Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 36:1-33

NUHE E BẸHẸN LẸ

  • Elihu jla kiklo Jiwheyẹwhe tọn (1-33)

    • Tonusetọ lẹ na gán (11-13)

    • ‘Mẹplọntọ tẹwẹ di Jiwheyẹwhe?’ (22)

    • Jobu dona pagigona Jiwheyẹwhe (24)

    • “Jiwheyẹwhe klohu nuhe mí sọgan lẹn” (26)

    • Jiwheyẹwhe nọ deanana jikun po abì po (27-33)

36  Elihu zindonukọn dọmọ:   “Whesọ vude pọ́n mi dogọ, na yẹn nido basi zẹẹmẹ, Na yẹn gbẹ́ jlo na dọho do Jiwheyẹwhe tamẹ.   Yẹn na dọho to aliho he họnwun mẹ gando nuhe yẹn yọnẹn go, Yẹn nasọ lá dodowiwa Mẹdatọ ṣie tọn.+   Na nugbo tọn, nuhe dọ n’te ma yin lalo; Mẹlọ he yin pipé to nuyọnẹn mẹ+ tin to nukọn towe.   Nugbo, Jiwheyẹwhe dohuhlọn+ bo ma nọ gbẹ́ mẹdepope dai; Ewọ klo taun to huhlọn nukunnumọjẹnumẹ tọn* etọn mẹ.   E ma na hlá mẹylankan lẹ dogbẹ̀,+ Ṣigba, e nọ hẹn mẹhe yè to yasana lẹ nado mọ whẹdida dodo.+   E ma nọ de nukun etọn sẹ̀ sọn dodonọ lẹ ji;+ E nọ hẹn yé dugán hẹ ahọlu lẹ,* bọ yé nọ yin zizedaga kakadoi.+   Ṣigba, eyin gẹdẹ yin dido yé Bọ yé yin wiwle do okàn yasanamẹ tọn lẹ mẹ,   Ewọ nọ de nuhe yé ko wà yindo lẹ hia yé, Yèdọ sẹ́nhẹngba he mẹ goyiyi yetọn dọ̀n yé biọ lẹ. 10  E nọ hùn otó yetọn lẹ na wọhẹ Bosọ nọ dọna yé nado lẹ́ sọn ylanwiwa kọ̀n.+ 11  Eyin yé setonu bo sẹ̀n ẹn, Yé na zan gbẹzan yetọn to vivomẹ, Podọ owhe yetọn lẹ to ayajẹ mẹ.+ 12  Ṣigba, eyin yé ma setonu, yé na dọ̀n gbọn ohí* dali+ Bo na kú matin nuyọnẹn. 13  Mẹhe tindo ahun jijọ-madi-Jiwheyẹwhe* tọn lẹ na nọ tindo nuvẹun. Yé ma nọ dawhá biọ alọgọ eyin ewọ tlẹ blá yé. 14  Yé* na kú dile yé gbẹ́ pò to jọja mẹ,+ Bo to gbẹzan yetọn zan* to sunnu galọtọ tẹmpli mẹ tọn lẹ ṣẹnṣẹn.+ 15  Ṣigba, Jiwheyẹwhe* nọ whlẹn mẹhe yè to yasana lẹ to yajiji yetọn whenu; E nọ hùn otó yetọn to whenuena yè to kọgbidina yé. 16  Ewọ na dọ̀n we sọn bẹbẹnu ayimajai tọn+ Wá otẹn gbigblo de mẹ, fie aliglọnnamẹnu depope ma te,+ Bọ núdùdù dojó na tin to tafo towe ji nado miọnhomẹna we.+ 17  Whenẹnu wẹ hiẹ na tindo pekọ po whẹdida he yin hinhẹnwa mẹylankan lẹ ji po,+ To whenuena whẹdida na yin hinhẹnṣẹ bọ whẹdida dodo na yin hinhẹn lodo. 18  Ṣigba, payi na adi nikaa plan we biọ nuyiwa vlẹko tọn* mẹ,+ Podọ a dike alọgodo-kuẹ daho de hẹn we buali blo. 19  Be awhágbe towe na alọgọ Kavi depope to vivẹnudido vẹkuvẹku towe lẹ mẹ na whlẹn we sọn ayimajai mẹ wẹ ya?+ 20  A yí jejejininọ do donukun ozán blo, Yèdọ whenuena gbẹtọ lẹ nọ busẹ sọn otẹn yetọn mẹ. 21  Payi na hiẹ nikaa lẹhlan ylanwiwa kọ̀n, Bo wá gbọnmọ dali de ehe kakati nido yin yajiji.+ 22  Pọ́n! Jiwheyẹwhe yin zizedaga to huhlọn etọn mẹ; Nuplọnmẹtọ tẹwẹ taidi ewọ? 23  Mẹnu wẹ ko deanana* aliho etọn+ Kavi dọna ẹn dọ, ‘Nuhe a wà lọ ma sọgbe’?+ 24  Flin nado pagigona azọ́n etọn,+ Yèdọ ehe gbẹtọ lẹ ko jihàn etọn.+ 25  Gbẹtọvi lẹpo wẹ ko mọ azọ́n etọn, Olá wẹ gbẹtọ tata nọ pọ́n ẹn hlan sọn. 26  Mọwẹ, Jiwheyẹwhe klohu nuhe mí sọgan lẹn;+ Sọha owhe etọn tọn zẹ̀ nuhe yè sọgan mọnukunnujẹemẹ go.*+ 27  Ewọ nọ dọ̀n kùnkùn osin tọn lẹ daga;+ Yé sọ nọ hòpli bo nọ lẹzun jikun sọn avìvì etọn mẹ; 28  Enẹgodo, aslọ nọ ja ẹ kọnyin kọmẹ;+ E nọ ja do gbẹtọvi lẹ ji. 29  Be mẹde sọgan mọnukunnujẹ dindlẹn aslọ tọn mẹ, Kavi nudidọ hẹviosò tọn sọn gòhọ etọn mẹ ya?+ 30  Pọ́n lehe e dlẹn abì*+ etọn do e ji Bosọ ṣinyọnnudo hùzànmẹ* do. 31  Gbọn ehelẹ gblamẹ wẹ e nọ hẹn gbẹtọ lẹ dogbẹ̀;* E nọ na yé núdùdù susugege.+ 32  Alọ etọn lẹ wẹ e nọ yí do ṣinyọnnudo abì, Bo nọ deanana ẹn hlan yanwle etọn kọ̀n.+ 33  Hẹviosò etọn nọ dekunnu gando e go, Podọ kanlin-yìnyìn lẹ lọsu tlẹ nọ dọ mẹhe* ja.

Nudọnamẹ Odò Tọn

To paa mẹ, “to ahun.”
Kavi vlavo, “E nọ hẹn ahọlu lẹ dugán.”
Kavi “adánwanu (ogá) de.”
Kavi “atẹṣitọ.”
Kavi “Alindọn yetọn.”
Kavi vlavo, “Bo hẹn gbẹzan yetọn wá vivọnu.”
To paa mẹ, “Ewọ.”
Kavi “biọ pẹhiho vlẹko tọn.”
Kavi vlavo, “mọhodọdo; hẹn ẹn nado dogbè gando.”
Kavi “Sọha owhe etọn tọn yin dinmamọdona.”
To paa mẹ, “hinhọ́n.”
To paa mẹ, “adọ̀ ohù tọn lẹ.”
Kavi vlavo, “nọ yí owhẹ̀ dọ na gbẹtọ lẹ.”
Kavi vlavo, “nuhe.”