Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 11:1-57

NUHE E BẸHẸN LẸ

  • Okú Lazalọsi tọn (1-16)

  • Jesu miọnhomẹna Malta po Malia po (17-37)

  • Jesu fọ́n Lazalọsi sọnku (38-44)

  • Sébibla nado hù Jesu (45-57)

11  Todin, dawe de he nọ yin Lazalọsi to azọ̀njẹ; Bẹtani wẹ e nọ nọ̀, yèdọ gbétatò Malia podọ Malta nọviyọnnu etọn tọn mẹ.+  Malia ehe wẹ kọ̀n amisisa owán gblingblinnọ do Oklunọ go bo yí oda etọn do súnsún afọ etọn lẹ;+ nọvisunnu etọn Lazalọsi wẹ to azọ̀njẹ.  Enẹwutu, nọviyọnnu etọn lẹ dowẹn hlan ẹn bo dọmọ: “Oklunọ, pọ́n! mẹhe hiẹ yiwanna lọ to azọ̀njẹ.”  Ṣigba, to whenue Jesu sè ehe, e dọmọ: “Azọ̀n ehe ma na dekọtọn do okú mẹ gba, ṣigba nado na gigo Jiwheyẹwhe wutu wẹ,+ na Visunnu Jiwheyẹwhe tọn nido sọgan yin gigopana gbọn ehe gblamẹ.”  Na taun tọn, Jesu yiwanna Malta po nọviyọnnu etọn po gọna Lazalọsi.  Etomọṣo, whenue e sè dọ Lazalọsi to azọ̀njẹ, e gbẹ́ gbọṣi fihe e te lọ na azán awe dogọ.  Enẹgodo, e dọna devi lẹ dọmọ: “Mì gbọ mí ni yì Jude whladopo dogọ.”  Devi lẹ dọna ẹn dọmọ: “Labi,+ to agọe poun wẹ omẹ Jude tọn lẹ to dindin nado dlan zannu do we,+ bọ hiẹ nasọ vọ́ yì finẹ ya?”  Jesu gblọn dọmọ: “Gànhiho 12 wẹ tin to okle dopo mẹ, kavi e ma yin mọ wẹ?+ Eyin mẹde to zọnlinzin to okle, e ma nọ gbà afọ do nudepope go, na ewọ nọ mọ hinhọ́n aihọn ehe tọn wutu. 10  Ṣigba, eyin mẹde to zọnlinzin to zánmẹ, e nọ gbà afọ do núgo, na hinhọ́n ma tin to ewọ mẹ wutu.” 11  To whenue e ko dọ onú ehelẹ, e yidogọ dọmọ: “Lazalọsi họntọn mítọn to amlọndọ,+ ṣigba yẹn jei finẹ nado fọ́n ẹn.” 12  To whenẹnu, devi etọn lẹ dọna ẹn dọmọ: “Oklunọ, eyin amlọndọ wẹ e te, e na jẹgangan.” 13  Ṣigba, okú etọn hodọ wẹ Jesu te. Amọ́, yé lẹndọ gbigbọjẹ to amlọn mẹ go wẹ ewọ to hodọ gando. 14  Whenẹnu wẹ Jesu dọna yé madoadúdẹji dọmọ: “Lazalọsi ko kú,+ 15  yẹn sọ jaya na mìtọn wutu dọ yẹn ma tin to finẹ, na mìwlẹ nido sọgan yise. Ṣigba, mì gbọ mí ni yì e dè.” 16  Enẹwutu, Tọmasi, mẹhe nọ yin yiylọdọ Ahoho lọ, dọna devi hatọ etọn lẹ dọmọ: “Mì gbọ mí ni yì ga, na mí nido sọgan kú hẹ ẹ.”+ 17  To whenue Jesu jẹ finẹ, e mọdọ Lazalọsi ko to yọdò* mẹ na azán ẹnẹ. 18  Todin, Bẹtani ma dẹn do Jelusalẹm, yèdọ nudi kilomẹtlu atọ̀n.* 19  Susu Ju lẹ tọn ko sọ wá Malta po Malia po dè nado miọnhomẹna yé, na nọvisunnu yetọn tọn wutu. 20  Whenue Malta sè dọ Jesu ja, e yì pé e; ṣigba Malia+ tin to aisinsin to whégbè. 21  Whenẹnu, Malta dọna Jesu dọmọ: “Oklunọ, eyin hiẹ ko tin tofi wẹ, nọvisunnu ṣie ma na ko kú. 22  Ṣogan, todin n’yọnẹn dọ nudepope he hiẹ biọ Jiwheyẹwhe, Jiwheyẹwhe na na we.” 23  Jesu dọna ẹn dọmọ: “Nọvisunnu towe na fọ́n.” 24  Malta dọna ẹn dọmọ: “N’yọnẹn dọ e na fọ́n to fọnsọnku whenu+ to azán godo tọn gbè.” 25  Jesu dọna ẹn dọmọ: “Yẹn wẹ fọnsọnku po ogbẹ̀ po.+ Mẹhe do yise hia to yẹn mẹ, eyin ewọ tlẹ kú, e na gọwá ogbẹ̀; 26  podọ mẹdepope he to ogbẹ̀ bo do yise hia to yẹn mẹ ma na kú pọ́n gbede.+ Be hiẹ yí ehe sè ya?” 27  Ewọ dọna ẹn dọmọ: “Mọwẹ, Oklunọ, n’yise dọ hiẹ wẹ Klisti lọ, Visunnu Jiwheyẹwhe tọn, mẹlọ he dona wá aihọn mẹ.” 28  Whenue e ko dọ ehe, e yì bo ylọ Malia nọviyọnnu etọn bosọ dọna ẹn to nuglọ dọmọ: “Mẹplọntọ lọ+ ko wá bo to yiylọ we.” 29  Whenue Malia sè ehe, e fọ́n po awuyiya po bo yì e dè. 30  Jesu ma ko wá gbétatò lọ mẹ gba, ṣigba e gbẹ́ tin to fihe Malta yì pé e te. 31  Whenue Ju he tin po Malia po to whégbè bo to homẹmiọnna ẹn lẹ mọdọ ewọ fọ́n po awuyiya po bo tọ́njẹgbonu, yé hodo e, na yé to linlẹn dọ yọdò* lọ kọ̀n wẹ e jei+ nado yì viavi to finẹ. 32  Whenue Malia jẹ fihe Jesu te bo mọ ẹn, e jẹklo to afọ etọn lẹ kọ̀n bo dọna ẹn dọmọ: “Oklunọ, eyin hiẹ ko tin tofi wẹ, nọvisunnu ṣie ma na ko kú.” 33  Whenue Jesu mọdọ e to avivi bọ Ju he hodo e wá lẹ to avivi, e wẹnhun to ohò* ede tọn mẹ bo biọ bẹwlu mẹ. 34  E sọ dọmọ: “Fie wẹ mì tẹ́ ẹ do?” Yé dọna ẹn dọmọ: “Oklunọ, wá pọ́n.” 35  Jesu kùn dasin.+ 36  Whenẹnu, Ju lẹ jẹ didọ ji dọmọ: “Pọ́n lehe e yiwanna ẹn sọ!” 37  Ṣigba, delẹ to yé mẹ dọmọ: “Be dawe ehe, he hùn nukun dawe nukuntọ́nnọ lọ tọn+ ma sọgan glọnalina ẹn ma nado kú wẹ ya?” 38  Enẹwutu, to whenue Jesu sọ vọ́ wẹnhun whladopo dogọ to ohò ede tọn mẹ, e yì yọdò* lọ kọ̀n. Na taun tọn, oslò de wẹ bọ zannu de tin to e ji. 39  Jesu dọmọ: “Mì de zannu lọ sẹ̀.” Malta, nọviyọnnu matintọ lọ tọn dọna ẹn dọmọ: “Oklunọ, e na ko to wánlùn todin, na azán ẹnẹtọ die.” 40  Jesu dọna ẹn dọmọ: “Be yẹn ma dọna we dọ eyin hiẹ yise, hiẹ na mọ gigo Jiwheyẹwhe tọn ya?”+ 41  Enẹwutu, yé de zannu lọ sẹ̀. Enẹgodo, Jesu ze nukun etọn lẹ daga hlan olọn+ bo dọmọ: “Otọ́, n’dopẹna we dọ hiẹ ko sè ṣie. 42  Nugbo, yẹn yọnẹn dọ hiẹ nọ sè ṣie to whepoponu; ṣigba na gbẹtọgun he ṣite lẹdo pé lẹ tọn wutu wẹ yẹn do dọho, na yé nido sọgan yise dọ hiẹ wẹ do mi hlan.”+ 43  Whenue e ko dọ onú ehelẹ, e yí ogbè lélé do dawhá dọmọ: “Lazalọsi, tọ́njẹgbonu wá!”+ 44  Dawe he ko kú lọ tọ́njẹgbonu bọ avọ̀ he yin biblá do afọ po alọ etọn lẹ po go tin to e go, nukunmẹ etọn sọ yin biblá po avọ̀ de po. Jesu sọ dọna yé dọmọ: “Mì tún in bo gbọ e ni yì.” 45  To whenẹnu, susu Ju lẹ tọn he ko wá Malia dè bo mọ nuhe e wà lẹ tindo yise to ewọ mẹ,+ 46  ṣigba delẹ to yé mẹ tọ́nyi Falesi lẹ dè bo dọ nuhe Jesu ko wà na yé. 47  Enẹwutu, yẹwhenọgán lẹ po Falesi lẹ po ylọ hagbẹ Whẹdatẹn Daho Ju lẹ tọn* lẹ pli bo dọmọ: “Etẹwẹ mí na wà, na dawe ehe to ohia susu lẹ basi?+ 48  Eyin mí jo e do domọ, yemẹpo na tindo yise to ewọ mẹ, Lomunu lẹ nasọ wá bo yí nọtẹn mítọn* po akọta mítọn po.” 49  Ṣigba, dopo to yé mẹ, yèdọ Kaifa,+ he yin yẹwhenọ daho to owhe enẹ mẹ dọna yé dọmọ: “Mì ma yọ́n nudepope, 50  mì masọ yọnẹn dọ alenu de wẹ e yin na mì dọ dawe dopo ni kú do ota gbẹtọ lẹ tọn mẹ hú dọ akọta lọ blebu ni yin vivasudo.” 51  Ṣigba, ewọ ma dọ ehe sọn ojlo edetiti tọn mẹ gba, amọ́ na ewọ wẹ yin yẹwhenọ daho to owhe lọ mẹ wutu, e dọ dọdai dọ Jesu dona kú na akọta lọ, 52  podọ e ma yin na akọta lọ kẹdẹ gba, ṣigba na ewọ nido sọgan bẹ ovi Jiwheyẹwhe tọn he gbàpe lẹ pli dopọ ga. 53  Enẹwutu, sọn azán enẹ gbè, yé blasé nado hù i. 54  Enẹwutu, Jesu masọ nọ zinzọnlin dánpe to Ju lẹ ṣẹnṣẹn to gbangba ba, ṣigba e tọ́n sọn finẹ yì agbegbe he sẹpọ danfafa ji lọ mẹ, yèdọ yì tòdaho he nọ yin Eflaimi mẹ,+ e sọ gbọṣi finẹ po devi lẹ po. 55  Todin, hùnwhẹ Juwayi+ Ju lẹ tọn ko sẹpọ, mẹsusu sọ hẹji sọn glètoho lọ mẹ yì Jelusalẹm jẹnukọnna hùnwhẹ Juwayi tọn nado sọgan klọ́ yede wé to aṣa-liho. 56  Yé to Jesu dín, yé sọ nọ dọna ode awetọ dile yé to ote to tẹmpli lọ mẹ dọmọ: “Etẹwẹ mìwlẹ lẹn? Be e ma na wá hùnwhẹ lọ paali wẹ ya?” 57  Ṣigba, yẹwhenọgán lẹ po Falesi lẹ po ko degbe dọ eyin mẹdepope yọ́n fihe Jesu te, e ni hẹn ẹn zun yinyọnẹn, na yé nido sọgan wle e.

Nudọnamẹ Odò Tọn

Kavi “yọdò oflin tọn.”
To paa mẹ, “nudi stade 15.” Pọ́n Nud. B14.
Kavi “yọdò oflin tọn.”
To paa mẹ, “to gbigbọ.”
Kavi “yọdò oflin tọn.”
To paa mẹ, “Sanhedlin.” Pọ́n Zẹm.
Enẹ wẹ, tẹmpli lọ.