Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 38:1-41

NUHE E BẸHẸN LẸ

  • Jehovah yí whiwhè gbẹtọ tọn do plọnnumẹ (1-41)

    • ‘Fie wẹ a te whenue aigba yin didá?’ (4-6)

    • Visunnu Jiwheyẹwhe tọn lẹ dawhá (7)

    • Kanbiọ gando nujiawu lẹ go (8-32)

    • “Osẹ́n he nọ deanana olọn lẹ” (33)

38  Whenẹnu, Jehovah gblọnna Jobu sọn yujẹhọn lọ mẹ+ dọmọ:   “Mẹnu wẹ to ayinamẹ ṣie hẹn dózin Bo to hodọ matin nuyọnẹn to finẹ?+   Jaale, blagbajana dewe di sunnu; Yẹn nasọ kanhose we bọ hiẹ na dọna mi.   Fie wẹ hiẹ te to whenue yẹn basi aigba?+ Dọna mi, eyin a lẹndọ emi yọnnuin.   Be a yọ́n mẹhe de dogbó etọn lẹ, Kavi mẹhe tá okàn do e ji nado jlẹ ẹ ya?   Etẹ mẹ wẹ dodonu etọn lẹ yin tùntùn ai do, Kavi mẹnu wẹ do zannu họ̀gosu tọn etọn,+   To whenue sunwhlẹvu afọnnu tọn lẹ+ yí aglinjijẹ do to awhádo dopọ, Bọ visunnu Jiwheyẹwhe tọn lẹ*+ to awhá pipà tọn do?   Podọ mẹnu wẹ yí ohọ̀n lẹ do glọn ohù+ To whenue e wujẹgbonu sọn homẹ,   To whenue yẹn yí aslọ lẹ ṣinyọ́n na ẹn Bo yí zinvlu gọ́ngọ́n do bu i, 10  To whenue yẹn de dogbó na ẹn Bo ze atin etọn po ohọ̀n etọn lẹ po do otẹn yetọn mẹ,+ 11  Bọ yẹn dọ dọ, ‘Hiẹ sọgan wá kaka fi, amọ́ a ma dona zẹ̀ fi go; File wẹ huhlọn agbówhẹn towe lẹ tọn na nọte do’?+ 12  Be hiẹ ko degbena afọnnu* pọ́n Kavi hẹn afọnnu fliflimẹ nado yọ́n otẹn etọn,+ 13  Nado tá hinhọ́n kakajẹ opodo aigba tọn lẹ Podọ nado yàn mẹylankan sẹ̀ sọn e ji wẹ ya?+ 14  Aigba nọ yin adàdiọna kẹdẹdi okò to hiadonu de glọ, Bọ awusọhia etọn nọ họnwun kẹdẹdi avọ̀ de tọn. 15  Ṣigba, hinhọ́n mẹylankan lẹ tọn nọ yin titẹ̀ yé, Bọ awà yetọn he yin zizedaga nọ yin winwẹ́n. 16  Be hiẹ ko jẹte yì asisa ohù tọn lẹ mẹ Kavi yì otọ̀ he siso lẹ glọ pọ́n wẹ?+ 17  Be họngbo okú tọn lẹ+ ko yin didehia we wẹ, Kavi hiẹ ko mọ họngbo zinvlu gọ́ngọ́n* tọn lẹ pọ́n wẹ?+ 18  Be hiẹ mọnukunnujẹ lehe aigba gbloada do mẹ ya?+ Dọna mi, eyin hiẹ yọ́n ehe lẹpo. 19  Awà tẹ ji wẹ hinhọ́n nọ nọ̀?+ Podọ fie wẹ yin nọtẹn zinvlu tọn, 20  Na hiẹ nido plan ẹn sọyi fininọ etọn Bo yọ́n aliho he yì owhé etọn gbè lẹ? 21  Be hiẹ yọ́n ehe, na a ko yin jiji to whenẹnu Bọ sọha owhe* towe lẹ tọn sù taun wutu wẹ ya? 22  Be hiẹ ko biọ agbànhọ osin-agó tọn lẹ mẹ,+ Kavi mọ agbànhọ kẹ́njikun tọn lẹ,+ 23  Ehe yẹn ko hlá dai na ojlẹ ayimajai tọn, Yèdọ na azán avùnhiho po awhànfunfun po tọn ya?+ 24  Awà tẹ ji wẹ hinhọ́n* nọ họnwun sọn, Podọ fie wẹ jẹhọn whèzẹtẹn tọn nọ yìn sọn wá aigba ji?+ 25  Mẹnu wẹ ko de osinwhín na singigọ Bo deali na aslọ yujẹhọn whenu tọn he nọ zọnpọ po hẹviosò po,+ 26  Na e nido ja jikun do fie mẹdepope ma nọ nọ̀, Yèdọ do danfafa ji, fie gbẹtọvi depope ma te,+ 27  Nado hẹn pekọ wá na aigba gbọgbé lẹ Bo hẹn ogbé lẹ nado wú?+ 28  Be jikun tindo otọ́ de wẹ,+ Kavi mẹnu wẹ yin otọ́ ahun he nọ ja tọn?+ 29  Ohò mẹnu tọn mẹ wẹ osin-agó lẹ nọ tọ́njẹgbonu sọn, Podọ mẹnu wẹ ji osin-agó wọ́dọ́wọ́dọ́ olọn tọn lẹ+ 30  To whenue osin lẹ yin nuṣinyọndo taidi gbọn zannu de dali, Bọ nukunmẹ otọ̀ he siso lẹ tọn lẹzun osin-agó?+ 31  Be hiẹ sọgan sìn okàn pipli sunwhlẹvu lẹ tọn he nọ yin Kima* tọn lẹ Kavi tún okàn pipli sunwhlẹvu lẹ tọn he nọ yin Kesili* tọn lẹ ya?+ 32  Be hiẹ sọgan plan pipli sunwhlẹvu lẹ tọn de* jẹgbonu to osaa etọn mẹ Kavi deanana pipli sunwhlẹvu lẹ tọn he nọ yin Aṣi* po visunnu etọn lẹ po ya? 33  Be hiẹ yọ́n osẹ́n he nọ deanana olọn lẹ,+ Kavi be hiẹ sọgan hẹn aigba nado tin to aṣẹpipa yetọn* glọ ya? 34  Be hiẹ sọgan ze ogbè towe daga hlan aslọ lẹ Nado hẹn singigọ wá dewe ji ya?+ 35  Be hiẹ sọgan do abì lẹ hlan bọ yé na zẹ̀ ya? Be yé na lẹkọwa bo na dọna we dọ, ‘Míwlẹ die!’ ya? 36  Mẹnu wẹ na nuyọnẹn aslọ lẹ*+ Kavi na wuntuntun nujiawu agahomẹ tọn lẹ?*+ 37  Mẹnu wẹ yọnnuin sọmọ nado hia aslọ lẹ, Kavi mẹnu wẹ sọgan ṣinyọ́n nukunmẹdò na osinzẹ́n olọn tọn lẹ+ 38  To whenue kọ́gudu kọnyinai bo mlindopọ Bọ okọ́ aigba tọn lẹ tẹdopọ? 39  Be hiẹ sọgan yangbé nude tọn na kinnikinni Kavi hẹn pekọ wá na huvẹ kinnikinni winyanwinyan lẹ tọn+ 40  To whenue yé mlọnai to fiwhiwhlá yetọn lẹ Kavi tọ̀pọwu to odò yetọn lẹ mẹ ya? 41  Mẹnu wẹ nọ wleawu núdùdù tọn na ohọ́n+ To whenue ovi etọn dawhá hlan Jiwheyẹwhe na alọgọ Bo to lèlèsà pé na e ma mọ nudepope nado dù wutu?

Nudọnamẹ Odò Tọn

Hogbe yẹhiadonu tọn Heblugbe mẹ tọn he nọ dlẹnalọdo visunnu Jiwheyẹwhe tọn he yin angẹli lẹ.
To paa mẹ, “degbena afọnnu to azán towe lẹ whenu.”
Kavi “oyẹ̀ okú tọn.”
To paa mẹ, “azán.”
Kavi vlavo, “abì.”
Vlavo sunwhlẹvu Pleiadi lẹ to pipli sunwhlẹvu lẹ tọn he nọ yin Taulusi mẹ.
Vlavo pipli sunwhlẹvu lẹ tọn he nọ yin Oliọni.
To paa mẹ, “Mazalọti.” To 2Ah 23:5 mẹ, hogbe mọnkọtọn he yin yiyizan na susu yetọn dlẹnalọdo pipli sunwhlẹvu lẹ tọn zodiaki tọn.
Vlavo pipli sunwhlẹvu lẹ tọn he nọ yin Beali Daho (Ursa Major).
Kavi vlavo, “Etọn.”
Kavi vlavo, “gbẹtọ.”
Kavi vlavo, “na wuntuntun ayiha.”