Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 19:1-42

NUHE E BẸHẸN LẸ

  • Jesu yin hihò bo yin vivlẹko (1-7)

  • Pilati sọ vọ́ kanhose Jesu (8-16a)

  • Jesu yin whiwhè do pòtin go to Gọlgọta (16b-24)

  • Jesu wleawudaina onọ̀ etọn (25-27)

  • Okú Jesu tọn (28-37)

  • Ṣiọdidi Jesu tọn (38-42)

19  Whenẹnu, Pilati dọna awhànfuntọ lẹ nado plan Jesu yì bo hò e.+  Awhànfuntọ lẹ sọ lọ̀n jẹgbakun owùn tọn de bo ṣinyọ́n do ota na ẹn bosọ do tewu sopẹ́-vọ̀ tọn de na ẹn,+  yé sọ to e dè wá bo nọ dọmọ: “Kudo lewhenu,* hiẹ Ahọlu Ju lẹ tọn!” Podọ yé nọ hotómẹ na ẹn ga.+  Pilati sọ vọ́ tọ́n bo dọna yé dọmọ: “Mì pọ́n! Yẹn plan ẹn jẹgbonu wá na mì, na mì nido yọnẹn dọ yẹn ma mọ oylan de to okọ̀ na ẹn.”+  Enẹwutu, Jesu tọ́njẹgbonu, bọ jẹgbakun owùn tọn to ota na ẹn bọ e tin to tewu sopẹ́-vọ̀ tọn de mẹ. Pilati sọ dọna yé dọmọ: “Mì pọ́n! Dawe lọ!”  Ṣigba, to whenue yẹwhenọgán lẹ po ponọ lẹ po mọ ẹn, yé dawhá dọmọ: “Ewọ ni yin hùhù do pòtin ji! Ewọ ni yin hùhù do pòtin ji!”+ Pilati dọna yé dọmọ: “Mìlọsu ni plan ẹn bo hù i,* na yẹn ma mọ oylan depope to okọ̀ na ẹn.”+  Ju lẹ gblọnna ẹn dọmọ: “Míwlẹ tindo osẹ́n de, podọ sọgbe hẹ osẹ́n lọ, ewọ dona kú,+ na e ylọ ede dọ visunnu Jiwheyẹwhe tọn wutu.”+  To whenue Pilati sè nuhe dọ yé te, obu jẹ e ji dogọ,  ewọ sọ vọ́ biọ owhé ayimatẹn-gán tọn gbè bo dọna Jesu dọmọ: “Fie wẹ hiẹ wá sọn?” Ṣigba, Jesu ma na ẹn gblọndo depope.+ 10  Enẹwutu, Pilati dọna ẹn dọmọ: “Hiẹ ma kẹnù demẹ na mi wẹ? A ma yọnẹn dọ n’tindo aṣẹ nado tún we dote podọ n’sọ tindo aṣẹ nado hù we* wẹ ya?” 11  Jesu gblọnna ẹn dọmọ: “Hiẹ ma na ko tindo aṣẹ de do ji e eyin e ma ko yin nina we sọn aga. Ehe wutu wẹ ylando dawe lọ he ze mi do alọ towe mẹ tọn do klohu.” 12  Na whẹwhinwhẹ́n ehe wutu, Pilati to aliho dín nado tún in dote, ṣigba Ju lẹ dawhá dọmọ: “Eyin hiẹ tún dawe ehe dote, a ma yin họntọn Sesali tọn. Mẹdepope he hẹn ede zun ahọlu to hodọ sọta* Sesali.”+ 13  Enẹwutu, to whenue Pilati ko sè ohó ehelẹ, e hẹn Jesu jẹgbonu, ewọ sọ sinai to whẹdaján de ji to fihe nọ yin Zannu Titẹ́, ṣigba Gabbata to Heblugbe mẹ. 14  Todin, azán Awuwle*+ na hùnwhẹ Juwayi tọn wẹ; e yin nudi gànhiho ṣidopotọ* mẹ. Ewọ sọ dọna Ju lẹ dọmọ: “Mì pọ́n! Ahọlu mìtọn!” 15  Ṣigba, yé dawhá dọmọ: “De e sẹ̀ sọn aimẹ! De e sẹ̀ sọn aimẹ! Ewọ ni yin hùhù do pòtin ji!” Pilati dọna yé dọmọ: “Be yẹn ni hù ahọlu mìtọn wẹ ya?” Yẹwhenọgán lẹ gblọn dọmọ: “Míwlẹ ma tindo ahọlu de adavo Sesali.” 16  Enẹwutu, e jo e do alọ mẹ na yé nado yin hùhù do pòtin ji.+ To whenẹnu, Jesu jẹ alọ yetọn mẹ. 17  Ewọ lọsu wẹ hẹn yatin* lọ yì fihe nọ yin Taká Tẹnmẹ,+ he yin Gọlgọta to Heblugbe mẹ.+ 18  Yé sọ whè e do pòtin go to finẹ+ dopọ hẹ dawe awe devo lẹ, dopo to awà ehe ji podọ awetọ to awà diẹ ji bọ Jesu to ṣẹnṣẹn.+ 19  Pilati sọ wleawuna nukinkan de bo ze e do yatin* lọ go. E yin kinkan dọmọ: “Jesu Nazalẹti tọn, Ahọlu Ju lẹ tọn.”+ 20  Susu Ju lẹ tọn wẹ hia nukinkan ehe, na fihe Jesu yin whiwhè do pòtin go te sẹpọ tòdaho lọ, podọ e yin kinkan do Heblugbe, Latingbe po Glẹkigbe po mẹ. 21  Ṣigba, yẹwhenọgán Ju lẹ tọn lẹ dọna Pilati dọmọ: “Hiẹ kàn ‘Ahọlu Ju lẹ tọn’ blo, ṣigba dọ e dọ dọ, ‘Yẹn wẹ Ahọlu Ju lẹ tọn.’” 22  Pilati gblọn dọmọ: “Nuhe n’kàn ko yin kinkan.” 23  Todin, whenue awhànfuntọ lẹ ko whè Jesu do pòtin go, yé yí awugbó etọn lẹ bo má do ẹnẹ, dopo na awhànfuntọ dopo, yé sọ yí awù odò tọn ga. Ṣigba, awù odò tọn lọ ma tindo titọ̀tẹn de, na e yin linlọ̀n sọn aga wá odò. 24  Enẹwutu, yé dọna ode awetọ dọmọ: “Mì gbọ mí ni ma tlẹ́n ẹn blo, ṣigba mì gbọ mí ni de ovò nado yọ́n mẹhe tọn e na yin.”+ Ehe yinmọ, na adà Owe-wiwe tọn lọ nido sọgan yin hinhẹndi he dọmọ: “Yé má awù ṣie lẹ to yede ṣẹnṣẹn, yé sọ de ovò do avọ̀ ṣie lẹ ji.”+ Na nugbo tọn, awhànfuntọ lẹ wà onú ehelẹ. 25  Ṣigba, onọ̀ Jesu tọn+ po nọviyọnnu onọ̀ etọn tọn po tin to ote to yatin* etọn kọ̀n; mọdopolọ Malia asi Klopasi tọn po Malia Magdaleni po.+ 26  Enẹwutu, whenue Jesu mọ onọ̀ etọn po devi he e yiwanna lọ+ po to ote to finẹ, e dọna onọ̀ etọn dọmọ: “Yọnnu, pọ́n! Visunnu towe!” 27  Enẹgodo, e dọna devi lọ dọmọ: “Pọ́n! Onọ̀ towe!” Podọ sọn ojlẹ enẹ mẹ, devi lọ plan ẹn yì owhé edetiti tọn gbè. 28  To ehe godo, whenue Jesu yọnẹn dọ nulẹpo ko yin hinhẹndi todin, na adà Owe-wiwe tọn lọ nido sọgan yin hinhẹndi, e dọmọ: “Nugbla to hùhù mi.”+ 29  Ozẹ́n de to finẹ bọ ovẹn vẹsin gọ́ ẹ. Enẹwutu, yé ze hùmẹ-tekan de he gọ́ na ovẹn vẹsin do opò hisọpu* tọn de nù bo dlẹn ẹn do onù na ẹn.+ 30  To whenue Jesu ko dọ́ ovẹn vẹsin lọ pọ́n, e dọmọ: “E ko yin wiwadotana!”+ podọ dile e dẹ́ ota etọn, e jo gbigbọ etọn do.*+ 31  To whenuena e yindọ azán Awuwle* tọn wẹ,+ na oṣiọ lọ lẹ nikaa gbọṣi yatin lẹ ji+ to Gbọjẹzangbe (na Gbọjẹzan daho wẹ azán enẹ yin),+ Ju lẹ biọ to Pilati si nado wẹ́n afọ yetọn lẹ,* na oṣiọ lọ lẹ nido yin zize sẹ̀. 32  Enẹwutu, awhànfuntọ lọ lẹ wá, bo wẹ́n afọ omẹ tintan podọ omẹ awetọ he yin whiwhè do pòtin go dopọ hẹ ẹ lẹ tọn. 33  Ṣigba, yé wá Jesu dè bo mọdọ e ko kú, enẹwutu yé ma wẹ́n afọ etọn lẹ. 34  Amọ́, dopo to awhànfuntọ lọ lẹ mẹ sọ́ owhán adà mẹ na ẹn,+ podọ to afọdopolọji ohùn po osin po tọ́njẹgbonu. 35  Podọ mẹhe mọ nujijọ lọ ko dekunnu, nugbo sọ wẹ kunnudide etọn, ewọ sọ yọnẹn dọ nugbo wẹ nuhe e dọ lẹ, na mìlọsu nido sọgan yise.+ 36  Na nugbo tọn, onú ehelẹ jọ, na adà Owe-wiwe tọn lọ nido yin hinhẹndi he dọmọ: “Depope to ohú etọn lẹ mẹ ma na yin winwẹ́n.”*+ 37  Podọ adà Owe-wiwe tọn devo sọ dọmọ: “Yé na pọ́n mẹlọ he yé sọnú.”+ 38  Todin, to onú ehelẹ godo, Josẹfu Alimate tọn, mẹhe na obu etọn na Ju lẹ wutu,+ yin devi Jesu tọn de to nuglọ, biọ to Pilati si eyin ewọ sọgan ze oṣiọ Jesu tọn yì, Pilati sọ nagbè e. Enẹwutu, e wá bo ze oṣiọ etọn sọyi.+ 39  Nikodẹmi,+ yèdọ dawe lọ he wá e dè to zánmẹ to tintan whenu sọ hẹn zuya po aloẹsi po he yè flusọ́* bọ e yì nudi kilo 30* wá.+ 40  Enẹwutu, yé ze oṣiọ Jesu tọn bo yí alavọ lẹ do blá ẹ po nuwhẹ́nkun lẹ po+ sọgbe hẹ aṣa ṣiọdidi Ju lẹ tọn. 41  Todin, jipa de tin to fihe ewọ yin hùhù* te, yọdò* yọyọ de+ he mẹ mẹdepope ma ko yin titẹ́ do gbede sọ tin to jipa lọ mẹ. 42  Na e yin azán Awuwle* tọn+ na Ju lẹ bọ yọdò lọ sọ to yakẹ wutu, yé tẹ́ Jesu do finẹ.

Nudọnamẹ Odò Tọn

Kavi “N’kàn whé biọ.”
Kavi “hù i do pòtin ji.”
Kavi “hù we do pòtin ji.”
Kavi “to agọjẹdo.”
Pọ́n Zẹm.
Enẹ wẹ, nudi ogàn 12 whèmẹ tọn.
Pọ́n Zẹm.
Pọ́n Zẹm.
Pọ́n Zẹm.
Pọ́n Zẹm.
Kavi “gbigbọ etọn ṣí.”
Pọ́n Zẹm.
Vlavo, ehe yin bibasi na yé nido yawu kú.
Kavi “gbigbà.”
Kavi vlavo, “yè blá.”
Enẹ wẹ, nujlẹka Lomu tọn. Pọ́n Nud. B14.
Kavi “hùhù do pòtin ji.”
Kavi “yọdò oflin tọn.”
Pọ́n Zẹm.