Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Johanu 10:1-42

NUHE E BẸHẸN LẸ

  • Lẹngbọhọtọ lọ po lẹngbọpo lẹ po (1-21)

    • Jesu wẹ lẹngbọhọtọ dagbe lọ (11-15)

    • “Yẹn sọ tindo lẹngbọ devo lẹ” (16)

  • Ju lẹ dukosọ hẹ Jesu to Hùnwhẹ Klandowiwe tọn lọ tẹnmẹ (22-39)

    • Ju susu gbẹ́ nado yise (24-26)

    • ‘Lẹngbọ ṣie lẹ nọ sè ogbè ṣie’ (27)

    • Visunnu to kọndopọ mẹ hẹ Otọ́ (30, 38)

  • Mẹsusu yise to Jọdani godo (40-42)

10  “Nugbonugbo wẹ yẹn dọna mì dọ, mẹhe ma gbọn ohọ̀n lọ nù biọ lẹngbọpo lọ mẹ ṣigba he hẹji gbọn fidevo biọ e mẹ, ajotọ po whébẹtọ po wẹ omẹ enẹ.+  Ṣigba, mẹhe gbọn ohọ̀n lọ nù biọ e mẹ wẹ lẹngbọhọtọ lẹngbọ lẹ tọn.+  Họ̀njinọtọ lọ sọ hùnhọ̀n na ewọ,+ podọ lẹngbọ lẹ nọ dotoaina ogbè etọn.+ Ewọ nọ ylọ lẹngbọ etọn titi lẹ gbọn oyín yetọn dali bo nọ plan yé tọ́n.  To whenue e ko plan etọn titi lẹpo tọ́n, e jẹnukọnna yé, lẹngbọ lẹ sọ hodo e, na yé yọ́n ogbè etọn wutu.  Yé ma na hodo jonọ depope, ṣigba yé na họnyi sọn ewọ dè, na yé ma yọ́n ogbè jonọ lẹ tọn wutu.”  Jesu dọ nuyijlẹdonugo ehe na yé, ṣigba yé ma mọnukunnujẹ nuhe e to didọna yé lẹ mẹ.  Enẹwutu, Jesu sọ vọ́ dọna yé dọmọ: “Nugbonugbo wẹ yẹn dọna mì dọ, yẹn wẹ ohọ̀n lọ na lẹngbọ lẹ.+  Ajotọ po whébẹtọ po wẹ yemẹpo he wá bo gbọn lalo dali yí oyín ṣie zan lẹ; ṣigba lẹngbọ lẹ ma dotoaina yé.  Yẹn wẹ ohọ̀n lọ; mẹdepope he gbọn yẹn nù biọ e mẹ na yin whinwhlẹngán, podọ ewọ na biọ e mẹ bo tọ́n bosọ mọ kanlindugbo.+ 10  Ajotọ ma nọ wá adavo nado fìnnú bo hùmẹ bosọ husudo.+ Yẹn wá na yé nido tindo ogbẹ̀ bo tindo e to gigọ́ mẹ. 11  Yẹn wẹ lẹngbọhọtọ dagbe lọ;+ lẹngbọhọtọ dagbe nọ ze ogbẹ̀* etọn jo do ota lẹngbọ lẹ tọn mẹ.+ 12  Pakanọ he ma yin lẹngbọhọtọ podọ he lẹngbọ lẹ ma yin etọn, nọ mọ ohla ja bo nọ jo lẹngbọ lẹ do bosọ nọ họnyi—ohla sọ nọ lọ́n jẹ yé ji bo nọ gbà yé do— 13  na pakanọ de wẹ ewọ bo ma nọ hò lẹngbọ lẹ tọn pọ́n. 14  Yẹn wẹ lẹngbọhọtọ dagbe lọ. Yẹn yọ́n lẹngbọ ṣie lẹ, lẹngbọ ṣie lẹ sọ yọ́n mi,+ 15  kẹdẹdile Otọ́ yọ́n mi bọ yẹn yọ́n Otọ́ do;+ yẹn sọ ze ogbẹ̀* ṣie jo do ota lẹngbọ lẹ tọn mẹ.+ 16  “Yẹn sọ tindo lẹngbọ devo lẹ, he ma yin apó ehe tọn;+ yewlẹ ga wẹ yẹn dona hẹnwa, yé nasọ dotoaina ogbè ṣie, podọ yé na lẹzun lẹngbọpa dopo, lẹngbọhọtọ dopo.+ 17  Ehe wutu wẹ Otọ́ yiwanna mi,+ na yẹn ze ogbẹ̀* ṣie jo,+ na yẹn nido sọgan vọ́ ẹ mọyi. 18  E ma yin mẹde wẹ yí ogbẹ̀ ṣie gba, ṣigba yẹnlọsu wẹ ze e jo sọn ojlo mẹ wá. Yẹn tindo jlọjẹ nado ze e jo, yẹn sọ tindo jlọjẹ nado vọ́ ẹ mọyi.+ Otọ́ ṣie dè wẹ yẹn mọ gbedide ehe yí sọn.” 19  Whladopo dogọ, kinklan de fọ́n to Ju lẹ ṣẹnṣẹn,+ na ohó ehelẹ wutu. 20  Susu to yé mẹ to didọmọ: “E tindo aovi de bosọ hùnalẹ̀. Naegbọn mì to todoaina ẹn?” 21  Mẹdevo lẹ dọmọ: “Ohó ehelẹ ma taidi mẹhe tindo aovi de tọn gba. Aovi de ma sọgan hùn nukun nukuntọ́nnọ lẹ tọn, kavi e sọgan wàmọ wẹ?” 22  To ojlẹ enẹ mẹ, Hùnwhẹ Klandowiwe tọn lọ wá aimẹ to Jelusalẹm. Avivọ-whenu sọ wẹ, 23  bọ Jesu to zọnlinzin gbọn tẹmpli mẹ to agbà gaa* Sọlomọni tọn mẹ.+ 24  Whenẹnu, Ju lẹ lẹdo e pé bo jẹ didọna ẹn ji dọmọ: “Nawẹ e na dẹnsọ bọ hiẹ na jo mí* do ayihaawe mẹ? Eyin hiẹ wẹ Klisti lọ, dọna mí madoadúdẹji.” 25  Jesu gblọnna yé dọmọ: “Yẹn ko dọna mì, ṣogan mì ma yise. Azọ́n he yẹn to wiwà to oyín Otọ́ ṣie tọn mẹ lẹ, ehelẹ wẹ to kunnude gando go e.+ 26  Ṣigba, mìwlẹ ma yise, na mì ma yin lẹngbọ ṣie lẹ wutu.+ 27  Lẹngbọ ṣie lẹ nọ dotoaina ogbè ṣie, yẹn sọ yọ́n yé, bọ yé nọ hodo mi.+ 28  Yẹn na na yé ogbẹ̀ madopodo,+ bọ yé ma na yin vivasudo gbede to aliho depope mẹ, podọ mẹdepope ma na hò yé yí sọn alọ ṣie mẹ.+ 29  Nuhe Otọ́ ṣie ko na mi yin nude he klohu nudevo lẹpo, podọ mẹdepope ma sọgan hò yé yí sọn alọ Otọ́ tọn mẹ.+ 30  Yẹn po Otọ́ po yin dopo.”*+ 31  Whladopo dogọ, Ju lẹ ze zannu lẹ nado dlan do e. 32  Jesu gblọnna yé dọmọ: “Azọ́n dagbe susu wẹ yẹn dohia mì sọn Otọ́ dè. Detẹ to azọ́n enẹlẹ mẹ wẹ mì to zannu dlan do mi na?” 33  Ju lẹ gblọnna ẹn dọmọ: “Mí ma to zannu dlan do we na azọ́n dagbe de wutu gba, ṣigba na nùzinzan wutu;+ na dile etlẹ yindọ gbẹtọ de wẹ hiẹ, a hẹn dewe zun yẹwhe de.” 34  Jesu gblọnna yé dọmọ: “Be e ma yin kinkandai to Osẹ́n mìtọn mẹ dọ, ‘Yẹn dọmọ: “Yẹwhe lẹ wẹ mìwlẹ yin”’?*+ 35  Eyin ewọ ylọ mẹhe ohó Jiwheyẹwhe tọn gblewhẹdo lẹ dọ ‘yẹwhe lẹ’+—bọ adà Owe-wiwe tọn lọ ma yin hinhẹn zun ovọ́, 36  naegbọn mìwlẹ dọna yẹn mẹhe Otọ́ ko hẹn zun wiwe bo dohlan aihọn lọ mẹ dọ, ‘Hiẹ zánnu,’ na yẹn dọ dọ, ‘Visunnu Jiwheyẹwhe tọn’ wẹ yẹn yin wutu?+ 37  Eyin e ma yin azọ́n Otọ́ ṣie tọn lẹ wà wẹ n’te, mì ma yí mi sè blo. 38  Ṣigba, eyin azọ́n lọ lẹ wà wẹ n’te, eyin mìwlẹ ma tlẹ yí mi sè, mì bo yí azọ́n lọ lẹ sè,+ na mì nido sọgan wá yọnẹn bosọ sọgan zindonukọn to yinyọnẹn mẹ dọ Otọ́ tin to kọndopọ mẹ hẹ mi podọ yẹn tin to kọndopọ mẹ hẹ Otọ́.”+ 39  Enẹwutu, yé sọ vọ́ tẹnpọn nado wle e, ṣigba e họnyi sọn yé dè. 40  E sọ vọ́ yì Jọdani godo fie Johanu ko baptizi gbẹtọ lẹ te dai,+ ewọ sọ nọ finẹ. 41  Gbẹtọ susu sọ wá e dè bo jẹ didọ ji dọmọ: “Johanu ma basi ohia dopo tata, ṣigba nulẹpo he Johanu dọ gando dawe ehe go wẹ yin nugbo.”+ 42  Mẹsusu sọ tindo yise to ewọ mẹ to finẹ.

Nudọnamẹ Odò Tọn

Kavi “alindọn.”
Kavi “alindọn.”
Kavi “alindọn.”
Enẹ wẹ, agbà gaa de he tindo dòtin lẹ to adà awe lẹ ji he họ̀gbánu lẹ tin to e ji.
Kavi “alindọn mítọn.”
Kavi “tin to kọndopọ mẹ.”
Kavi “Mìwlẹ taidi yẹwhe lẹ.”