Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 28:1-28

NUHE E BẸHẸN LẸ

  • Jobu yí adọkun aigba tọn jlẹdo nuyọnẹn go (1-28)

    • Vivẹnu gbẹtọ tọn nado kùn adọkunnu lẹ tọ́n (1-11)

    • Nuyọnẹn họakuẹ hú peali (18)

    • Budisi Jiwheyẹwhe wẹ nuyọnẹn (28)

28  “Fide tin he fataka nọ yin kùnkùn te Podọ sika he nọ yin kinkọ̀n lọsu tindo fihe e nọ yin mimọ te;+   Aigba glọ wẹ gànyuu nọ yin didesọn, Podọ osé lẹ mẹ wẹ gànvẹẹ nọ yin yiyọ́* sọn.+   Gbẹtọ nọ duto zinvlu ji; E nọ kùndò kakajẹ otẹn godo tọn mẹ to zinvlu gọ́ngọ́n po titli po mẹ, Bo nọ to gànmú* dín.   E nọ kùndò sisosiso do lẹdo he dẹn do fihe gbẹtọ lẹ nọ nọ̀ mẹ, Yèdọ to fihe yè wọnji e go lẹ, dẹn do fihe gbẹtọ lẹ nọ zinzọnlin gbọn; Mẹdelẹ nọ biọ dòmẹ bo nọ to sẹ́gẹ́sẹgẹ.   Aigba ji aga wẹ núdùdù nọ wujẹgbonu te; Ṣigba, diọdo sinsinyẹn de wẹ nọ wá aimẹ to aigba glọ taidi gbọn miyọ́n dali.*   Zannu safili tọn lẹ nọ yin mimọ to finẹ, Bọ sika nọ yin mimọ to kọ́gudu mẹ.   Ohẹ̀ nuwledutọ de ma yọ́n ali yì dọ́n; Nukun gàngàn yuu de tọn ma nọ mọnú yì dọ́n.   Gbekanlin nuwledutọ de ma ko zinzọnlin gbọn e ji; Kinnikinni winyanwinyan de ma ko yangbé gbọn finẹ.   Gbẹtọ nọ yí alọ etọn do linú osé gángán; E nọ hùngona dodonu osó lẹ tọn. 10  E nọ de osinwhín+ lẹ to osé lẹ mẹ; Nukun etọn nọ mọ nuhọakuẹ lẹpo. 11  E nọ sú asisa otọ̀ lẹ tọn Bo nọ hẹn nuhe yin whiwhla lẹ wá hinhọ́n nù. 12  Ṣigba, nuyọnẹn—fie wẹ e sọgan yin mimọ te,+ Podọ fie wẹ asisa nukunnumọjẹnumẹ tọn te?+ 13  Gbẹtọvi depope ma yọ́n pinpẹn etọn,+ Podọ e ma sọgan yin mimọ to aigba mẹhe togbẹ̀ lẹ tọn ji. 14  Otọ̀ he siso lẹ dọ dọ, ‘E ma tin to yẹn mẹ!’ Ohù lọsu sọ dọ dọ, ‘E ma tin to dè e!’+ 15  E ma sọgan yin hihọ̀ po sika akú po; Mọjanwẹ fataka jijlẹ ma sọgan yin yíyí do diọ ẹ do niyẹn.+ 16  Sika Ofili tọn ma sọgan yin yíyí do họ̀ ẹ+ Mọ zannu họakuẹ onizi tọn po safili tọn po ma sọgan yin yíyí do họ̀ ẹ. 17  Sika po mẹpọ́nnu po ma sọgan yin yiyijlẹdo e go; Mọjanwẹ núzinzan sika dagbedagbe* tọn de ma sọgan yin yíyí do diọ ẹ do niyẹn.+ 18  Aṣápán* po zannu klistali tọn po ma sọgan nọte to apá na ẹn,+ Na nuyọnẹn saki gigọ́ dopo họakuẹ hú peali saki gigọ́ dopo. 19  Zannu topazi+ Kuṣi tọn ma sọgan yin yiyijlẹdo e go; E ma tlẹ sọgan yin hihọ̀ po sika akú po. 20  Ṣigba, fie wẹ nuyọnẹn nọ wá sọn, Podọ fie wẹ asisa nukunnumọjẹnumẹ tọn sọgan yin mimọ te?+ 21  E ko yin whiwhla do nutogbẹ̀ lẹpo+ Bo ko yin sisẹdo do ohẹ̀ agahomẹ tọn lẹ. 22  Vasudo po okú po sọ dọmọ, ‘Otó mítọn lẹ kẹdẹ wẹ sè linlin gandego poun.’ 23  Jiwheyẹwhe wẹ yọ́n aliho he mẹ e sọgan yin mimọ te; Ewọ dopo kẹdẹ wẹ yọ́n fihe e nọ nọ̀,+ 24  Na ewọ wẹ nọ pọ́n opodo aigba tọn lẹ hlan, Bo nọ mọ nuhe tin to olọn glọ lẹpo.+ 25  To whenuena ewọ wleawuna huhlọn* jẹhọn tọn+ Bo jlẹ osin lẹ pọ́n,+ 26  Whenuena e basi aṣẹdai de na jikun+ Bo deali na aslọ jikun tọn po hẹviosò po,+ 27  Whenẹnu wẹ e mọ nuyọnẹn bo basi zẹẹmẹ etọn; E do e ai bo tẹ́n ẹn pọ́n. 28  Ewọ sọ dọna gbẹtọ dọmọ: ‘Pọ́n! Budisi Jehovah—enẹ wẹ nuyọnẹn,+ Podọ hinhọ̀nna oylan wẹ nukunnumọjẹnumẹ.’”+

Nudọnamẹ Odò Tọn

To paa mẹ, “kinkọ̀n.”
To paa mẹ, “zannu.”
Ehe na ko to alọdlẹndo aliho he mẹ adọkunnu dòglọ tọn lẹ nọ yin kùnkùn jẹgbonu te.
Kavi “he yin kiklọ́we.”
To ojlẹ Biblu tọn mẹ, “aṣápán lẹ” nọ yin pinpọnhlan taidi nuhe họakuẹ taun.
To paa mẹ, “zínpinpẹn.”