bo tlẹ́ ẹ do nukun ṣie lẹ ji bosọ dọna mi dọ, ‘Yì Siloami mẹ bo klọ́ ẹ.’+ Enẹwutu, n’yì bo klọ́ ẹ bosọ mọnú.” 12  Whenẹnu, yé dọna ẹn dọmọ: “Fie wẹ dawe enẹ te?” Ewọ sọ dọmọ: “N’ma yọnẹn.” 13  Yé plan dawe he yin nukuntọ́nnọ dai lọ yì Falesi lẹ dè. 14  Gbọjẹzan+ de sọ wẹ azán lọ he gbè Jesu yàn okọ́ bo hùn nukun etọn lẹ.+ 15  Enẹwutu, Falesi lẹ lọsu jẹ kinkanbiọ dawe lọ ji lehe e wagbọn do mọnú. E dọna yé dọmọ: “E sá okọ́ yinyan do nukun ṣie lẹ ji, n’sọ klọ́ ẹ bo mọnú.” 16  Delẹ to Falesi lẹ mẹ jẹ didọ ji dọmọ: “Dawe ehe ma wá sọn Jiwheyẹwhe dè gba, na e ma nọ yìn Gbọjẹzan wutu.”+ Mẹdevo lẹ sọ dọmọ: “Nawẹ dawe de he yin ylandonọ sọgan basi ohia mọnkọtọn lẹ gbọn?”+ Todin, kinklan de fọ́n to ṣẹnṣẹn yetọn.+ 17  Yé sọ vọ́ dọna dawe nukuntọ́nnọ lọ dọmọ: “Etẹwẹ hiẹ dọ gando ewọ go, to whenuena e yindọ nukun towe lẹ wẹ e hùn?” Dawe lọ dọmọ: “Yẹwhegán de wẹ ewọ.” 18  Etomọṣo, Ju lẹ ma yise dọ ewọ ko yin nukuntọ́nnọ dai bo wá mọnú gba, kakajẹ whenue yé ylọ mẹjitọ dawe he to numọ todin lọ tọn lẹ. 19  Yé sọ kanbiọ yé dọmọ: “Be visunnu mìtọn he mì dọ dọ e yin jiji di nukuntọ́nnọ lọ die ya? To whelọnu lo, nawẹ ewọ wagbọn do to numọ todin?” 20  Mẹjitọ etọn lẹ gblọn dọmọ: “Mí yọnẹn dọ visunnu mítọn die podọ ewọ yin jiji di nukuntọ́nnọ. 21  Ṣigba, lehe ewọ wagbọn do to numọ todin, mí ma yọnẹn; podọ mẹhe hùn nukun etọn lẹ, mí masọ yọnẹn. Mì kanse e. E ko whẹ́n mẹho. Ewọ lọsu wẹ dona dọho.” 22  Mẹjitọ etọn lẹ dọ onú ehelẹ, na yé dibuna Ju lẹ wutu,+ na Ju lẹ ko kọngbedopọ dọ, eyin mẹdepope yigbe dọ ewọ wẹ Klisti lọ, mẹlọ dona yin yinyan sọn sinagọgu mẹ.+ 23  Ehe wẹ zọ́n bọ mẹjitọ etọn lẹ do dọmọ: “E ko whẹ́n mẹho. Mì kanse e.” 24  Enẹwutu, yé sọ ylọ dawe he yin nukuntọ́nnọ dai lọ whla awetọ bo dọna ẹn dọmọ: “Dọ nugbo lọ to Jiwheyẹwhe nukọn; míwlẹ yọnẹn dọ ylandonọ de wẹ dawe ehe.” 25  Ewọ sọ gblọn dọmọ: “Yẹn ma yọnẹn eyin ylandonọ de wẹ ewọ. Onú dopo he yẹn yọnẹn wẹ yindọ, n’yin nukuntọ́nnọ dai, amọ́ n’to numọ todin.” 26  To whenẹnu, yé dọna ẹn dọmọ: “Etẹwẹ ewọ wà na we? Nawẹ e hùn nukun towe lẹ gbọn?” 27  E gblọnna yé dọmọ: “Yẹn ko dọna mì dai, ṣogan mì ma dotoai. Naegbọn mì do jlo nado vọ́ ehe sè? Kavi mìlọsu jlo na lẹzun devi etọn lẹ ga wẹ?” 28  Enẹwutu, yé gbọn mẹṣanko dali dọna ẹn dọmọ: “Hiẹ wẹ yin devi dawe enẹ tọn, ṣigba devi Mose tọn wẹ míwlẹ yin. 29  Mí yọnẹn dọ Jiwheyẹwhe dọhona Mose, ṣigba na dawe ehe tọn, mí ma yọ́n fie ewọ wá sọn.” 30  Dawe lọ gblọnna yé dọmọ: “Na taun tọn, nupaṣamẹ de wẹ ehe, dọ mì ma yọ́n fie ewọ wá sọn, ṣogan ewọ ko hùn nukun ṣie lẹ. 31  Mí yọnẹn dọ Jiwheyẹwhe ma nọ dotoaina ylandonọ lẹ,+ ṣigba eyin mẹdepope dibusi Jiwheyẹwhe bo nọ wà ojlo etọn, omẹ enẹ wẹ ewọ nọ dotoaina.+ 32  Sọn hohowhenu, e ma ko yin sisè pọ́n gbede dọ mẹdepope hùn nukun mẹhe yin jiji di nukuntọ́nnọ de tọn. 33  Eyin dawe ehe ma wá sọn Jiwheyẹwhe dè, e ma sọgan wà nudepope.”+ 34  Yé sọ gblọnna ẹn dọmọ: “Hiẹ lọsu blebu wẹ yin jiji di ylandonọ, ṣogan be pinplọn mí wẹ a te ya?” Yé sọ dlan ẹn do gbonu!+ 35  Jesu sè dọ yé ko dlan ẹn do gbonu, podọ to whenue e mọ ẹn, e dọmọ: “Be hiẹ tindo yise to Visunnu gbẹtọ tọn mẹ ya?” 36  Dawe lọ gblọn dọmọ: “Mẹdaho, mẹnu wẹ ewọ? Dọna mi, na yẹn nido tindo yise to ewọ mẹ?” 37  Jesu dọna ẹn dọmọ: “Hiẹ ko mọ ẹn podọ, na nugbo tọn, mẹhe to hodọna we lọ wẹ.” 38  E dọmọ: “Oklunọ, yẹn tindo yise to ewọ mẹ.” E sọ litaina* ẹn. 39  Whenẹnu, Jesu dọmọ: “Na whẹdida ehe wutu wẹ yẹn do wá aihọn ehe mẹ, na mẹhe ma nọ mọnú lẹ nido sọgan mọnú+ podọ mẹhe nọ mọnú lẹ nido sọgan lẹzun nukuntọ́nnọ.”+ 40  Falesi he tin to finẹ po e po lẹ sè onú ehelẹ, yé sọ dọna ẹn dọmọ: “Kavi nukuntọ́nnọ wẹ míwlẹ lọsu yin ga ya?” 41  Jesu dọna yé dọmọ: “Eyin mìwlẹ ko yin nukuntọ́nnọ wẹ, mì ma na ko tindo ylando. Ṣigba, todin mìwlẹ dọ dọ, ‘Mí nọ mọnú.’ Enẹwutu, ylando mìtọn gbọṣi aimẹ.”+

Nudọnamẹ Odò Tọn

Kavi “dẹ́ do odò na.”