Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jobu 10:1-22

NUHE E BẸHẸN LẸ

  • Gblọndo Jobu tọn zindonukọn (1-22)

    • ‘Naegbọn Jiwheyẹwhe do to ahidi hẹ mi?’ (2)

    • Jiwheyẹwhe ma yin gbẹtọ tata di Jobu (4-12)

    • ‘Na yẹn ni mọ kọgbọ vude’ (20)

10  “Ogbẹ̀* ṣie hiọawu na mi.+ Yẹn na túntún lewuwu ṣie jẹgbonu. Yẹn na dọho to ayimajai sinsinyẹn ṣie* mẹ!   Yẹn na dọna Jiwheyẹwhe dọmọ: ‘A do mi hia di whẹhutọ blo. Dọ nuhewutu hiẹ do to ahidi hẹ mi na mi.   Be ale de to e mẹ na we nado gbidikọnamẹ, Nado gbẹkọ azọ́n alọ towe tọn go+ Bo ka yí nukundagbe do pọ́n ayinamẹ mẹylankan lẹ tọn wẹ ya?   Be nukun gbẹtọ tọn lẹ wẹ hiẹ tindo ya, Kavi be hiẹ nọ mọnú di gbẹtọ tata lẹ wẹ ya?   Be azán towe lẹ ka taidi azán gbẹtọ tata tọn lẹ wẹ, Kavi owhe towe lẹ taidi gbẹtọ de tọn wẹ,+   Bọ hiẹ nado to nuṣiwa ṣie dín Bo nasọ to ylando ṣie dín mapote ya?+   Hiẹ yọnẹn dọ yẹn ma hùwhẹ;+ Podọ mẹdepope ma sọgan whlẹn mi sọn alọ towe mẹ.+   Alọ towe titi wẹ wleawuna mi bosọ basi mi,+ Ṣigba, todin hiẹ jlo na hù mi sudo pete.   Jaale, flindọ okọ́ mẹ wẹ hiẹ de mi sọn,+ Ṣigba, todin hiẹ hẹn mi gọ̀ do kọ́gudu mẹ.+  10  Be e ma yin hiẹ wẹ kọ̀n mi jẹgbonu di anọ́sin Bosọ hò mi nado sinyẹn di anọ́sin mimlin ya?  11  Ayú po agbasalan po wẹ hiẹ yí do ṣinyọnavọ̀na mi, Bosọ yí ohú po agbasakàn lẹ po do lọ̀n mi dopọ.+  12  Hiẹ ko na mi ogbẹ̀ po owanyi nugbo po; Bo ko sọ yí nukunpedomẹgo towe do basi hihọ́na gbigbọ* ṣie.+  13  Ṣigba, hiẹ ko to linlẹn to nuglọ nado wà onú ehelẹ.* Yẹn yọnẹn dọ dè we wẹ onú ehelẹ wá sọn.  14  Eyin yẹn ko waylando janwẹ, hiẹ na ko mọ mi,+ Bo ma na jo nuṣiwa ṣie lẹ na mi.  15  Eyin yẹn hùwhẹ, be dindọn wẹ na mi! Podọ eyin yẹn tlẹ yin homẹvọnọ, yẹn ma sọgan ze ota ṣie daga,+ Na yẹn ko duwinyan bosọ to yaji.+  16  Eyin yẹn ze ota ṣie daga, hiẹ nọ yangbé ṣie taidi kinnikinni de+ Bo nọ do huhlọn towe hia sọta mi whladopo dogọ.  17  Hiẹ hẹn kunnudetọ yọyọ lẹ wá sọta mi Bo hẹn homẹgble towe sinyẹn deji sọta mi, Bọ awusinyẹn de-to-deji nọ to wiwá ji e.  18  Enẹwutu, naegbọn hiẹ do hẹn mi jẹgbonu sọn adọ̀mẹ?+ E na ko pọnte dọ yẹn ni kú whẹpo nukun depope nido mọ mi.  19  E na ko taidi dọ yẹn ma wá ogbẹ̀ pọ́n wẹ nkọ; Sọn adọ̀mẹ, yẹn na ko yin zize yì yọdò mẹ tlọlọ.’  20  Be e ma yin vude poun wẹ azán ṣie lẹ ya?+ Gbọ ewọ ni jo mi do bo; Gbọ ewọ ni lẹ́ nukun etọn lẹ sọn ji e, na yẹn nido mọ kọgbọ* vude+ 21  Whẹpo do yì—bo ma na lẹkọwa ba+ Yèdọ yì aigba zinvlu gọ́ngọ́n tọn ji,*+ 22  Yì aigba he dózin petepete lọ ji, Yèdọ aigba zinvlu titli po bẹwlu po tọn, Fihe hinhọ́n lọsu nọ dózin te.”

Nudọnamẹ Odò Tọn

Kavi “Alindọn.”
Kavi “to awufiẹsa alindọn ṣie tọn.”
Kavi “gbọfufu; ogbẹ̀.”
To paa mẹ, “Podọ hiẹ ko whlá onú ehelẹ do ahun towe mẹ.”
Kavi “ayajẹ.”
Kavi “yì zinvlu po oyẹ̀ okú tọn po mẹ.”