Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 16:1-33

NUHE E BẸHẸN LẸ

  • Devi Jesu tọn lẹ sọgan pehẹ okú (1-4a)

  • Azọ́n gbigbọ wiwe tọn (4b-16)

  • Awubla devi lẹ tọn na diọ zun ayajẹ (17-24)

  • Jesu gbawhàn aihọn tọn (25-33)

16  “Yẹn ko dọ onú ehelẹ na mì, na mì nikaa dahli.  Gbẹtọ lẹ na yàn mì sọn sinagọgu mẹ.+ Na nugbo tọn, ojlẹ lọ ja, to whenue mẹdepope he hù mì+ na lẹndọ emi ko basi sinsẹ̀nzọn wiwe hlan Jiwheyẹwhe.  Ṣigba, yé na wà onú ehelẹ, na yé ma ko yọ́n Otọ́ lọ kavi yẹn wutu.+  Ṣogan, yẹn dọ onú ehelẹ na mì, na whenue ojlẹ he mẹ onú ehelẹ na jọ na wá, mì nido flindọ yẹn ko dọ yé na mì.+ “Yẹn ma dọ onú ehelẹ na mì to tintan whenu, na yẹn tin to mì dè wutu.  Ṣigba todin, yẹn jei Mẹhe do mi hlan dè;+ ṣogan depope to mì mẹ ma kanse mi dọ, ‘Fie wẹ hiẹ jei?’  Ṣigba, na yẹn ko dọ onú ehelẹ na mì wutu, awubla gọ́ ahun mìtọn mẹ.+  Etomọṣo, nugbo wẹ yẹn to didọna mì dọ, na dagbe mìtọn wutu wẹ yẹn do jei. Na eyin n’ma yì, alọgọtọ lọ+ ma na wá mì dè; ṣigba eyin n’yì, yẹn na do e hlan mì.  Podọ whenue e na wá, e na na kunnudenu he dutomẹji aihọn lọ gando ylando go podọ gando dodowiwa go podọ gando whẹdida go:  jẹnukọn whẹ́, gando ylando go,+ na yé ma to yise tindo to yẹn mẹ wutu;+ 10  enẹgodo, gando dodowiwa go, na yẹn jei Otọ́ dè bọ mìwlẹ ma na mọ mi ba wutu; 11  podọ gando whẹdida go, na ogán aihọn ehe tọn ko yin whẹdana wutu.+ 12  “Yẹn gbẹ́ tindo nususu nado dọna mì, ṣigba mì ma penugo nado hẹn yé todin gba. 13  Ṣogan, to whenue e* na wá, yèdọ gbigbọ nugbo lọ,+ e na deanana mì nado mọnukunnujẹ nugbo lọ mẹ to gigọ́ mẹ, na e ma na dọho sọn ojlo edetiti tọn mẹ, ṣigba nuhe e sè lẹ wẹ e na dọ, e nasọ lá nuhe ja lẹ na mì.+ 14  E na pagigona mi,+ na e na lá nuhe e mọyi sọn yẹn dè na mì.+ 15  Ṣie wẹ nuhe Otọ́ tindo lẹpo.+ Enẹwutu wẹ yẹn do dọ dọ e na lá nuhe e mọyi sọn yẹn dè na mì. 16  Whenu vude dogọ, mì ma na mọ mi ba,+ podọ whenu vude dogọ, mì nasọ vọ́ mọ mi.” 17  To whenẹnu, delẹ to devi etọn lẹ mẹ to didọna ode awetọ dọmọ: “Etẹwẹ nuhe ewọ dọna mí ehe zẹẹmẹdo, ‘Whenu vude dogọ, mì ma na mọ mi ba, podọ whenu vude dogọ, mì nasọ vọ́ mọ mi,’ podọ ‘na yẹn jei Otọ́ dè wutu’?” 18  Enẹwutu, yé to didọmọ: “Etẹwẹ nuhe e dọ ehe zẹẹmẹdo dọ, ‘whenu vude dogọ’? Mí ma yọ́n nuhe hodọ e te.” 19  Jesu yọnẹn dọ yé jlo na kanhose e, enẹwutu e dọna yé dọmọ: “Be mìwlẹ to hokanse mìdelẹ gando ehe go, na yẹn dọ dọmọ: ‘Whenu vude dogọ, mì ma na mọ mi ba, podọ whenu vude dogọ, mì nasọ vọ́ mọ mi’ wutu wẹ? 20  Nugbonugbo wẹ yẹn dọna mì dọ, mìwlẹ na viavi bo doavihàn, ṣigba aihọn na jaya; mìwlẹ na blawu, ṣigba awubla mìtọn na lẹzun ayajẹ.+ 21  To whenue yọnnu de to viji, e nọ tindo awufiẹsa,* na ojlẹ etọn ko wá wutu, ṣigba to whenue e ko ji ovi lọ, e masọ nọ flin awufiẹsa lọ ba, na ayajẹ lọ dọ gbẹtọ de ko yin jiji do aihọn mẹ wutu. 22  Enẹwutu, mìlọsu to awubla mẹ todin; ṣigba yẹn nasọ vọ́ wá mọ mì bọ ahun mìtọn na jaya,+ podọ mẹdepope ma na yí ayajẹ mìtọn sọn mì si. 23  To azán enẹ gbè, mì ma na kàn nudepope sè mi. Nugbonugbo wẹ yẹn dọna mì dọ, eyin mìwlẹ biọ nudepope Otọ́,+ ewọ na na ẹn mì to oyín ṣie mẹ.+ 24  Kakajẹ din, mì ma ko biọ onú dopo tata to oyín ṣie mẹ. Mì biọ, mì nasọ mọyi, na ayajẹ mìtọn nido sọgan yin hinhẹn gọ́. 25  “Yẹn ko yí nuyijlẹdonugo lẹ do dọ onú ehelẹ na mì. Ojlẹ lọ ja, whenue yẹn ma na nọ yí nuyijlẹdonugo lẹ do dọhona mì ba, ṣigba yẹn na dọhona mì to aliho he họnwun mẹ gando Otọ́ go. 26  To azán enẹ gbè, mìwlẹ na biọ Otọ́ to oyín ṣie mẹ; gbọn ehe didọ dali, yẹn ma to didọ dọ yẹn na nọ basi obiọ na mì to whepoponu gba. 27  Na Otọ́ lọsu yiwanna mì, na mì yiwanna mi+ bo ko yise dọ n’wá taidi afọzedaitọ Jiwheyẹwhe tọn wutu.+ 28  N’wá taidi afọzedaitọ Otọ́ tọn bo wá aihọn mẹ. Todin, yẹn to tintọ́n sọn aihọn mẹ bo jei Otọ́ dè.”+ 29  Devi etọn lẹ dọmọ: “Pọ́n! Todin, hiẹ to hodọ to aliho he họnwun mẹ, bo ma to nuyijlẹdonugo yizan. 30  Todin, mí yọnẹn dọ hiẹ yọ́n nulẹpo bọ e ma biọ dọ mẹde ni kanhose we whẹ́. Gbọn ehe dali, mí yise dọ Jiwheyẹwhe dè wẹ hiẹ wá sọn.” 31  Jesu gblọnna yé dọmọ: “Mìwlẹ ko wá yise todin lo? 32  Mì pọ́n! Ojlẹ lọ ja, na nugbo tọn, e ko wá, whenue dopodopo mìtọn na gbàdo bo yì owhé etọn titi gbè bọ mì na jo yẹn kẹdẹ do.+ Ṣigba, yẹn ma tin dee ṣo, na Otọ́ tin po yẹn po.+ 33  Yẹn dọ onú ehelẹ na mì, na gbọn yẹn gblamẹ, mì nido sọgan tindo jijọho.+ To aihọn mẹ, mì na nọ tindo nukunbibia, ṣigba mì gboadọ! N’ko gbawhàn aihọn tọn.”+

Nudọnamẹ Odò Tọn

Hogbe lọ “e” to wf 13 po 14 po mẹ dlẹnalọdo “alọgọtọ lọ” he yin nùdego to wf 7 mẹ. Jesu yí hogbe lọ “alọgọtọ lọ” (he nọ yin yiyizan na sunnu to Glẹkigbe mẹ) zan, ehe do gbigbọ wiwe, yèdọ huhlọn tata de hia taidi gbẹtọ. Tofi, hogbe paa he ma nọ do sunnu kavi yọnnu hia to Glẹkigbe mẹ wẹ yin yiyizan na gbigbọ wiwe.
To paa mẹ, “awubla.”