Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 2:1-25

NUHE E BẸHẸN LẸ

  • Alọwle to Kana; osin diọ zun ovẹn (1-12)

  • Jesu klọ́ tẹmpli lọ wé (13-22)

  • Jesu yọ́n nuhe to gbẹtọ homẹ (23-25)

2  To azán atọ̀ntọ gbè, hùnwhẹ alọwle tọn de yin bibasi to Kana Galili tọn, onọ̀ Jesu tọn sọ tin to finẹ.  Jesu po devi etọn lẹ po yin oylọ-basina wá hùnwhẹ alọwle tọn lọ tẹnmẹ ga.  To whenue ovẹn whè, onọ̀ Jesu tọn dọna ẹn dọmọ: “Yé ma tindo ovẹn.”  Ṣigba, Jesu dọna ẹn dọmọ: “Yọnnu, etẹwẹ dù yẹn po hiẹ po to enẹ mẹ?* Ogàn ṣie ma ko hò todin gba.”  Onọ̀ etọn dọna mẹhe to lizọnyi lẹ dọmọ: “Nudepope he e dọna mì, mì wà ẹ.”  Todin, osinzẹ́n zannu tọn ṣidopo tin to finẹ dile osẹ́n lẹ̀wé Ju lẹ tọn lẹ biọ do,+ dopodopo yetọn sọgan hẹn osin jlẹka* awe kavi atọ̀n.  Jesu dọna yé dọmọ: “Mì kọ̀n osin do ozẹ́n lọ lẹ mẹ ni gọ́.” Enẹwutu, yé kọ̀n osin gọ́ yé kakajẹ onù.  Whenẹnu, ewọ dọna yé dọmọ: “Todin, mì ba vude tọ́n bo hẹn ẹn yì anadenanutọ hùnwhẹ lọ tọn dè.” Yé sọ ba ẹ.  Todin, to whenue anadenanutọ hùnwhẹ lọ tọn dọ́ osin he ko yin didiọ zun ovẹn lọ pọ́n, bo ma yọ́n fie e wá sọn, (ṣogan bọ lizọnyitọ he ba osin lọ tọ́n lẹ yọnẹn), anadenanutọ hùnwhẹ lọ tọn ylọ asisunọ yọyọ lọ 10  bo dọna ẹn dọmọ: “Mẹlẹpo wẹ nọ de ovẹn dagbe tọ́n jẹnukọn, bọ to whenue gbẹtọ lẹ ko nùmú, yé nọ de dehe ma sinyẹn lọ tọ́n. Hiẹ ka whlá ovẹn dagbe lọ kakajẹ din.” 11  Jesu basi ehe to Kana Galili tọn taidi bẹjẹeji ohia etọn lẹ tọn. Gbọnmọ dali, ewọ hẹn gigo etọn sọawuhia,+ devi etọn lẹ sọ tindo yise to ewọ mẹ. 12  To ehe godo, ewọ po onọ̀ etọn po gọna nọvisunnu etọn lẹ+ po devi etọn lẹ po jẹte yì Kapẹlnaumi,+ ṣigba yé ma nọ finẹ na azán susu. 13  Todin, hùnwhẹ Juwayi+ Ju lẹ tọn ko sẹpọ, Jesu sọ hẹji yì Jelusalẹm. 14  Ewọ sọ mọ mẹhe to oyìn lẹ, lẹngbọ lẹ po apoe+ lẹ po sà to tẹmpli mẹ lẹ gọna akuẹṣẹtọ lẹ to aisinnu yetọn lẹ ji. 15  Enẹwutu, to whenue e ko yí okàn lẹ do basi obá de, e yàn mẹhe tindo lẹngbọ po oyìn po lẹpo jẹgbonu sọn tẹmpli lọ mẹ, e sọ kọ̀n abọgan-kuẹ akuẹdiọtọ lẹ tọn yìngbe bo takitina tafo yetọn lẹ.+ 16  Ewọ sọ dọna mẹhe to apoe sà lẹ dọmọ: “Mì bẹ onú ehelẹ sọn fi! Mì sọ yí ohọ̀ Otọ́ ṣie tọn do basi ohọ̀ ajọwiwa tọn* ba blo!”+ 17  Devi etọn lẹ flindọ e ko yin kinkandai dọmọ: “Yẹn na gọ́ na zohunhun na ohọ̀ towe.”+ 18  Enẹwutu, Ju lẹ gblọnna ẹn dọmọ: “Ohia tẹwẹ a sọgan na mí+ nado dohia dọ hiẹ tindo aṣẹ nado wà onú ehelẹ?” 19  Jesu sọ gblọnna yé dọmọ: “Mì họ́ tẹmpli ehe liai, yẹn nasọ jlọ ẹ dote to azán atọ̀n gblamẹ.”+ 20  To whenẹnu, Ju lẹ dọmọ: “Owhe 46 gblamẹ wẹ tẹmpli ehe yin gbigbá, bọ hiẹ na jlọ ẹ dote to azán atọ̀n gblamẹ ya?” 21  Ṣigba, tẹmpli agbasa etọn tọn hodọ wẹ e te.+ 22  Todin, to whenue e ko yin finfọn sọn oṣiọ lẹ mẹ, devi etọn lẹ flindọ e ko nọ dọ ehe dai,+ yé sọ yí adà Owe-wiwe tọn lọ po nuhe Jesu ko dọ lẹ po sè. 23  Ṣigba, to whenue e tin to hùnwhẹ Juwayi tọn lọ tẹnmẹ to Jelusalẹm, mẹsusu tindo yise to oyín etọn mẹ, dile yé mọ ohia he e to bibasi lẹ. 24  Ṣigba, Jesu ma nọ dejido yé go, na e yọ́n yemẹpo wutu 25  podọ na e ma tindo nuhudo mẹdepope tọn nado dekunnuna ẹn gando gbẹtọ go, na ewọ yọ́n nuhe tin to ohò gbẹtọ tọn mẹ.+

Nudọnamẹ Odò Tọn

To paa mẹ, “Yọnnu, etẹwẹ yin yẹn po hiẹ po tọn?” Hogbe yẹhiadonu tọn de wẹ ehe, he do agọjẹdonu hia. Hogbe lọ “yọnnu” yiyizan ma do mẹmasi hia gba.
Vlavo osin jlẹka dopo yin bati dopo he sọzẹn hẹ L 22. Pọ́n Nud. B14.
Kavi “do basi ahimẹ; do wàjọ.”