Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 39:1-30

NUHE E BẸHẸN LẸ

  • Didá kanlin lẹ tọn dohia dọ nuyọnẹn gbẹtọ tọn whè (1-30)

    • Gbọgbọẹ osó ji tọn po agbanlin po (1-4)

    • Kẹtẹkẹtẹ gbémẹ tọn (5-8)

    • Oyìnsú gbémẹ tọn (9-12)

    • Ogongo (13-18)

    • Osọ́ (19-25)

    • Ohọ́n po akùn po (26-30)

39  “Be hiẹ yọ́n whenue gbọgbọẹ osó ji tọn lẹ nọ jivi ya?+ Kavi be a ko mọ agbanlin to viji pọ́n ya?+   Be hiẹ nọ hia osun na yé wẹ? Kavi be a yọ́n whenue yé nọ jivi wẹ?   Yé nọ fẹ̀ yìdo to vijiji whenu, Bọ awufiẹsa ajipanu tọn yetọn nọ doalọte.   Kanmẹ ovi yetọn lẹ tọn nọ wá ló bọ yé nọ whẹ́n to danji; Yé sọ nọ tọ́nyi bo ma nọ lẹkọwa yé dè ba.   Mẹnu wẹ tún kẹtẹkẹtẹ gbémẹ tọn dote,+ Podọ mẹnu wẹ túnkan na kẹtẹkẹtẹ gbémẹ tọn?   Yẹn ko yí danfafa do basi owhé na ẹn Bo yí aigba ojẹ̀ tọn do basi fininọ etọn.   E nọ ṣàn zingidi tòdaho mẹ tọn kò; E ma nọ sè awhágbe anademẹtọ de tọn.   E nọ dánpe gbọn okọ́ta lẹ ji bo nọ to núdùdù dín, Bosọ nọ to ogbé-mú lẹ dín pé.   Be oyìnsú gbémẹ tọn tindo ojlo nado sẹ̀n we wẹ?+ Be e na dọ́ apó* towe mẹ wẹ? 10  Be hiẹ sọgan yí okàn do hẹn oyìnsú gbémẹ tọn nado lẹ̀ owhẹ̀n na we wẹ, Kavi e na hodo we nado jlo* aigba to agbàdo mẹ ya? 11  Be hiẹ na dejido huhlọn daho etọn go Bo jo azọ́n sinsinyẹn towe do na ẹn wẹ? 12  Be hiẹ na ganjẹ e go nado bẹ jinukun* wá whé na we, Podọ nado bẹ ẹ pli do likun-flétẹn towe wẹ? 13  Ogongo asi nọ hò awà etọn lẹ po ayajẹ po, Ṣigba, be awà po ofún etọn lẹ po sọgan yin yiyijlẹdo adọwé tọn lẹ go ya?+ 14  Na e nọ jo azìn etọn lẹ do kọmẹ, Bo nọ hẹn yé hlá yozò to kọ́gudu mẹ. 15  E ma nọ flindọ afọ mẹde tọn sọgan gbà yé Kavi dọ gbekanlin de sọgan tùnafọ yé ji. 16  E nọ yinuwa hẹ ovi etọn lẹ po kanyinylan po, taidi dọ yé ma yin etọn wẹ nkọ;+ E ma nọ dibu dọ tuklajijẹ etọn sọgan yin to ovọ́ mẹ. 17  Na Jiwheyẹwhe ko hẹn ẹn gbọagba nuyọnẹn tọn* Bo ma na ẹn wuntuntun depope. 18  Ṣigba, eyin e fọ́n bo jẹ awà etọn lẹ hò ji, E nọ ṣàn osọ́ po hihẹtọ etọn po kò. 19  Be hiẹ wẹ nọ na huhlọn osọ́ ya?+ Be hiẹ wẹ yí okọ̀-fún whanpẹnọ de ṣinyọ́n na okọ̀ etọn ya? 20  Be hiẹ sọgan hẹn ẹn nado lọ́n di owẹ̀n ya? Awọntin mẹ finfin gángán etọn dobu taun.+ 21  E nọ sẹwhẹ́ kọmẹ to agbàdo mẹ bo nọ yí aglinjijẹ do to linlọ́n po huhlọn po;+ E nọ zọ̀n adán ji yì awhàngbenu.*+ 22  E nọ ṣàn obu kò bo ma nọ dibuna nudepope.+ E ma nọ joagọyigodo na ohí wutu. 23  Ogába-hẹnnu nọ to núdọ gbọn agbasa etọn go, Owhán po dludlu po sọ nọ to sisẹ́. 24  E nọ sisọ na jejejininọ wutu bo nọ lọ́n yì nukọn,* E ma sọgan sè nudidọ opẹ̀n tọn bo nọ whii.* 25  Eyin opẹ̀n dọnú, e nọ dọ, ‘Ẹn hẹn!’ E nọ sè owán awhàn tọn sọn olá Bo nọ sè awhágbe awhàngán daho lẹ tọn po abobo awhàn tọn po.+ 26  Be gbọn nuyọnẹn towe dali wẹ gàngàn nọ zlọn, Bo nọ kẹ̀ awà etọn lẹ hlan hùwaji ya? 27  Kavi hiẹ wẹ nọ degbe bọ akùn do nọ zlọn yiaga+ Bo nọ do adọ́ etọn do aga pete,+ 28  Bosọ nọ dọ́ bẹbẹnu osókla de tọn, Bo nọ nọ̀ fibẹtado etọn to osé gángán de* ji ya? 29  Finẹ wẹ e nọ dín núdùdù sọn;+ Nukun etọn nọ mọnú hlan fidindẹn. 30  Ovi etọn lẹ nọ nù ohùn; Podọ fidepope he onú kúkú te, finẹ wẹ yè nọ mọ ẹn te.”+

Nudọnamẹ Odò Tọn

Kavi “otò núdùdù tọn.”
Kavi “pọ̀.”
To paa mẹ, “okún.”
To paa mẹ, “hẹn ẹn nado wọn nuyọnẹn.”
To paa mẹ, “E nọ tọ́nyi nado pé gbaja.”
To paa mẹ, “nọ ze kọmẹ (aigba) mì.”
Kavi vlavo, “E ma nọ yí nudidọ opẹ̀n tọn sè.”
To paa mẹ, “to adú osé de tọn.”