Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 2:1-13

NUHE E BẸHẸN LẸ

  • Satani vọ́ fọ́n ayihaawe dote do Jobu go (1-5)

  • Yè nagbè Satani nado linú agbasa Jobu tọn (6-8)

  • Asi Jobu tọn: “Zánnu do Jiwheyẹwhe go bo kú!” (9, 10)

  • Họntọn Jobu tọn 3 lẹ wá (11-13)

2  Enẹgodo, azán lọ pé bọ visunnu Jiwheyẹwhe nugbo lọ tọn lẹ*+ yì nado sọawuhia to Jehovah nukọn,+ bọ Satani lọsu wá finẹ nado sọawuhia to Jehovah nukọn.+  To whenẹnu, Jehovah kanse Satani dọ: “Fie wẹ hiẹ wá sọn?” Satani sọ gblọnna Jehovah dọmọ: “Yẹn nọ to yìyì pé gbọn aigba ji bosọ nọ to dindanpe gbọn e ji.”+  Jehovah sọ kanse Satani dọmọ: “Be hiẹ ko doayi* devizọnwatọ ṣie Jobu go ya? Mẹdepope ma tin he taidi ewọ nkọ to aigba ji. Dawe nugbonọ podọ tenọglinọ* de wẹ ewọ,+ he nọ dibusi Jiwheyẹwhe bo nọ họ̀nna oylan. Ewọ gbẹ́ hẹn tenọgli etọn go janwẹ,+ mahopọnna dọ hiẹ to tintẹnpọn nado hẹn mi diọnukunsọ ẹ+ bo và ẹ sudo* matin whẹwhinwhẹ́n depope.”  Ṣigba, Satani gblọnna Jehovah dọmọ: “Ayú na ayú. Nuhe gbẹtọ tindo lẹpo wẹ e na bẹ jo nado whlẹn ogbẹ̀* ede tọn.  Ṣigba, nado diọ ninọmẹ lọ, dlẹnalọ towe bo doalọ ohú po agbasalan etọn po go bo pọ́n dọ ewọ ma na zánnu do gowe to nukun towe mẹ ya.”+  To whenẹnu, Jehovah dọna Satani dọmọ: “Pọ́n! Ewọ tin to alọ towe mẹ!* Ṣigba, a yí ogbẹ̀* etọn blo!”  Satani sọ tọ́nyi sọn Jehovah nukọn bo yí nutitẹ̀ fifiẹ*+ lẹ do hò Jobu sọn afọpahomẹ kaka yì ahọ̀ndòmẹ.  Jobu sọ yí zẹ́nkla de do to agbasa ede tọn klu, bosọ sinai to afín mẹ.+  To godo mẹ, asi etọn dọna ẹn dọmọ: “Be hiẹ gbẹ́ to tenọgli towe go hẹn janwẹ ya? Gbọ bo zánnu do Jiwheyẹwhe go bo kú!” 10  Ṣigba, ewọ dọna yọnnu lọ dọmọ: “Hiẹ to hodọ taidi yọnnu gugutọ de. Be dagbe kẹdẹ wẹ mí na kẹalọyi sọn Jiwheyẹwhe nugbo lọ dè bo ma na kẹalọyi oylan ga ya?”+ Mahopọnna nuhe jọ do e go ehe lẹpo, Jobu ma yí nùflo etọn do waylando.+ 11  Họntọn* Jobu tọn atọ̀n, yèdọ Elifazi+ Temaninu lọ, Bildadi+ Ṣuahinu+ lọ po Zofali+ Naamanu lọ po, sè dogbọn nugbajẹmẹji he wá e ji lẹ dali, bọ dopodopo yetọn wá sọn nọtẹn etọn. Enẹwutu, yé kọngbedopọ nado zọnpọ yì vẹawu Jobu bo miọnhomẹna ẹn. 12  To whenue yé mọ ẹn sọn olá, yé ma tlẹ yọnẹn dọ ewọ wẹ. Yé sọ jẹ avivi ji po awhá po bo jẹ awugbó yetọn lẹ tlẹ́n ji bosọ ba kọ́gudu dlan jẹhọn mẹ podọ do ota.+ 13  Enẹgodo, yé sinai do kọmẹ hẹ ẹ na okle ṣinawe ozán ṣinawe. Depope to yé mẹ ma dọho de na ẹn, na yé mọdọ awufiẹsa etọn sù taun.+

Nudọnamẹ Odò Tọn

Hogbe yẹhiadonu tọn Heblugbe mẹ tọn he nọ dlẹnalọdo visunnu Jiwheyẹwhe tọn he yin angẹli lẹ.
To paa mẹ, “ze ahun towe do.”
Kavi “Dawe madoblọnọ podọ dodonọ.”
To paa mẹ, “bo ze e mì.”
Kavi “alindọn.”
Kavi “to anademẹ towe glọ.”
Kavi “alindọn.”
Kavi “yí agàdá yinyọ̀n.”
Kavi “Mẹyinyọnẹn.”