Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 8:12-59

NUHE E BẸHẸN LẸ

  • Otọ́ lọ dekunnu gando Jesu go (12-30)

    • Jesu, “hinhọ́n aihọn tọn” (12)

  • Ovi Ablaham tọn lẹ (31-41)

    • “Nugbo lọ nasọ hẹn mì jẹ mẹdekannu” (32)

  • Ovi Lẹgba tọn lẹ (42-47)

  • Jesu po Ablaham po (48-59)

8  12  To whenẹnu, Jesu sọ vọ́ dọna yé dọmọ: “Yẹn wẹ hinhọ́n aihọn tọn.+ Mẹdepope he nọ hodo mi ma na zinzọnlin to zinvlu mẹ gbede, ṣigba e na tindo hinhọ́n+ ogbẹ̀ tọn.” 13  Enẹwutu, Falesi lẹ dọna ẹn dọmọ: “Hiẹ to kunnude gando dewe go; kunnudide towe ma yin nugbo.” 14  Jesu gblọnna yé dọmọ: “Eyin yẹn tlẹ to kunnude gando dee go, nugbo wẹ kunnudide ṣie, na yẹn yọ́n fihe yẹn wá sọn podọ fihe yẹn jei.+ Ṣigba, mìwlẹ ma yọ́n fihe yẹn wá sọn podọ fihe yẹn jei. 15  Mìwlẹ nọ dawhẹ sọgbe hẹ awusọhia gbonu tọn;*+ yẹn ma nọ dawhẹna mẹde paali. 16  Ṣogan, eyin n’tlẹ dawhẹ, nugbo wẹ whẹdida ṣie, na yẹn ma to dee ṣo, ṣigba Otọ́ he do mi hlan tin po yẹn po.+ 17  Humọ, e ko yin kinkan to Osẹ́n mìtọn mẹ dọmọ: ‘Nugbo wẹ kunnudide omẹ awe tọn.’+ 18  Yẹn wẹ mẹlọ he to kunnude gando dee go, Otọ́ he do mi hlan sọ to kunnude gando go e.”+ 19  To whenẹnu, yé dọna ẹn dọmọ: “Fie wẹ Otọ́ towe te?” Jesu gblọn dọmọ: “Mìwlẹ ma yọ́n mi kavi Otọ́ ṣie.+ Eyin mì ko yọ́n mi wẹ, mì na ko yọ́n Otọ́ ṣie ga.”+ 20  E dọ onú ehelẹ to fihe adọkun potin+ lẹ tin te dile e to mẹplọn to tẹmpli mẹ. Ṣigba, mẹdepope ma wle e, na ojlẹ etọn ma ko wá wutu.+ 21  Enẹwutu, e sọ vọ́ dọna yé dọmọ: “Yẹn jei, mìwlẹ nasọ dín mi, ṣigba mì na kú do ylando mìtọn mẹ.+ Fihe yẹn jei, mìwlẹ ma sọgan wá.”+ 22  To whenẹnu, Ju lẹ jẹ didọ ji dọmọ: “Kavi e jlo na hù ede wẹ? Na e dọ dọ, ‘Fihe yẹn jei, mìwlẹ ma sọgan wá.’” 23  E sọ dọna yé dọmọ: “Odò wẹ mìwlẹ wá sọn; aga wẹ yẹn wá sọn.+ Aihọn ehe mẹ wẹ mìwlẹ wá sọn; yẹn ma wá sọn aihọn ehe mẹ gba. 24  Enẹwutu wẹ yẹn dọna mì dọmọ: Mì na kú do ylando mìtọn lẹ mẹ. Na eyin mìwlẹ ma yise dọ yẹn wẹ ewọ, mì na kú do ylando mìtọn lẹ mẹ.” 25  To whenẹnu, yé jẹ didọna ẹn ji dọmọ: “Mẹnu wẹ hiẹ yin?” Jesu gblọnna yé dọmọ: “Naegbọn yẹn tlẹ do to hodọ hẹ mì taun? 26  Yẹn tindo nususu nado dọ gando mì go podọ yẹn tindo owhẹ̀ susu nado dá. Na taun tọn, nugbonọ wẹ Mẹhe do mi hlan, podọ nuhe yẹn sè sọn ewọ dè lọ lẹ pẹpẹ wẹ yẹn to didọ to aihọn mẹ.”+ 27  Yé ma mọnukunnujẹemẹ dọ Otọ́ lọ hodọ wẹ e te na yé. 28  Enẹwutu, Jesu dọmọ: “To whenue mì na ko ze Visunnu gbẹtọ tọn plá do núgo,+ whenẹnu wẹ mì na yọnẹn dọ yẹn wẹ ewọ,+ podọ dọ yẹn ma nọ wà nudepope sọn ojlo ṣie mẹ;+ ṣigba yẹn to onú ehelẹ dọ kẹdẹdile Otọ́ lọ plọn mi do. 29  Podọ Mẹhe do mi hlan tin po yẹn po; e ma jo yẹn dopo do gba, na yẹn nọ wà nuhe nọ hẹn homẹhun in lẹ to whepoponu.”+ 30  Dile e to onú ehelẹ dọ, mẹsusu tindo yise to ewọ mẹ. 31  Enẹwutu, Jesu zindonukọn nado dọna Ju he yí i sè lẹ dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, 32  mìwlẹ nasọ yọ́n nugbo lọ,+ nugbo lọ nasọ hẹn mì jẹ mẹdekannu.”+ 33  Yé gblọnna ẹn dọmọ: “Kúnkan Ablaham tọn wẹ mí podọ mí ma ko yin afanumẹ na mẹde pọ́n gbede. Naegbọn hiẹ do dọ dọ, ‘Mì na jẹ mẹdekannu’?” 34  Jesu gblọnna yé dọmọ: “Nugbonugbo wẹ yẹn dọna mì dọ, ylanwatọ lẹpo wẹ yin afanumẹ ylando tọn.+ 35  Humọ, afanumẹ ma nọ nọ̀ whégbè kakadoi; visunnu wẹ nọ nọ̀ kakadoi. 36  Enẹwutu, eyin Visunnu lọ hẹn mì jẹ mẹdekannu, mì na jẹ mẹdekannu nugbonugbo. 37  Yẹn yọnẹn dọ kúnkan Ablaham tọn wẹ mìwlẹ. Ṣigba, mì to dindin nado hù mi, na ohó ṣie lẹ ma mọ otẹn to ohò mìtọn mẹ wutu. 38  Nuhe yẹn ko mọ to Otọ́ ṣie dè lẹ dọ wẹ n’te,+ ṣigba mìwlẹ to nuhe mì ko sè sọn otọ́ mìtọn dè lẹ wà.” 39  Yé sọ gblọnna ẹn dọmọ: “Ablaham wẹ otọ́ mítọn.” Jesu sọ dọna yé dọmọ: “Eyin mìwlẹ yin ovi Ablaham tọn lẹ,+ mì na ko to azọ́n he yin Ablaham tọn lẹ wà. 40  Ṣigba, todin mìwlẹ to dindin nado hù yẹn mẹhe ko dọ nugbo he n’ko sè sọn Jiwheyẹwhe dè na mì.+ Ablaham ma wà ehe gba. 41  Azọ́n he yin otọ́ mìtọn tọn lẹ wà wẹ mì te.” Yé dọna ẹn dọmọ: “Míwlẹ ma yin ayọvi gba;* Otọ́ dopo wẹ mí tindo, yèdọ Jiwheyẹwhe.” 42  Jesu dọna yé dọmọ: “Eyin Jiwheyẹwhe wẹ yin Otọ́ mìtọn, mì na ko yiwanna mi,+ na Jiwheyẹwhe dè wẹ yẹn wá sọn bo do tin tofi. Yẹn ma wá na dee gba, ṣigba Ewọ wẹ do mi hlan.+ 43  Naegbọn mì ma do mọnukunnujẹ nuhe dọ n’te mẹ? Na mì ma sọgan dotoaina ohó ṣie wutu. 44  Otọ́ mìtọn Lẹgba dè wẹ mì wá sọn, mì sọ jlo nado wà ojlo otọ́ mìtọn tọn lẹ.+ Hlọnhutọ de wẹ ewọ sọn dowhenu,*+ e masọ nọ nọte to nugbo mẹ, na nugbo ma tin to ewọ mẹ wutu. Eyin e dolalo, e nọ dọho sọgbe hẹ ayilinlẹn etọn titi, na lalonọ de wẹ ewọ podọ otọ́ lalo tọn.+ 45  To alọ devo mẹ, na yẹn dọ nugbo na mì wutu, mìwlẹ ma yí mi sè. 46  Mẹnu to mì mẹ wẹ gblewhẹ ylando tọn do mi? Eyin nugbo dọ wẹ n’te, naegbọn mì ma do yí mi sè? 47  Mẹhe yin Jiwheyẹwhe tọn nọ dotoaina ohó Jiwheyẹwhe tọn lẹ.+ Ehe wutu wẹ mìwlẹ ma do dotoai, na mì ma yin Jiwheyẹwhe tọn wutu.”+ 48  Ju lẹ gblọnna ẹn dọmọ: “Be owhẹ̀ mítọn ma whẹ́n bọ mí do dọ dọ, ‘Samalianu de wẹ hiẹ+ bosọ tindo aovi de ya’?”+ 49  Jesu gblọn dọmọ: “Yẹn ma tindo aovi de gba, ṣigba Otọ́ ṣie gbògbéna wẹ n’te, bọ mìwlẹ ma gbògbéna mi. 50  Ṣigba, yẹn ma to gigo dín na dee gba;+ Mẹde tin he to dindin in bosọ to whẹda. 51  Nugbonugbo wẹ yẹn dọna mì dọ, eyin mẹde payi ohó ṣie go, ewọ ma na kú gbede.”+ 52  Ju lẹ dọna ẹn dọmọ: “Todin wẹ mí yọnẹn dọ hiẹ tindo aovi de. Ablaham kú, yẹwhegán lẹ lọsu ga, ṣigba hiẹ dọ dọ, ‘Eyin mẹde payi ohó ṣie go, ewọ ma na dọ́ okú pọ́n gbede.’ 53  Hiẹ ma klohu otọ́ mítọn Ablaham, mẹhe kú, kavi hiẹ wàmọ wẹ? Yẹwhegán lẹ lọsu kú. Mẹnu wẹ hiẹ lẹndọ a yin?” 54  Jesu gblọn dọmọ: “Eyin yẹn pagigona dee, gigo ṣie ma yin nude. Otọ́ ṣie wẹ nọ pagigona mi,+ mẹhe mìwlẹ ylọdọ Jiwheyẹwhe mìtọn. 55  Ṣogan, mìwlẹ ma ko yọ́n ewọ,+ ṣigba yẹn yọ́n ewọ.+ Podọ eyin yẹn dọ dọ yẹn ma yọ́n ewọ, be yẹn taidi mìwlẹ, yèdọ lalonọ de. Ṣigba, yẹn yọ́n ewọ bosọ to pipayi ohó etọn go. 56  Ablaham otọ́ mìtọn jaya tlala dile e to nukundo nado mọ azán ṣie, ewọ sọ mọ ẹn bo jaya.”+ 57  To whenẹnu, Ju lẹ dọna ẹn dọmọ: “Hiẹ ma ko tindo owhe 50 todin, ṣogan hiẹ ko mọ Ablaham ya?” 58  Jesu dọna yé dọmọ: “Nugbonugbo wẹ yẹn dọna mì dọ, whẹpo Ablaham do yin jiji, yẹn ko tin.”+ 59  Enẹwutu, yé ze zannu lẹ nado dlan do e, ṣigba Jesu whlá ede bo tọ́n sọn tẹmpli lọ mẹ.

Nudọnamẹ Odò Tọn

Kavi “nujinọtedo gbẹtọvi tọn lẹ.”
Kavi “yin jiji gbọn fẹnnuwiwa zanhẹmẹ tọn dali.” Glẹki, pọlnẹia. Pọ́n Zẹm.
Kavi “bẹjẹeji.”