Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 16:1-22

NUHE E BẸHẸN LẸ

  • Gblọndo Jobu tọn (1-22)

    • “Homẹmiọnnamẹtọ he nọ hẹn awusinyẹn wá wẹ mì!” (2)

    • E dọ dọ Jiwheyẹwhe ko magbe nado diọnukunsọ emi (12)

16  Jobu sọ gblọn dọmọ:   “Yẹn ko sè onú ehelẹ nkọ susu wayi. Homẹmiọnnamẹtọ he nọ hẹn awusinyẹn wá namẹ lẹ wẹ mìmẹpo!+   Be ohó fúsa* didọ na doalọte ya? Etẹwẹ hẹn mì nado gblọnhona mi dole?   Yẹnlọsu sọgan dọho dile mìwlẹ wà do. Eyin mìwlẹ ko tin to otẹn ṣie mẹ wẹ,* Yẹnlọsu sọgan ko yí hogbe linlẹndiọnamẹ tọn lẹ zan sọta mì Bo mimí ota hlan mì.+   Ṣigba, kakatimọ yẹn na yí ohó onù ṣie mẹ tọn lẹ do hẹn mì lodo, Podọ homẹmimiọn nùflo ṣie lẹ tọn na hẹn kọgbọ wá.+   Eyin yẹn dọho, awufiẹsa ṣie ma nọ doalọte,+ Eyin yẹn masọ dọho, nawẹ awufiẹsa ṣie na depò sọ?   Ṣigba, ewọ ko hẹn mi yin madogánnọ todin;+ E ko và whédo ṣie* pete sudo.   Alọ towe ko jẹ go e, bọ enẹ ko lẹzun kunnudenu de, Sọmọ bọ gohúhú ṣie fọ́n bo to kunnude to nukọn ṣie.   Homẹgble etọn ko gbà mi hányán, bọ ewọ hẹn mi do homẹ.+ Ewọ nọ dù adúkúnkún do go e. Kẹntọ ṣie nọ yí nukun etọn lẹ do sọnú mi.+ 10  Yé ko kẹ̀ onù yetọn lẹ pete nado hù mi sudo,+ Bo ko sọ gbọn vlẹko dali hò alaka na mi; Yé doawhàn do bẹ yede pli do ji e.+ 11  Jiwheyẹwhe jo mi do alọ jọja sunnu lẹ tọn mẹ, Bosọ tùn mi dlan alọ mẹylankan lẹ tọn mẹ.+ 12  Blẹo mẹ wẹ yẹn te dai, ṣigba ewọ gbà mi hányán;+ E hẹn mi sọn kọ̀godo bosọ gbidi mi; E sọ magbe nado diọnukunsọ mi. 13  Ogádetọ etọn lẹ lẹdo mi pé;+ Ewọ nọ sọnú ayi ṣie lẹ+ bo ma tlẹ nọ do awuvẹmẹ depope hia; E sọ kọ̀n vivẹ́ he to homẹ na mi do aigba. 14  Ewọ nọ tọ́n odò de-to-deji do go e taidi do adó de go; E nọ dlí do ji e taidi awhànfuntọ de. 15  Yẹn ko tọ̀ odẹ́vọ̀ nado sọgan ṣinyọnavọ̀na ayú ṣie,+ Podọ yẹn ko dì yẹyi* he yẹn tindo do kọ́gudu mẹ.+ 16  Nukun ṣie lẹ ko bia na avi wutu,+ Podọ oyẹ̀ daho* de tin to nukundama ṣie lẹ ji, 17  Mahopọnna dọ yẹn ma doalọ to danuwiwa mẹ Bọ odẹ̀ ṣie sọ yin wiwe. 18  Aigba E, a ṣinyọnnudo ohùn ṣie blo!+ Podọ a dike gbọjẹtẹn de tin na awhágbe ṣie blo! 19  To alọnu din, kunnudetọ ṣie tin to olọn mẹ; Mẹhe sọgan dekunnuna mi tin to oji aga. 20  Hagbẹ ṣie lẹ nọ ṣàn mi kò+ Dile nukun ṣie lẹ to dasin kùn* to Jiwheyẹwhe nukọn.+ 21  Na mẹde ni dawhẹ to gbẹtọ po Jiwheyẹwhe po ṣẹnṣẹn, Dile e nọ yin wiwà do to gbẹtọ de po hatọ etọn po ṣẹnṣẹn.+ 22  Na owhe he ja lẹ masọ sù ba, Yẹn nasọ gbọn aliho he ji yè ma nọ lẹkọ sọn lọ yì.+

Nudọnamẹ Odò Tọn

Kavi “ohó glòlò-jijlá tọn.”
Kavi “Eyin alindọn mìtọn ko tin to alindọn ṣie tẹnmẹ wẹ.”
Kavi “và mẹhe pli hẹ mi lẹ.”
Kavi “huhlọn.” To paa mẹ, “azò.”
Kavi “oyẹ̀ okú tọn.”
Kavi vlavo, “to nupọn ma samlọngọ.”