Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 13:1-38

NUHE E BẸHẸN LẸ

  • Jesu klọ́ afọ na devi etọn lẹ (1-20)

  • Jesu do Juda hia taidi mẹdehiatọ (21-30)

  • Gbedide yọyọ (31-35)

    • “Owanyi to mìde ṣẹnṣẹn” (35)

  • E yin didọ dọ Pita na mọ́n Jesu (36-38)

13  Todin, na Jesu ko yọnẹn jẹnukọnna hùnwhẹ Juwayi tọn lọ dọ ojlẹ emitọn ko wá+ nado tọ́n sọn aihọn ehe mẹ yì Otọ́ dè wutu,+ dile e ko yiwanna etọn titi he to aihọn lọ mẹ lẹ do, e yiwanna yé jẹ opodo.+  Dile núdùdù whèjai tọn lọ to yìyì, Lẹgba ko yí i do ahun mẹ na Juda Iskaliọti,+ visunnu Simọni tọn, nado de e hia.+  Enẹwutu, na Jesu yọnẹn dọ Otọ́ ko yí nulẹpo do alọ emitọn mẹ podọ Jiwheyẹwhe dè wẹ emi wá sọn bo nasọ lẹkọyi Jiwheyẹwhe dè wutu,+  e fọ́n sọn núdùdù whèjai tọn lọ kọ̀n bo de awugbó etọn lẹ do apadopo. Podọ whenue e yí awusúnsúnvọ̀ de, e sìn in do alinkàn.*+  Enẹgodo, e kọ̀n osin do basia de mẹ bo jẹ afọ klọ́ na devi etọn lẹ ji bosọ nọ yí awusúnsúnvọ̀ he e sìn do alinkàn* lọ do súnsún.  Todin, e jẹ Simọni Pita dè. Ewọ sọ dọna ẹn dọmọ: “Oklunọ, hiẹ jlo na klọ́ afọ ṣie lẹ wẹ?”  Jesu sọ gblọnna ẹn dọmọ: “Nuhe yẹn to wiwà, hiẹ ma mọnukunnujẹemẹ todin, ṣigba hiẹ na wá mọnukunnujẹemẹ to godo mẹ.”  Pita dọna ẹn dọmọ: “Lala, hiẹ ma na klọ́ afọ ṣie lẹ gbede.” Jesu gblọnna ẹn dọmọ: “Eyin n’ma klọ́ yé,+ hiẹ ma tindo mimá hẹ mi gba.”  Simọni Pita dọna ẹn dọmọ: “Oklunọ, e ma yin afọ ṣie lẹ kẹdẹ wẹ a na klọ́ gba, ṣigba alọ ṣie lẹ po ota ṣie po ga.” 10  Jesu dọna ẹn dọmọ: “Mẹdepope he ko lawu ma tindo nuhudo hugan afọ etọn lẹ kiklọ tọn, ṣigba e ko wé pete. Podọ mìwlẹ ko wé, amọ́ e ma yin mìmẹpo.” 11  Na e ko yọ́n mẹhe to na de e hia.+ Enẹwutu wẹ e do dọmọ: “E ma yin mìmẹpo wẹ wé.” 12  Todin, to whenue e ko klọ́ afọ yetọn lẹ bo ko ze awugbó etọn lẹ do, e sọ vọ́ jagla to tafo kọ̀n bo dọna yé dọmọ: “Be mìwlẹ mọnukunnujẹ nuhe yẹn ko wà na mì lọ mẹ ya? 13  Mì nọ ylọ mi dọ, ‘Mẹplọntọ,’ podọ ‘Oklunọ,’ owhẹ̀ mìtọn whẹ́n, na mọ wẹ yẹn yin.+ 14  Enẹwutu, eyin yẹn, he yin Oklunọ po Mẹplọntọ po klọ́ afọ mìtọn lẹ,+ mìlọsu dona* nọ klọ́ afọ ode awetọ mìtọn lẹ tọn ga.+ 15  Na ohia wẹ yẹn zedai na mì, dọ kẹdẹdile yẹn basi na mì do, mọ wẹ mìlọsu dona nọ basi do ga.+ 16  Nugbonugbo wẹ yẹn dọna mì dọ, afanumẹ de ma nọ klohu oklunọ etọn, mọdopolọ mẹhe yin didohlan ma nọ klohu mẹhe do e hlan gba. 17  Eyin mìwlẹ yọ́n onú ehelẹ, ayajẹnọ wẹ mì eyin mì nọ basi yé.+ 18  N’ma to hodọ gando mìmẹpo go gba; n’yọ́n mẹhe n’ko de lẹ. Ṣigba, na adà Owe-wiwe tọn lọ nido sọgan yin hinhẹndi dọmọ:+ ‘Mẹhe nọ dù núdùdù ṣie ko ze afọgbẹn etọn daga sọta* mi.’+ 19  Bẹsọn din, yẹn to didọna mì whẹpo e nado jọ, na to whenue e na jọ, mìwlẹ nido yise dọ yẹn wẹ mẹlọ.+ 20  Nugbonugbo wẹ yẹn dọna mì dọ, mẹdepope he yí mẹhe yẹn dohlan, yí yẹnlọsu ga.+ Podọ mẹdepope he yí mi, yí Mẹhe do mi hlan lọsu ga.”+ 21  To onú ehelẹ didọ godo, Jesu yin tuklado to gbigbọ mẹ, ewọ sọ dekunnu dọmọ: “Nugbonugbo wẹ yẹn dọna mì dọ, dopo to mì mẹ na de mi hia.”+ 22  Devi lẹ jẹ ode awetọ pọ́n ji, na yé ma yọ́n mẹhe hodọ ewọ te wutu.+ 23  Dopo to devi lẹ mẹ, yèdọ mẹhe Jesu yiwanna lọ+ jagla sẹpọ* Jesu. 24  Enẹwutu, Simọni Pita mì ota hlan ewọ bo dọna ẹn dọmọ: “Dọ mẹhe hodọ e te lọ na mí.” 25  Whenẹnu, ewọ dẹ́ yì godo hlan akọ́nnu Jesu tọn bo dọmọ: “Oklunọ, mẹnu wẹ?”+ 26  Jesu sọ gblọn dọmọ: “Mẹlọ he yẹn na ze nùdo akla tọn he yẹn yí do siọ agbán mẹ na lọ wẹ.”+ Todin, whenue e ko yí akla lọ do siọ agbán mẹ, e ze e bo yí na Juda, visunnu Simọni Iskaliọti tọn. 27  To whenue Juda ko yí nùdo akla tọn lọ godo, whenẹnu wẹ Satani biọ ewọ mẹ.+ Enẹwutu, Jesu dọna ẹn dọmọ: “Nuhe hiẹ to bibasi, basi i po awuyiya po dogọ.” 28  Ṣigba, depope to mẹhe jagla to tafo kọ̀n hẹ ẹ lẹ mẹ ma yọ́n nuhewutu e do dọ ehe na ẹn. 29  Na taun tọn, delẹ to yé mẹ to linlẹn dọ, to whenuena e yindọ Juda si wẹ apotin akuẹ tọn lọ te,+ didọna ẹn wẹ Jesu te dọ, “Họ̀ nuhe mí tindo nuhudo etọn lẹ na hùnwhẹ lọ,” kavi dọ ewọ ni na nude wamọnọ lẹ. 30  Enẹwutu, whenue e ko yí nùdo akla tọn lọ, e tọ́njẹgbonu to afọdopolọji. Zánmẹ sọ wẹ.+ 31  To whenue e ko tọ́nyi, Jesu dọmọ: “Todin, Visunnu gbẹtọ tọn ko yin gigopana,+ podọ Jiwheyẹwhe ko yin gigopana gbọn ewọ gblamẹ. 32  Jiwheyẹwhe lọsu nasọ pagigona ẹn,+ podọ e na pagigona ẹn to afọdopolọji. 33  Yọpọ lẹ emi, yẹn na gbẹ́ nọ mì dè vude dogọ. Mìwlẹ na dín mi; podọ kẹdẹdile yẹn ko dọna Ju lẹ do dọ, ‘Fihe yẹn jei, mìwlẹ ma sọgan wá,’+ todin yẹn sọ vọ́ dọ ẹ na mìlọsu. 34  Gbedide yọyọ de wẹ yẹn to nina mì dọ, mì ni yiwanna ode awetọ; kẹdẹdile yẹn ko yiwanna mì do,+ dọ mìlọsu ni yiwanna ode awetọ.+ 35  Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin—eyin mì tindo owanyi to mìde ṣẹnṣẹn.”+ 36  Simọni Pita dọna ẹn dọmọ: “Oklunọ, fie wẹ hiẹ jei?” Jesu gblọn dọmọ: “Fihe yẹn jei, hiẹ ma sọgan hodo mi todin, ṣigba hiẹ na hodo mi to godo mẹ.”+ 37  Pita dọna ẹn dọmọ: “Oklunọ, naegbọn yẹn ma sọgan hodo we todin? Yẹn na ze ogbẹ̀* ṣie jo do ota towe mẹ.”+ 38  Jesu gblọn dọmọ: “Be didọ wẹ a te dọ hiẹ na ze ogbẹ̀* towe jo do ota ṣie mẹ ya? Nugbonugbo wẹ yẹn dọna we dọ, koklo ma na ko dosé to aliho depope mẹ whẹpo hiẹ nado mọ́n mi whla atọ̀n.”+

Nudọnamẹ Odò Tọn

Kavi “e blagbajana ede.”
Kavi “he e yí do blagbajana ede.”
Kavi “tin to dandannu glọ nado.”
Kavi “ko diọnukunsọ.”
To paa mẹ, “to akọ́nnu na.”
Kavi “alindọn.”
Kavi “alindọn.”